Apocalypse

21 Na pekoni, mbi bâ mbeni fini yayu na mbeni fini sese;+ ndali ti so ngbene yayu nga na ngbene sese ni ahon awe,+ nga ngu-ingo+ ayeke dä mbeni pëpe. 2 Mbi bâ nga gbata so ayeke nzoni-kue, Fini Jérusalem, so alondo na mbage ti Nzapa na yayu si ayeke descend;+ lo leke terê ti lo tongana mbeni wali so aye ti mû koli fini fini si asara pendere na terê ti lo ti ku na koli ti lo ni.+ 3 Na pekoni, mbi mä mbeni go so asara tënë na kota go na so alondo na mbage ti trône ni, atene: “Bâ, tente ti Nzapa ayeke na azo, Nzapa ayeke sara ande kodro na ala, na ala yeke duti azo ti lo. Nga Nzapa wani ayeke duti ande na ala.+ 4 Lo yeke mbô ande ngu ti lê kue na lê ti ala,+ kuâ ayeke duti ande dä mbeni pëpe;+ mua, wala toto, wala pasi ayeke duti dä mbeni pëpe.+ Angbene ye ni ahon ti ala awe.”

5 Lo so aduti na ndö ti trône ni+ atene: “Bâ, mbi yeke sara si aye kue aga fini.”+ Nga lo tene: “Mo sû atënë so na mbeti, ndali ti so atënë so ayeke atënë so a lingbi ti zia bê dä nga ayeke tâ tënë.” 6 Lo tene na mbi: “A sara aye so awe! Mbi yeke Alpha na Oméga, tongo nda ti ye nga na kongo nda ti ye.+ Zo so nzara ti ngu asara lo, mbi yeke mû ande na lo ngu so alondo na li ti ngu so amû fini na zo nga mbi yeke mû ni na lo senge senge.*+ 7 Zo kue so asö benda, aye so ayeke ga ande ti lo, mbi yeke duti ande Nzapa ti lo na lo yeke ga molenge ti mbi. 8 Me ti azo ti mbeto, azo so mabe amanke ala+ nga na ala so bê ti zo ayeke londo na aye ti saleté so ala yeke na yâ ni, azo ti fango zo,+ azo ti sarango lango-sioni,*+ azo so angbâ na yâ ti sarango yorö, azo ti vorongo ayanda nga na azo ti mvene kue,+ ye so a yeke mû na ala ande ayeke duti na yâ ti lac so wâ nga na soufre ayeke gbi dä.+ So ayeke kuâ ti use ni.”+

9 Mbeni oko ti a-ange mbasambala, so ayeke fade na adû ti sembe mbasambala so asi na tanga ti asioni ye mbasambala ni,+ aga na lo sara tënë na mbi, lo tene: “Ga ge, mbi yeke fa na mo ande wali so amû koli fini fini so, wali ti Molenge ti taba ni.”+ 10 Tongaso, lo gue na mbi na gbe ti ngangu ti yingo, lo zia mbi na ndö ti mbeni kota hoto so ayo na nduzu, na lo fa na mbi gbata so ayeke nzoni-kue, Jérusalem so alondo na mbage ti Nzapa na yayu si ayeke descend+ 11 na ayeke na gloire ti Nzapa.+ Zango ti lo ayeke tongana ti mbeni tênë ti ngangu ngere, tongana tênë ti jaspe so aza si zo alingbi ti bâ ndo na yâ ni kue.+ 12 Gbagba ti gbata ni ayeke kota na ayo na nduzu, na ayanga ni ayeke 12 si a-ange 12 ayeke luti na ayanga ni, na a sû iri ti amara 12 ti amolenge ti Israël na ndö ti ayanga ti gbagba ni. 13 Na mbage ti est, ayanga ti gbagba ni ayeke ota; na mbage ti nord, ayanga ni ayeke ota; na mbage ti sud, ayanga ni ayeke ota; na mbage ti ouest, ayanga ni ayeke ota.+ 14 Atênë ti fondation ti gbagba ti gbata ni ayeke 12, nga a sû iri 12 na ndö ni, iri ti abazengele 12+ ti Molenge ti taba ni.

15 Ange so ayeke sara tënë na mbi agbu na maboko ti lo mbeni sosongo so ayeke na lor si ayeke ye ti mungo na mesure ti ye, ti tene lo mû mesure ti gbata ni, ti ayanga ti gbata ni nga na ti gbagba ti gbata ni.+ 16 Aterê ti gbata ni ayeke osio, na yongo ti aterê ni kue alingbi terê. Lo mû mesure ti gbata ni na sosongo ni: yongo ni alingbi stade 12 000;* yongo ti aterê ni nga yongo ni na nduzu, kue alingbi terê. 17 Lo mû nga mesure ti gbagba ti gbata ni: yongo ni alingbi coudée 144,* a lingbi na ye so zo ayeke mû ti mû na mesure ti ye, si a yeke nga ye so mbeni ange ayeke mû ti mû na mesure ti ye. 18 A sara gbagba ni na tênë ti jaspe,+ na gbata ni ayeke na lor ti nzoni ni so ayeke tongana verre so zo alingbi ti bâ ndo na yâ ni kue. 19 Nga, a zia mara ti atênë ti ngangu ngere nde nde kue na terê ti afondation ti gbagba ti gbata ni ti sara pendere ni: Kozo fondation ti gbagba ni ayeke tênë ti jaspe, use ni ayeke saphir, ota ni ayeke calcédoine, osio ni ayeke émeraude, 20 oku ni ayeke sardonyx, omene ni ayeke sardoine, mbasambala ni ayeke chrysolithe, miombe ni ayeke béryl, gumbaya ni ayeke topaze, bale-oko ni ayeke chrysoprase, bale-oko na oko ni ayeke hyacinthe na bale-oko na use ni ayeke améthyste. 21 Nga, ayanga ti gbagba ti gbata ni 12 kue ayeke aperle 12; a sara yanga ti gbagba oko oko na perle oko. Kota balabala ti gbata ni ayeke na lor ti nzoni ni, tongana verre so zo alingbi ti bâ ndo na yâ ni kue.

22 Mbi bâ mbeni temple na yâ ti gbata ni pëpe, ndali ti so Jéhovah* Nzapa, Lo so ngangu ti lo ahon angangu kue,+ si ayeke temple ti gbata ni, Molenge ti taba ni nga. 23 Na gbata ni ayeke na bezoin ti lâ pëpe wala ti nze pëpe ti su na ndö ni, ngbanga ti so gloire ti Nzapa asu na yâ ni,+ nga lampe ti gbata ni ayeke Molenge ti taba ni.+ 24 Amara ayeke tambela ande na lege ti lumière ti gbata ni,+ si agbia ti sese ayeke ga ande na gloire ti ala na yâ ni. 25 Ayanga ti gbata ni ayeke kanga ande lâ oko pëpe na kota lâ, ndali ti so bï ayeke duti ande kâ pëpe.+ 26 Ala yeke mû ande gloire nga na nengo ti amara ti ga na ni na yâ ni.+ 27 Me mbeni ye so aga sioni awe, mbeni zo so angbâ na yâ ti ye ti saleté nga mbeni zo so angbâ na yâ ti mvene ayeke lï ande dä oko pëpe;+ gï azo so a sû iri ti ala na yâ ti rouleau ti fini, rouleau ti Molenge ti taba ni, si ayeke lï ande dä.+