Exode

19 Na ota nze ni na peko ti so azo ti Israël asigi na kodro ti Égypte, na oko lango ni so, ala si na benyama ti Sinaï. 2 Ala londo na Réphidim+ ala si na benyama ti Sinaï na ala sara camp ti ala na yâ ti benyama ni. Israël asara camp kâ, lê na lê na hoto ni.+

3 Moïse amonté hoto ni lo gue na gbele tâ Nzapa, Jéhovah airi lo na ndö ti hoto ni,+ si lo tene na lo: “Tene na ahale ti Jacob, azo ti Israël, mo tene: 4 ‘Ala bâ ye so mbi sara lani na azo ti Égypte,+ si mbi yô ala tongana ti so aigle ayeke yô amolenge ti lo na ndö ti kpangbi* ti lo na mbi ga na ala na terê ti mbi.+ 5 Fadeso tongana ala sara gï ye so mbi hunda na ala ti sara nga ala bata mbele ti mbi, na popo ti azo ti amara kue ala yeke ga ye ti mbi wani so mbi zia ni nde,*+ ngbanga ti so sese kue ayeke ti mbi.+ 6 Fade ala ga mbeni royaume ti aprêtre ndali ti mbi, mbeni mara so ayeke nzoni-kue.’+ Atënë so mo yeke tene na azo ti Israël la.”

7 Tongaso Moïse ague, lo iri a-ancien ti azo ni na lo fa na ala peko ti atënë kue so Jéhovah amû yanga na lo ti tene.+ 8 Na pekoni, azo ni kue akiri tënë yanga oko, ala tene: “Atënë kue so Jéhovah atene so, e yeke sara ye alingbi na ni.”+ Moïse ague hio afa peko ti tënë ti yanga ti azo ni na Jéhovah. 9 Jéhovah atene na Moïse: “Bâ! Mbi yeke si na mo na yâ ti mbeni vuko mbinda, tongaso azo ni alingbi ti mä go ti mbi na ngoi so mbi yeke sara tënë na mo, tongaso si lakue ala mä na bê na mo nga kue.” Na pekoni, Moïse afa peko ti atënë ti azo ni na Jéhovah.

10 Jéhovah atene na Moïse: “Gue na mbage ti azo ni, mo zia ala nde ndali ti mbi laso nga kekereke, a lingbi ala sukula abongo ti ala. 11 Ala leke terê ti ala ndali ti ota lango ni, ngbanga ti so na ota lango ni Jéhovah ayeke descend na ndö ti Hoto ti Sinaï na lê ti azo ni kue. 12 Mo zia mbeni katikati angoro hoto ni ti kanga lege na azo ni ti si na terê ni, na mo tene na ala: ‘Ala monté na ndö ti hoto ni pëpe, ala ndu nga terê ni pëpe. Zo so andu hoto ni, a yeke fâ lo. 13 Zo oko ayeke ndu lo pëpe, me a yeke bo lo bongo na tênë wala a kpo lo na kokora. Atâa nyama wala zo, a yeke zia lo ngbâ na fini pëpe.’+ Me tongana ala mä go ti hurungo didi ti taba+ awe si ala lingbi ti monté na ndö ti hoto ni.”

14 Tongaso, Moïse alondo na ndö ti hoto ni, lo descend lo gue na mbage ti azo ni, lo zia ala nde ndali ti Nzapa nga ala sukula abongo ti ala.+ 15 Lo tene na azo ni: “Ala leke terê ti ala na yâ ti alango ota ni. Ala bungbi na wali pëpe.”*

16 Na ota lango ni na ndapre, abekpa asungba, wâ ti bekpa aza na mbeni mbinda so ane+ aga na ndö ti hoto ni nga go ti didi ni atoto ngangu, tongaso terê ti azo ni kue na yâ ti camp ni akomanse ti dö.+ 17 Moïse asigi na azo ni na yâ ti camp ni ti tene ala gue ala tingbi na tâ Nzapa, ala gue ala luti na gbe ti hoto ni. 18 Guru amû ndö ti Hoto ti Sinaï kue, ndali ti so Jéhovah adescend na ndö ti hoto ni na yâ ti wâ;+ guru ni ayeke monté tongana guru ti mbeni four, na hoto ni kue ayeke yengi tâ ngangu.+ 19 Tongana go ti didi ni angbâ gï ti toto ngangu mingi, Moïse asara tënë, na tâ Nzapa akiri tënë na lo.

20 Tongaso, Jéhovah adescend na ndö ti Hoto ti Sinaï, na li ti hoto ni. Na pekoni, Jéhovah airi Moïse ti gue na li ti hoto ni, na Moïse amonté kâ.+ 21 Jéhovah atene na Moïse: “Mo descend mo gboto mê ti azo ni si ala tara pëpe ti hon katikati ni na ngangu ti ga ti bâ Jéhovah; tongana ala sara tongaso, mingi ti ala ayeke kui. 22 Zia si aprêtre so ayeke ga lakue nduru na Jéhovah abata terê ti ala wani nde ndali ti Nzapa, si Jéhovah afuti* ala pëpe.”+ 23 Moïse atene na Jéhovah: “Azo ni alingbi ti monté na ndö ti Hoto ti Sinaï ni pëpe, ngbanga ti so mo gboto mê ti e fade awe, mo tene: ‘Zia akatikati na terê ti hoto ni, zia hoto ni nde ndali ti mbi.’”+ 24 Ye oko, Jéhovah atene na lo: “Descend, mo mû Aaron na terê ti mo ala monté na li ti hoto ni. Me zia si aprêtre nga na azo ni ahon akatikati ni na ngangu ti monté na Jéhovah pëpe, ndali ti lo futi ala.”+ 25 Tongaso, Moïse adescend na mbage ti azo ni na lo sara tënë ni na ala.