Michée
2 “Mawa na azo so aleke na bê ti ala ti sara ye ti sioni,
ala so apensé ti sara ye ti sioni na ngoi so ala ngbâ na ndö ti gbogbo ti ala.
Tongana ndo ahan awe, ala sara ye so ala leke na bê ti ala ti sara so,
ndali ti so ngangu ti sarango ni ayeke na maboko ti ala.+
2 Ala sara nzara ti ayaka ti azo na ala gbu ni na ngangu;+
ala sara nga nzara ti ada ti azo na ala mû ada ni.
Ala sara ye ti likisi ti mû da ti zo,+
ala mû ye so ayeke ti zo na lege ti likisi.
3 Ndani la, bâ tënë so Jéhovah atene:
‘Bâ, mbi yeke leke mbeni ye ti ngangu ti ga na ni na ndö ti azo so,+ ye ti ngangu so ala lingbi ande ti sigi na yâ ni pëpe.*+
Mo yeke tambela ande na fandara encore ape,+ ndali ti so a yeke ngoi ti ye ti ngangu.+
4 Na lango ni so, azo ayeke tene ande mbeni proverbe na ndö ti mo,
nga azo ni ayeke dema terê ngangu na ndö ti ala.+
Azo ni ayeke tene ande, atene: “A futi e biani biani awe!+
Lo sara si a mû mbage ti sese ti azo ti mara ti mbi a mû ni na ambeni zo nde, bâ tongana nyen la si lo zi ni na maboko ti e ma!+
Lo mû ayaka ti e lo mû na zo so ayeke voro lo pëpe.”
5 Ni la mo yeke wara ande pëpe mbeni zo ti gboto yâ ti kamba ti mungo na mesure ti ye,
ti fa sese so a yeke mû na azo na yâ ti bungbi ti azo ti Jéhovah.
6 Ala yeke fa tënë, atene: “Ala zia ti fa tënë!
Ala doit ti fa tënë ti aye so pëpe;
kamene ayeke gbu ande e ape!”
7 Azo ti Jacob, ala mä azo ayeke tene:
“Eskê yingo ti Jéhovah ni azia lege ti kangango bê ti lo ti ku awe?
Lo la lo sara aye tongaso?”
Atënë ti mbi ayeke ga na ye ti nzoni na azo so ayeke sara ye na lege ni, ni la ape?
8 Me ade ti ninga pëpe, azo ti mbi alondo tongana mbeni wato.
Ala zi apendere ye ti baba legeoko na* bongo
na terê ti azo so ayeke hon na lege sân mbeto, tongana ti azo so alondo na bira si ayeke kiri.
9 Ala tomba awali ti azo ti mbi na yâ ti ada ti ala so a nzere na ala ti lango na yâ ni so;
ala zi gloire ti mbi na terê ti amolenge ti awali ti azo ti mbi ala hon na ni biani biani.
10 Ala londo ala hon, ndo ti wungo terê ayeke ge pëpe.
Ngbanga ti so ala ga sioni awe,+ a yeke futi ala tâ na mbeni sioni futingo.+
11 Tongana mbeni zo atomba peko ti pupu nga na ti tënë ti handa si lo tene mvene, lo tene:
“Mbi yeke fa tënë na ala na ndö ti vin na sämba,”
mara ti zo tongaso la ayeke ga wafango tënë ti azo so!+
12 Jacob, biani mbi yeke bungbi ande azo ti mo kue.
Mbi yeke bungbi ande tanga ti azo ti Israël so angbâ so ndo oko.+
Mbi yeke zia ala sara beoko na popo ti ala, tongana ataba so ayeke na yâ ti gbagba ti ala,
nga tongana anyama so ayeke na ndo ti tengo pere ti ala;+
a yeke duti ande mbeni ndo so a yeke mä bruit ti gbâ ti azo dä.’+
13 Zo so asuru lege ayeke tambela ande na devant ti ala;
ala yeke suru lege ala lï na yanga ti gbagba ni na ala yeke sigi dä.+
Gbia ti ala ayeke hon na devant ti ala,
na Jéhovah la ayeke tambela na li ni.”+