aJuge

21 Na Mizpah, akoli kue ti Israël adeba yanga ti ala lani,+ ala tene: “Zo oko na popo ti e ayeke mû molenge ti lo ti wali na mbeni koli ti mara ti Benjamin ti ga wali ti lo pëpe.”+ 2 Tongaso, azo ti Israël ague na Béthel,+ ala duti kâ na gbele tâ Nzapa juska lakui; ala dekongo, na ala toto ngangu mingi. 3 Nga, ala yeke dema, ala tene: “Jéhovah Nzapa ti Israël, ndani nyen si mara ti ye so asi na Israël? Ndani nyen si mbeni mara oko amanke na Israël laso?” 4 Na ndade ni, azo ni alondo hio, ala leke mbeni gbalaka kâ ti yâa na Nzapa asandaga so a zö ni agbi kue na ti mû asandaga ti beoko.+

5 Na pekoni, azo ti Israël atene: “Na popo ti amara kue ti Israël, azo wa la aga ti bungbi na e ge na gbele Jéhovah ape?” Ala hunda ndo tongaso ndali ti so ala deba yanga ti ala, ala tene zo kue so aga na gbele Jéhovah na Mizpah pëpe, a yeke fâ lo. 6 Vundu asara azo ti Israël ngbanga ti ye so asi na aita ti ala azo ti Benjamin. Ala tene: “Laso, a zi mbeni mara oko na Israël awe. 7 So e deba na iri ti Jéhovah ti tene e mû amolenge ti e ti wali ti ga awali ti ala pëpe so,+ e yeke sara tongana nyen ti wara awali ndali ti akoli so angbâ so?”+

8 Azo ahunda, atene: “Na popo ti amara ti Israël, azo wa la aga na gbele Jéhovah na Mizpah ape?”+ A ga ti bâ so zo oko ti gbata ti Jabesh-Galaad aga pëpe na yâ ti camp so congrégation ni ayeke dä. 9 Tongana a diko azo ni, a bâ so mbeni zo ti gbata ti Jabesh-Galaad ayeke na popo ti ala pëpe. 10 Tongaso, azo so abungbi atokua angangu koli 12 000 kâ. Ala mû yanga na ala, atene: “Ala gue afâ azo ti Jabesh-Galaad na épée, même awali na amolenge.+ 11 Ye so a yeke nzoni ala sara ni ayeke so: Akoli ni kue nga na awali kue so abungbi na koli awe, ala fâ ala.” 12 Na popo ti azo ti Jabesh-Galaad, ala wara amaseka-wali 400 so ade ti hinga koli pëpe. Tongaso, ala ga na ala na yâ ti camp so ayeke na Shilo+ so ayeke na sese ti Canaan.

13 Azo kue so abungbi atokua ndo na azo ti Benjamin so ayeke na ndö ti tênë ti Rimmon,+ ala hunda ti duti na siriri na ala. 14 Tongaso, azo ti Benjamin ayeda ti kiri na ndo ti ala na ngoi ni so. Azo ni amû na ala awali ti Jabesh-Galaad+ so a bata ala na fini, me wungo ti awali ni alingbi na ala kue pëpe. 15 Vundu asara azo ni ngbanga ti ye so asi na azo ti Benjamin,+ ndali ti so Jéhovah asara si kangbi aduti na popo ti amara ti Israël. 16 A-ancien so ayeke na popo ti azo so abungbi atene: “So a fâ awali kue ti azo ti mara ti Benjamin awe so, e yeke sara tongana nyen ti mû awali na akoli so angbâ so?” 17 Ala tene: “Azo ti Benjamin so angbâ adoit ti wara héritage, si mbeni mara ti Israël ahunzi pëpe. 18 Me e lingbi ti mû amolenge ti e na ala ti ga awali ti ala pëpe, ndali ti so e azo ti Israël e deba yanga, e tene: ‘Deba ayeke na ndö ti zo so amû mbeni wali na zo ti Benjamin ti ga wali ti lo.’”+

19 Na pekoni, ala tene: “Ngu oko oko, a yeke sara matanga ti Jéhovah na Shilo,+ so ayeke na mbage ti nord ti Béthel; a yeke na est ti kota lege so alondo na Béthel ti si na Sichem, nga a yeke na mbage ti sud ti Lébonah.” 20 Ni la ala mû yanga na akoli ti mara ti Benjamin, atene: “Ala gue, ala honde terê ti ala na yâ ti ayaka ti vigne. 21 Na ngoi so ala bâ amaseka-wali* ti Shilo asigi ti dodo na cercle, a yeke nzoni zo oko oko asigi na yâ ti ayaka ti vigne ni, lo gbu mbeni maseka-wali ni ti ga wali ti lo, na pekoni ala kiri na sese ti Benjamin. 22 Tongana ababâ ti awali ni wala aita ti ala ti koli aga adema terê na terê ti e, e yeke tene na ala: ‘Ala sara nzoni bê na e ndali ti akoli ni, ngbanga ti so awali so e gbu na bira, wungo ti ala alingbi na ala kue pëpe,+ nga ala lingbi fade pëpe ti mû awali na ala sân ti tene tënë aduti na li ti ala.’”+

23 Akoli ti mara ti Benjamin asara tongaso, na ala gbu awali na popo ti awali so ayeke dodo, ala hon na ni. Na pekoni, ala kiri na sese so ayeke héritage ti ala, ala kiri ala leke agbata ti ala,+ ala sara kodro dä.

24 Na ngoi ni so, azo ti Israël akangbi terê ti ala, zo oko oko ague na yâ ti mara ti lo nga na yâ ti sewa ti lo; ala londo kâ, ala kiri na sese so ayeke héritage ti ala.

25 Na ngoi ni so, gbia ayeke na Israël pëpe.+ Zo oko oko ayeke sara ye so ayeke nzoni na lê ti lo.*