2 Chronique

33 Manassé+ ayeke na ngu 12 na ngoi so lo ga gbia, lo komande na Jérusalem ngu 55.+

2 Lo sara ye so ayeke sioni na lê ti Jéhovah, lo mû peko ti asioni sarango ye ti amara so Jéhovah atomba ala lani na gbele azo ti Israël.+ 3 Lo kiri lo leke ando so ayeke na nduzu, so babâ ti lo Ézéchias akungbi ni lani.+ Lo leke agbalaka ndali ti aBaal nga lo leke ayongoro yanda,* lo kuku na gbe ti aye kue so ayeke na lê ti nduzu nga lo voro ni.+ 4 Lo leke nga agbalaka na yâ ti da ti Jéhovah,+ da so Jéhovah asara tënë ni, atene: “Iri ti mbi ayeke duti ande na Jérusalem lakue lakue.”+ 5 Na lê ti alacour use ti da ti Jéhovah, lo leke nga agbalaka ndali ti aye kue so ayeke na lê ti nduzu.+ 6 Lo gbi amolenge ti lo ti koli+ na yâ ti Popo-hoto ti Molenge ti Hinnom.+ Lo sara magie,+ lo sara mbadi, lo sara yorö nga lo zia na yâ ti kodro ni azo ti sarango tënë na yingo ti akuâ nga na azo ti fango aye so ayeke si ande na zo.+ Lo sara aye mingi so ayeke sioni na lê ti Jéhovah ti son bê ti lo.

7 Lo mû yanda so a leke ni na kode, lo zia ni na yâ ti da ti tâ Nzapa,+ da so Nzapa asara tënë ni na David nga na molenge ti lo Salomon, atene: “Iri ti mbi ayeke ngbâ biani biani na yâ ti da so nga na Jérusalem, so mbi soro ni na popo ti amara ti Israël kue.+ 8 Tongana azo ti Israël asara ye alingbi tâ na aye kue so mbi hunda na ala ti sara, so ti tene ala sara ye alingbi na Ndia ni kue, andia so ayeke fa lege na zo nga na ambela so mbi mû na Moïse si lo fa na ala, mbi yeke kiri ti zi ala lâ oko pëpe na ndö ti sese so mbi mû ni na akotara ti ala.” 9 Manassé angbâ ti pusu azo ti Juda na azo ti Jérusalem ti gue yongoro na Nzapa, lo sara si ala sara sioni mingi ahon amara so Jéhovah afuti ala lani na gbele azo ti Israël.+

10 Jéhovah angbâ ti wa Manassé nga na azo ti lo, me ala mä lo pëpe.+ 11 Ni la Jéhovah asara si amokonzi ti aturugu ti gbia ti Assyrie aga na bira na terê ti ala, na ala gbu Manassé na mbeni wen so ayeke tongana kongi,* ala kanga lo na chaîne use so a sara na cuivre na ala gue na lo na Babylone. 12 Na ngoi so Manassé ayeke na yâ ti vundu, lo voro yanga na Jéhovah Nzapa ti lo ti sara nzoni bê na lo* nga lo ngbâ ti sara terê ti lo tâ kete mingi na lê ti Nzapa ti akotara ti lo. 13 Lo ngbâ ti sambela na Nzapa, nga vorongo yanga so lo voro na Nzapa apika bê ti Nzapa, na Nzapa amä dema ti lo ti sara nzoni bê na lo, lo kiri na Manassé na Jérusalem na ndö ti mbata ti lo ti gbia.+ Manassé aga ti hinga so Jéhovah ayeke tâ Nzapa.+

14 Na peko ti aye so, Manassé aleke mbeni mur na terê ti Gbata ti David+ na mbage ti ouest ti ngu ti Guihon+ na yâ ti Popo-hoto.* Mur ni ague asi na yanga ti gbagba so a iri ni Yanga-ti-gbagba-ti-asusu,+ na a ngoro juska asi na Ophel.+ Lo sara ni ayo na nduzu mingi. Lo zia amokonzi ti aturugu na yâ ti agbata kue ti Juda so angangu gbagba ayeke na terê ni. 15 Na pekoni, lo zi anzapa ti awande, yanda so ayeke na yâ ti da ti Jéhovah+ nga na agbalaka kue so lo leke lani na ndö ti hoto ti da ti Jéhovah+ nga na Jérusalem. Lo mû yanga si a tuku ni na gigi ti gbata ni. 16 Lo leke nga gbalaka ti Jéhovah+ na lo komanse ti yâa na ndö ni asandaga ti beoko+ nga na asandaga ti kiringo singila.+ Lo tene nga na azo ti Juda ti voro Jéhovah Nzapa ti Israël. 17 Ye oko, azo ni angbâ ti mû asandaga na ando so ayeke na nduzu, atâa so ala mû ni gï na Jéhovah Nzapa ti ala.

18 Âdu ti tanga ti mbaï ti Manassé, sambela so lo tene na Nzapa ti lo, nga na tënë so azo ti fango peko ti avision atene na lo na iri ti Jéhovah Nzapa ti Israël, a sû ni na yâ ti mbeti ti mbaï ti agbia ti Israël. 19 Ti sambela ti lo,+ lege so Nzapa akiri tënë na lo na peko ti so lo voro yanga na Nzapa, asiokpari kue so lo sara nga na aye kue so lo sara so afa so lo yeke be-ta-zo pëpe,+ a sû tënë ni na popo ti atënë ti azo ti lo ti fango peko ti avision. Na yâ ni, a fa nga aplace so lo leke dä ando so ayeke na nduzu, aplace so lo kpo ayongoro yanda*+ dä nga na ayanda so a leke ni na kode. A yeke aye so lo sara kozo si lo sara terê ti lo kete. 20 Manassé akui, na lo wu terê ti lo tongana ti akotara ti lo. A lu lo na terê ti da ti lo. Molenge ti lo Amon aga gbia na peko ti lo.+

21 Amon+ ayeke na ngu 22 na ngoi so lo ga gbia, lo komande na Jérusalem ngu use.+ 22 Lo ngbâ ti sara ye so ayeke sioni na lê ti Jéhovah, tâ gï tongana ti so babâ ti lo Manassé asara lani.+ Amon amû sandaga na ayanda kue so babâ ti lo Manassé aleke lani,+ na lo ngbâ ti voro ni. 23 Me ti Amon, lo sara terê ti lo kete pëpe na lê ti Jéhovah+ tongana ti so babâ ti lo Manassé asara lani.+ Amon akiri asara ti lo aye ti sioni mingi. 24 A si na mbeni ngoi, awakua ti lo amä terê na hondengo ni ti sara sioni na lo,+ na ala fâ lo na yâ ti da ti lo wani. 25 Me azo ti kodro ni afâ azo kue so amä terê si afâ Gbia Amon.+ Ala zia molenge ti lo Josias+ gbia na peko ti lo.