Genèse
33 Jacob ayô lê ti lo na nduzu na lo bâ Ésaü so ayeke ga, lo na akoli 400.+ Tongaso lo kangbi yâ ti amolenge ni na popo ti Léa, Rachel nga na azo ti kua use ti wali.+ 2 Lo zia azo ti kua ni na amolenge ti ala kozo,+ lo zia Léa na amolenge ti lo na peko ti ala,+ na lo zia Rachel+ na Joseph na ndangba ni. 3 Lo wani lo tï na devant ti ala, na lo kuku na sese fani mbasambala na ngoi so lo yeke ga nduru nduru na ita ti lo ni.
4 Me Ésaü akpe loro ague awara lo, lo gbu lo na kate ti lo, lo su ngbangba ti lo; na ala tï na toto. 5 Tongana Ésaü ayô lê ti lo na nduzu lo bâ awali na amolenge ni, lo hunda ndo, lo tene: “Azo wa la so?” Jacob atene: “Amolenge so Nzapa amû ala na mbi, zo ti kua ti mo, na nzoni bê ti lo la.”+ 6 Tongaso, azo ti kua ti wali aga, ala na amolenge ti ala, na ala kuku na gbe ti lo; 7 Léa nga aga, lo na amolenge ti lo, na ala kuku na gbe ti lo. Na pekoni Joseph aga, lo na Rachel, na ala kuku na gbe ti lo.+
8 Ésaü atene: “Mbi tingbi fade na gbâ ti anyama so azo aga na ni. Mo ye ti sara nyen na ni?”+ Jacob atene: “A yeke ti tene mbi nzere na lê ti mo seigneur ti mbi.”+ 9 Ésaü atene: “Mbi yeke na aye gbani gbani, ita ti mbi.+ Zia ye ti mo angbâ na mo.” 10 Me Jacob atene: “Ên-ën, pardon. Tongana mbi nzere na lê ti mo, mû matabisi ni na maboko ti mbi, ngbanga ti so mbi ga na ni si mbi bâ lê ti mo. Mbi bâ lê ti mo mo bâ mo tene mbi bâ lê ti Nzapa, ndali ti so mo yamba mbi na ngia.+ 11 Pardon, mû matabisi so mbi ga na ni na mo,+ ngbanga ti so Nzapa asara nzoni na mbi nga mbi yeke na ye kue so mbi yeke na bezoin ni.”+ Jacob ague na lo juska lo mû ni.
12 Na pekoni, Ésaü atene: “E gue ma; zia mbi tï na devant.” 13 Me Jacob atene na lo: “Seigneur ti mbi ahinga so amolenge akpengba pëpe,+ nga mbi yeke na ataba na abagara so amolenge ti ala angbâ ti nyon me. Tongana a gboto ala na loro loro na yâ ti lango oko, anyama ni kue ayeke kui. 14 Pardon, zia seigneur ti mbi ague ti lo kozo na mbi zo ti kua ti lo. Me mbi yeke ga yeke yeke, a lingbi na tambela ti anyama ti mbi nga na ti amolenge ti mbi, juska mbi si na ndo ti seigneur ti mbi na Séir.”+ 15 Ésaü atene: “Pardon, zia mbi zia na mo ambeni zo ti mbi.” Me Jacob atene: “Ti sara na nyen? So mbi nzere na lê ti mo seigneur ti mbi so, a lingbi awe ape?” 16 Tongaso, na lango ni so Ésaü akiri na Séir.
17 Jacob ague na Succoth;+ lo leke da ti lo nga na ada ti anyama ti lo. Ndani la lo iri ndo ni so Succoth.*
18 Jacob alondo na Paddan-Aram+ lo si na nzoni terê na gbata ti Sichem,+ so ayeke na sese ti Canaan,+ na lo leke camp ti lo nduru na gbata ni. 19 Lo vo mbeni sese na lo leke tente ti lo dä; lo vo ni na alê ti nginza 100 na maboko ti amolenge ti Hamor, babâ ti Sichem.+ 20 Lo leke mbeni gbalaka na ndo so, na lo iri ni Nzapa ayeke Nzapa ti Israël.+