2 Chronique
12 Kete na peko ti so komandema ti Roboam aluti nzoni nga lo kpengba awe,+ lo na azo ti Israël kue adö Ndia ti Jéhovah azia.+ 2 Na yâ ti oku ngu ti komandema ti Gbia Roboam, Shishac+ gbia ti Égypte aga na bira na terê ti azo ti Jérusalem, ndali ti so azo ti Israël ayeke be-ta-zo na Jéhovah pëpe. 3 Shishac aga na apuse ti mbarata 1 200, azo 60 000 so ayeke kpe na ambarata nga na gbâ ti aturugu so zo alingbi ti diko wungo ti ala pëpe so lo na ala alondo na Égypte si aga: a yeke azo ti Libye, ti Sukki nga na ti Éthiopie.+ 4 Lo mû agbata ti Juda so ngangu gbagba ayeke na terê ni ngbii lo si na Jérusalem.
5 Prophète Shémaïah+ ague na ndo ti Roboam nga na amokonzi ti Juda so abungbi terê na Jérusalem ndali ti so ala sara mbeto ti Shishac. Lo tene na ala, lo tene: “Jéhovah atene: ‘So ala dö mbi ala zia, mbi nga kue mbi zia ala+ na maboko ti Shishac.’” 6 Na mango tënë so, amokonzi ti Israël nga na gbia asara terê ti ala kete+ na ala tene: “Jéhovah ayeke mbilimbili.” 7 Tongana Jéhovah abâ so ala sara terê ti ala kete, Jéhovah atene na Shémaïah: “Ala sara terê ti ala kete awe. Mbi yeke futi ala pëpe;+ na yâ ti kete ngoi mbi yeke sö ala. Mbi yeke tuku ngonzo ti mbi na ndö ti Jérusalem na lege ti Shishac pëpe. 8 Me ala yeke ga azo ti kua ti lo, tongaso si ala hinga kangbi so ayeke na popo ti sarango kua na mbi na sarango kua na agbia* ti ambeni kodro.”
9 Tongaso, Shishac gbia ti Égypte aga na bira na terê ti azo ti Jérusalem. Lo mû amosoro ti da ti Jéhovah+ nga na ti da* ti gbia. Lo mû aye kue, même avala ti lor so Salomon asara.+ 10 Tongaso, Gbia Roboam asara avala ti cuivre na place ni na lo mû ni na amokonzi ti agarde* si ala bata ni, ala so ayeke bata yanga ti da ti gbia. 11 Lakue tongana gbia aga na da ti Jéhovah, agarde ayeke gue na yâ ti kubu so a zia ndali ti ala, ala mû ni, na pekoni ala yeke kiri na ni kâ. 12 So gbia asara terê ti lo kete, a sara si Jéhovah azia ti sara ngonzo na terê ti lo,+ na lo futi ala kue kue kue ape.+ Na ndö ni, a bâ nga anzoni ye so ambeni zo ti Juda ayeke sara.+
13 Gbia Roboam asara si komandema ti lo aluti nzoni na Jérusalem na lo ngbâ ti komande. Roboam ayeke na ngu 41 na ngoi so lo ga gbia, na lo komande ngu 17 na Jérusalem, gbata so Jéhovah asoro ni na popo ti amara ti Israël kue ti zia iri ti lo dä. Iri ti mama ti lo ayeke Naamah, zo ti mara ti Ammon.+ 14 Me lo sara ye so ayeke sioni, ndali ti so lo mû bê ti lo kue pëpe ti gi Jéhovah.+
15 Âdu ti tanga ti mbaï ti Roboam, ti londo na tongo nda ni juska na kongo nda ni, a sû ni na yâ ti molongo ti iri ti akotara na popo ti atënë ti prophète Shémaïah+ nga na ti Iddo,+ zo ti fango na gbia peko ti avision, ni la ape? Bira ayeke lani lakue na popo ti Roboam na Jéroboam.+ 16 Na pekoni, Roboam akui, na lo wu terê ti lo tongana ti akotara ti lo. A lu lo na terê ti akotara ti lo na yâ ti Gbata ti David.+ Molenge ti lo Abijah+ aga gbia na peko ti lo.