aJuge

7 Na pekoni Gédéon,+ so ti tene Jérubbaal, na azo kue so amû peko ti lo alondo hio na ndapre, ala sara camp ti ala na terê ti li ti ngu ti Harod; camp ti azo ti Madian ayeke na mbage ti nord, na kpangbala ndo so ayeke na yâ ti popo-hoto* so ayeke na terê ti kete hoto ti Moréh. 2 Jéhovah atene na Gédéon: “Wungo ti azo so amû peko ti mo ahon ndö ni; tongana ala ngbâ tongaso, mbi yeke zia azo ti Madian na maboko ti ala pëpe.+ Tongaso pëpe, zo ti Israël oko oko ayeke gonda terê ti lo ahon ti gonda mbi, lo tene: ‘Maboko ti mbi wani la asö mbi.’+ 3 Pardon, mo tene na azo ni: ‘Zo kue so mbeto asara lo si terê ti lo adö, zia lo kiri na yanga-da.’”+ Tongaso, Gédéon atene tënë ni so ti tara azo ni; na azo 22 000 akiri na yanga-da, azo 10 000 la angbâ.

4 Atâa so kue, Jéhovah atene na Gédéon, lo tene: “Azo ni angbâ mingi. Gue na ala na yanga ti ngu si mbi tara bê ti ala kâ na mo. Tongana mbi tene na mo: ‘Lo so ayeke gue na mo’, lo yeke gue; me tongana mbi tene: ‘Lo so ayeke gue na mo pëpe’, lo yeke gue pëpe.” 5 Tongaso, lo na azo ni adescend na yanga ti ngu.

Jéhovah atene na Gédéon: “Zo kue so anyon ngu na langue ti lo tongana ti mbo, mo zia lo nde na azo so akpo genou ti ala na sese si ala nyon ngu.” 6 Wungo ti azo so atö ngu na maboko ti ala si ala nyon ni na langue ti ala ayeke azo 300. Tanga ti azo ni akpo genou ti ala na sese si ala nyon ngu ni.

7 Fadeso Jéhovah atene na Gédéon: “Mbi yeke sö ala na lege ti azo 300 so anyon ngu na langue ti ala; na mbi yeke zia azo ti Madian na maboko ti mo.+ Me zia tanga ti azo ni akiri na yanga-da.” 8 Tongaso, ala mû akungba nga na adidi ti tanga ti azo ni, na lo zia ala ti kiri na yanga-da; gï azo 300 la angbâ na lo. Na gbe ni na yâ ti popo-hoto ni, mo yeke wara camp ti azo ti Madian.+

9 Na bï ni so, Jéhovah atene na Gédéon: “Londo, mo gue mo sara bira na ala, ndali ti so mbi zia ala na maboko ti mo awe.+ 10 Me tongana mbeto asara mo, mû wakua ti mo Purah, ala descend ague na yâ ti camp ni. 11 Mä tënë so ala yeke tene, na pekoni mo yeke wara ngangu* ti gue ti sara bira na ala.” Tongaso, lo na wakua ti lo Purah adescend ague na yanga ti camp ti aturugu ni.

12 Andâ azo ti Madian, azo ti mara ti Amalec nga na azo ti mbage ti Est+ kue amû ndo na yâ ti popo-hoto ni tongana gbâ ti agbadora; a lingbi ti diko wungo ti achameau ti ala pëpe,+ ala yeke gbani gbani tongana mbutu ti yanga ti ngu-ingo. 13 Gédéon asi na terê ti camp ni, na mbeni zo ayeke fa peko ti bango li na mba ti lo, lo tene: “Mbi bâ li ti mbi. Mbi bâ mapa ti orge so ayeke ronde ronde aroulé aga na yâ ti camp ti azo ti Madian. A si na terê ti mbeni tente, a pika ni ngangu mingi si tente ni atï na sese.+ Li ti tente ni atourné na sese, nga yâ ni akungbi kue.” 14 Mba ti lo ni atene: “Ye ni so adoit ti duti gï épée ti Gédéon,+ molenge ti Joash, mbeni zo ti Israël. Nzapa azia azo ti Madian nga na camp ni kue na maboko ti lo awe.”+

15 Gï so Gédéon amä peko ti bango li ni nga na nda ti bango li ni awe,+ lo kuku na sese lo voro Nzapa. Na pekoni, lo kiri na yâ ti camp ti azo ti Israël, lo tene: “Ala londo, ndali ti so Jéhovah azia camp ti azo ti Madian na maboko ti ala awe.” 16 Tongaso, lo kangbi yâ ti azo 300 so na groupe ota; lo mû na zo oko oko didi,+ ta ti sese so yâ ni ayeke senge, na a zia mbeni ye so wâ ayeke za na yanga ni na yâ ni. 17 Lo tene na ala: “Ala bâ mbi, na ala sara gï ye so mbi sara. Tongana mbi si na yanga ti camp ni, a yeke nzoni ala sara gï ye so mbi sara. 18 Tongana mbi na azo kue so amû peko ti mbi e hûru didi, ala nga kue ala hûru didi na terê ti camp ni kue, na ala dekongo: ‘Ndali ti Jéhovah nga ndali ti Gédéon!’”

19 Gédéon na azo 100 so ayeke na terê ti lo asi na yanga ti camp ni na tongo nda ti l’heure ti sinziri ti bê ti bï,* tâ gï na peko ti so a zia asinziri na ndo ti kua ti ala. Ala hûru adidi,+ na ala fâ yâ ti akota ta so ayeke na maboko ti ala.+ 20 Tongaso, agroupe ota so ahûru adidi ni na ala fâ yâ ti akota ta ni. Ala gbu aye so wâ ayeke za na yanga ni so na maboko ti ala ti wali, na ala hûru adidi so ayeke na maboko ti ala ti koli; ala dekongo, ala tene: “Épée ti Jéhovah na ti Gédéon!” 21 Zo oko oko angbâ ti luti na place ti lo na terê ti camp ni, me aturugu ti Madian kue akpe, ala dekongo na ngoi so ala yeke kpe.+ 22 Azo 300 so angbâ ti hûru adidi ni, na Jéhovah atourné épée ti zo oko oko na yâ ti camp ti azo ti Madian na terê ti mba ti lo;+ aturugu ni akpe juska na Beth-Shittah, ala hon ala gue na Zérérah, juska na yanga ti sese ti Abel-Méholah+ nduru na Tabbath.

23 A iri azo ti Israël so ayeke ti mara ti Nephtali, ti Aser nga na ala kue so ayeke ti mara ti Manassé+ ti ga, na ala tomba peko ti azo ti Madian. 24 Gédéon atokua azo ti tene ala gue na ando kue ti Éphraïm so ahoto ayeke dä, ala tene: “Ala ga e gue e tiri na azo ti Madian; e gue e kanga lege na ando so azo ayeke fâ ngu dä juska na Beth-Barah nga na Ngu ti Jourdain.” Tongaso, akoli kue ti mara ti Éphraïm abungbi terê ti ala, ala kanga lege so azo ayeke fâ ngu dä juska na Beth-Barah nga na Ngu ti Jourdain. 25 Ala gbu nga amokonzi use ti azo ti Madian, Oreb na Zéeb; ala fâ Oreb na ndö ti kota tênë ti Oreb,+ na ala fâ Zéeb na place ti dû ti sarango vin ti Zéeb. Ala ngbâ gï ti tomba peko ti azo ti Madian,+ na ala mû li ti Oreb na ti Zéeb, ala gue na ni na Gédéon na ndo so ayeke na terê ti Ngu ti Jourdain.