Zo-ti-fa-tene

8 Zo wa la ayeke tongana zo ti ndara zo wa? Zo wa la ahinga ti sara si mbeni kpale akaï* zo wa? Ndara ti zo asara si lê ti lo aza nga asara si face ti lo so lo kpengba ni akpengba encore ape.

2 Mbi tene: “Sara ye alingbi na yanga so gbia amû,+ ndali ti yanga so mo mû na gbele Nzapa.+ 3 Gi ti sigi hio na gbele lo ti hon pëpe.+ Mû mbage ti mbeni ye ti sioni pëpe,+ ndali ti so lo lingbi ti sara ye kue so lo ye, 4 ngbanga ti so tënë so gbia atene awe, lo tene awe.+ Zo wa la apeut ti tene na lo: ‘Nyen la mo yeke sara so?’”

5 Zo so abata commandement ni, sioni ye ayeke wara lo pëpe,+ nga zo so ayeke na bê ti ndara ayeke hinga nzoni ngoi ti sara mbeni ye nga nzoni fason ti bango lege ni.*+ 6 Ti ye oko oko kue, ngoi ni nga fason ti bango lege ni* ayeke dä,+ ndali ti so akpale ti azo ayeke mingi. 7 So zo oko ahinga pëpe ye so ayeke si ande, zo wa la apeut ti fa na lo tongana nyen si ye ni ayeke si?

8 Tongana ti so zo ayeke na ngangu na ndö ti yingo* pëpe wala lo peut pëpe ti kanga lege na yingo ni ti hon, zo oko ayeke na ngangu na ndö ti lango ti kuâ ti lo pëpe.+ Tongana ti so a yeke zia lege pëpe na mbeni zo ti duti yamba na ngoi ti bira, ye ti sioni ayeke zia lege pëpe na azo so ayeke sara ni ti kpe.*

9 Mbi bâ aye so kue, nga mbi zia bê ti mbi na ndö ti kusala oko oko kue so azo asara na gbe ti lâ, na ngoi so komandema ti zo na ndö ti mba ti lo aga gï na sioni* na mba ti lo ni.+ 10 Mbi bâ azo ti sioni so a yeke lu ala, ala so lani ala yeke lï na ndo so ayeke nzoni-kue nga ala yeke sigi dä; me gï hio tongaso, azo ti yâ ti gbata so ala yeke sara aye ni so dä agirisa na ndö ti ala.+ So kue ayeke senge senge.

11 So a punir zo hio pëpe na peko ti ngbanga so a dë na li ti lo ndali ti sioni so lo sara,+ bê ti azo akpengba ti sara gï ye ti sioni.+ 12 Atâa so wasiokpari alingbi ti sara sioni fani ngbangbo oko me lo te gigi, mbi hinga so ye ayeke ga ande nzoni ndali ti azo so akpe mbeto ti tâ Nzapa, ndali ti so ala kpe mbeto ti lo.+ 13 Me ye ayeke ga nzoni pëpe ndali ti zo ti sioni,+ nga gigi ti lo so ayeke tongana gbe ti dê ayeke gue ayo pëpe,+ ndali ti so lo kpe mbeto ti Nzapa pëpe.

14 Mbeni ye so ayeke senge senge* si ayeke si na ndö ti sese ayeke so: A yeke sara ye na azo ti mbilimbili mo bâ mo tene ala sara sioni,+ nga a yeke sara ye na azo ti sioni mo bâ mo tene ala sara ye mbilimbili.+ Mbi tene so ye so kue ayeke senge senge.

15 Ni la mbi tene a yeke nzoni ti duti na ngia,+ ndali ti so tongana zo ate ye, lo nyon ye nga lo sara ngia, mbeni ye ti nzoni ti hon ni na gbe ti lâ ayeke dä pëpe; a yeke nzoni zo asara aye so na ngoi so lo yeke sara kua ngangu na yâ ti alango ti gigi ti lo+ so tâ Nzapa amû na lo na gbe ti lâ.

16 Mbi mû bê ti mbi kue ti wara ndara nga ti bâ akusala kue so azo ayeke sara* na ndö ti sese,+ sân même ti lango na kota lâ wala na bï.* 17 Na pekoni, mbi gbu li na ndö ti akusala kue so tâ Nzapa asara, na mbi bâ so azo apeut ti hinga pëpe nda ti aye so ayeke si na gbe ti lâ.+ Atâa ala sara nyen, ala peut ti hinga ndani pëpe. Même tongana ala tene so ala yeke na ndara ti hinga ni, ala peut ti hinga ndani nzoni pëpe.+