1 Samuel

13 Saül ayeke na ngu . . .* na ngoi so lo ga gbia;+ lo lë gbia na ndö ti azo ti Israël ngu use. 2 Saül asoro akoli 3 000 na popo ti azo ti Israël; akoli 2 000 ayeke na terê ti Saül na Micmash, nga na ndo so ahoto ayeke dä na Béthel. Akoli 1 000 ayeke na terê ti Jonathan+ na Guibéah,+ kodro ti azo ti Benjamin. Lo tene na tanga ti azo ni ti kiri, zo oko oko na yâ ti tente ti lo. 3 Jonathan afâ aturugu ti aPhilistin+ so ayeke na Guéba,+ na aPhilistin amä tënë ni. Saül amû yanga si a hûru didi+ na yâ ti kodro ni kue, lo tene: “Zia aHébreu amä!” 4 Azo ti Israël kue amä tënë so: “Saül afâ ambeni turugu ti aPhilistin, na fadeso Israël aga tongana mbeni ye so afun sioni na hôn ti aPhilistin.” Tongaso, a iri azo ni ti gue na peko ti Saül na gbata ti Guilgal.+

5 A-Philistin nga abungbi terê ti ala ti tiri na Israël. Ala yeke na apuse ti mbarata 30 000, aturugu ti kpengo na mbarata 6 000 nga na ambeni turugu gbani gbani tongana mbutu ti yanga ti ngu-ingo.+ Ala sara camp ti ala na Micmash, na mbage ti est ti Beth-Aven.+ 6 Azo ti Israël abâ so ala yeke na yâ ti ye ti ngangu, ndali ti so awato ti ala ayeke pusu nduru nduru na ala; tongaso, ala honde terê ti ala na yâ ti adû ti tênë,+ na yâ ti akota dû, na gbe ti akota tênë, na yâ ti ada na gbe ti sese* nga na yâ ti adû so a zi ti bata ngu dä. 7 Ambeni Hébreu afâ même Ngu ti Jourdain, ala gue na sese ti Gad nga na Galaad.+ Me Saül angbâ na Guilgal, nga terê ti azo kue so amû peko ti lo ayeke dö. 8 Lo ku Samuel lango mbasambala juska ngoi so Samuel afa na lo; me Samuel ade ti si na Guilgal pëpe, nga azo ni akomanse ti zia Saül ti hon. 9 Saül atene: “Ala ga na nyama ti zongo na sandaga ni nga na anyama ti sandaga ti beoko ni.” Tongaso, lo mû nyama ti zongo na sandaga ni, lo zö ni na Nzapa.+

10 Gï so lo hunzi ti zö nyama ti sandaga ni awe, Samuel asi. Saül amû devant ti Samuel, na Saül airi tufa na ndö ti lo. 11 Samuel ahunda lo, atene: “Nyen la mo sara so?” Saül akiri tënë, atene: “Mbi bâ so azo ni akomanse ti zia mbi ti hon,+ nga mo si na yâ ti ngoi so mo fa so pëpe. Na ndö ni, aPhilistin ayeke bungbi terê ti ala na Micmash.+ 12 Tongaso, mbi tene na yâ ti bê ti mbi, mbi tene: ‘A-Philistin ayeke ga ti sara bira na mbi na Guilgal, nga ade mbi sara mbeni ye ti nzere na lê ti* Jéhovah pëpe.’ Ni la mbi bâ gbä mbi zö sandaga ni.”

13 Na mango tënë so, Samuel atene na Saül: “Mo sara ye tongana zo so li ti lo ayeke dä pëpe. Mo bata commandement so Jéhovah Nzapa ti mo amû na mo so pëpe.+ Tongana fade mo bata ni, ka Jéhovah ayeke sara si mo ngbâ ti lë gbia lakue na ndö ti azo ti Israël. 14 Me ti fadeso, royaume ti mo ayeke ngbâ lakue lakue pëpe.+ Jéhovah ayeke gi mbeni zo so bê ti lo aye lo,+ na Jéhovah ayeke sara si lo lë gbia na ndö ti azo ti lo,+ ndali ti so mo ke ti mä yanga ti Jéhovah.”+

15 Na pekoni, Samuel alondo na Guilgal, lo gue na Guibéah, kodro ti azo ti Benjamin. Saül adiko wungo ti azo ni, na azo so angbâ na lo ayeke akoli 600.+ 16 Saül na molenge ti lo Jonathan nga na azo so angbâ na ala aduti na Guéba,+ kodro ti azo ti Benjamin. A-Philistin asara camp ti ala na Micmash awe.+ 17 Aturugu ti aPhilistin asigi, ala kangbi terê ti ala na groupe ota. Groupe oko amû lege so ague na Ophrah, ti gue na sese ti Shual. 18 Mbeni groupe ni amû lege so ague na Beth-Horon;+ ota groupe ni amû lege so ague na yanga ti sese so abâ ndo na mbage ti popo-hoto ti Zéboïm, na mbage ti benyama.

19 Na yâ ti kodro ti Israël kue, mbeni zo ti pikango ndao ayeke dä pëpe, ndali ti so aPhilistin atene: “A yeke nzoni a duti tongaso, si aHébreu asara épée wala likongo pëpe.” 20 Tongana azo ti Israël aye ti za yanga ti akpoka ti acharrue ti ala, akângâ ti ala, adö ti ala nga na azembe ti ala, a lingbi ala gue na aPhilistin kâ si ala sara ni. 21 Ngere ti zango yanga ti akpoka ti acharrue, ti akângâ, ti aye ti kua so yanga ni ayeke ota, ti adö nga na ngere ti ziango wen na yanga ti saworo ayeke pim* oko. 22 Na lango ti bira ni, épée wala likongo ayeke pëpe na maboko ti azo so ayeke na terê ti Saül nga na Jonathan;+ gï Saül na molenge ti lo Jonathan la ayeke na aye ti bira.

23 Ambeni turugu* ti aPhilistin asigi ague na lege so ahon na yâ ti popo-hoto ni ti gue na Micmash.+