Jérémie
19 Bâ tënë so Jéhovah atene la: “Mo gue na ndo ti zo ti lekengo ta ti sese, mo vo mbeni ta ti sese.+ Mo mû na terê ti mo ambeni ancien ti azo ti kodro ni nga na ambeni ancien na popo ti aprêtre, 2 na pekoni mo sigi na mbage so ague na Popo-hoto ti Molenge ti Hinnom,+ na yanga ti gbagba so a iri ni Yanga-ti-gbagba-ti-zo-ti-lekengo-ta-ti-sese. Kâ, mo to mbela na atënë so mbi yeke tene na mo. 3 Mo tene: ‘Ala, agbia ti Juda nga na azo ti kodro ti Jérusalem, ala mä tënë ti Jéhovah. Bâ tënë so Jéhovah ti aturugu, Nzapa ti Israël, atene la:
“‘“Mbi yeke nduru ti ga na ye ti vundu na ndo so, zo kue so amä tënë ni so, tënë ni ayeke son yâ ti mê ti lo. 4 A yeke ndali ti so ala dö mbi azia,+ na ala sara si ndo so aga mbeni ndo so zo alingbi ti hinga ni encore ape.+ Na ndo so, ala yeke mû asandaga na ambeni nzapa nde, anzapa so ala wani ahinga ni pëpe, akotara ti ala ahinga ni pëpe na agbia ti Juda nga ahinga ni pëpe. Ala sara si ndo so asi singo na mênë ti azo so tënë ayeke na li ti ala pëpe.+ 5 Ala leke ambeni ndo na nduzu ndali ti Baal, ti gbi amolenge ti ala na sandaga na Baal dä,+ mbeni ye so mbi mû yanga na ala ti sara ni pëpe, wala mbi sara tënë na ndö ni na ala pëpe nga bê ti mbi atï même na ndö ti ye tongaso lâ oko pëpe.”’+
6 “‘Jéhovah atene: “Ndali ti tënë so, bâ, ngoi ayeke ga, so a yeke iri ande ndo so Topheth encore ape wala Popo-hoto ti Molenge ti Hinnom encore ape, me a yeke iri ni Popo-hoto ti Fango gbâ ti azo.+ 7 Mbi yeke kanga lege na ye so azo ti Juda nga na azo ti Jérusalem aleke ti sara na ndo so, na mbi yeke sara si awato ti ala afâ ala na épée, mbi yeke zia ala na maboko ti azo so ayeke gi lege ti fâ ala.* Mbi yeke mû kuâ ti ala ti ga kobe ti andeke ti nduzu nga na ti anyama ti ngonda.+ 8 Mbi yeke sara ande si gbata so aga mbeni ye so amû mbeto na zo nga azo ayeke hûru yanga ti ala ndali ni. Zo kue so ayeke hon na lege ayeke sara mbeto na ayeke hûru yanga ti lo ndali ti aye ti ngangu kue so asi na gbata so.+ 9 Mbi yeke sara ande si ala te nyama ti terê ti amolenge ti ala ti koli na ti amolenge ti ala ti wali, na ala te nyama ti terê ti amba ti ala; ngbanga ti so awato ti ala nga na azo so ayeke gi lege ti fâ ala* asara camp angoro ala kue, ye so asara si ala lingbi ti gue na mbeni ndo pëpe, na ala hinga ye so ala peut ti sara pëpe.”’+
10 “Na pekoni, mo bi ta ni na sese si yâ ni afâ na lê ti azo so mo na ala ague so, 11 na mo tene na ala: ‘Bâ tënë so Jéhovah ti aturugu atene la: “A yeke tongaso la mbi yeke fâ yâ ti azo so nga mbi yeke fâ yâ ti gbata so, tongana mbeni zo so afâ yâ ti ta ti sese si alingbi ti kiri ti leke ni encore ape. A yeke lu akuâ na Topheth juska ndo ti lungo ala ayeke duti dä encore ape.”’+
12 “Jéhovah atene: ‘Bâ ye so mbi yeke sara na gbata so nga na azo so ayeke sara kodro dä la, mbi yeke sara si gbata so aga tongana Topheth. 13 Ada ti Jérusalem nga na ada ti agbia ti Juda ayeke ga sioni tongana Topheth.+ Ngbanga ti so ala mû asandaga na li ti ada ni so ala yâa na aye kue so ayeke na yayu*+ nga ala yâa asandaga ti sämba na ambeni nzapa nde.’”+
14 Tongana Jérémie alondo na Topheth, ndo so Jéhovah atokua lo fade dä ti tene lo tene aprophétie ni si lo kiri awe, lo luti na yâ ti lacour ti da ti Jéhovah, lo tene na azo ni kue, lo tene: 15 “Bâ tënë so Jéhovah ti aturugu, Nzapa ti Israël atene la: ‘Bâ, mbi yeke ga na ye ti vundu na ndö ti gbata so, na ndö ti akete kodro kue so mbi tene aprophétie na ndö ni, ndali ti so azo ti ando ni so asara kpengba-li* na ala ke ti mä tënë ti mbi.’”+