aJuge
13 Azo ti Israël akiri asara ye so ayeke sioni na lê ti Jéhovah,+ na Jéhovah azia ala na maboko ti aPhilistin+ ngu 40.
2 Na yâ ti angoi ni so, na kodro ti Zorah,+ mbeni koli ti mara ti Dan+ ayeke dä so iri ti lo ayeke Manoah.+ Wali ti lo adü pëpe, na lo yeke na molenge pëpe.+ 3 A si na mbeni ngoi, ange ti Jéhovah asi na wali ni, na lo tene na lo: “Bâ, mo dü pëpe, nga mo yeke na molenge pëpe. Me mo yeke mû ande ngo na mo yeke dü molenge-koli.+ 4 Ti fadeso, sara hange si mo nyon vin wala mbeni sämba nde pëpe,+ nga mo te pëpe mbeni ye so aga sioni awe.+ 5 Mo yeke mû ngo na mo yeke dü molenge-koli; rasoir adoit ti ndu li ti lo pëpe,+ ndali ti so ti londo na ngoi so a dü lo, lo yeke duti ande mbeni Naziréen ndali ti Nzapa; na lo la lo yeke sö azo ti Israël na maboko ti aPhilistin.”+
6 Wali ni ague lo tene na koli ti lo: “Mbeni zo ti tâ Nzapa asi na mbi, lo kpa mbeni ange ti tâ Nzapa, nga bango lo apika bê ti zo mingi. Mbi hunda pëpe ndo so lo londo dä si lo ga, nga lo fa na mbi iri ti lo pëpe.+ 7 Me koli ni atene na mbi: ‘Mo yeke mû ngo na mo yeke dü molenge-koli. Ti fadeso, sara hange si mo nyon vin wala mbeni sämba nde pëpe, nga mo te pëpe mbeni ye so aga sioni awe, ndali ti so ti londo na ngoi so a dü molenge ni* juska na lâ ti kuâ ti lo, lo yeke duti ande mbeni Naziréen ndali ti Nzapa.’”
8 Manoah atoto na Jéhovah, atene: “Pardon Jéhovah, sara si zo ti tâ Nzapa so mo tokua lo fade akiri aga, si lo fa na e ye so e doit ti sara ndali ti molenge ni so e yeke dü ande lo so.” 9 Tongaso, tâ Nzapa amä Manoah, na ange ti tâ Nzapa akiri aga na wali ni na ngoi so lo duti na yâ ti yaka; koli ti lo Manoah ayeke na terê ti lo pëpe. 10 Wali ni amû loro hio atene na koli ti lo: “Koli so asi na mbi lani so akiri aga.”+
11 Manoah alondo, lo na wali ti lo ague. Lo gue na ndo so koli ni ayeke dä, na lo tene na lo: “Mo la mo sara tënë lani na wali ti mbi so?” Koli ni atene: “En, a yeke mbi.” 12 Manoah atene: “Zia si ye ni asi tongana ti so mo tene. Gigi ti molenge ni ayeke duti ande tongana nyen? Nga kua ti nyen la lo yeke sara ande?”+ 13 Tongaso, ange ti Jéhovah atene na Manoah: “A yeke nzoni wali ti mo akpe ti ndu aye so mbi fa ni na lo.+ 14 A yeke nzoni lo te pëpe ye kue so a sara na lê ti vigne, lo nyon vin wala mbeni sämba nde pëpe+ nga lo te pëpe mbeni ye so aga sioni awe.+ Ye kue so mbi hunda na lo ti sara so la lo doit ti sara gï ni.”
15 Fadeso, Manoah atene na ange ti Jéhovah: “Pardon mo ngbâ ge, zia e mû mbeni ngasa so ade ti kono kue pëpe ti leke kobe na mo.”+ 16 Me ange ti Jéhovah atene na Manoah: “Tongana mbi ngbâ, mbi yeke te ande kobe ti mo pëpe; me tongana mo ye ti yâa na Jéhovah mbeni sandaga so a zö ni agbi kue, mo peut ti yâa ni senge.” Andâ Manoah ahinga pëpe so ange ti Jéhovah la. 17 Manoah ahunda ange ti Jéhovah, atene: “Iri ti mo ayeke zo wa,+ si e lingbi ti gonda mo na ngoi so ye so mo sara tënë ni asi?” 18 Ye oko, ange ti Jéhovah atene na lo: “Mo ye ti hinga iri ti mbi ngbanga ti nyen? Iri ti mbi ayeke mbeni ye so apika bê mingi.”
19 Manoah amû ngasa ni nga na sandaga ti lê ti kobe, lo mû na sandaga na Jéhovah na ndö ti kota tênë. Na ngoi so Manoah na wali ti lo ayeke bâ ndo, Nzapa asara mbeni ye ti kpene. 20 Na ngoi so lê ti wâ ni ayeke monté na yayu, ange ti Jéhovah amonté na yâ ti lê ti wâ ti gbalaka ni so ayeke za so; andâ Manoah na wali ti lo ayeke bâ ni. Hio tongaso, ala kuku ala kpo li ti ala na sese. 21 Ange ti Jéhovah asi na Manoah na wali ti lo encore ape. Ge la Manoah ahinga so ange ti Jéhovah la.+ 22 Manoah atene na wali ti lo: “E yeke kui, ndali ti so a yeke Nzapa la e bâ lo so.”+ 23 Me wali ti lo atene na lo: “Tongana fade Jéhovah aye ti fâ e, ka lo yeke yeda pëpe na sandaga so e zö ni na lo si agbi kue+ nga na sandaga ti lê ti kobe so e mû na lo; ka lo yeke fa aye so kue na e pëpe nga lo yeke sara tënë ti aye so na e pëpe.”
24 Na pekoni, wali ni adü molenge-koli, na ala zia iri ti lo Samson;+ na ngoi so molenge ni ayeke kono, Jéhovah angbâ ti sara tufa na ndö ti lo. 25 A si na mbeni ngoi, yingo ti Jéhovah akomanse ti pusu lo ti sara ye+ na kodro ti Mahanéh-Dan,+ so ayeke na popo ti Zorah na Eshtaol.+