Lévitique
17 Jéhovah akiri atene na Moïse, atene: 2 “Tene na Aaron, na amolenge ti lo nga na azo ti Israël kue, mo tene: ‘Jéhovah amû yanga, atene:
3 “‘“Tongana mbeni zo ti Israël afâ koli-bagara, koli-taba wala ngasa na yâ ti camp ni wala na gigi ti camp ni, 4 me lo ga na ni pëpe na yanga ti tente ti bungbi ti mû na sandaga na Jéhovah na devant ti tabernacle ti Jéhovah, ngbanga ti mênë ayeke na li ti zo ni. Lo tuku mênë awe, ala fâ lo. 5 Tongaso si azo ti Israël afâ anyama ti ala ti sandaga na yâ ti ngonda encore ape, me ala yeke ga ande na ni na Jéhovah na yanga ti tente ti bungbi, ala mû ni na prêtre. Ala yeke mû anyama ti ala so na sandaga na Jéhovah tongana asandaga ti beoko.+ 6 Prêtre ni ayeke fi mênë ni na ndö ti gbalaka ti Jéhovah so ayeke na yanga ti tente ti bungbi, na lo yeke zö mafuta ni na ndö ti gbalaka tongana sandaga so fion ni afun nzoni na hôn ti Jéhovah.*+ 7 Tongaso si ala mû asandaga encore ape na asioni yingo so akpa angasa*+ so ala yeke sara ndumba na ala.+ Mbela so ayeke ngbâ aninga teti ala nga na ahale ti ala na yâ ti angoi nde nde so ayeke ga.”’
8 “Mo tene na ala, mo tene: ‘Tongana mbeni zo ti Israël wala mbeni wande so asara kodro na popo ti ala amû sandaga so a zö ni agbi kue wala mbeni sandaga nde, 9 me lo ga na ni pëpe na yanga ti tente ti bungbi ti mû ni na Jéhovah, ala fâ zo ni so.+
10 “‘Tongana mbeni zo ti Israël wala mbeni wande so asara kodro na popo ti ala ate mênë, atâa mara ti mênë wa,+ mbi yeke ke zo ni so ate mênë so, na mbi yeke fâ lo. 11 Fini* ti ye kue so ayeke na nyama ti terê ayeke na yâ ti mênë,+ na mbi la mbi mû yanga ti tene a zia mênë na ndö ti gbalaka+ ti sara si a zi siokpari ti ala,* ndali ti so mênë ni la asara si a zi siokpari ti zo+ na lege ti fini* so ayeke na yâ ni. 12 Ndani la mbi tene na azo ti Israël, mbi tene: “Mbeni zo* na popo ti ala adoit ti te mênë pëpe,+ atâa a yeke ala wala wande so asara kodro na popo ti ala.”+
13 “‘Tongana mbeni zo ti Israël wala mbeni wande so asara kodro na popo ti ala agi nyama na lo gbu nyama ti ngonda wala ndeke so ayeke ti tengo ni, a lingbi lo tuku mênë ni,+ lo fû sese na ndö ni. 14 Fini* ti ye kue so ayeke na nyama ti terê ayeke mênë ti lo, ndali ti so fini* ayeke na yâ ni. Ni la mbi tene na azo ti Israël, mbi tene: “Aye kue so ayeke na nyama ti terê, ala te mênë ti ala pëpe, ndali ti so fini* ti ala ayeke mênë ti ala. Zo so ate mênë, ala fâ lo.”+ 15 Tongana mbeni zo* ate nyama so akui awe wala nyama so nyama ti ngonda asuru yâ ti lo,+ atâa a yeke zo ti Israël wala wande, lo yeke sukula bongo ti lo na lo sukula ngu, me lo ga sioni juska na lakui;+ na pekoni lo yeke ga nzoni. 16 Me tongana lo sukula bongo ni pëpe na lo sukula ngu* pëpe, lo yeke kiri ande tënë ndali ti faute ti lo.’”+