Exode
31 Jéhovah angbâ ti sara tënë na Moïse, lo tene: 2 “Bâ, mbi soro* Bézalel+ molenge ti Uri, molenge ti Hur ti mara ti Juda.+ 3 Mbi yeke sara si lo si singo na yingo ti Nzapa; mbi yeke mû na lo ndara, hingango ndo, hingango ye na ndö ti akode nde nde kue ti kua ti maboko, 4 ti leke aye na kode, ti sara kua na lor, argent na cuivre, 5 ti dë atênë ti zia na yâ ti amonture+ nga ti mû akeke ti sara na apendere kusala nde nde kue.+ 6 Mbi zia na terê ti lo Oholiab,+ molenge ti Ahisamak ti mara ti Dan, ti mû maboko na lo. Mbi yeke zia ndara na yâ ti bê ti azo kue so ayeke na kode,* si ala sara aye kue so mbi fa na ala:+ 7 tente ti bungbi ni,+ sanduku ti Témoin+ nga ye ti kangango na yanga ni+ so ayeke na ndö ni nga na agbakuru ti tente ni kue, 8 table ni+ na akungba ti terê ni kue, ye ti yongo lampe so ayeke na lor ti nzoni ni na akungba ti terê ni kue,+ gbalaka ti zongo dukane,+ 9 gbalaka ti asandaga so a zö ni agbi kue+ na akungba ti terê ni kue, kota tawa ni nga na ye ti ziango tawa ni na ndö ni,+ 10 abongo so a kpo ni pendere na laine nga na abongo so a zia ni nde ndali ti Aaron so ayeke prêtre nga na abongo ti amolenge ti lo ndali ti kua ti ala ti prêtre;+ 11 mafuta ti tukungo na li ti zo ti soro lo nga dukane so afun pendere ndali ti akubu ti tabernacle ni.+ Ala yeke sara ye kue so mbi fa na ala ti sara.”
12 Jéhovah akiri atene na Moïse: 13 “Tene na azo ti Israël, mo tene: ‘Na yâ ti aye kue, ala yeke bata ande asabbat ti mbi,+ ndali ti so a yeke mbeni fä na popo ti mbi na ala ti londo na ala ti si na ahale ti ala, si ala hinga so mbi Jéhovah Nzapa ti ala la mbi yeke sara si ala ga nzoni-kue. 14 Ala yeke bata lango ti Sabbat ndali ti so ayeke mbeni lango so a zia ni nde ndali ti Nzapa ngbanga ti ala.+ Zo so adoro Sabbat, a yeke fâ lo. Tongana mbeni zo* asara kua na lango ni, a yeke fâ lo.+ 15 Zo ayeke sara kua na yâ ti alango omene kue senge, me lango mbasambala ni ayeke mbeni sabbat, lango so a zia ni nde ti tene zo awu terê ti lo.+ A yeke mbeni lango so a zia ni nde ndali ti Jéhovah. Zo so asara kua na lango ti Sabbat, a yeke fâ lo. 16 Azo ti Israël ayeke bata lango ti Sabbat; ala bata ni ti londo na ala ti si na ahale ti ala. A yeke mbele so ayeke ngbâ aninga. 17 A yeke mbeni fä so ayeke ngbâ aninga na popo ti mbi na azo ti Israël,+ ngbanga ti so Jéhovah asara ayayu na sese na yâ ti alango omene me na lango mbasambala ni lo zia ti sara kua na lo wu terê ti lo.’”+
18 Gï so Nzapa ahunzi ti sara tënë na Moïse na ndö ti Hoto ti Sinaï awe, lo mû na lo akete tableau use ti Témoin ni,+ akete tableau ti tênë so li ti maboko ti Nzapa asû mbeti na ndö ni.+