Genèse

35 Na peko ti ye so, Nzapa atene na Jacob: “Londo, mo monté na Béthel;+ sara kodro kâ, na mo leke mbeni gbalaka kâ na tâ Nzapa so asi lani na mo na ngoi so mo yeke kpe ita ti mo Ésaü.”+

2 Tongaso, Jacob atene na azo ti da ti lo nga na azo ti lo kue: “Ala zi anzapa ti awande so ayeke na popo ti ala,+ ala zi sioni ye na terê ti ala, ala changé bongo ti ala, 3 na e londo e monté na Béthel. Mbi yeke leke mbeni gbalaka kâ na tâ Nzapa so akiri tënë na mbi na lâ ti vundu ti mbi nga na ndo kue* so mbi gue dä, lo zia mbi pëpe.”+ 4 Tongaso, ala mû na Jacob anzapa kue ti awande so ala yeke na ni nga na aye ti mê so ayeke na mê ti ala, na Jacob alu* ni na gbe ti kota keke so ayeke nduru na Sichem.

5 Tongana ala mû lege ala hon, Nzapa asara si mbeto ahon ndö ti azo ti agbata so angoro ala, na ala tomba peko ti amolenge ti Jacob pëpe. 6 Jacob ague ngbii lo si na Luz,+ wala Béthel, so ayeke na sese ti Canaan, lo na azo ti lo kue. 7 Lo leke mbeni gbalaka kâ na lo iri ndo ni El-Béthel,* ndali ti so a yeke kâ si tâ Nzapa afa terê ti lo na lo na ngoi so lo yeke kpe ita ti lo.+ 8 Na pekoni, Déborah,+ wali so abata Rébecca lani, akui; a lu lo nduru na Béthel na gbe ti mbeni keke ti chêne. Tongaso lo iri keke ni Allon-Bacuth.*

9 Nzapa akiri asi na Jacob na ngoi so lo londo na Paddan-Aram lo yeke ga, na lo iri tufa na ndö ti lo. 10 Nzapa atene na lo: “Iri ti mo ayeke Jacob.+ A yeke iri mo Jacob encore ape, me iri ti mo ayeke ga Israël.” Lo komanse ti iri lo Israël.+ 11 Nzapa akiri atene na lo: “Mbi yeke Nzapa so ngangu ti lo ahon angangu kue.+ Mo dü, mo ga gbani. Mo yeke ga babâ ti amara, amara so abungbi aga congrégation;+ nga, na lege ti mo, agbia ayeke bâ gigi.*+ 12 Âdu ti sese ni so mbi mû na Abraham nga na Isaac, mbi yeke mû ni na mo, na mbi yeke mû ni na ahale* ti mo.”+ 13 Nzapa azia lo na ndo so lo sara tënë na lo dä so, Nzapa ahon.

14 Tongaso, Jacob akpo mbeni pilier ti tênë na nduzu na ndo so Nzapa asara tënë na lo dä. Lo tuku sandaga ti sämba na ndö ni nga lo tuku mafuta na ndö ni.+ 15 Jacob angbâ ti iri ndo so Nzapa asara tënë na lo dä so Béthel.+

16 Na pekoni, ala londo na Béthel ala hon. Na ngoi so lege ti singo na Éphrath angbâ ti yo na ala, Rachel aye ti dü, me lo dü gbä. 17 Na ngoi so lo yeke tirika ti pusu molenge ni, matrone ni atene na lo: “Sara mbeto pëpe, ndali ti so mo kiri mo dü koli.”+ 18 Na ngoi so fini ti Rachel ayeke gue ti hunzi* (teti lo yeke gue ti kui), lo zia iri ti lo Ben-Oni,* me babâ ti lo airi lo Benjamin.*+ 19 Tongaso, Rachel akui na a lu lo na lege ti Éphrath, wala Bethléhem.+ 20 Jacob akpo mbeni pilier na ndö ti dû ti kuâ ti lo; pilier so ayeke pilier ti dû ti kuâ ti Rachel juska laso.

21 Na peko ti ye so, Israël alondo lo hon, na lo leke tente ti lo ayo kete na peko ti tour ti Éder. 22 Na ngoi so Israël ayeke sara kodro na sese ni, mbeni lâ, Ruben ague abungbi na Bilhah, mbeni wali ti babâ ti lo so ayeke na use ndo, na Israël amä tënë ni.+

Li ti amolenge ti Jacob ti koli ayeke 12. 23 Ala so Léa adü na Jacob ayeke: Ruben,+ kozo molenge, na pekoni Siméon, Lévi, Juda, Issacar na Zabulon. 24 Ala so Rachel adü ayeke Joseph na Benjamin. 25 Ala so Bilhah, zo ti kua ti Rachel, adü ayeke Dan na Nephtali. 26 Ala so Zilpah, zo ti kua ti Léa, adü ayeke Gad na Aser. Amolenge ti Jacob ti koli so a dü ala na lo na Paddan-Aram la.

27 Jacob ague ngbii lo si na ndo so babâ ti lo Isaac ayeke dä na Mamré,+ na sese ti Kiriath-Arba, wala Hébron, ndo so Abraham na Isaac nga asara kodro dä tongana awande.+ 28 Isaac awara ngu 180.+ 29 Na pekoni, Isaac awu tanga ti pupu ti lo na lo kui. Lo yeke mbakoro nga gigi ti lo anzere na lo;* lo wu terê ti lo tongana ti azo ti lo.* Amolenge ti lo Ésaü na Jacob alu lo.+