1 aGbia

15 Na yâ ti ngu 18 ni ti komandema ti Gbia Jéroboam+ molenge ti Nébat, Abijam aga gbia na ndö ti azo ti Juda.+ 2 Lo komande na Jérusalem ngu ota. Iri ti mama ti lo ayeke Maacah,+ tarä ti Abishalom. 3 Lo sara a-oko siokpari so babâ ti lo asara lani. Nga lo sara pëpe na Jéhovah Nzapa ti lo na bê ti lo kue,* tongana ti kotara ti lo David. 4 Me ndali ti David,+ Jéhovah Nzapa ti lo azia molenge ti lo gbia na peko ti lo, tongaso si mbeni lampe angbâ ti za na Jérusalem,+ na Jérusalem angbâ lakue. 5 David asara lani ye so ayeke na lege ni na lê ti Jéhovah. Na yâ ti gigi ti lo kue, lo hon nde pëpe na ye kue so Nzapa ahunda na lo ti sara. Sioni oko so lo sara ayeke gï tënë ti ye so lo sara na Urie, zo ti mara ti Heth.+ 6 Na yâ ti gigi ti Roboam kue, bira ayeke na popo ti lo na Jéroboam.+

7 Âdu ti tanga ti mbaï ti Abijam, tënë ti aye kue so lo sara, eskê a sû ni na yâ ti mbeti ti mbaï ti agbia ti Juda ape?+ Bira ayeke nga lani na popo ti Abijam na Jéroboam.+ 8 Na pekoni Abijam akui, na lo wu terê ti lo tongana ti akotara ti lo. A lu lo na Gbata ti David; na molenge ti lo Asa+ aga gbia na peko ti lo.+

9 Na yâ ti ngu 20 ni ti komandema ti Gbia Jéroboam na ndö ti azo ti Israël, Asa aga gbia na ndö ti azo ti Juda. 10 Lo komande na Jérusalem ngu 41. Iri ti âta ti lo ti wali ayeke Maacah,+ tarä ti Abishalom. 11 Asa asara ye so ayeke na lege ni na lê ti Jéhovah,+ tongana ti kotara ti lo David. 12 Akoli so ayeke na yâ ti temple si ayeke zia terê ti ala na amba ti ala akoli si ala lango na ala+ so, lo tomba ala na yâ ti kodro ni, nga lo zi afungo yanda* so akotara ti lo asara.+ 13 Asa azi même Maacah,+ âta ti lo, na kota ndo ti lo ti mama ti kodro,* ndali ti so lo sara mbeni yanda so gï na bango ni bê ti zo ason. Lo sara ni ti tene azo avoro ni legeoko na yongoro yanda.* Asa adë yanda so na sese,+ na lo zö ni na yâ ti Popo-hoto ti Cédron.+ 14 Me ando so ayeke na nduzu angbâ.+ Ye oko, na yâ ti gigi ti Asa kue, lo sara na Jéhovah na bê ti lo kue.* 15 Lo mû argent, lor nga na akungba nde nde so lo na babâ ti lo azia ni nde ndali ti kua ti Nzapa, lo ga na ni na yâ ti da ti Jéhovah.+

16 Bira ayeke lakue na popo ti Asa na Baasha,+ gbia ti Israël. 17 Baasha, gbia ti Israël, aga na bira na terê ti azo ti Juda. Lo komanse ti leke peko* ti gbata ti Ramah+ ti kanga lege si zo asigi na yâ ti gbata ni pëpe nga si zo ague na ndo ti* Asa gbia ti Juda pëpe.+ 18 Tongana Asa abâ ye so, lo mû tanga ti argent na lor so angbâ na yâ ti ando so a bata mosoro dä na da ti Jéhovah nga na ti da* ti gbia, lo mû na awakua ti lo. Gbia Asa atokua ala na Ben-Hadad, gbia ti Syrie+ so asara kodro na Damas. Ben-Hadad ayeke molenge ti Tabrimmon, so ayeke molenge ti Hézion. Asa atene na lo: 19 “Mbeti ti siriri* ayeke na popo ti mbi na mo, tongana ti so a yeke na popo ti babâ ti mbi na babâ ti mo. Mbi tokua na mo argent na lor tongana matabisi. Tongaso, mo ga, mo buba yâ ti mbeti ti siriri* so ayeke na popo ti mo na Baasha, gbia ti Israël, si lo zia mbi.” 20 Ben-Hadad ayeda na tënë so Gbia Asa atene, na lo tokua amokonzi ti aturugu ti lo ti londo na bira na terê ti agbata ti Israël. Ala futi gbata ti Ijon,+ ti Dan,+ ti Abel-Beth-Maacah, ndo kue so ayeke na yâ ti Kinnéreth nga na sese ti azo ti mara ti Nephtali. 21 Tongana Baasha amä tënë ni, hio lo zia lege ti lekengo peko* ti gbata ti Ramah, na lo ngbâ ti sara kodro na Tirzah.+ 22 Gbia Asa airi azo ti Juda kue, lo zia zo oko pëpe, na azo ni amû atênë nga na akota keke so Baasha azia na Ramah ti leke na peko ti gbata ni, ala gue na ni na Gbia Asa si lo leke peko* ti gbata ti Guéba+ so ayeke na sese ti azo ti mara ti Benjamin nga na gbata ti Mizpah.+

23 Âdu ti tanga ti mbaï ti Asa, tënë ti angangu ye kue so lo sara, tënë ti aye kue so lo sara nga na agbata so lo leke pekoni,* eskê a sû ni na yâ ti mbeti ti mbaï ti agbia ti Juda ape? Me na ngoi so lo ga mbakoro, mbeni kobela asara lo na gere ti lo.+ 24 Na pekoni, Asa akui, na lo wu terê ti lo tongana ti akotara ti lo. A lu lo na ndo so a lu ala dä na yâ ti Gbata ti David, kotara ti lo. Molenge ti lo Josaphat+ aga gbia na peko ti lo.

25 Na yâ ti use ngu ti komandema ti Asa gbia ti Juda, Nadab+ molenge ti Jéroboam aga gbia na ndö ti azo ti Israël, na lo komande ngu use. 26 Lo ngbâ ti sara ye so ayeke sioni na lê ti Jéhovah. Lo sara a-oko sioni ye so babâ+ ti lo asara lani, si lo pusu azo ti Israël ti sara siokpari.+ 27 Baasha molenge ti Ahijah, so ayeke hale ti Issacar, amä terê na ambeni zo ti sara sioni na Nadab. Baasha afâ Nadab na yâ ti gbata ti Guibbéthon,+ so ayeke na yâ ti kodro ti aPhilistin, na ngoi so Nadab na aturugu ti Israël kue asara camp na terê ti Guibbéthon. 28 Baasha afâ Nadab na yâ ti ota ngu ti komandema ti Asa, gbia ti Juda, na lo ga gbia na peko ti lo. 29 Gï so lo ga gbia, lo fâ ahale ti Jéroboam kue. Lo zia mbeni hale ti Jéroboam angbâ na fini pëpe. Lo futi ala kue, a lingbi na tënë so Jéhovah atene na wakua ti lo Ahijah, zo ti kodro ti Shilo,+ si lo fa peko ni lani. 30 Ala kui ndali ti aye ti sioni so Jéroboam asara, si lo pusu azo ti Israël ti sara siokpari, nga ndali ti so lo son bê ti Jéhovah Nzapa ti Israël ngangu. 31 Âdu ti tanga ti mbaï ti Nadab, tënë ti aye kue so lo sara, eskê a sû ni na yâ ti mbeti ti mbaï ti agbia ti Israël ape? 32 Bira ayeke lakue na popo ti Asa na Baasha, gbia ti Israël.+

33 Na yâ ti ota ngu ti komandema ti Asa gbia ti Juda, Baasha molenge ti Ahijah aga gbia na Tirzah na ndö ti azo ti Israël kue, na lo komande ngu 24.+ 34 Me lo ngbâ ti sara ye so ayeke sioni na lê ti Jéhovah.+ Lo sara a-oko sioni ye so Jéroboam asara lani, si lo pusu azo ti Israël ti sara siokpari.+