Genèse

11 Sese kue ayeke tene yanga ti kodro oko nga na a-oko lê ti tënë. 2 Na ngoi so azo ayeke gue na mbage ti est, ala wara mbeni kota kpangbala ndo so popo-hoto ayeke dä na sese ti Shinéar,+ na ala sara kodro dä. 3 Ala tene na mba, ala tene: “Ala ga! E sara brique na e zö ni.” Tongaso, ala mû abrique ni tongana tênë, na ala mû goudron tongana popoto ti montengo na da. 4 Ala kiri ala tene: “Ala ga! E leke mbeni gbata ndali ti e nga na tour so li ni asi na yayu; e sara si iri ti e awu, si yâ ti e akangbi na ndö ti sese kue+ pëpe.”

5 Jéhovah adescend ti bâ gbata nga na tour so azo aleke. 6 Na pekoni, Jéhovah atene: “Bâ, ala yeke mara oko nga ala yeke tene yanga ti kodro oko,+ na bâ ye so ala yeke sara so ma. Fadeso, ye kue so ala bi bê ti ala ti sara ni, mbeni ye ti karango ala ayeke dä pëpe. 7 Ga! E+ descend kâ, e sara si yanga ti kodro ti ala aga nde nde, si ala mä yanga ti kodro ti mba pëpe.” 8 Tongaso, Jéhovah asara si ala zia ndo ni, ala kangbi na ndö ti sese kue,+ nga yeke na yeke ala zia kua ti lekengo gbata ni. 9 Ndani la a iri gbata ni Babel,*+ ndali ti so a yeke kâ la si Jéhovah asara si azo atene ayanga ti kodro nde nde; na Jéhovah asara si ala zia ndo ni, ala kangbi na ndö ti sese kue.

10 Mbaï ti Sem+ ayeke so.

Sem ayeke na ngu 100 na ngoi so lo dü Arpacshad,+ ngu use na peko ti kota ngu so apika. 11 Na peko ti so Sem adü Arpacshad, lo ngbâ na fini ngu 500. Lo dü amolenge ti koli na ti wali.+

12 Arpacshad awara ngu 35. Na pekoni, lo dü Shélah.+ 13 Na peko ti so Arpacshad adü Shélah, lo ngbâ na fini ngu 403. Lo dü amolenge ti koli na ti wali.

14 Shélah awara ngu 30. Na pekoni, lo dü Éber.+ 15 Na peko ti so Shélah adü Éber, lo ngbâ na fini ngu 403. Lo dü amolenge ti koli na ti wali.

16 Éber awara ngu 34. Na pekoni, lo dü Péleg.+ 17 Na peko ti so Éber adü Péleg, lo ngbâ na fini ngu 430. Lo dü amolenge ti koli na ti wali.

18 Péleg awara ngu 30. Na pekoni, lo dü Réu.+ 19 Na peko ti so Péleg adü Réu, lo ngbâ na fini ngu 209. Lo dü amolenge ti koli na ti wali.

20 Réu awara ngu 32. Na pekoni, lo dü Serug. 21 Na peko ti so Réu adü Serug, lo ngbâ na fini ngu 207. Lo dü amolenge ti koli na ti wali.

22 Serug awara ngu 30. Na pekoni, lo dü Nahor. 23 Na peko ti so Serug adü Nahor, lo ngbâ na fini ngu 200. Lo dü amolenge ti koli na ti wali.

24 Nahor awara ngu 29. Na pekoni, lo dü Térah.+ 25 Na peko ti so Nahor adü Térah, lo ngbâ na fini ngu 119. Lo dü amolenge ti koli na ti wali.

26 Térah awara ngu 70. Na pekoni, lo dü Abram,+ Nahor+ na Haran.

27 Mbaï ti Térah ayeke so.

Térah adü Abram, Nahor na Haran; Haran adü Lot.+ 28 Haran akui kozo ti babâ ti lo Térah; lo kui na kodro so a dü lo dä, na Ur+ ti azo ti Chaldée.+ 29 Abram na Nahor amû wali. Iri ti wali ti Abram ayeke Saraï,+ na iri ti wali ti Nahor ayeke Milcah,+ molenge ti Haran; na Haran ayeke babâ ti Milcah nga babâ ti Iscah. 30 Saraï ayeke wali ti dungo pëpe;+ lo yeke na molenge pëpe.

31 Térah amû molenge ti lo Abram na âta ti lo Lot,+ molenge ti Haran, nga na Saraï wali ti molenge ti lo Abram, na ala zia gbata ti Ur ti azo ti Chaldée ti gue na sese ti Canaan.+ Ala gue ala si na gbata ti Haran+ na ala sara kodro kâ. 32 Ngu ti Térah kue ayeke ngu 205. Na pekoni, Térah akui na gbata ti Haran.