2 aGbia

24 Na ngoi ti komandema ti Jéhoïakim, Nébucadnezzar+ gbia ti Babylone aga asara bira na lo, na pekoni Jéhoïakim aga wakua ti lo teti ngu ota. Me lo londo ti ke gbia ti Babylone na lo sara kpengba-li na lo. 2 Jéhovah akomanse ti tokua na terê ti lo azo ti kodro ti Chaldée,+ ti Syrie, ti Moab nga na ti Ammon so ayeke gbu ka aye ti azo na ngangu. Lo ngbâ ti tokua ala na terê ti kodro ti Juda ti futi ni, a lingbi na tënë ti Jéhovah+ so awakua ti lo aprophète afa peko ni. 3 Jéhovah la amû yanga si ye so asi na azo ti kodro ti Juda, ti tene lo zi ala na lê ti lo+ ndali ti siokpari kue so Manassé asara ni,+ 4 nga ndali ti mênë ti azo so lo tuku ni senge senge.+ Lo sara si yâ ti Jérusalem kue asi na mênë ti azo so tënë ayeke na li ti ala pëpe, na Jéhovah aye ti pardonné ni pëpe.+

5 Âdu ti tanga ti mbaï ti Jéhoïakim, tënë ti aye kue so lo sara, eskê a sû ni na yâ ti mbeti ti mbaï ti agbia ti Juda ape?+ 6 Jéhoïakim akui, na lo wu terê ti lo tongana ti akotara ti lo.+ Molenge ti lo Jéhoïakin aga gbia na peko ti lo.

7 Gbia ti Égypte akiri atokua aturugu ti lo ti gue ti sara bira pëpe, ndali ti so gbia ti Babylone amû ando kue so ayeke ti gbia ti Égypte,+ a londo na Popo-hoto* ti Égypte+ juska na Ngu ti Euphrate.+

8 Jéhoïakin+ ayeke na ngu 18 na ngoi so lo ga gbia, na lo komande na Jérusalem nze ota.+ Iri ti mama ti lo ayeke Néhushta molenge ti Elnathan, zo ti Jérusalem. 9 Lo ngbâ ti sara ye so ayeke sioni na lê ti Jéhovah. Lo sara a-oko ye ti sioni kue so babâ ti lo asara. 10 Na ngoi ni so, awakua ti Nébucadnezzar, gbia ti Babylone, aga ti sara bira na Jérusalem, na ala sara camp ti ala na terê ti gbata ni.+ 11 Nébucadnezzar, gbia ti Babylone, aga na gbata ti Jérusalem na ngoi so awakua ti lo angbâ ti gi ti mû ni.

12 Jéhoïakin, gbia ti Juda, asigi ague na mbage ti gbia ti Babylone,+ lo, mama ti lo, awakua ti lo, amokonzi ti lo nga na akota zo ti yangbo ti lo.+ Na yâ ti ngu miombe ni ti komandema ti gbia ti Babylone, lo gbu Jéhoïakin na ngbâa.+ 13 Na pekoni, lo mû amosoro kue so ayeke na yâ ti ando ti batango mosoro ti da ti Jéhovah nga na ti da*+ ti gbia. Akungba ti lor so Salomon gbia ti Israël asara lani ndali ti temple ti Jéhovah, lo fâ yâ ni kue kete kete. Ye ni asi tâ gï tongana ti so Jéhovah+ afa tënë ni kozo. 14 Lo gbu azo ti Jérusalem kue lo gue na ala na Babylone: amokonzi+ kue, angangu turugu kue, azo so ahinga ti sara akua ti maboko nga na azo ti kua ti ndao.*+ Wungo ti ala kue ayeke 10 000. Lo zia zo oko pëpe, gï awayere la angbâ.+ 15 A yeke tongaso si lo gbu Jéhoïakin+ lo gue na lo na Babylone.+ Lo gbu nga mama ti gbia, awali ti gbia, akota zo ti yangbo ti lo nga na akota zo ti kodro ni kue. Lo gbu ala kue na Jérusalem lo gue na ala na Babylone. 16 Gbia ti Babylone agbu nga akpengba turugu kue, so wungo ti ala ayeke 7 000, nga na azo so ahinga ti sara kua ti maboko nzoni nga azo ti kua ti ndao,* so wungo ti ala ayeke 1 000. Ala kue ayeke akpengba koli so a leke ala nzoni ti sara bira. 17 Gbia ti Babylone azia Mattaniah, babâ kete ti Jéhoïakin,+ gbia na place ti lo, na lo changé iri ti lo ti ga Sédécias.+

18 Sédécias ayeke na ngu 21 na ngoi so lo ga gbia, na lo komande na Jérusalem ngu 11. Iri ti mama ti lo ayeke Hamutal+ molenge ti Jérémie, zo ti kodro ti Libnah. 19 Lo ngbâ ti sara ye so ayeke sioni na lê ti Jéhovah. Lo sara a-oko sioni ye kue so Jéhoïakim asara.+ 20 Aye so kue asi na Jérusalem nga na Juda ndali ti ngonzo so agbu Jéhovah, juska lo zi ala na lê ti lo.+ Sédécias asara kpengba-li na terê ti gbia ti Babylone.+