Jonas
3 Na pekoni, Jéhovah akiri asara tënë na Jonas ti fani use ni, lo tene:+ 2 “Mo londo, mo gue na Ninive,+ kota gbata so, na mo to mbela na azo ni na tënë so mbi tene na mo so.”
3 Tongaso, Jonas alondo lo gue na Ninive+ alingbi na tënë ti yanga ti Jéhovah.+ Ninive ayeke lani mbeni gbata so akono mingi,* ti fâ yâ ni na gere zo ayeke tambela lango ota. 4 Jonas alï na yâ ti gbata ni; so lo yeke tambela lango oko, lo yeke to mbela, lo tene: “A ngbâ gï lango 40 ti tene a futi gbata ti Ninive.”
5 Azo ti Ninive angbâ amä na bê na Nzapa,+ ala to mbela na tënë ti mungo jeûne nga ala yü bongo ti vundu, a londo na akete zo ti si na akota zo na popo ti ala, ambakoro na amaseka. 6 Tongana tënë ni atï na mê ti gbia ti Ninive, lo londo na ndö ti trône ti lo, lo zi bongo ti lo ti gbia na terê ti lo, lo yü bongo ti vundu na lo duti na yâ ti mburu ti wâ. 7 Na ndö ni, lo mû yanga si a to mbela na yâ ti Ninive kue, a tene:
“Mbela so alondo na gbia nga na akota zo ti kodro ni atene: A lingbi zo wala nyama, bagara wala taba ate ye oko pëpe. A lingbi ala te kobe pëpe nga ala nyon ngu pëpe. 8 Zia azo na anyama kue ayü bongo ti vundu. A yeke nzoni ala sambela Nzapa ngangu, na ala zia lege ti aye ti sioni so ala sara, ala zia nga lege ti aye ti ngangu so ala yeke sara na azo. 9 Hinga ape tâ Nzapa ayeke changé* ye so lo ye ti sara so, na lo zia lege ti ngonzo ti lo so alondo ngangu so, tongaso si e kui pëpe.”
10 Na ngoi so tâ Nzapa abâ ye so ala sara, so ala zia lege ti aye ti sioni so ala sara,+ lo zia lege ti* ye ti vundu so lo tene lo yeke ga na ni na ndö ti ala so, na lo ga na ni pëpe.+