Apocalypse

18 Na peko ti ye so, mbi bâ mbeni ange ni nde so alondo na yayu si ayeke descend, lo yeke na kota komandema, na gloire ti lo asu na ndö ti sese kue. 2 Lo dekongo na go so atoto ngangu, lo tene: “Lo tï awe! Babylone, Ngangu gbata, atï awe,+ lo ga ndo ti lango ti asioni yingo, mbeni ndo so asioni yingo* kue, asioni ye kue nga na asioni ndeke+ kue so azo ake ala ahonde terê ti ala dä! 3 Biani, ndali ti vin ti kota nzara* ti lango-sioni* ti lo, lo gbu amara kue,+ na agbia ti sese asara lango-sioni na lo,+ awadengo buze ti sese* aga azo ti mosoro ndali ti ngangu ti gbâ ti aye ti lo so ayeke aye ti nginza so kamene asara lo na ni pëpe.”

4 Na pekoni, mbi mä mbeni go nde so alondo na yayu atene: “Azo ti mbi,+ ala sigi na yâ ti gbata so tongana ala ye ti yô mbage ti asiokpari ti lo pëpe, nga tongana ala ye ti wara mbage ti asioni ye so ayeke si na lo so pëpe.+ 5 Ndali ti so asiokpari ti lo abungbi na ndö ti terê juska na yayu,+ nga Nzapa adabe na aye ti kirikiri* so lo sara.+ 6 Ala kiri na lo peko ti ye ni tongana ti so lo wani lo sara lani na ambeni zo,+ biani, ala sara na lo ahon ti lo ni fani use;+ na yâ ti kopo+ so lo mélangé ye dä, ala zia mbeni dä na lo fani use.+ 7 A lingbi na lege so lo gonda terê ti lo na ni nga lo duti na lege ti gbâ ti aye ti lo so ayeke aye ti nginza so kamene asara lo na ni pëpe so, ala sara si lo bâ pasi nga lo duti na yâ ti mua alingbi na ni. Biani, lo yeke tene na yâ ti bê ti lo, lo tene: ‘Mbi yeke gbia-wali, mbi yeke wali-mua pëpe na mbi yeke duti na yâ ti mua lâ oko pëpe.’+ 8 Ndani la gï na yâ ti lango oko, asioni ye so ayeke si ande na lo: kuâ, mua na kota nzara; na a yeke gbi lo ande kue na wâ,+ ngbanga ti so Jéhovah* Nzapa so afâ ngbanga ti lo ayeke ngangu.+

9 “Agbia ti sese so asara lani lango-sioni* na lo nga so aduti na yâ ti gbâ ti aye ti nginza so kamene asara ala na ni pëpe so, ala yeke toto na ala yeke pika terê ti ala ti fa so ala yeke na vundu ndali ti lo na ngoi so ala yeke bâ guru ti wâ so ayeke gbi lo. 10 Ala yeke ngbâ ande ayo ndali ti mbeto ti pasi ti lo so asara ala si ala tene: ‘Aï-oo, aï-oo, mo kota gbata so,+ Babylone, mo ngangu gbata, gï na yâ ti ngbonga oko ngbanga atï na ndö ti mo awe!’

11 “Nga, awadengo buze ti sese ayeke toto nga ayeke duti na mua ndali ti lo, ngbanga ti so mbeni zo ti vo gbâ ti akungba ti ala kue ayeke dä mbeni pëpe, 12 gbâ ti akungba ti lor, ti argent, atênë ti ngangu ngere, aperle, pendere bongo ti lin, bongo ti violet, bongo ti soie na bengba bongo; aye kue so a leke ni na keke so afun pendere; mara ti aye kue so a leke ni na pembe ti doli, mara ti aye kue so a leke ni na keke so ngere ni ayeke ngangu, na cuivre, na wen nga na tênë ti marbre; 13 nga na cinnamome, épice, dukane, mafuta so afun pendere, vuru dukane, vin, mafuta ti olive, pendere farine, blé, abagara, ataba, ambarata, apuse ti mbarata, angbâa nga na azo.* 14 Biani, pendere lê ti keke so mo sara* nzara ni ahon yongoro na terê ti mo awe; aye kue so ayeke tâ nzoni ye nga na aye so ayeke pendere mingi abuba na tïtî mo awe, na azo ayeke kiri ti wara ni ande mbeni pëpe.

15 “Awadengo buze so akä aye ni so, so aga azo ti mosoro ndali ti lo so, ala yeke ngbâ ande ayo ngbanga ti mbeto ti pasi so lo yeke bâ na ala yeke toto nga ala yeke duti na mua, 16 si ala tene: ‘Aï-oo, aï-oo, kota gbata, so ayü pendere bongo ti lin, bongo ti violet nga na bengba bongo, lo so lo sara pendere na gbâ ti aye ti lor, atênë ti ngangu ngere nga na aperle so,+ 17 gï na yâ ti ngbonga oko, a buba gbâ ti aye ti mosoro so kue!’

“Azo kue ti kpengo na bateau, azo kue so ayeke mû bateau ti gue na ando nde nde kue, azo so ayeke sara kua na yâ ti bateau nga na azo kue so ayeke wara kobe ti yanga ti ala ndali ti ngu-ingo, azo so kue angbâ ayo 18 si na ngoi so ala yeke bâ guru ti wâ so ayeke gbi lo, ala dekongo, ala tene: ‘Gbata wa la si alingbi na kota gbata so?’ 19 Ala tuku fuku ti sese na li ti ala, ala dekongo, ala toto, ala duti na yâ ti mua si ala tene: ‘Aï-oo, aï-oo, kota gbata, gbata so azo ti yâ ni kue so ayeke na bateau na lê ti ngu-ingo aga azo ti mosoro ndali ti gbâ ti mosoro ti lo, gï na yâ ti ngbonga oko, a buba ni kue!’+

20 “Yayu, mo duti na ngia ndali ti lo,+ ala azo ti be-vulu nga kue,+ abazengele na aprophète, ngbanga ti so Nzapa afâ ngbanga na li ti lo ndali ti ala!”+

21 Mbeni ngangu ange ayô mbeni tênë so akpa kota tênë ti nekango na ye, lo bi ni na yâ ti ngu-ingo, na lo tene: “A yeke tongaso si a yeke bi ande Babylone, kota gbata ni, gï hio tongaso, na a yeke kiri ti wara lo ande mbeni pëpe.+ 22 Na a yeke mä ande go ti azo ti hengo bia so ayeke pika aharpe ti ala ti he na bia na yâ ti mo mbeni pëpe; a yeke mä nga go ti azo ti pikango mozoko, go ti azo ti hurungo flûte, go ti azo ti hurungo trompette na yâ ti mo mbeni pëpe; nga a yeke kiri ande ti wara azo ti sarango kua ti maboko na yâ ti mo mbeni pëpe; a yeke kiri ande ti mä go ti tênë ti nekango na ye na yâ ti mo mbeni pëpe. 23 Lumière ti lampe ayeke kiri ande ti za na yâ ti mo mbeni pëpe; a yeke kiri ande ti mä go ti koli so ayeke mû wali fini fini na ti wali so ayeke mû koli fini fini na yâ ti mo mbeni pëpe; ndali ti so awadengo buze ti mo ayeke lani akota zo ti sese so, nga, na lege ti sarango aye ti yorö ti mo,+ a handa lani azo ti amara kue. 24 Biani, a wara na yâ ti lo mênë ti aprophète, mênë ti azo ti be-vulu+ nga na mênë ti azo kue so a fâ ala na ndö ti sese.”+