Josué
9 Na ngoi so agbia kue so ayeke na mbage ti ouest ti Ngu ti Jourdain+ amä tënë ti ye so asi so, ala so ayeke na ando so ahoto ayeke dä, na Séphélah, na terê ti Kota Ngu-ingo,*+ ala so abâ ndo lê na lê na Liban: azo ti mara ti Heth, azo ti mara ti Amori, azo ti Canaan, azo ti Périzzi, azo ti Hévi nga na azo ti mara ti Jébus,+ 2 ala bungbi ala mä terê ti tiri bira na Josué nga na azo ti Israël.+
3 Azo ti Gabaon+ nga kue amä tënë ti ye so Josué asara na Jéricho+ nga na Aï.+ 4 Tongaso, ala sara ye na mayele, ala mû akobe ti tengo ni ala zia ni na yâ ti agbagbara bozo na ala zia ni na ndö ti akororo, ala mû nga agbagbara bozo ti vin so a sara ni na poro ti nyama so akôro awe si ala fü terê ni fungo, 5 ala yü agbagbara pâpä so ala fü terê ni fungo nga na agbagbara bongo. Amapa kue so ala mû ni ti te na lege ahule nga yâ ni afâ kete kete. 6 Ala gue awara Josué na camp so ayeke na Guilgal,+ na ala tene na lo nga na amokonzi ti azo ti Israël, ala tene: “E londo na mbeni yongoro kodro la e ga ge so. Fadeso e ye si ala te mbele na e.” 7 Me amokonzi ti bungbi ti azo ti Israël ni atene na azo ti Hévi ni atene:+ “Hinga ape ala lango nduru na terê ti e ge. E yeke te mbele na ala tongana nyen?”+ 8 Ala tene na Josué: “E yeke azo ti kua* ti mo.”
Josué ahunda ala, atene: “Ala yeke azo wa? Ala londo na ndo wa?” 9 Ala tene na lo: “E azo ti kua ti mo e londo na mbeni yongoro kodro si e ga so.+ E ga ndali ti iri ti Jéhovah Nzapa ti mo, ngbanga ti so e mä sango ti lo nga tënë ti aye kue so lo sara lani na kodro ti Égypte,+ 10 nga tënë ti aye kue so lo sara na agbia use ti azo ti mara ti Amori so ayeke na mbage* ti Ngu ti Jourdain, Sihon+ gbia ti Hesbon na Og+ gbia ti Basan so lo yeke na Ashtaroth. 11 Tongaso, a-ancien ti e nga na azo ti kodro ti e kue atene na e, atene: ‘Ala mû akobe ti tengo ni na lege na ala gue ala tingbi na ala. Ala tene na ala: “E ye ti ga azo ti kua ti ala.+ Pardon ala te mbele na e.”’+ 12 Mapa so e mû ti te na lege angbâ lani wâ na lango so e londo na yanga-da ti e ti ga. Me ala bâ ni fadeso a hule nga a fâ kete kete.+ 13 Abozo ti poro ti nyama so e zia vin na yâ ni angbâ lani fini, me bâ fadeso a kôro awe.+ Abongo ti e nga na apâpä ti e aga gbagbara ni gï ndali ti yongoro lege ni.”
14 Na ndö ti tënë so ala tene so, amokonzi ti bungbi ti azo ti Israël ni amû ambeni kobe ni so,* me ala hunda Jéhovah na ndö ni pëpe.+ 15 Tongaso, Josué ayeda ti sara siriri na ala+ na lo te mbele na ala si a zia ala ngbâ na fini, ndani la amokonzi ti bungbi ti azo ni adeba yanga ti ala na ala.+
16 Lango ota na peko ti so ala te mbele na ala, ala mä so azo ni so alango nduru na terê ti ala ge, ala yo na ala pëpe. 17 Tongaso, azo ti Israël alondo, ala tambela ala si na kodro ti azo ni so na ota lango ni. Kodro ti ala ni ayeke Gabaon,+ Képhirah, Béeroth na Kiriath-Jéarim.+ 18 Me azo ti Israël asara bira na ala pëpe, ngbanga ti so amokonzi ti bungbi ti azo ni adeba yanga na ala na iri ti Jéhovah+ Nzapa ti Israël awe. Tongaso, azo ni kue akomanse ti diko tënë na terê ti amokonzi ni. 19 Na amokonzi ni atene na bungbi ti azo ni kue, atene: “So e deba yanga ti e fade na ala na iri ti Jéhovah Nzapa ti Israël awe so, e lingbi ti sara sioni na ala pëpe. 20 Bâ ye so e yeke sara la: E yeke zia ala ngbâ na fini, si bê ti Nzapa ason na terê ti e pëpe ndali ti so e deba yanga ti e fade na ala.”+ 21 Amokonzi ni akiri atene: “E zia ala ngbâ na fini me ala yeke ga azo ti rongo keke ti wâ nga na azo ti tongo ngu ndali ti bungbi ti azo ni kue.” Tënë so amokonzi ni atene na ala la.
22 Josué airi ala na lo tene na ala, lo tene: “Ngbanga ti nyen la ala handa e ala tene: ‘E londo na mbeni yongoro ndo la e ga ge so?’ andâ ti tâ tënë ni ala yeke gï nduru na terê ti e ge?+ 23 Ti londo na lango ti laso a deba ala awe,+ ala yeke duti lakue gï angbâa na ala yeke sara kua tongana azo ti rongo keke ti wâ nga azo ti tongo ngu ndali ti da ti Nzapa ti mbi.” 24 Me ala tene na Josué: “A yeke ndali ti so a tene polele na e, azo ti kua ti mo, a tene so Jéhovah Nzapa ti mo amû yanga lani na Moïse, wakua ti lo, ti mû akodro kue ti mû na ala nga ti futi azo ti kodro ni so kue na devant ti ala.+ Tongaso, mbeto ti fini* ti e asara e ndali ti ala,+ ni la e sara ye tongaso so.+ 25 E la na maboko ti mo so, mo sara na e ye so mo bâ ayeke nzoni na lê ti mo.” 26 Ye so Josué asara na ala ayeke so: lo sö ala na maboko ti azo ti Israël na a fâ ala pëpe. 27 Me ti londo na lango ni so, Josué asara si ala ga azo ti rongo keke ti wâ nga azo ti tongo ngu ndali ti bungbi ti azo ni,+ nga ndali ti gbalaka ti Jéhovah na ndo kue so Nzapa ayeke soro,+ na ala ngbâ ti sara akua so juska laso.+