2 Samuel
23 So ayeke tanga ti atënë ti David la:+
3 Nzapa ti Israël asara tënë;
Kota tênë ti Israël+ atene na mbi, atene:
‘Tongana zo ti mbilimbili akomande na ndö ti azo,+
na lo kpe mbeto ti Nzapa,+
4 komandema ti lo ayeke tongana lumière ti ndapre na ngoi so lâ ayeke su,+
mbeni ndapre so mbinda ayeke dä pëpe.
A yeke tongana sungo ti lâ na peko ti ngu-nzapa
so asara si apere asigi.’+
5 Sewa ti mbi ayeke tongaso na lê ti Nzapa ape?
Lo te mbeni mbele na mbi, so ayeke ngbâ lakue na ngangu;+
lo fa anzene nzene tënë ti yâ ni kue nga lo yeke bâ si a ngbâ senge pëpe.
So salut ti mbi nga na ngia ti mbi kue aluti na ndö ni so,
lo yeke sara si a maï ape?+
6 Me azo so li ti ala ayeke dä pëpe, a bi ala na ngonda+ tongana asisi.
Zo alingbi ti gbu ala na maboko pëpe.
7 Tongana mbeni zo aye ti ndu ala,
a yeke nzoni lo mû wen nga na keke ti likongo si;
nga a yeke nzoni a gbi ala biani biani na ndo so ala yeke dä.”
8 Iri ti angangu zo ti bira ti David ayeke so:+ Josheb-Bashébeth, zo ti Tachkémon; na popo ti angangu zo ti bira ni ota,+ lo la lo yeke na li ti ala. Mbeni lâ, lo mû likongo lo fâ azo 800. 9 Zo so aga na peko ti lo ayeke Éléazar+ molenge ti Dodo,+ so ayeke molenge ti Ahohi. Lo yeke oko ti angangu zo ti bira ota so ayeke na terê ti David na ngoi so ala gi yanga ti aPhilistin. Ala bungbi terê kâ ti sara bira, me tongana azo ti Israël akpe, 10 lo kpe ti lo pëpe. Lo ngbâ lo fâ aPhilistin juska maboko ti lo awoko kue na épée ni acalé na yâ ti maboko ti lo.+ A yeke tongaso si Jéhovah aga na kota songo benda* na lango ni so.+ Azo so akpe so akiri aga na peko ti lo ti mû aye ti azo so lo fâ ala.
11 Zo so aga na peko ti Éléazar ayeke Shammah molenge ti Agée, zo ti Harar. A-Philistin abungbi terê ti ala na Léhi ti sara bira. Mbeni kota yaka ti lentille ayeke kâ. Azo ti Israël akpe ndali ti aPhilistin. 12 Me lo luti na milieu ti yaka ni lo bata ni, nga lo ngbâ lo fâ aPhilistin juska Jéhovah aga na kota songo benda.*+
13 Na ngoi ti kongo alê ti kobe, David ayeke na yâ ti kota dû ti tênë na Adullam.+ Amokonzi ota na popo ti amokonzi ti lo 30 ague na peko ti lo kâ. Mbeni bungbi ti aturugu* ti aPhilistin asara camp ti ala na yâ ti Popo-hoto* ti Réphaïm.+ 14 David ayeke kâ na yâ ti hoto ni,+ me aPhilistin azia ambeni turugu ti ala na Bethléhem. 15 Nzara ti ngu agbu David na lo tene: “Tâ tongana mbi peut ti nyon ngu so a bata ni na yâ ti dû so ayeke na terê ti yanga ti gbagba ti Bethléhem, ka a yeke nzoni!” 16 Na mango tënë so, angangu zo ti bira ota so alï na ngangu na yâ ti camp ti aPhilistin. Ala tö ngu so ayeke na yâ ti dû ni so ayeke na terê ti yanga ti gbagba ti Bethléhem, ala ga na ni na David. Me lo ke ti nyon ngu ni, lo tuku ni na sese na Jéhovah.+ 17 Lo tene: “Jéhovah, mbi pensé lâ oko pëpe ti sara ye so! Mbi peut ti nyon mênë+ ti akoli so ague azia fini* ti ala na lê ti kuâ so tongana nyen?” Ni la lo ke ti nyon ni. So ayeke aye so angangu zo ti lo ti bira ota so asara la.
18 Abishaï,+ ita ti Joab molenge ti Zéruïah,+ ayeke mokonzi na popo ti ambeni ngangu zo ti bira ota. Mbeni lâ, lo mû épée ti lo lo fâ azo 300, na iri ti lo awu tongana ti angangu zo ti bira ota so.+ 19 Atâa so lo la iri ti lo awu mingi na popo ti angangu zo ti bira ota so, na lo yeke mokonzi ti ala, kamba ti lo alingbi na ti akozo ngangu zo ti bira ota so pëpe.
20 Bénaïah,+ molenge ti Jéhoïada, ayeke mbeni zo so ayeke sara ka ye na mbeto pëpe.* Lo sara akpengba ye mingi na Cabzéel.+ Lo fâ amolenge ti Ariel, zo ti Moab, use; nga mbeni lâ tongana neige ayeke tï, lo descend na yâ ti dû ti ngu lo fâ mbeni bamara.+ 21 Lo fâ nga mbeni zo ti Égypte so ayo ngangu. Atâa so zo ti Égypte ni ayeke na likongo na maboko ti lo, lo gue na terê ti lo na keke, lo gboto likongo ni na maboko ti zo ti Égypte ni na lo fâ lo na ni. 22 So ayeke aye so Bénaïah molenge ti Jéhoïada asara la. Iri ti lo awu tongana ti angangu zo ti bira ota so. 23 Atâa so iri ti lo awu ahon même amokonzi 30 so, kamba ti lo alingbi na ti angangu zo ti bira ota so pëpe. Me David azia lo na ndö ti agarde ti lo.
24 Asahel,+ ita ti Joab, ayeke na popo ti amokonzi 30 so. A yeke: Elhanan molenge ti Dodo, zo ti Bethléhem;+ 25 Shammah zo ti mara ti Harod; Élica zo ti mara ti Harod; 26 Hélez+ zo ti mara ti Pélet; Ira+ molenge ti Ikkesh, zo ti kodro ti Técoa; 27 Abiézer,+ zo ti kodro ti Anatoth;+ Mébunnaï, zo ti mara ti Husha; 28 Zalmon, zo ti mara ti Ahoha; Maharaï,+ zo ti kodro ti Nétopha; 29 Héleb molenge ti Baanah, zo ti kodro ti Nétopha; Ittaï molenge ti Ribaï, zo ti Guibéah, kodro ti azo ti mara ti Benjamin; 30 Bénaïah,+ zo ti Pirathon; Hiddaï so alango na terê ti apopo-hoto* ti Gaash;+ 31 Abi-Albon, zo ti mara ti Araba; Azmaveth, zo ti mara ti Bahurim; 32 Éliahba, zo ti Shaalbon; amolenge ti Jashen; Jonathan; 33 Shammah, zo ti Harar; Ahïam molenge ti Sharar, zo ti Harar; 34 Éliphélet molenge ti Ahasbaï, zo ti Maaca; Éliam molenge ti Ahithophel,+ zo ti Guilo; 35 Hezro, zo ti kodro ti Carmel; Paaraï, zo ti Arabe; 36 Igal molenge ti Nathan, zo ti Zobah; Bani, zo ti mara ti Gad; 37 Zélec, zo ti mara ti Ammon; Naharaï, zo ti Beéroth, so ayeke zo ti yongo aye ti bira ti Joab molenge ti Zéruïah; 38 Ira, zo ti mara ti Jéther; Gareb, zo ti mara ti Jéther+ 39 nga na Urie,+ zo ti mara ti Heth. Wungo ti ala kue ayeke 37.