1 Samuel

15 Samuel atene na Saül: “Jéhovah la atokua mbi lani ti tuku mafuta na li ti mo si mo ga gbia na ndö ti azo ti Israël, azo ti lo.+ Tongaso, mä tënë so Jéhovah atene.+ 2 Jéhovah ti aturugu atene: ‘Mbi yeke hunda na azo ti mara ti Amalec ti kiri tënë ndali ti ye so ala sara ândö na azo ti Israël. Ala kanga lani lege na azo ti Israël na ngoi so ala sigi na Égypte si ala yeke hon.+ 3 Tongaso, gue mo fâ azo ti mara ti Amalec,+ mo futi ala+ nga na aye ti ala kue. Mo bata ala na fini* pëpe;+ mo fâ akoli na awali, amolenge na aforoto, abagara na ataba, achameau na akororo.’”+ 4 Saül airi azo ni, lo diko wungo ti ala na kodro ti Télaïm. Wungo ti aturugu so atambela na gere ayeke 200 000, na ti akoli ti Juda ayeke 10 000.+

5 Saül ague ngbii lo si na kodro ti Amalec, na lo zia aturugu ti lo ahonde terê ti ala nduru na popo-hoto* so ayeke kâ ti ku azo ni. 6 Me Saül atene na azo ti mara ti Kéni:+ “Ala sigi na popo ti azo ti mara ti Amalec ala hon, si mbi futi ala legeoko na azo ti mara ti Amalec pëpe,+ ndali ti so na ngoi so azo ti Israël+ alondo lani na Égypte si ala yeke hon, ala fa tâ ndoye na mbage ti ala.” Tongaso, azo ti mara ti Kéni alondo na popo ti azo ti mara ti Amalec ala hon. 7 Na pekoni, Saül afuti azo ti mara ti Amalec,+ a londo na Havilah+ juska na Shur,+ so ayeke na terê ti Égypte. 8 Lo gbu Agag,+ gbia ti Amalec, me lo fâ tanga ti azo ti kodro ni kue na épée.+ 9 Ye oko, Saül na azo ti lo abata* Agag, nga ala bata apendere taba na apendere ngasa, abagara, anyama so akono pendere, akoli-taba nga na aye kue so ayeke nzoni.+ Ala ye ti futi aye ni so pëpe. Me asenge kungba kue nga na aye so ala ye ni pëpe, ala futi ni.

10 Tënë ti Jéhovah asi na Samuel, atene: 11 “Mbi regretté* so mbi sara si Saül aga gbia ndali ti so lo tourné peko ti lo na mbi awe nga lo sara ye alingbi na tënë ti yanga ti mbi pëpe.”+ Tënë so amû vundu na Samuel mingi, na lo toto na Jéhovah na bï ni kue.+ 12 Samuel alondo hio na ndapre lo gue ti wara Saül. Me a tene na Samuel, a tene: “Saül asi na Carmel,+ lo leke mbeni ye aluti na nduzu ti yâa na iri ti lo wani.+ Na pekoni, lo mû lege lo gue na Guilgal.” 13 Tongana Samuel asi na Saül, Saül atene na lo: “Zia tufa ti Jéhovah aga na ndö ti mo. Mbi sara ye alingbi na tënë ti yanga ti Jéhovah awe.” 14 Me Samuel atene: “Ka a sara tongana nyen si mbi yeke mä toto ti ataba, ti angasa nga na ti abagara so?”+ 15 Saül akiri tënë, atene: “Azo ni amû ni na kodro ti azo ti mara ti Amalec si ala ga na ni, ndali ti so ala bata* apendere taba na apendere ngasa nga na abagara ni ti tene ala mû ni na sandaga na Jéhovah Nzapa ti mo. Me ti tanga ti aye ni, e futi ni.” 16 Na mango tënë so, Samuel atene na Saül, atene: “Duti kpô! Mbi yeke tene na mo tënë so Jéhovah atene na mbi na bï so.”+ Saül atene: “Tene tënë ni.”

17 Samuel akiri atene: “Na ngoi so a zia mo na ndö ti amara ti Israël, nga na ngoi so Jéhovah asoro mo lani ti ga gbia ti Israël,+ mo bâ terê ti mo kete lani ape?+ 18 Na pekoni Jéhovah atokua mo, lo tene: ‘Gue, mo futi azo ti mara ti Amalec so ayeke awasiokpari.+ Tiri na ala juska mo hunzi ala kue.’+ 19 Tongaso, ndali ti nyen si mo mä yanga ti Jéhovah ape? Me mo gue mo tï na ndö ti aye so mo gbu ni,+ na mo sara ye so ayeke sioni na lê ti Jéhovah.”

20 Saül atene na Samuel: “Me mbi mä yanga ti Jéhovah! Mbi gue mbi sara ye so Jéhovah atokua mbi ti sara, na mbi ga na Agag, gbia ti Amalec, nga mbi futi azo ti mara ti Amalec.+ 21 Ye oko, azo ni amû ataba na abagara na popo ti aye so ala gbu ni, apendere ye na popo ti aye so e futi ni, ti mû ni na sandaga na Jéhovah Nzapa ti mo na Guilgal.”+

22 Samuel atene: “Eskê asandaga so a zö ni agbi kue nga na ambeni sandaga+ anzere na Jéhovah ahon mango yanga ti lo? Bâ! Ti mä yanga ayeke nzoni ahon mungo sandaga,+ nga ti dengi mê ti mä tënë ayeke nzoni ahon mafuta+ ti akoli-taba. 23 Sarango kpengba-li+ ayeke sioni tongana bango mbadi,+ nga sarango ye na fandara ayeke sioni tongana sarango magie nga na vorongo yanda.* So mo ke tënë ti Jéhovah awe so,+ lo nga kue lo ke ti tene mo ngbâ gbia.”+

24 Na pekoni, Saül atene na Samuel: “Mbi sara siokpari; mbi gue nde na yanga so Jéhovah amû nga na tënë ti yanga ti mo, ndali ti so mbi sara mbeto ti azo ni na mbi sara ye so ala hunda. 25 Tongaso, mbi gbu gere ti mo, mo pardonné siokpari so mbi sara, nga zia mbi na mo e kiri si mbi kuku na gbe ti Jéhovah.”+ 26 Me Samuel atene na Saül: “Mbi na mo e yeke kiri pëpe, ndali ti so mo ke yanga ti Jéhovah, na Jéhovah ake ti tene mo ngbâ gbia na ndö ti Israël.”+ 27 Gï so Samuel amû lege ti hon, Saül agbu yanga ti kota bongo* ti lo, na bongo ni asuru. 28 Samuel atene na lo: “Gï tongana ti so kota bongo ni asuru, laso Jéhovah azi komandema na ndö ti Israël na maboko ti mo awe, na lo yeke mû ni na mbeni mba ti mo so ayeke nzoni ahon mo.+ 29 Na ndö ni, tënë ti Kota Nzapa ti Israël+ ayeke ngbâ senge pëpe,+ nga lo yeke changé yanga ti lo* pëpe ndali ti so lo yeke zo pëpe si lo changé yanga ti lo.”*+

30 Saül atene: “Mbi sara siokpari. Pardon, mo ne mbi na lê ti a-ancien ti azo ti mara ti mbi nga na lê ti azo ti Israël. Zia mbi na mo e kiri, na mbi yeke kuku na gbe ti Jéhovah Nzapa ti mo.”+ 31 Tongaso, Samuel amû peko ti Saül, ala kiri, na Saül akuku na gbe ti Jéhovah. 32 Na pekoni Samuel atene: “Ala ga na Agag, gbia ti azo ti mara ti Amalec, na mbi ge.” Agag ague na mbage ti Samuel na gingo bê kete* ndali ti so lo yeke tene fade na yâ ti bê ti lo, lo tene: “Kuâ ayeke ku mbi encore ape.”* 33 Me Samuel atene: “Gï tongana ti so mo sara si amama atoto kuâ ti amolenge ti ala so mo fâ na épée, mama ti mo la ayeke sara ande vundu mingi ahon tanga ti awali kue.” Ge, Samuel afâ yâ ti Agag kete kete na gbele Jéhovah na Guilgal.+

34 Samuel ague na Ramah, na Saül ague na da ti lo na Guibéah. 35 Samuel abâ Saül encore ape juska na lango ti kuâ ti lo, ngbanga ti so Samuel asara vundu ti Saül.+ Jéhovah aregretté so lo zia Saül gbia na ndö ti Israël.+