Jérémie

33 Na ngoi so Jérémie ayeke na kanga na yâ ti Lacour-ti-agarde, Jéhovah akiri asara tënë na lo ti fani use ni,+ atene: 2 “Bâ tënë so Jéhovah, lo so asara sese, Jéhovah, lo so aleke ni si a luti nzoni, iri ti lo ayeke Jéhovah, lo tene: 3 ‘Mo iri mbi, na mbi yeke yeda na mo, mbi yeke fa na mo akota ye nga na aye so zo alingbi ti mä yâ ni pëpe, ye so mo de ti hinga ni pëpe.’”+

4 “Bâ tënë so Jéhovah, Nzapa ti Israël, atene na ndö ti ada ti yâ ti gbata so nga na ndö ti ada ti gbia ti Juda so a kungbi ni na sese ti kanga lege na awato so amonté sese aga koto angoro gbagba ti gbata ni kue, nga ti kanga lege na épée ti awato ni;+ 5 tënë so lo tene na ndö ti azo so aga ti sara bira na azo ti Chaldée, ala so ayeke sara gï ti tene ando so asi singo na akuâ ti azo so na yâ ti kota ngonzo ti mbi, mbi fâ ala, ala so sioni ti ala asara si mbi honde lê ti mbi na azo ti gbata so: 6 ‘Bâ, mbi yeke sara si gbata ni awara seni,+ mbi yeke sava azo ti kodro ni nga mbi yeke mû na ala gbâ ti siriri nga na tâ tënë.+ 7 Mbi yeke mû azo ti Juda nga na azo ti Israël so ayeke angbâa ti kiri na ala,+ mbi yeke leke ala na nduzu tongana ti so mbi sara na ala kozo.+ 8 Mbi yeke sukula ala ti zi ande tënë ti asiokpari kue so ayeke na li ti ala, asiokpari so ala sara ti ke mbi;+ mbi yeke pardonné ande tënë ti asiokpari kue so ayeke na li ti ala nga na asioni so ala sara na terê ti mbi.+ 9 Iri ti gbata so ayeke sara si mbi duti na ngia, na gbata ni ayeke ga mbeni ye so asara si a sepela mbi nga a mû gloire na mbi na gbele amara kue ti sese so ayeke mä ande tënë ti aye ti nzoni kue so mbi sara na ala.+ Mbeto ayeke sara amara ni so nga terê ti ala ayeke dö+ ndali ti gbâ ti aye ti nzoni nga na siriri so mbi yeke mû na gbata ni.’”+

10 “Bâ tënë so Jéhovah atene la: ‘Ndo so ala yeke tene ande atene, a yeke désert so, so zo wala nyama ayeke na yâ ni pëpe so, na yâ ti agbata ti Juda nga na ndö ti alege ti Jérusalem so mbeni zo wala azo ti kodro ni wala anyama ayeke dä pëpe so, a yeke kiri ti mä 11 dekongo ti ngia na ti nzerengo terê dä,+ go ti koli so amû wali fini fini nga go ti wali so amû koli fini fini, na go ti azo so ayeke dekongo, atene: “Ala kiri singila na Jéhovah ti aturugu, ndali ti so Jéhovah ayeke nzoni;+ tâ ndoye ti lo angbâ lakue lakue.”’+

“‘Ala yeke ga na asandaga ti kiringo singila na da ti Jéhovah,+ ndali ti so mbi yeke kiri na azo so ayeke angbâa na yâ ti kodro so tongana ti kozo’, tënë so Jéhovah atene la.”

12 “Bâ tënë so Jéhovah ti aturugu atene la: ‘Na yâ ti désert so, so zo wala nyama ayeke dä pëpe so, nga na yâ ti agbata ni kue, ando ti tengo pere ayeke kiri ti duti dä ndali ti aberger, ti tene ala zia si ataba ti ala awu terê ti ala dä.’+

13 “‘Na yâ ti agbata so ayeke na ando so ahoto ayeke dä, na yâ ti agbata so ayeke na kpangbala ndo, na yâ ti agbata ti mbage ti sud, na yâ ti kodro ti Benjamin, na ando so angoro Jérusalem+ nga na yâ ti agbata ti Juda,+ aberger ayeke kiri ti diko ataba ti ala dä,’ tënë so Jéhovah atene la.”

14 “Jéhovah atene: ‘Bâ, ngoi ayeke ga so mbi yeke sara ande si tënë ti zendo so mbi mû na azo ti mara ti Israël nga na azo ti mara ti Juda aga tâ tënë.+ 15 Na yâ ti angoi ni so, mbi yeke sara si mbeni kete keke*+ so ayeke mbilimbili asigi na yâ ti ahale ti David, na lo yeke fâ ngbanga ti mbilimbili nga lo yeke sara ye na lege ni na yâ ti kodro ni.+ 16 Na yâ ti angoi ni so, a yeke sö ande Juda,+ nga Jérusalem ayeke duti ande na siriri.+ Bâ iri so a yeke iri na lo ande la: Jéhovah ayeke mbilimbili ti e.’”+

17 “Ndali ti so Jéhovah atene: ‘Lakue mbeni hale ti David ayeke duti na ndö ti trône ti azo ti mara ti Israël,+ 18 nga na popo ti aprêtre ti mara ti Lévi, mbeni zo ayeke duti dä ti luti lakue na devant ti mbi ti tene lo yâa na mbi asandaga so a zö ni agbi kue, asandaga ti lê ti kobe so a zö ni agbi kue, nga na ambeni sandaga ni.’”

19 Jéhovah akiri atene na Jérémie: 20 “Bâ tënë so Jéhovah atene la: ‘Mbi te mbele ti tene na kota lâ, lâ asu nga na bï, ndo avuko. Tongana ala lingbi ti fâ yâ ti mbele ti mbi ti tene kota lâ aduti dä pëpe nga bï aduti dä pëpe,+ 21 si mbi lingbi ande ti fâ yâ ti mbele so mbi te lani na wakua ti mbi David,+ si lo wara pëpe mbeni hale ti komande tongana gbia na ndö ti trône ti lo.+ Tongana ala lingbi ti fâ yâ ti mbele ni so, si mbi lingbi nga ande ti fâ yâ ti mbele so mbi te na awakua ti mbi, aprêtre ti mara ti Lévi.+ 22 Gï tongana ti so zo alingbi pëpe ti diko wungo ti atongoro so ayeke na yayu, wala ti diko wungo ti mbutu ti ngu-ingo, tongaso nga mbi yeke sara ande si ahale ti wakua ti mbi David awu, mbi yeke sara nga si wungo ti azo ti mara ti Lévi, so ayeke sara kua na mbi, awu.’”

23 Jéhovah akiri atene na Jérémie: 24 “Mo bâ ye so azo so atene tënë ni so ape? Ala yeke tene: ‘Jéhovah ayeke ke ande azo ti asewa use so lo soro.’ Ala bâ azo ti mbi tongana asenge zo, ala bâ ala tongana mara na lê ti ala encore ape.

25 “Bâ tënë so Jéhovah atene la: ‘Tongana ti so mbi te mbele na kota lâ ti tene lâ asu, nga na bï ti tene ndo avuko,+ na mbi lu ndia ndali ti yayu nga ndali ti sese,+ 26 legeoko nga mbi yeke ke ahale* ti Jacob nga na ahale* ti David wakua ti mbi lâ oko pëpe, mbi yeke mû pëpe ambeni zo nde so ayeke pëpe na popo ti ahale ti David ti ga agbia na ndö ti ahale ti Abraham, ti Isaac na ti Jacob. Ndali ti so mbi yeke bungbi ande na ndo oko azo ti ala so ayeke angbâa+ na mbi yeke bâ mawa ti ala.’”+