Josué
3 Na pekoni, Josué alondo hio na ndapre lo na azo ti Israël kue, ala londo na Sittim+ na ala si na Ngu ti Jourdain. Ala lango na ndo so kozo si ala fâ ngu ni.
2 Na peko ti lango ota, amokonzi ti aturugu ni+ atambela na yâ ti camp ni kue 3 ala mû yanga na azo ni, atene: “Na ngoi so ala bâ azo ti mara ti Lévi ayô sanduku ti mbele* ti Jéhovah Nzapa,+ a lingbi ala londo na ndo so ala yeke dä na ala mû peko ti sanduku ni, 4 tongaso si ala lingbi ti hinga lege so ala yeke gue dä, ndali ti so ade ala hon na lege so lâ oko pëpe. Me a lingbi ala ngbâ ayo na terê ti sanduku ni coudée 2 000 tongaso.* Ala pusu nduru na ni pëpe.”
5 Josué atene na azo ni: “Ala zi sioni ye na terê ti ala,+ ngbanga ti so kekereke Jéhovah ayeke sara aye ti kpene na popo ti ala.”+
6 Na pekoni, Josué atene na aprêtre, atene: “Ala yô sanduku+ ti mbele ni ala hon kozo ti azo ni.” Tongaso, ala yô sanduku ti mbele ni na ala hon kozo ti azo ni.
7 Jéhovah atene na Josué: “Laso, mbi yeke yâa mo na nduzu na lê ti azo ti Israël kue,+ si fade ala hinga so mbi yeke na mo+ tongana ti so mbi yeke ândö na Moïse.+ 8 Me ti mo, mo mû yanga na aprêtre so ayeke yô sanduku ti mbele, mo tene: ‘Tongana ala si na yanga ti Ngu ti Jourdain, ala doit ti lï yâ ti ngu ni ala luti.’”+
9 Tongaso, Josué atene na azo ti Israël, atene: “Ala ga ge ala mä tënë ti Jéhovah Nzapa ti ala.” 10 Josué angbâ atene na ala: “Na lege ti ye so ala yeke hinga so mbeni Nzapa so ayeke na fini ayeke na popo ti ala,+ na fade lo yeke tomba biani na devant ti ala azo ti Canaan, azo ti mara ti Heth, azo ti Hévi, azo ti Périzzi, azo ti mara ti Guirgashi, azo ti mara ti Amori na azo ti mara ti Jébus.+ 11 Ala bâ! sanduku ti mbele ti Seigneur ti sese kue ayeke hon kozo ti ala na yâ ti Ngu ti Jourdain. 12 Tongaso, ala soro akoli 12 na popo ti amara ti Israël, koli oko na yâ ti mara oko.+ 13 Gï so gere ti aprêtre so ayô Sanduku ti Jéhovah, Seigneur ti dunia kue, ayeke ndu Ngu ti Jourdain ni, ngu ni so ayeke sua ayeke luti, na ngu ni ayeke luti ndo oko tongana mbeni gbagba.”+
14 Na ngoi so azo ni asigi na yâ ti atente ti ala kozo ti tene ala fâ Ngu ti Jourdain, aprêtre so ayô sanduku+ ti mbele ni ahon kozo ti ala. 15 (Lakue na ngoi ti fango alê ti kobe Ngu ti Jourdain ayeke suku juska asigi na gigi).+ Gï na ngoi so azo ti yongo Sanduku ni asi na Ngu ti Jourdain, na gere ti aprêtre so ayô Sanduku ni alï na yâ ti ngu ni, 16 ngu ni so alondo na mbage ti li ni kâ si ayeke sua so aluti. A luti na nduzu tongana mbeni gbagba so ague juska asi na Adam, gbata so ayeke nduru na Zaréthan; na oko ngoi ni angu so ayeke sua na mbage ti gbe ni si ayeke gue na Ngu-ingo ti Arabah, (Ngu ti gbâ ti ingo*) ahule. Angu ni so ahule na azo ni afâ ngu ni na ndo so abâ ndo lê na lê na Jéricho. 17 Ti aprêtre so ayô sanduku ti mbele ti Jéhovah, ala ngbâ ti luti na ndö ti kuru sese ni+ na milieu ti Ngu ti Jourdain na ngoi so azo ti Israël kue afâ ngu ni na ndö ti kuru sese.+ Ala luti juska azo ti Israël kue afâ Ngu ti Jourdain.