Zacharie

14 “Mbeni lango ayeke ga so ayeke lâ ti Jéhovah; na ngoi ni so, aye ti mo* so a gbu ni na ngangu, a yeke kangbi yâ ni na lê ti mo. 2 Mbi yeke sara si amara kue abungbi oko ti sara bira na mo Jérusalem. A yeke mû gbata ni, a yeke mû aye na yâ ti ada nga a yeke lango na awali na ngangu. A yeke mû ndambo ti azo ti gbata ni ti gue na ala na kodro-wande, me tanga ti azo so angbâ na yâ ni, a yeke hon na ala pëpe.

3 “Jéhovah ayeke gue ti sara bira na amara ni so,+ tongana ti so lo yeke sara ka na ngoi ti bira.+ 4 Na ngoi ni so, gere ti lo ayeke luti na ndö ti Hoto ti akeke ti olive,+ so abâ ndo lê na lê na Jérusalem na mbage ti est. Yâ ti Hoto ti akeke ti olive ni ayeke kangbi use, ti londo na est* ti gue na ouest.* A yeke sara si kota popo-hoto abâ gigi. Ndambo ti hoto ni ayeke gue na mbage ti nord, na tanga ti ndambo ni ayeke gue na mbage ti sud. 5 Ala yeke kpe ti gue na yâ ti popo-hoto so ayeke na milieu ti ahoto ti mbi, ndali ti so popo-hoto ni ayeke gue juska na kodro ti Azel. A lingbi ala kpe, tongana ti so ala kpe lani na ngoi so sese ayengi na ngoi ti Ozias gbia ti Juda.+ Jéhovah Nzapa ti mbi ayeke ga, lo na ala kue so ayeke abe-vulu.+

6 “Na lango ni so, pendere lumière ayeke duti dä pëpe,+ aye kue ayeke kpengba.* 7 Azo ayeke hinga so lango ni so ayeke ti Jéhovah.+ Zo ayeke hinga pëpe wala a yeke kota lâ wala bï; même na lakui, lumière ayeke duti dä. 8 Na lango ni so, angu,+ so aye so ayeke na fini ayeke na yâ ni, ayeke sigi na Jérusalem ti sua.+ Ndambo ni ayeke sua ti gue na mbage ti ngu-ingo so ayeke na est,*+ tanga ti ndambo ni ayeke sua ti gue na ngu-ingo so ayeke na ouest.*+ Ye so ayeke si na ngoi ti ndowa nga na ngoi ti dê. 9 Jéhovah ayeke duti ande Gbia na ndö ti sese kue.+ Na lango ni so, Jéhovah ayeke duti gï oko,+ nga iri ti lo ayeke duti gï oko.+

10 “Kodro ni kue ayeke ga tongana ndo so a iri ni Arabah,+ ti londo na Guéba+ ti gue na Rimmon+ so ayeke na sud ti Jérusalem. Jérusalem ayeke londo, na azo ayeke sara kodro dä,+ ti londo na yanga ti gbagba so a iri ni Yanga-ti-gbagba-ti-Benjamin+ ti gue na ndo so Kozo yanga ti gbagba ayeke dä; a gue nga juska na yanga ti gbagba so a iri ni Yanga-ti-gbagba-ti-Coin. A londo nga na ndo so a iri ni Tour ti Hananel+ a gue juska na adû ti sarango na vin* ti gbia. 11 Azo ayeke sara kodro dä; a yeke kiri ti dë ngbanga ti kuâ na ndö ti gbata ni pëpe,+ na azo so asara kodro na Jérusalem ayeke duti na siriri.+

12 “Akobela so Jéhovah ayeke ga na ni na ndö ti azo kue so alondo na bira na terê ti Jérusalem ayeke so:+ Nyama ti terê ti ala ayeke fun na ngoi so ala yeke luti na nduzu, lê ti ala ayeke fun na yâ ti dû ni nga langue ti ala ayeke fun na yâ ti yanga ti ala.

13 “Na lango ni so, Jéhovah ayeke sara si li ti azo ni aga kirikiri. Zo oko oko ayeke gbu maboko ti mba ti lo, na ala yeke sara sioni na mba.*+ 14 Juda nga kue ayeke bi terê ti lo na yâ ti bira so a yeke sara na terê ti Jérusalem. Ala yeke bungbi amosoro ti amara kue so angoro ala: gbâ ti lor, argent nga na bongo.+

15 “Amara ti akobela so ayeke ga nga na ndö ti ambarata, avuko kororo, achameau, akororo nga na anyama kue so ayeke na yâ ti acamp.

16 “Zo kue so angbâ na popo ti amara kue so aga na bira na terê ti Jérusalem, ngu na ngu+ lo yeke gue ti kuku na gbe ti* Gbia, Jéhovah ti aturugu,+ na lo yeke sara Matanga ti Akpangba.*+ 17 Me tongana mbeni mara ague pëpe na Jérusalem ti kuku na gbe ti Gbia, Jéhovah ti aturugu, ngu ayeke pika na ndö ti ala pëpe.+ 18 Tongana azo ti Égypte aga pëpe na yâ ti gbata ni, ngu ayeke pika na ndö ti ala pëpe. Jéhovah ayeke ga na a-oko kobela so na ndö ti amara so aga pëpe ti sara Matanga ti Akpangba. 19 A yeke tongaso la a yeke punir azo ti Égypte ndali ti siokpari ti ala nga na amara kue so aga pëpe ti sara Matanga ti Akpangba.

20 “Na lango ni so, a yeke sara mbeti so na terê ti acloche so a kanga na terê ti ambarata: “Jéhovah ayeke Lo so ayeke nzoni-kue.”+ Atawa ti tongo na ye*+ so ayeke na yâ ti da ti Jéhovah ayeke duti tongana adû ti sembe+ so ayeke na devant ti gbalaka. 21 Tawa* oko oko kue ti tongo na ye so ayeke na Jérusalem nga na Juda ayeke ga ye so a zia ni nde ndali ti kua ti Jéhovah ti aturugu. Azo kue so ayeke ga ti mû sandaga ayeke mû ambeni tawa ni ti kporo ye dä. Na lango ni so, a yeke wara mbeni zo ti Canaan* na yâ ti da ti Jéhovah ti aturugu pëpe.”+