Apocalypse

13 Lo* ngbâ lo luti na ndö ti mbutu ti ngu-ingo.

Na mbi bâ mbeni nyama ti ngonda,+ lo londo na yâ ti ngu-ingo ni+ lo yeke sigi. Lo yeke na adidi bale-oko na ali mbasambala. Akpoto ti gbia ayeke na ndö ti adidi ti lo ni oko oko si akpoto ni kue ayeke bale-oko; me na ndö ti ali ti lo ni, airi so azonga Nzapa ayeke dä. 2 Nyama ti ngonda so mbi bâ akpa zen, me agere ti lo ayeke tongana agere ti nyama so a iri lo ours nga yanga ti lo akpa yanga ti bamara. Sioni nyama so akpa ngbo+ so amû ngangu ti lo, trône ti lo na kota komandema+ na nyama ti ngonda so.

3 Mbi bâ mbeni oko ti ali ti nyama ni, mo bâ mo tene a dë ni dengo si kä ni akpa ti tene lo kui fade na ni, me kä ni amü.+ Na sese kue amû peko ti nyama ti ngonda so na gondango lo. 4 Ala voro sioni nyama so akpa ngbo so ngbanga ti so lo mû komandema na nyama ti ngonda ni, nga ala voro nyama ti ngonda ni, ala tene: “Zo wa si ayeke tongana nyama ti ngonda so? Zo wa si alingbi ti tiri na lo?” 5 A mû na nyama so mbeni yanga so atene akota tënë na atënë ti zongango ndo, nga a mû na lo komandema ti sara ye na yâ ti nze 42.+ 6 Lo zi yanga ti lo ti zonga Nzapa,+ ti zonga iri ti lo nga na ndo so lo duti dä, même azo so ayeke na yayu.+ 7 A mû lege na lo ti sara bira na azo ti be-vulu nga ti sö benda na ndö ti ala;+ a mû na lo komandema na ndö ti akete mara kue, azo ti kodro kue, azo ti yanga ti kodro kue nga na amara kue. 8 Azo kue so asara kodro na ndö ti sese ayeke voro ande nyama ti ngonda so. Ti londo na ngoi so a zia gere ti dunia, a sû iri ti zo oko pëpe na popo ti ala na yâ ti rouleau ti fini+ so ayeke ti Molenge ti taba so a fâ lo ândö.+

9 Tongana mbeni zo ayeke na mê, zia lo mä.+ 10 Tongana a leke ti tene a gue na mbeni zo na ngbâa, lo yeke gue gï na ngbâa ni. Tongana a si so mbeni zo afâ zo na épée,* a lingbi a fâ lo na épée.+ Ge la si a hunda na azo ti be-vulu+ ti gbu ngangu+ nga ti duti na mabe.+

11 Na pekoni, mbi bâ mbeni nyama ti ngonda ni nde so alondo na yâ ti sese ayeke monté, lo yeke na adidi use tongana ti molenge ti taba, me lo komanse ti sara tënë tongana mbeni sioni nyama so akpa ngbo.+ 12 Lo sara kusala na komandema kue ti kozo nyama ti ngonda ni,+ na lo sara ni na gbele lo. Lo sara si sese nga na azo so asara kodro na ndö ni avoro kozo nyama ti ngonda ni, so ayeke na kä so akpa ti tene lo kui fade na ni, me si kä ni amü so.+ 13 Lo sara akota fä, juska lo sara si wâ alondo na yayu adescend na sese na lê ti azo kue.

14 Lo handa azo so asara kodro na sese, ndali ti afä so a mû lege na lo ti sara na lê ti nyama ti ngonda ni; na oko ngoi ni, lo tene na azo so asara kodro na sese ti leke mbeni statue+ ndali ti nyama ti ngonda so a dë lo na épée me lo kiri lo zingo so.+ 15 A mû na lo lege ti tokua pupu na yâ ti statue ti nyama ti ngonda ni, tongaso si statue ni asara tënë nga asara si a fâ ala kue so ake ti voro statue ti nyama ti ngonda ni.

16 Lo gbu azo kue na ngangu, akete zo na akota zo, azo ti mosoro na awayere, azo so ayeke ngbâa pëpe na angbâa, ti tene a zia mbeni marque na ndö ti maboko ti ala ti koli wala na ndö ti lê ti ala,+ 17 nga ti tene mbeni zo awara lege ti vo ye wala ti kä ye pëpe, me gï zo so ayeke na marque ni, so ti tene iri+ ti nyama ti ngonda ni wala numéro ti iri ti lo ni.+ 18 Ge la si a hunda ti duti na ndara: Zia zo so ahinga ti bâ yâ ti aye nzoni adiko numéro ti nyama ti ngonda ni, ndali ti so a yeke numero ti zo, na numéro ni ayeke 666.+