Jérémie
16 Jéhovah akiri asara tënë na mbi, lo tene: 2 “Mo mû wali pëpe, nga mo dü amolenge ti koli na amolenge ti wali na ndo so pëpe. 3 Ngbanga ti so, bâ tënë so Jéhovah atene na ndö ti amolenge ti koli na amolenge ti wali so a dü ala na ndo so ge la, nga tënë so lo tene na ndö ti amama so adü amolenge ni so, nga na tënë so lo tene na ndö ti ababâ so adü amolenge ni na ndo so la, lo tene: 4 ‘Ala yeke kui ande na lege ti asioni kobela,+ me mbeni zo ti toto ala ande ayeke duti dä pëpe wala zo ti lungo ala ayeke duti ande dä pëpe; ala yeke ga tongana puru ti anyama na ndö ti sese ni.+ Ala yeke kui na lege ti épée wala na lege ti kota nzara,+ na kuâ ti ala ayeke ga kobe ti andeke ti nduzu nga kobe ti anyama ti ngonda.’
5 Bâ tënë so Jéhovah atene la:
‘Mo lï pëpe na yâ ti da so azo ayeke toto kuâ dä,*
mo gue nga ti toto kuâ pëpe wala ti kangbi vundu na azo ni pëpe.+
Ndali ti so mbi zi siriri ti mbi na maboko ti azo so awe,
tâ ndoye so mbi yeke na ni na mbage ti ala nga na bango mawa ti ala, mbi zi ni awe,’ tënë ti yanga ti Jéhovah la.+
6 ‘Akota zo nga na akete zo kue la ayeke kui ande na yâ ti kodro so.
A yeke lu ala ande pëpe,
zo oko ti toto kuâ ti ala ayeke dä pëpe,
wala mbeni zo ti suru terê ti lo na kä ndali ti ala wala ti kio kuä ti li ti lo* ndali ti ala ayeke dä pëpe.
7 Mbeni zo ayeke mû ande kobe na ala so ayeke toto kuâ so pëpe,
mbeni zo ayeke dë bê ti ala pëpe;
wala mbeni zo ayeke ga ande pëpe ti mû na ala kopo ti vin so ayeke zi vundu
ti tene ala nyon ndali ti babâ ti ala wala mama ti ala so akui.
8 Mo lï pëpe na yâ ti da so azo ayeke sara matanga dä,
ti duti legeoko na ala ti te na ti nyon.’
9 “Bâ tënë so Jéhovah ti aturugu, Nzapa ti Israël, atene la: ‘Na ndo so ge, mbi yeke sara si dekongo ti ngia nga na ti nzerengo terê ni so ahunzi, mbi yeke sara si a mä encore ape go ti koli so amû wali fini fini nga na go ti wali so amû koli fini fini. Mbi yeke sara aye so na lê ti ala na ngoi so ala ngbâ na fini.’+
10 “Tongana mo fa peko ti tënë so kue na azo ni awe, ala yeke hunda mo ande, atene: ‘Jéhovah asara tënë ti akota ye ti vundu so kue na terê ti e ngbanga ti nyen? Faute wa, wala siokpari wa la e sara na terê ti Jéhovah Nzapa ti e?’+ 11 Mo kiri tënë na ala, mo tene: ‘Jéhovah atene: “A yeke ndali ti so akotara ti ala adö mbi azia+ na ala gue na peko ti ambeni nzapa nde na ala voro anzapa ni so nga ala kuku na gbe ti ala.+ Me mbi, ala dö mbi azia na ala sara ye alingbi na andia ti mbi pëpe.+ 12 Ala sara ye ti sioni ahon akotara ti ala,+ li ti ala akpengba, na zo oko oko na popo ti ala amû peko ti aye ti sioni so bê ti lo afa na lo ti sara ahon ti mä yanga ti mbi.+ 13 Mbi yeke tomba ala na yâ ti kodro so, si ala gue na mbeni kodro nde so ala hinga ni pëpe, so akotara ti ala nga ahinga ni pëpe.+ Na ndo ni so kâ, ala yeke voro ande ambeni nzapa nde bï na lâ+ ndali ti so mbi yeke sara nzoni bê na ala oko pëpe.”’
14 “Jéhovah atene: ‘Tongaso, ngoi ayeke ga so ala yeke tene ande encore ape, atene: “Ti tâ tënë ni so Jéhovah ayeke na fini, lo so lo sigi na azo ti Israël na kodro ti Égypte.”+ 15 Me ala yeke tene: “Ti tâ tënë ni so Jéhovah ayeke na fini, lo so lo sigi na azo ti Israël na kodro so ayeke na mbage ti nord, lo so lo sigi na ala na yâ ti akodro kue so lo kangbi ala lani dä kirikiri!” Mbi yeke kiri ande na ala na yâ ti kodro ti ala, kodro so mbi mû lani na akotara ti ala.’+
16 Jéhovah atene: ‘Bâ, mbi yeke tokua ti tene a iri gbâ ti azo ti gingo susu si ala ga,
ala yeke gi azo so tongana ti so ala yeke gi na asusu.
Na pekoni, mbi yeke tokua ti tene a iri gbâ ti azo ti gingo nyama si ala ga,
na ala yeke gi azo so tongana ti so ala yeke gi na anyama na ndö ti ahoto kue, na ndö ti akete hoto kue
nga na yâ ti adû ti atênë.
17 Lê ti mbi abâ aye kue so ala yeke sara.*
Ala honde terê ti ala na lê ti mbi pëpe,
wala asioni ti ala ahonde na lê ti mbi pëpe.
18 Kozoni kue, mbi yeke kiri na ala peko ti aye ti sioni nga na asiokpari kue so ala sara,+
ndali ti so ala sara si kodro ti mbi aga sioni na lege ti afungo yanda ti ala so ayeke na fini ape so,*
na ala sara si aye ti sioni asi singo na yâ ti ye so ayeke ti mbi.’”+
19 Jéhovah, mo so mo yeke ngangu ti mbi nga ngangu gbagba so ayeke bata mbi,
ndo ti mbi so mbi lingbi ti kpe dä na ngoi ti ye ti vundu,+
amara kue ayeke londo na mbage ti yanga ti sese kâ ti ga na mbage ti mo,
na ala yeke tene ande, atene: “Héritage so akotara ti e awara ayeke gï atënë ti mvene,
asenge senge ye nga na aye so aga na ala ye ti nzoni oko pëpe.”+
20 Zo alingbi ti leke anzapa ti lo wani?
Aye so zo aleke ayeke biani anzapa pëpe.+
21 “Bâ, mbi yeke fa ande ye na ala,
na ngoi ni so mbi yeke sara si ala hinga ngangu ti mbi,
na ala yeke hinga ande atene iri ti mbi ayeke Jéhovah.”