1 Chronique

15 David angbâ ti sara ada ndali ti lo wani na Gbata ti David, nga lo leke mbeni place ndali ti Sanduku ti tâ Nzapa, na lo zia ni na yâ ti tente so lo leke ti zia ni dä.+ 2 A yeke na ngoi ni so la David atene: “Mbeni zo nde alingbi ti yô Sanduku ti tâ Nzapa pëpe, gï azo ti mara ti Lévi, ndali ti so Jéhovah asoro ala ti yô Sanduku ti Jéhovah na ti sara kua na lo lakue.”+ 3 Na pekoni, David abungbi azo ti Israël kue na Jérusalem ti mû sanduku ti Jéhovah ti gue na ni na place so lo leke ndali ni.+

4 David abungbi ahale ti Aaron+ nga na ambeni zo ti mara ti Lévi:+ 5 na popo ti ahale ti Kohath, Uriel so ayeke mokonzi na aita ti lo 120; 6 na popo ti ahale ti Mérari, Asaïah+ so ayeke mokonzi na aita ti lo 220; 7 na popo ti ahale ti Guershom, Joël+ so ayeke mokonzi na aita ti lo 130; 8 na popo ti ahale ti Élizaphan,+ Shémaïah so ayeke mokonzi na aita ti lo 200; 9 na popo ti ahale ti Hébron, Éliel so ayeke mokonzi na aita ti lo 80; 10 na popo ti ahale ti Uzziel,+ Aminadab so ayeke mokonzi na aita ti lo 112. 11 David airi nga prêtre Zadoc+ na prêtre Abiathar;+ lo iri nga Uriel, Asaïah, Joël, Shémaïah, Éliel na Aminadab so ayeke azo ti mara ti Lévi, 12 na lo tene na ala, lo tene: “Ala yeke amokonzi ti ahale ti akotara ti ala so ayeke azo ti mara ti Lévi. Ala na aita ti ala, ala zi sioni ye na terê ti ala, na ala gue aga na Sanduku ti Jéhovah Nzapa ti Israël ti zia ni na place so mbi leke ndali ni. 13 So ala la ayô sanduku ni pëpe na ngoi so e gi lani ti ga na ni,+ Jéhovah Nzapa ti e atuku ngonzo ti lo na ndö ti e,+ ndali ti so e sara ye pëpe tongana ti so lo fa.”+ 14 Tongaso, aprêtre na azo ti mara ti Lévi azi sioni ye na terê ti ala ti tene ala gue aga na Sanduku ti Jéhovah Nzapa ti Israël.

15 Na pekoni, azo ti mara ti Lévi amû abarre ti Sanduku ni si ala yô na ni na ndö ti go ti ala,+ tongana ti so Jéhovah amû yanga na Moïse si lo fa peko ni. 16 David atene na amokonzi ti azo ti mara ti Lévi ti soro ambeni ita ti ala so ayeke azo ti hengo bia ti he bia na ngia na bê, na ngoi so a yeke pika aye ti mozoko: aharpe, ambeni ye ti mozoko so ayeke na kamba+ nga na acymbale.+

17 Tongaso, azo ti mara ti Lévi asoro Héman+ molenge ti Joël, nga, na popo ti aita ti lo, ala soro Asaph+ molenge ti Bérékiah; na popo ti aita ti ala so ayeke ahale ti Mérari, ala soro Éthan+ molenge ti Cushaïah. 18 Aita ti ala ti use groupe ni so a zia ala na terê ti ala+ ayeke Zacharie, Ben, Jaaziel, Shémiramoth, Jéhiel, Unni, Éliab, Bénaïah, Maaséïah, Mattithiah, Éliphéléhu, Micnéïah nga na Obed-Édom na Jéïel so ayeke azo so ayeke bata ayanga ti gbagba. 19 A hunda na Héman,+ Asaph+ na Éthan so ayeke azo ti hengo bia ti pika acymbale+ so a sara ni na cuivre. 20 Zacharie, Aziel, Shémiramoth, Jéhiel, Unni, Éliab, Maaséïah na Bénaïah apika aye ti mozoko so ayeke na kamba so a leke totongo ni alingbi na Alamoth.*+ 21 A hunda na Mattithiah,+ Éliphéléhu, Micnéïah, Obed-Édom, Jéïel na Azaziah, so ayeke pika aharpe so a leke totongo ni alingbi na Shéminith,*+ ti duti amokonzi ti azo ti pikango mozoko ni. 22 Kénaniah+ mokonzi ti azo ti mara ti Lévi abâ ndo na ndö ti kua ti yongo Sanduku ni, ndali ti so lo hinga kua ni nzoni mingi. 23 Bérékiah na Elcanah ayeke azo ti batango Sanduku ni. 24 Shébaniah, Josaphat, Néthanel, Amasaï, Zacharie, Bénaïah na Éliézer so ayeke aprêtre ahûru atrompette ngangu na devant ti Sanduku ti tâ Nzapa;+ a mû nga Obed-Édom na Jéhiah ti bata Sanduku ni.

25 Na pekoni David, na a-ancien ti azo ti Israël nga na amokonzi ti azo saki oko saki oko ayeke tambela legeoko na sanduku ti mbele ti Jéhovah so a mû ni na da ti Obed-Édom+ si a yeke ga na ni. Ala yeke na kota ngia na bê ti ala.+ 26 Na ngoi so Nzapa amû maboko na azo ti mara ti Lévi so ayeke yô sanduku ti mbele ti Jéhovah ti ga na ni, a mû akoli-bagara mbasambala so akono awe nga na akoli-taba mbasambala a mû na sandaga.+ 27 David ayü mbeni pendere kota bongo, lo na azo ti mara ti Lévi kue so ayô Sanduku ni, azo ti hengo bia nga na Kénaniah so ayeke bâ ndo na ndö ti kua ti yongo Sanduku ni nga na azo ti hengo bia; David ayü nga éphod so a sara ni na lin.+ 28 Azo ti Israël kue so ayeke ga na sanduku ti mbele ti Jéhovah ayeke dekongo na ngia,+ a yeke hûru adidi, atrompette,+ a yeke pika acymbale, aharpe nga na ambeni ye ti mozoko so ayeke na kamba si atoto ngangu.+

29 Me na ngoi so sanduku ti mbele ti Jéhovah asi na Gbata ti David,+ Mical,+ molenge ti Saül, ayeke bâ ndo na lê ti fenêtre. Lo bâ Gbia David so ayeke dodo nga lo yeke huru na gbele Jéhovah. Lo zere David na yâ ti bê ti lo.+