Genèse
4 Adam abungbi na wali ti lo Ève, na Ève amû ngo.+ Na ngoi so lo dü Caïn,+ lo tene: “Mbi wara* molenge-koli ndali ti so Jéhovah amû maboko na mbi.” 2 Na pekoni, lo dü Abel,+ ita ti Caïn.
Abel aga zo ti batango nyama, me Caïn aga zo ti fango yaka. 3 A si na mbeni ngoi, Caïn aga na alengo ti kobe ti sese ni ti mû na sandaga na Jéhovah. 4 Me Abel aga na ambeni kozo molenge ti anyama ti lo+ ti mû na sandaga; lo mû mafuta ti ala nga. Jéhovah abâ Abel nga na sandaga ti lo na nzoni lê,+ 5 me lo bâ Caïn nga na sandaga ti lo na nzoni lê pëpe. Tongaso, ngonzo agbu Caïn mingi, nga vundu asara lo. 6 Jéhovah ahunda Caïn, atene: “Ngonzo ahon ndö ti mo tongaso ngbanga ti nyen? Nga vundu asara mo tongaso ngbanga ti nyen? 7 Tongana mo kiri mo sara ye ti nzoni, mbi yeke kiri ti bâ mo na nzoni lê ape?* Me tongana mo kiri mo sara ye ti nzoni pëpe, siokpari ayeke ku mo na yanga-da, nga lo ye gï ti hon ndö ti mo. Me mo, mo yeke hon ande lo na ngangu?”
8 Na peko ti ye so, Caïn atene na ita ti lo Abel: “E gue na ngonda.” Tongaso, na ngoi so ala yeke na yâ ti ngonda, Caïn apika ita ti lo Abel, lo fâ lo.+ 9 Na pekoni, Jéhovah ahunda Caïn, atene: “Ita ti mo Abel ayeke na ndo wa?” Lo tene: “Mbi hinga pëpe. Mbi la mbi yeke garde ti ita ti mbi ni?” 10 Nzapa atene: “Nyen la mo sara so? Bâ, mênë ti ita ti mo so ayeke na sese ayeke dekongo na mbi.+ 11 Ti fadeso, deba ayeke na li ti mo, nga a tomba mo na ndö ti sese ni awe, sese ni so azi yanga ti lo ti nyon mênë ti ita ti mo so mo fâ lo.+ 12 Tongana mo fâ yaka, sese ni ayeke lë na mo* pëpe. Mo yeke fono ande gï tongaso nga mo yeke kpe na ando nde nde na ndö ti sese si a gbu mo pëpe.” 13 Me Caïn atene na Jéhovah: “Punition ti faute ti mbi ni ane ahon ndö ti mbi. 14 Mo tomba mbi laso na ndö ti sese* ni awe, a yeke honde mbi si lê ti mo abâ mbi pëpe. Mbi yeke fono ande gï tongaso nga mbi yeke kpe na ando nde nde na ndö ti sese si a gbu mbi pëpe. Zo so awara mbi, lo yeke fâ gï mbi fango.” 15 Tongaso, Jéhovah atene na lo: “Ndani la, zo so afâ Caïn, a yeke kiri peko ni na lo lege mbasambala.”
Tongaso, Jéhovah azia mbeni fä ndali ti Caïn, si zo so awara lo apika lo afâ lo pëpe. 16 Na pekoni, Caïn ahon yongoro na lê ti Jéhovah, lo gue lo sara kodro na sese ti Nod,* na mbage ti est ti Éden.+
17 Na pekoni, Caïn abungbi na wali ti lo,+ wali ni amû ngo na lo dü Hénok. Caïn ato nda ti leke mbeni gbata, lo zia iri ti molenge ti lo Hénok na ndö ni. 18 A si na mbeni ngoi, Hénok adü Irad. Irad adü Méhujaël, Méhujaël adü Méthushaël, Méthushaël adü Lamek.
19 Lamek amû awali use. Iri ti kozo wali ni ayeke Adah na iri ti use ni ayeke Zillah. 20 Adah adü Jabal. Lo yeke kozo zo ti langongo na yâ ti atente si lo yeke bata na anyama. 21 Iri ti ita ti lo ti koli ayeke Jubal. Lo yeke kozo zo ti pikango harpe na ti hurungo flûte. 22 Zillah adü Tubal-Caïn, zo ti lekengo agbakuru nde nde kue ti cuivre na ti wen. Ita ti Tubal-Caïn ti wali ayeke Naamah. 23 Lamek aleke atënë so ndali ti awali ti lo Adah na Zillah:
“Ala mä go ti mbi, ala awali ti Lamek;
ala dengi mê ti mä tënë ti mbi:
Mbi fâ mbeni koli ndali ti so lo zia kä na terê ti mbi,
mbeni maseka-koli ndali ti so lo pika mbi.
24 Tongana a kiri fani 7 peko ti ye so a sara na Caïn,+
ti Lamek, a yeke fani 77.”
25 Adam akiri abungbi na wali ti lo, wali ni amû ngo na lo dü molenge ti koli. Lo zia iri ti lo Seth,*+ ndali ti so lo tene: “Nzapa azia na mbi mbeni molenge* na place ti Abel, teti Caïn afâ lo awe.”+ 26 Seth nga adü molenge ti koli, na lo zia iri ti lo Énosh.+ Na ngoi ni so, azo ato nda ti di iri ti Jéhovah.