Esdras

3 Tongana nze mbasambala ni+ asi, na azo ti Israël ayeke na yâ ti agbata ti ala, ala bungbi terê ti ala tongana zo oko na Jérusalem. 2 Jéshua+ molenge ti Jéhozadac na amba ti lo aprêtre nga na Zorobabel+ molenge ti Shéaltiel+ na aita ti lo alondo ala leke gbalaka ti Nzapa ti Israël, ti tene ala yâa na ndö ni asandaga so a zö ni agbi kue, tongana ti so a sû na yâ ti Ndia ti Moïse,+ zo ti tâ Nzapa.

3 Tongaso, ala sara gbalaka ni na ngbene ndo ni, atâa so mbeto ti azo ti akodro so angoro ala asara ala.+ Ala komanse ti yâa na Jéhovah asandaga so a zö ni agbi kue na ndö ti gbalaka ni, asandaga so ala yeke zö na ndapre na so ala yeke zö na lakui.+ 4 Na pekoni ala sara Matanga ti Akpangba* alingbi na tënë so a sû ni na yâ ti Ndia.+ Lâ na lâ ala yeke yâa asandaga so a zö ni agbi kue alingbi na wungo ni so a hunda ti yâa ni lango oko oko.+ 5 Na pekoni, ala yâa asandaga so a zö ni agbi kue,+ so a yeke zö ka ni lakue; ala yâa nga asandaga ndali ti fini nze,+ asandaga ndali ti ngoi ti amatanga+ so a zia ni nde ndali ti Jéhovah nga na asandaga ti azo kue so ayeda ti mû sandaga na Jéhovah na bê ti ala wani.+ 6 Ti londo na kozo lango ti nze mbasambala ni,+ ala komanse ti yâa na Jéhovah asandaga so a zö ni agbi kue, atâa so ade a zia gere ti temple ti Jéhovah pëpe.

7 Ala mû nginza na azo ti dengo tênë+ nga na azo so ahinga ti sara kua ti maboko nzoni.+ Ala mû nga aye ti tengo ni na aye ti nyongo ni nga na mafuta na azo ti kodro ti Sidon na azo ti Tyr ti tene ala ga na akeke ti cèdre. Ala londo na ni na Liban na ala ga na ni na lê ti ngu-ingo juska na Joppé,+ a lingbi na yanga so Cyrus, gbia ti Perse, amû.+

8 Na yâ ti use ngu ni, na peko ti so ala kiri na da ti tâ Nzapa na Jérusalem, na use nze ni, Zorobabel molenge ti Shéaltiel, Jéshua molenge ti Jéhozadac na tanga ti aita ti ala, aprêtre na azo ti mara ti Lévi nga na ala kue so alondo na ngbâa+ si akiri na Jérusalem, akomanse ti sara kua ni. Ala mû azo ti mara ti Lévi so ngu ti ala alondo na ngu 20 ti gue na ni, ala zia ala ti bâ ndo na ndö ti kua ti da ti Jéhovah. 9 Tongaso, Jéshua na amolenge ti lo na aita ti lo, na Cadmiel nga na amolenge ti lo, ahale ti Juda, ala bungbi oko ti bâ ndo na ndö ti azo so ayeke sara kua ti da ti tâ Nzapa, ala na amolenge ti Hénadad,+ amolenge ti ala nga na aita ti ala, azo ti mara ti Lévi.

10 Tongana azo ti lekengo da ni ahunzi ti zia gere ti temple ti Jéhovah awe,+ aprêtre ayü abongo ti ala ti kua, ala mû atrompette,+ na azo ti mara ti Lévi, amolenge ti Asaph, amû acymbale na ala londo ti gonda Jéhovah alingbi na lege so David gbia ti Israël afa ândö.+ 11 Tongaso, ambeni ahe bia, na ambeni aye gbe ni+ na gondango Jéhovah nga na kiringo singila na lo, ala tene so “lo yeke nzoni; tâ ndoye ti lo na mbage ti azo ti Israël angbâ lakue lakue.”+ Azo ni kue adekongo ngangu ti gonda Jéhovah ngbanga ti so a zia gere ti da ti Jéhovah awe. 12 Aprêtre ni mingi, azo ti mara ti Lévi, nga na amokonzi ti ahale ti akotara ti ala, (ambakoro so abâ da ni ândö so),+ atoto na kota go na ngoi so ala bâ lani so a yeke zia gere ti da ni, na oko ngoi ni ambeni adekongo na kota ngia.+ 13 Tongaso, azo alingbi ti hinga dekongo ti toto na dekongo ti ngia ni pëpe, ngbanga ti so azo ni adekongo ngangu mingi na tongana zo angbâ ayo mingi lo yeke mä go ti ala.