DEUTÉRONOME

1 Moïse asara tënë na azo ti Israël kue na yâ ti benyama so ayeke nduru na Ngu ti Jourdain, na kpangbala ndo ti désert so abâ ndo lê na lê na Suph, kpangbala ndo ti désert so ayeke na popo ti Paran, Tophel, Laban, Hazéroth na Dizahab. 2 Tongana zo alondo na Horeb lo hon na mbage ti Hoto ti Séir ti si na Cadès-Barnéa,+ lo yeke tambela lango 11. 3 Na yâ ti ngu 40 ni,+ na kozo lango ti nze 11 ni, Moïse atene na azo ti Israël aye kue so Jéhovah amû yanga na lo ti tene na ala. 4 Lo sara ni na peko ti so lo sö benda na ndö ti Sihon+ gbia ti azo ti mara ti Amori so asara kodro na Hesbon, nga na peko ti so lo sö benda na ndö ti Og+ gbia ti Basan so asara kodro na Ashtaroth, na Édréi.+ 5 Na ndo so ayeke nduru na Ngu ti Jourdain, na sese ti Moab, Moïse afa nda ti Ndia so,+ lo tene:

6 “Jéhovah Nzapa ti e asara tënë na e na Horeb, lo tene: ‘Ala sara kodro na ndo so ahoto ayeke dä so alingbi awe.+ 7 Ala londo, ala mû lege ti ndo so ahoto ayeke dä na sese ti azo ti mara ti Amori,+ ala gue na mbage ti akodro kue so ayeke na terê ti ala: Arabah,+ ndo so ahoto ayeke dä, Séphélah, Négueb nga na ando so ayeke na terê ti ngu-ingo.+ Ala gue na sese ti azo ti Canaan, na Liban*+ juska na kota ngu, Ngu ti Euphrate.+ 8 Bâ, sese ni la mbi zia na devant ti ala so. Ala gue, ala mû sese ni so mbi Jéhovah mbi deba na ababâ ti ala, Abraham, Isaac+ na Jacob,+ ti mû ni na ala nga na ahale* ti ala.’+

9 “Na ngoi ni kâ, mbi tene na ababâ ti ala, mbi tene: ‘Mbi oko mbi lingbi ti fa lege na ala pëpe.+ 10 Jéhovah Nzapa ti ala asara si ala wu; na fadeso ala yeke gbani gbani tongana atongoro ti yayu.+ 11 Zia Jéhovah Nzapa ti akotara ti ala asara si ala wu mingi mingi*+ ahon ti fadeso, nga zia lo sara tufa na ndö ti ala tongana ti so lo mû zendo ni lani na ala.+ 12 Ala yeke tongana mbeni nengo kungba; mbi oko mbi lingbi ti yô ala nga ti kanga bê na atënë ti papa ti ala tongana nyen?+ 13 Na yâ ti amara ti ala, ala soro ambeni koli so ayeke na ndara, so lê ti ala ahan nga so ayeke na kode, si mbi zia akoli ni so na ndö ti ala.’+ 14 Ala tene na mbi: ‘Ye so mo tene na e ti sara so ayeke nzoni.’ 15 Tongaso, mbi mû amokonzi ti amara ti ala ni, azo so ayeke na ndara nga na kode so, mbi zia ala na ndö ti ala: mbi zia ambeni ti komande azo ahon saki oko, ambeni ti komande azo ahon ngbangbo oko, ambeni ti komande azo ahon bale-oku, ambeni ti komande azo ahon bale-oko, nga mbi zia ambeni ti komande na ndö ti amara ti ala.+

16 “Na ngoi ni kâ, mbi mû yanga na ajuge ti ala, mbi tene: ‘Tongana ala mä tënë ti aita ti ala so aga na ngbanga awe, ala fâ ngbanga ni mbilimbili,+ atâa a yeke na popo ti zo ti Israël na ita ti lo wala zo ti Israël na wande so asara kodro na lo.+ 17 Ala mû mbage ti mbeni zo na yâ ti ngbanga pëpe.+ Ala mä senge zo na ala mä kota zo nga.+ Ala sara mbeto ti azo pëpe,+ ndali ti so ngbanga ayeke ti Nzapa;+ angangu tënë so akara ala, ala ga na ni na gbe ti mbi si mbi mä ni.’+ 18 Na ngoi ni kâ, mbi fa na ala aye kue so a lingbi ala sara.

19 “Na pekoni, e londo na Horeb e hon na yâ ti kota désert so asara ka zo mbeto mingi so,+ benyama so ala wani ala bâ ni; e mû lege ti ndo ti azo ti mara ti Amori so ahoto ayeke dä,+ tongana ti so Jéhovah Nzapa ti e ahunda na e, e gue ngbii e si na Cadès-Barnéa.+ 20 Na mbi tene na ala, mbi tene: ‘Ala si na ndo ti azo ti mara ti Amori so ahoto ayeke dä so awe, ndo so Jéhovah Nzapa ti e aye ti mû na e. 21 Bâ, Jéhovah Nzapa ti ala azia sese ni na maboko ti ala awe. Ala gue ala mû ni, tongana ti so Jéhovah Nzapa ti akotara ti ala atene na ala.+ Ala sara mbeto pëpe.’

22 “Me ala kue ala ga na mbi, ala tene: ‘Zia e tokua ambeni zo na kodro ni ti tene ala gue kozo ti e ala bembe ndo si ala kiri ala fa na e lege so e lingbi ti mû, nga ti fa na e wala agbata so e yeke si ande dä ayeke tongana nyen.’+ 23 Ye ni anzere na mbi; ni la mbi mû azo 12 na popo ti ala, zo oko na yâ ti mara oko oko.+ 24 Tongaso, ala monté na ndo so ahoto ayeke dä,+ ala gue juska na Popo-hoto* ti Eshcol na ala bembe kodro ni. 25 Ala mû ambeni kobe ti sese ni ala ga na ni na e; ala ga na e asango ti kâ nga ala tene: ‘Sese ni so Jéhovah Nzapa ti e aye ti mû na e so ayeke nzoni.’+ 26 Me ala ke lani ti gue, ala ke yanga so Jéhovah Nzapa ti ala amû na ala.+ 27 Ala diko tënë na yâ ti atente ti ala, ala tene: ‘Jéhovah aye e kete pëpe, ni la lo sigi na e na kodro ti Égypte ti zia e na maboko ti azo ti mara ti Amori, ti futi e. 28 Mara ti ndo ti nyen la e yeke gue dä so! Aita ti e asara si bê ti e awoko kue,*+ ala tene: “Azo ni akono nga ala yo ahon e, agbata ti ala akono mingi, agbagba ni ayo juska na yayu,*+ na e bâ nga amolenge ti Anak+ kâ.”’

29 “Tongaso, mbi tene lani na ala, mbi tene: ‘Zia terê ti ala adö na mbeto pëpe, ala sara mbeto ti ala pëpe.+ 30 Jéhovah Nzapa ti ala la ayeke tambela na devant ti ala. Lo yeke tiri ande ndali ti ala+ tongana ti so lo sara ndali ti ala na Égypte, na ala wani abâ lani na lê ti ala.+ 31 Nga na yâ ti benyama, na ndo kue so ala gue dä juska ti si na ndo so, ala wani ala bâ tongana nyen Jéhovah Nzapa ti ala ayô ala tongana ti so mbeni zo ayô molenge ti lo.’ 32 Atâa atënë so kue, ala ke ti mä na bê na Jéhovah Nzapa ti ala,+ 33 lo so ayeke gue na devant ti ala ti wara mbeni ndo si ala sara camp dä. Na bï, lo gue na devant ti ala na lege ti wâ si ala bâ lege so ala lingbi ti mû, nga na kota lâ, na lege ti mbeni mbinda.+

34 “Na yâ ti tango so kue, Jéhovah amä tënë so ala yeke tene. Tongaso, bê ti lo ason, na lo deba yanga, lo tene:+ 35 ‘Na popo ti asioni zo so, zo oko ayeke bâ ande pëpe pendere sese so mbi deba yanga ti mbi ti mû na akotara ti ala so,+ 36 gï Caleb, molenge ti Jéphunnéh la ayeke bâ ni ande. Mbi yeke mû na lo nga na amolenge ti lo sese so lo tambela lani na ndö ni, ndali ti so lo mû peko ti mbi Jéhovah na bê ti lo oko.+ 37 (Même mbi kue, bê ti Jéhovah ason ngangu na terê ti mbi ngbanga ti ala, si lo tene: “Mo kue, mo yeke si ande kâ pëpe.+ 38 Josué, molenge ti Nun, so aluti na lê ti mo so,+ lo la lo yeke si ande kâ.+ Mo sara si lo kpengba,*+ ndali ti so lo la lo yeke sara ande si azo ti Israël amû sese ni.”) 39 Me amolenge ti ala so ala tene ayeke ga aye so a gbu na bira+ nga amolenge ti ala so fadeso ahinga nzoni wala sioni pëpe so, ala la ayeke si ande kâ; na mbi yeke mû na ala sese ni.+ 40 Âdu ti ala, ala tourné, ala mû lege ti guengo na yâ ti benyama so ayeke na mbage ti Kota Ngu-Bengba.’+

41 “Na mango tënë so, ala kiri tënë na mbi, ala tene: ‘E sara siokpari na terê ti Jéhovah. Ti fadeso, e yeke gue ti sara bira ni tongana ti so Jéhovah Nzapa ti e amû yanga na e ti sara!’ Ni la, zo oko oko akanga aye ti bira ti lo na terê ti lo, na ala bâ ti ala so guengo na ndö ti hoto ni ayeke gï mbeni ye ti ngia.+ 42 Me Jéhovah atene na mbi, atene: ‘Tene na ala: “Ala monté ti sara bira ni pëpe, ndali ti so mbi yeke duti ande na popo ti ala pëpe.+ Me tongana ala gue, awato ti ala ayeke sö benda na ndö ti ala.”’ 43 Tongaso mbi sara tënë na ala, me ala mä pëpe. Ala sara kpengba-li na Jéhovah, ala sara mvene, ala tara ti gue na ndö ti hoto ni. 44 Tongaso, azo ti mara ti Amori, so asara kodro na ndö ti hoto ni, aga ti tiri na ala; azo ti mara ti Amori ni atomba peko ti ala, tongana ti so a-otoro ayeke sara; ala tomba ala kirikiri na Séir juska na Hormah. 45 Na pekoni, ala ga, ala toto na gbe ti Jéhovah, me Jéhovah amä ala pëpe, lo bâ ala bango na lê. 46 Ni la ala sara kodro na Cadès aninga so.

2 “Tongaso, e tourné e mû lege ti guengo na benyama so ayeke na mbage ti Kota Ngu-Bengba, tongana ti so Jéhovah atene na mbi;+ e ngoro na terê ti Hoto ti Séir lango mingi. 2 Na pekoni, Jéhovah atene na mbi, atene: 3 ‘Ala ngoro hoto so a lingbi awe. Fadeso ala gue na mbage ti nord. 4 Mû yanga na azo ni, mo tene: “Ala yeke hon na yanga ti kodro ti aita ti ala, ahale ti Ésaü+ so ayeke sara kodro na Séir.+ So mbeto ti ala ayeke sara ande aita ti ala ni,+ ala sara hange. 5 Ala sara bira na ala pëpe,* ndali ti so atâa kete lê ti sese ti ala, mbi yeke mû ni na ala pëpe, ndali ti so mbi mû Hoto ti Séir na Ésaü.+ 6 Ala vo kobe vongo na maboko ti ala si ala te; ala vo ngu vongo na maboko ti ala si ala nyon,+ 7 ndali ti so Jéhovah Nzapa ti ala asara tufa na ndö ti ala na yâ ti aye kue so ala sara. Lo hinga nzoni mingi tambela ti ala na yâ ti kota benyama so. Na yâ ti ngu 40 so kue so, Jéhovah Nzapa ti ala ayeke na ala, ye oko amanke ala pëpe.”’+ 8 Tongaso, e zia lege ti kodro ti aita ti e ahale ti Ésaü+ so asara kodro na Séir, e si nduru pëpe na lege ti Arabah, ti Élath na ti Ézion-Guéber.+

“E tourné e mû lege ti guengo na benyama ti Moab.+ 9 Jéhovah atene na mbi, atene: ‘Ala gi yanga ti azo ti Moab pëpe wala ala sara bira na ala pëpe, ngbanga ti so mbi yeke mû mbeni sese ti ala na ala pëpe, ndali ti so mbi mû kodro ti Ar na ahale ti Lot awe.+ 10 (Ândö azo ti Émim+ la asara kodro kâ; ala yeke ngangu, ala yeke gbani nga ala yo tongana amolenge ti Anak. 11 Azo abâ nga azo ti Rapha+ tongana azo ti Anak,+ na azo ti Moab airi ala azo ti Émim. 12 Ândö azo ti Hori+ la asara kodro na Séir, me ahale ti Ésaü amû kodro ni na tïtî ala, ala futi ala na ala sara kodro dä,+ gï tongana ti so azo ti Israël ayeke sara na sese so Jéhovah ayeke mû ande na ala.) 13 Fadeso, ala londo ala fâ yâ ti Popo-hoto* ti Zéred.’ Tongaso e londo e fâ yâ ti Popo-hoto* ti Zéred.+ 14 Ti londo na Cadès-Barnéa ngbii ti si na ngoi so e fâ yâ ti Popo-hoto* ti Zéred, e sara ngu 38, juska azo so ayeke lani azo ti bira akui kue na yâ ti camp ni alingbi na tënë so Jéhovah adeba na ala.+ 15 Maboko ti Jéhovah ayeke nga gï na terê ti ala na yâ ti camp ni ti hunzi ala, juska ala kui kue.+

16 “Gï na peko ti so azo ti bira so kue akui awe,+ 17 Jéhovah akiri asara tënë na mbi, atene: 18 ‘Laso, mo yeke hon na yâ ti sese ti Moab, so ayeke Ar. 19 Tongana mo si nduru na azo ti Ammon, mo sara ye ti ngangu na ala pëpe wala mo gi yanga ti ala pëpe, ngbanga ti so mbi yeke mû mbeni sese ti azo ti Ammon na mo pëpe, ndali ti so mbi mû ni na ahale ti Lot awe.+ 20 Ândö azo abâ nga sese ti azo ti Ammon tongana sese ti azo ti Rapha.+ (Ândö azo ti Rapha asara kodro kâ, na azo ti Ammon airi ala azo ti Zamzummi. 21 Ala yeke ngangu, ala yeke gbani nga ala yo tongana azo ti Anak;+ me Jéhovah afuti ala si azo ti Ammon amû kodro ni na ala sara kodro dä. 22 A yeke ye so lo sara ndali ti ahale ti Ésaü so ayeke sara kodro na Séir,+ na ngoi so lo futi azo ti Hori+ si ahale ti Ésaü amû kodro ti ala na ala sara kodro dä juska laso. 23 Âdu ti azo ti Avva so lani asara kodro juska na Gaza,+ azo ti Caphtor,+ so ayeke ahale ti Caphtor,* afuti ala na ala sara kodro na place ti ala.)

24 “‘Ala londo, ala gue ala fâ Popo-hoto* ti Arnon.+ Mbi zia Sihon+ gbia ti Hesbon so ayeke zo ti mara ti Amori na maboko ti ala awe. Tongaso, ala komanse ti mû kodro ti lo na ala sara bira na lo. 25 A to nda ni laso, mbi yeke sara si azo na ndo kue so ayeke mä ande sango ti ala ayeke sara mbeto mingi. Li ti ala ayeke ga kirikiri nga ala yeke dö na mbeto* ndali ti ala.’+

26 “Tongaso, na benyama ti Kédémoth+ mbi tokua azo na Sihon gbia ti Hesbon na tënë ti siriri,+ mbi tene: 27 ‘Mo zia mbi fâ na yâ ti kodro ti mo mbi hon. Mbi yeke mû ande gï ndö ti kota lege, mbi yeke gue na mbage ti koli wala na mbage ti wali pëpe.+ 28 Kobe so mbi yeke te nga na ngu so mbi yeke nyon kâ ayeke gï so mbi yeke vo ande vongo na tïtî mo. Pardon, mo zia mbi fâ na yâ ti kodro ti mo mbi hon, 29 juska mbi fâ Ngu ti Jourdain ti lï na sese so Jéhovah Nzapa ti e amû na e. A yeke ye so ahale ti Ésaü so asara kodro na Séir na azo ti Moab so asara kodro na Ar asara na mbi la.’ 30 Me Sihon gbia ti Hesbon ake ti tene e fâ na yâ ti kodro ti lo e hon, ngbanga ti so Jéhovah Nzapa ti e azia si li ti lo akpengba+ nga bê ti lo akpengba, ti tene lo zia lo na maboko ti ala tongana ti so laso lo yeke na yâ ti maboko ti ala awe so.+

31 “Ge, Jéhovah atene na mbi, atene: ‘Fadeso mbi zia Sihon nga na kodro ti lo na maboko ti mo awe. Mo komanse ti mû kodro ti lo.’+ 32 Tongana Sihon na azo ti lo kue asigi ti tiri bira na e na Jahaz,+ 33 Jéhovah Nzapa ti e azia lo na maboko ti e si e sö benda na ndö ti lo, na amolenge ti lo nga na azo ti lo kue. 34 Na ngoi ni kâ e mû agbata ti lo kue nga e futi gbata oko oko kue, e futi akoli, awali na amolenge. E zia zo oko angbâ na fini pëpe.+ 35 E mû gï anyama ti ala nga na anzoni ye ti agbata ti ala so atï na maboko ti e. 36 A komanse na Aroër+ so ayeke na terê ti Popo-hoto* ti Arnon (nga na gbata so ayeke na yâ ti popo-hoto ni) juska na Galaad, mbeni gbata so e wara lege ti mû ni pëpe ayeke dä pëpe. Jéhovah Nzapa ti e azia ni kue na maboko ti e.+ 37 Me kodro ti azo ti Ammon,+ ndo kue so ayeke na terê ti Popo-hoto* ti Jabboc,+ agbata ti ando so ahoto ayeke dä nga na ando kue so Jéhovah Nzapa ti e ake na e ti si dä, mo si lani na terê ni pëpe.

3 “Na pekoni, e tourné e monté na Lege ti Basan. Og, gbia ti Basan, lo na azo ti lo kue aga ti tingbi na e ti sara bira na e na Édréi.+ 2 Jéhovah atene na mbi, atene: ‘Mo sara mbeto ti lo pëpe, mbi yeke zia lo na azo ti lo kue nga na kodro ti lo na maboko ti mo. Mo yeke sara na lo ande oko ye so mo sara lani na Sihon, gbia ti azo ti mara ti Amori, so asara kodro lani na Hesbon.’ 3 Tongaso, Jéhovah Nzapa ti e azia nga Og, gbia ti Basan, na azo ti lo kue na maboko ti e; e fâ ala kue, zo oko angbâ na fini pëpe. 4 Na ngoi ni so, e mû agbata ti lo kue. E zia mbeni gbata oko angbâ pëpe, e mû agbata 60, agbata kue ti sese ti Argob, royaume ti Og so ayeke na sese ti Basan.+ 5 Agbata so kue ayeke na angangu gbagba na terê ni, aporte ni ayeke ngangu mingi nga abarre ti ndö ni akpengba; e mû nga gbâ ti akete kodro. 6 Atâa so kue, e futi agbata so kue,+ tongana ti so e sara na agbata ti Sihon, gbia ti Hesbon, na lege so e futi agbata ti lo oko oko kue, akoli, awali nga na amolenge.+ 7 E mû anyama ti ala kue nga na anzoni ye kue ti agbata ni.

8 “Na ngoi ni so, e mû sese ti agbia use ti kodro ti azo ti mara ti Amori+ so ala yeke na ndo so ayeke nduru na Ngu ti Jourdain, a londo na Popo-hoto* ti Arnon ti si na Hoto ti Hermon.+ 9 (Ândö azo ti Sidon airi hoto ni Sirion, na azo ti mara ti Amori airi ni Sénir.) 10 E mû agbata kue so ayeke na kpangbala ndo, Galaad kue nga na Basan kue juska na Salécah nga na Édréi,+ agbata ti royaume ti Og na sese ti Basan. 11 Og, gbia ti Basan, ayeke tanga ti azo ti Rapha so angbâ. Gbogbo* so a zia kuâ ti lo dä ayeke gbogbo ti wen.* A ngbâ na ndembe so na Rabbah, kodro ti azo ti Ammon. Yongo ni ayeke coudée* gumbaya, na largeur ni ayeke coudée osio, a lingbi na coudée so a yeke sara ka na kua. 12 Na ngoi ni so, e mû sese ni, a komanse na Aroër+ so ayeke na terê ti Popo-hoto* ti Arnon nga na ndambo ti mbage ti sese ti Galaad so ahoto ayeke dä; na mbi mû agbata ni na mara ti Ruben na ti Gad.+ 13 Tanga ti sese ti Galaad nga na sese ti Basan kue so ayeke royaume ti Og, mbi mû ni na ndambo ti mara ti Manassé.+ Sese kue ti Argob so ayeke mbage ti Basan, azo abâ ni tongana sese ti azo ti Rapha.

14 “Jaïr,+ molenge ti Manassé, amû sese ti Argob kue+ juska na yanga ti sese ti azo ti Guéshur nga na ti azo ti Maaca,+ na lo zia iri ti lo wani na ndö ti akete kodro ti Basan, lo iri ni Havvoth-Jaïr;*+ a ngbâ ti iri ni tongaso juska laso. 15 Mbi mû sese ti Galaad na Makir.+ 16 Ti mara ti Ruben na ti Gad,+ mbi mû na ala sese so akomanse na yanga ti sese ti Galaad ti si na Popo-hoto* ti Arnon, so milieu ni ayeke yanga ti sese ni, na a gue juska na Jabboc, popo-hoto so ayeke yanga ti sese ti azo ti Ammon; 17 mbi mû nga na ala Arabah, Ngu ti Jourdain nga na sese so ayeke na yanga ti ngu ni, a komanse na yanga ti Ngu ti Kinnéreth juska na ngu-ingo ti Arabah, so ti tene Kota ngu ti gbâ ti ingo,* so ayeke na terê ti Pisgah, na mbage ti gbe ni, na est.+

18 “Na ngoi ni so, mbi mû yanga na ala, mbi tene: ‘Jéhovah Nzapa ti ala amû sese so na ala awe. Ala angangu koli kue ala yeke mû aye ti bira ti ala, ala mû li ni ala fâ ngu na lê ti aita ti ala azo ti Israël.+ 19 Gï awali ti ala, amolenge ti ala nga na anyama ti ala (mbi hinga so ala yeke na gbâ ti anyama) si ayeke ngbâ na agbata so mbi mû na ala, 20 juska Jéhovah amû ndo ti wungo terê na aita ti ala, legeoko tongana ti so lo mû na ala; na aita ti ala ni nga asara kodro na sese so Jéhovah Nzapa ti ala amû na ala na mbage ti Ngu ti Jourdain. Na pekoni, ala yeke kiri na ndo ti ala, zo oko oko na sese so mbi mû na lo.’+

21 “Na ngoi ni so, mbi mû yanga na Josué,+ mbi tene: ‘Mo wani mo bâ na lê ti mo ye so Jéhovah Nzapa ti mo asara na agbia use so. Jéhovah ayeke sara nga tongaso na aroyaume kue so mo yeke fâ ngu ti gue dä.+ 22 Ala sara mbeto ti ala pëpe, ngbanga ti so Jéhovah Nzapa ti ala la ayeke tiri ndali ti ala.’+

23 “Na ngoi ni so, mbi voro yanga na Jéhovah, mbi tene: 24 ‘Jéhovah, Seigneur ti dunia kue, mo la mo sara si mbi wakua ti mo mbi bâ kota ti mo nga na ngangu maboko ti mo,+ teti nzapa wa na yayu wala na sese asara mara ti akpengba kusala so mo sara so?+ 25 Pardon, zia mbi fâ ngu ni, mbi bâ pendere sese so ayeke na mbage ti Ngu ti Jourdain, pendere sese so ayeke na ndo so ahoto ayeke dä nga na sese ti Liban.’+ 26 Me Jéhovah angbâ ti sara ngonzo na terê ti mbi ndali ti ala,+ na lo mä mbi pëpe. Me Jéhovah atene na mbi, atene: ‘A ngbâ tongaso! Sara tënë na mbi na ndö ti tënë so encore ape! 27 Gue na li ti Pisgah+ mo bâ ndo na mbage ti nord, sud, est na ouest, mo bâ gï sese ni bango na lê, teti mo yeke fâ Ngu ti Jourdain so pëpe.+ 28 Mo zia Josué+ na ndö ti azo ni, mo wa lo nga mo kpengba lo, ndali ti so lo la lo yeke fâ ngu ni+ na devant ti ala nga lo yeke sara si ala mû sese ni so mo yeke bâ ande.’ 29 Aye so kue asi na ngoi so e yeke lani na popo-hoto so abâ ndo lê na lê na Beth-Péor.+

4 “Fadeso, azo ti Israël, ala bata andia na ambela so mbi fa na ala ti sara ye alingbi na ni, si ala ngbâ na fini+ nga ala gue amû sese so Jéhovah Nzapa ti akotara ti ala ayeke mû na ala. 2 Ala zia mbeni tënë na ndö ti tënë so mbi tene na ala so pëpe, nga ala zi mbeni tënë na yâ ni pëpe,+ tongaso si ala bata acommandement ti Jéhovah Nzapa ti ala so mbi fa na ala.

3 “Ala wani abâ na lê ti ala ye so Jéhovah asara lani na ndö ti tënë ti Baal ti Péor; Jéhovah Nzapa ti ala afuti zo kue so amû peko ti Baal ti Péor.+ 4 Me ti ala so angbâ nduru na Jéhovah Nzapa ti ala, ala kue la angbâ na fini laso so. 5 Bâ, mbi fa na ala awe andia na ambela ni,+ tongana ti so Jéhovah Nzapa ti mbi ahunda na mbi ti sara, si ala sara ye alingbi na ni na kodro so ala yeke gue ti mû ni so. 6 Ala bata aye so nzoni,+ ndali ti so azo so ayeke mä ande tënë ti andia kue so a mû na ala ayeke bâ so ala, azo ti Israël, ayeke na ndara+ nga ala hinga ndo;+ na ala yeke tene ande, atene: ‘Azo ti kota mara so ayeke biani na ndara nga ala hinga ndo.’+ 7 Kota mara wa la anzapa ti ala ayeke nduru na terê ti ala tongana ti so Jéhovah Nzapa ti e ayeke nduru na terê ti e na ngoi kue so e toto na lo so?+ 8 Kota mara wa la ayeke na mara ti andia na ambela so ayeke mbilimbili tongana ti Ndia kue so mbi fa na ala laso so?+

9 “Ye oko, sara hange nga bâ terê ti mo nzoni,* tongaso si mo girisa pëpe aye so mo bâ na lê ti mo, nga si na yâ ti gigi ti mo kue mo ngbâ ti bata ni na bê ti mo. Fa aye ni so na amolenge ti mo nga na a-âta ti mo.+ 10 Na lango so mo luti lani na devant ti Jéhovah Nzapa ti mo na Horeb, Jéhovah atene na mbi, atene: ‘Mo bungbi azo ni ti tene ala mä atënë ti mbi,+ si ala manda ti kpe mbeto ti mbi+ na yâ ti angoi kue so ala yeke sara ande na ndö ti sese ni, nga si ala fa ni na amolenge ti ala.’+

11 “Tongaso, ala ga lani nduru na gbe ti hoto ni ala luti, na wâ aza na li ti hoto ni amonté juska na nduzu kâ;* ndo avuko nga mbinda so avuko pitipiti amû ndö ti hoto ni.+ 12 Jéhovah akomanse ti sara tënë na ala na yâ ti wâ ni.+ Ala mä gï atënë ni, me ala bâ zo pëpe,+ ala mä gï mbeni go.+ 13 Lo fa na ala atënë ti yâ ti mbele ni,+ atënë so lo tene na ala ti sara ye alingbi na ni, aCommandement bale-oko.*+ Na pekoni, lo sû ni na lê ti akete tableau use ti tênë.+ 14 Na ngoi ni so, mbi la Jéhovah amû yanga na mbi ti fa na ala andia na ambela ni, si ala sara ye alingbi na ni na kodro so ala yeke gue ti mû ni.

15 “So ala bâ zo pëpe na lango so Jéhovah asara tënë na ala na yâ ti wâ na Horeb, ala sara hange,* 16 si ala sara pëpe mbeni ye ti sioni na lege so ala sara mbeni statue so a leke ni na kode so akpa mbeni ye, atâa a kpa koli wala wali,+ 17 wala mbeni nyama so ayeke na ndö ti sese, wala mbeni ndeke so ayeke huru na lê ti nduzu,+ 18 wala mbeni ye so ayeke hara na ndö ti sese wala mbeni susu so ayeke na yâ ti angu na ndö ti sese.+ 19 Tongana mo bâ ndo na nduzu na mo bâ lâ, nze na atongoro, aye kue so ayeke na lê ti nduzu, zia bê ti mo ahanda mo pëpe ti kuku na gbe ti ala nga ti voro ala.+ Jéhovah Nzapa ti mo amû aye so na azo kue na gbe ti yayu. 20 Me ala la Jéhovah azi ala na yâ ti four ti tongo na wen na Égypte, ti sara si ala ga ye ti lo wani,*+ tongana ti so ala yeke azo ti lo laso.

21 “Jéhovah asara ngonzo na terê ti mbi ndali ti ala,+ si lo deba, lo tene mbi yeke fâ ande Ngu ti Jourdain pëpe nga mbi yeke lï ande pëpe na pendere sese so Jéhovah Nzapa ti ala aye ti mû na ala ti ga ye ti ala.+ 22 Ti mbi, mbi yeke kui na kodro so. Mbi yeke fâ ande Ngu ti Jourdain pëpe;+ me ti ala, ala yeke fâ ande ngu ni nga ala yeke mû pendere sese ni. 23 Ala sara hange si ala girisa pëpe mbele ti Jéhovah Nzapa ti ala so lo te na ala;+ nga ala leke pëpe mbeni statue so a leke ni na kode, mbeni ye so akpa mbeni ye so Jéhovah Nzapa ti ala ake na ala ti sara ni,+ 24 ndali ti so Jéhovah Nzapa ti ala ayeke tongana mbeni wâ so ayeke gbi ye kue kue kue,+ nga lo yeke Nzapa so lo ye ti tene azo avoro gï lo oko awe.+

25 “Tongana ala dü amolenge si amolenge ti ala adü a-âta na ala, nga ala sara kodro aninga na ndö ti sese ni, na tongana ala sara mbeni ye so ayeke ga na ala kpale na lege so ala sara mbeni statue so a leke ni na kode,+ na ala sara ye so ayeke sioni na lê ti Jéhovah Nzapa ti ala ti son bê ti lo,+ 26 laso, mbi mû yayu na sese tongana atémoin ti mbi: Ala yeke kui hio na ndö ti sese so ala yeke fâ Ngu ti Jourdain ti gue ti mû ni so. Ala yeke ninga ande na ndö ni pëpe, ndali ti so a yeke hunzi ala kue.+ 27 Jéhovah ayeke kangbi ande yâ ti ala na popo ti amara,+ na gï kete wungo ti ala la ayeke ngbâ+ na popo ti amara so Jéhovah ague na ala na popo ti ala. 28 Kâ, ala yeke voro ande anzapa so maboko ti zo la asara ni na keke wala na tênë,+ anzapa so alingbi pëpe ti bâ ndo wala ti mä ndo wala ti te ye wala ti mä fion ti ye.

29 “Kâ, tongana ala gi Jéhovah Nzapa ti ala, tongana ala gi peko ti lo na bê ti ala kue nga na âme* ti ala kue,+ ala yeke wara lo.+ 30 Na ngoi so ala yeke na yâ ti aye ti ngangu si aye so kue asi na ala, ala yeke kiri na Jéhovah Nzapa ti ala, na ala yeke mä yanga ti lo,+ 31 ndali ti so Jéhovah Nzapa ti ala ayeke Nzapa ti sarango nzoni bê na zo.+ Lo yeke zi maboko na terê ti ala pëpe, lo yeke futi ala pëpe nga lo yeke girisa pëpe mbele so lo te na akotara ti ala.+

32 “Fadeso, ala gi ti hinga aye so asi giriri kozo si a dü ala, a komanse na ngoi so Nzapa asara zo na ndö ti sese; ala hunda ndo a komanse na mbeni mbage ti sese ti si na mbeni mbage ni. Mbeni kpengba ye tongaso asi kozo awe? wala a mä tënë ti mara ti ye tongaso lâ oko awe?+ 33 Lâ oko mbeni mara amä go ti Nzapa awe na sarango tënë na yâ ti wâ, tongana ti so ala mä ni, na mara ni angbâ na fini?+ 34 Wala lâ oko Nzapa azi mbeni mara na maboko ti mbeni nde awe? Wala lâ oko lo sara ni na lege ti angbanga so lo dë,* afä, amiracle+ nga na bira+ awe? Lâ oko lo sara ni awe na lege ti ngangu maboko ti lo+ so lo yôro ni nga na akota ye ti mungo mbeto na zo?+ Aye so kue, Jéhovah Nzapa ti ala asara ndali ti ala na Égypte, na ala bâ ni na lê ti ala wani. 35 A fa aye so na ala si ala hinga so Jéhovah ayeke tâ Nzapa;+ nde na lo, mbeni Nzapa ayeke dä pëpe.+ 36 Lo ngbâ na yayu kâ, lo sara si ala mä go ti lo si lo kiri na ala na nzoni lege; lo sara si ala bâ kota wâ ti lo na ndö ti sese, nga ala mä tënë so lo tene na yâ ti wâ ni.+

37 “So lo ye akotara ti ala, na lo soro ahale* ti ala na peko ti ala,+ ni la ala ngbâ na fini, na lo wani lo sigi na ala na Égypte na kota ngangu ti lo. 38 Amara so ayeke kota nga ayeke ngangu ahon ala, lo tomba ala, si lo ga na ala na sese ti amara ni so ti mû ni na ala ti ga ye ti ala, tongana ti so lo sara laso so.+ 39 Laso, a lingbi ala hinga nzoni, nga ala girisa lâ oko pëpe so Jéhovah ayeke tâ Nzapa na yayu kâ nga na ndö ti sese ge.+ Mbeni Nzapa nde ayeke dä pëpe.+ 40 A lingbi ala bata andia ti lo so afa lege na zo na acommandement ti lo so mbi yeke fa na ala laso, si ye aga nzoni na ala na amolenge ti ala na peko ti ala, nga si ala ninga na ndö ti sese so Jéhovah Nzapa ti ala ayeke mû na ala.”+

41 Na ngoi ni so, Moïse asoro agbata ota na terê ti Ngu ti Jourdain na mbage ti est.+ 42 Tongana mbeni zo afâ mba ti lo na mbana pëpe nga lo ke lo kozo pëpe,+ a lingbi lo kpe lo gue na mbeni oko ti agbata so, si lo ngbâ na fini.+ 43 Agbata ni ayeke so: Bézer+ so ayeke na kpangbala ndo na yâ ti benyama ndali ti mara ti Ruben, Ramoth+ so ayeke na Galaad ndali ti mara ti Gad nga na Golan+ so ayeke na Basan ndali ti mara ti Manassé.+

44 So ayeke Ndia+ so Moïse afa na azo ti Israël. 45 So ayeke awango, andia so ayeke fa lege na zo nga na ambela so Moïse afa ni na azo ti Israël na peko ti so ala sigi na Égypte,+ 46 na ngoi so ala yeke na ndo so ayeke nduru na Ngu ti Jourdain, na yâ ti popo-hoto so ayeke lê na lê na Beth-Péor,+ na sese ti Sihon, gbia ti azo ti mara ti Amori, so asara kodro na Hesbon,+ lo so Moïse na azo ti Israël asö benda na ndö ti lo na peko ti so ala sigi na Égypte.+ 47 Na ala mû sese ti lo nga na ti Og,+ gbia ti Basan, agbia use ti azo ti mara ti Amori so asara kodro na est ti Ngu ti Jourdain, 48 a komanse na Aroër+ so ayeke na terê ti Popo-hoto* ti Arnon, juska na Hoto ti Sion, so ti tene Hermon,+ 49 nga na sese ti Arabah kue so ayeke na est ti Ngu ti Jourdain, juska na ngu-ingo ti Arabah,* na terê ti Pisgah, na mbage ti gbe ni.+

5 Na pekoni, Moïse airi azo ti Israël kue na lo tene na ala: “Azo ti Israël, ala mä andia so ayeke fa lege na zo na ambela so mbi yeke fa na ala laso, na a lingbi ala hinga ni nzoni nga ala sara ye alingbi na ni. 2 Jéhovah Nzapa ti e ate lani mbele na e na Horeb.+ 3 A yeke na akotara ti e la Jéhovah ate mbele so pëpe, me a yeke na e kue so e yeke na fini ge laso. 4 Jéhovah asara tënë lê na lê na ala na ndö ti hoto na yâ ti wâ.+ 5 Na ngoi ni so, mbi luti na popo ti ala na Jéhovah+ ti fa na ala tënë ti yanga ti Jéhovah, ndali ti so mbeto asara ala ndali ti wâ ni na ala ye ti monté na ndö ti hoto ni pëpe.+ Lo tene:

6 “‘Mbi yeke Jéhovah Nzapa ti mo, lo so asigi na mo na kodro ti Égypte, ndo so a sara mo na ngbâa dä.+ 7 A lingbi mo voro ambeni nzapa nde lâ oko pëpe, gï mbi oko awe.*+

8 “‘A lingbi mo leke ndali ti mo wani pëpe mbeni statue so a leke ni na kode,+ wala mbeni ye so akpa* mbeni ye so ayeke na yayu wala na ndö ti sese wala na yâ ti angu na gbe ti sese. 9 Mo kuku na gbe ti ala pëpe wala zia mbeni ye ahanda mo ti voro ala pëpe,+ ndali ti so mbi Jéhovah Nzapa ti mo, mbi yeke Nzapa so mbi hunda ti tene zo avoro gï mbi oko awe.+ Ti azo so ake mbi, mbi yeke punir amolenge ti ala, atarä ti ala nga na amolenge ti atarä ti ala ndali ti faute ti ala ababâ ni;+ 10 me ti azo so aye mbi na abata acommandement ti mbi, mbi yeke fa tâ ndoye* na mbage ti ahale ti ala juska na molongo saki oko ni.

11 “‘A lingbi mo di iri ti Jéhovah Nzapa ti mo senge senge pëpe,+ zo so adi iri ni so senge senge, Jéhovah ayeke zia lo senge pëpe, lo yeke punir lo.+

12 “‘Mo bata lango ti Sabbat so ayeke nzoni-kue, tongana ti so Jéhovah Nzapa ti mo ahunda na mo.+ 13 Mo sara angangu kua ti mo na asenge kua ti mo kue na yâ ti lango omene.+ 14 Me lango mbasambala ni ayeke sabbat na lê ti Jéhovah Nzapa ti mo.+ Mo sara mbeni kua pëpe,+ atâa a yeke mo wala molenge ti mo ti koli wala ti wali, wala ngbâa ti mo ti koli wala ti wali, wala bagara ti mo, wala kororo ti mo, wala mbeni nyama nde so mo bata wala wande so ayeke sara kodro na yâ ti agbata* ti mo,+ si ngbâa ti mo ti koli na ti wali awu terê ti ala tongana ti mo.+ 15 Girisa pëpe so mo yeke lani ngbâa na kodro ti Égypte na Jéhovah Nzapa ti mo asigi na mo kâ na lege ti ngangu maboko ti lo so lo yôro ni.+ Ndani la Jéhovah Nzapa ti mo ahunda na mo ti bata lango ti Sabbat.

16 “‘Mo ne babâ na mama ti mo,+ tongana ti so Jéhovah Nzapa ti mo ahunda na mo; tongaso si mo ngbâ na fini aninga na ndö ti sese so Jéhovah Nzapa ti mo ayeke mû na mo, nga si aye ti mo amaï.*+

17 “‘Mo fâ zo pëpe.+

18 “‘Mo gi wali wala koli nde pëpe.+

19 “‘Mo nzi ye pëpe.+

20 “‘Tongana a iri mo ti duti témoin, mo tene mvene na ndö ti mba ti mo pëpe.+

21 “‘Mo sara nzara ti wali ti mba ti mo pëpe.+ Mo sara nzara ti da ti mba ti mo pëpe, wala yaka ti lo, wala ngbâa ti lo ti koli wala ti wali, wala bagara ti lo wala kororo ti lo wala mbeni ye ti mba ti mo.’+

22 “So ayeke acommandement* so Jéhovah atene na kota go na ndö ti hoto na yâ ti wâ, na yâ ti mbinda, na yâ ti ndo so avuko pitipiti na congrégation ti ala kue;+ lo zia mbeni tënë na ndö ni pëpe. Na pekoni, lo sû ni na ndö ti akete tableau use ti tênë, na lo mû ni na mbi.+

23 “Me gï so ala mä go ni so atoto na yâ ti vukongo ndo na ngoi so wâ ayeke gbi na ndö ti hoto ni,+ amokonzi kue nga na a-ancien kue ti amara ti ala aga na terê ti mbi. 24 Ala tene: ‘Jéhovah Nzapa ti e afa na e gloire ti lo nga na kota ti lo, na e mä go ti lo na yâ ti wâ.+ Laso e bâ so Nzapa alingbi ti sara tënë na zo, na zo ni angbâ na fini.+ 25 Ndani nyen ti tene e kui? Kota wâ so alingbi ti gbi e. Tongana e ngbâ ti mä go ti Jéhovah Nzapa ti e, e yeke kui. 26 Na popo ti azo kue, zo wa la amä go ti Nzapa so ayeke na fini na sarango tënë na yâ ti wâ, tongana ti so e mä ni, na lo ngbâ na fini? 27 Mo la mo gue nduru na Jéhovah Nzapa ti e, mo mä tënë kue so lo yeke tene ande; mo la mo yeke tene na e peko ti atënë kue so Jéhovah Nzapa ti e atene na mo, na e yeke mä ni nga e yeke sara ye alingbi na ni.’+

28 “Tongaso, Jéhovah amä atënë so ala tene na mbi, na Jéhovah atene na mbi, atene: ‘Mbi mä tënë so azo ni atene na mo so awe. Tënë kue so ala tene so ayeke nzoni.+ 29 Tongana, na bê ti ala, ala ye lakue ti kpe mbeto ti mbi+ nga ti bata acommandement ti mbi kue,+ ye ti ala na amolenge ti ala ayeke tambela lakue nzoni.+ 30 Gue mo tene na ala, mo tene: “Ala kiri na yâ ti atente ti ala.” 31 Me mo, mo yeke ngbâ ti mo ge, si mbi fa na mo acommandement, andia so ayeke fa lege na zo nga na ambela kue so a lingbi mo fa na ala, nga so a lingbi ala bata ni na ndö ti sese so mbi yeke mû ni na ala.’ 32 Tongaso, ala sara kue ti sara ye tâ gï tongana ti so Jéhovah Nzapa ti ala ahunda na ala.+ Ala gue na mbage ti koli wala ti wali pëpe.+ 33 Ala tambela na lege kue so Jéhovah Nzapa ti ala ahunda na ala,+ si ala ngbâ na fini, aye ti ala amaï nga ala ninga na ndö ti sese so ala yeke gue ti mû ni.+

6 “So ayeke acommandement, andia so ayeke fa lege na zo nga na ambela so Jéhovah Nzapa ti ala amû ti tene afa ye na ala, si ala bata ni na ngoi so ala si na sese so ala yeke gue ti mû ni, 2 si ala kpe mbeto ti Jéhovah Nzapa ti ala, na ala bata andia na acommandement ti lo kue so mbi fa na ala, so ti tene ala, amolenge ti ala nga na atarä ti ala,+ na yâ ti gigi ti ala kue, tongaso si ala ngbâ na fini aninga.+ 3 Azo ti Israël, ala mä ni na ala sara kue ti bata ni si aye ti ala amaï, si ala ga gbani gbani na kodro so lait na mafuta ti otoro asi singo dä, gï tongana ti so Jéhovah Nzapa ti akotara ti ala amû zendo ni na ala.

4 “Azo ti Israël, ala mä si: Jéhovah Nzapa ti e, lo yeke gï Jéhovah oko.+ 5 Mo doit ti ndoye Jéhovah Nzapa ti mo na bê ti mo kue, na âme* ti mo kue+ nga na ngangu* ti mo kue.+ 6 Atënë so mbi fa na mo laso so, a lingbi a duti na bê ti mo; 7 mo sara si a wara place na yâ ti bê ti amolenge ti mo,*+ na mo fa ni na ala na ngoi so mo yeke duti na da ti mo, na ngoi so mo yeke tambela na lege, na ngoi so mo gue ti lango nga na ngoi so mo londo.+ 8 Mo kanga ni na ndö ti maboko ti mo tongana mbeni ye ti dango bê, nga zia a duti na ndö ti lê* ti mo tongana mbeni yanga ti bongo so zo akanga na devant ti li ti lo.+ 9 Mo sû ni na terê ti cadre ti yanga ti da ti mo nga na terê ti yanga ti gbagba ti mo.

10 “Tongana Jéhovah Nzapa ti mo ague na mo na kodro so lo deba na akotara ti mo Abraham, Isaac na Jacob ti mû ni na mo,+ kodro so ayeke na apendere kota gbata so mo la mo leke ni pëpe,+ 11 ada so asi singo na mara ti anzoni ye nde nde kue so mo la mo sara kua ni pëpe, adû* ti ngu so mo la mo zi ni pëpe, ayaka ti vigne na akeke ti olive so mo la mo lu ni pëpe, na mo te ye yâ ti mo asi,+ 12 sara hange si mo girisa Jéhovah pëpe,+ lo so asigi na mo na kodro ti Égypte, ndo so mo sara lani ngbâa dä. 13 Jéhovah Nzapa ti mo la mo doit ti kpe mbeto ti lo,+ mo sara na lo+ nga mo deba na iri ti lo.+ 14 Anzapa ti amara so angoro ala, ala gue na peko ti mbeni pëpe,+ 15 ndali ti so Jéhovah Nzapa ti ala so ayeke na popo ti ala, lo yeke Nzapa so ahunda ti tene azo avoro gï lo oko awe.+ Tongaso pëpe, ngonzo ti Jéhovah Nzapa ti ala ayeke ga wâ na terê ti ala+ na lo yeke hunzi ala kue na ndö ti sese.+

16 “Ala doit ti zia Jéhovah Nzapa ti ala na tara pëpe,+ tongana ti so ala zia lo lani na tara na Massah.+ 17 Acommandement ti Jéhovah Nzapa ti ala, awango so lo yeke mû nga na andia ti lo so ayeke fa lege na zo, so lo hunda na ala ti bata, ala bata ni nzoni. 18 Ala sara ye so ayeke mbilimbili nga ayeke nzoni na lê ti Jéhovah, si aye ti ala amaï nga ala gue amû pendere sese so Jéhovah adeba yanga ti lo na akotara ti ala ndali ni.+ 19 Ala yeke tomba awato ti ala kue, tongana ti so Jéhovah amû zendo ni.+

20 “Mbeni lâ tongana molenge ti mo ahunda mo, atene: ‘Nda ti awango, andia so ayeke fa lege na zo nga na ambela so Jéhovah Nzapa ti e amû na ala so ayeke nyen?’ 21 mo yeke tene na lo, mo tene: ‘Ândö e yeke angbâa ti Pharaon na Égypte, me Jéhovah amû e na Égypte lo sigi na e na lege ti ngangu maboko ti lo. 22 Na lê ti e, Jéhovah asara si gbâ ti akota fä nga na amiracle so amû vundu mingi na zo aga na ndö ti Égypte,+ na ndö ti Pharaon nga na ndö ti azo kue ti da ti lo.+ 23 Ti e, lo sigi na e kâ, lo ga na e ge ti mû na e sese so lo deba yanga ti lo na akotara ti e ndali ni.+ 24 Na pekoni, Jéhovah ahunda na e ti bata andia so kue nga ti kpe mbeto ti Jéhovah Nzapa ti e, si e bâ nzoni lakue+ nga e ngbâ na fini+ tongana ti so e yeke na fini na ndembe so. 25 Tongana e bata acommandement so kue nzoni na lê ti Jéhovah Nzapa ti e, tongana ti so lo hunda na e, a yeke bâ e tongana azo ti mbilimbili.’+

7 “Na ngoi so Jéhovah Nzapa ti mo ague na mo na ndö ti sese so mo ga nduru ti gue ti mû ni so,+ lo yeke zi nga na devant ti mo amara so azo ti ala ayeke gbani:+ azo ti mara ti Heth, azo ti mara ti Guirgashi, azo ti mara ti Amori,+ azo ti Canaan, azo ti Périzzi, azo ti Hévi nga na azo ti mara ti Jébus,+ amara mbasambala so azo ti ala ayeke gbani nga ala yeke ngangu mingi ahon mo.+ 2 Jéhovah Nzapa ti mo ayeke zia ande ala na maboko ti mo, na mo yeke sö benda na ndö ti ala.+ A lingbi mo futi ala kue kue kue.+ Mo te mbele na ala pëpe nga mo sara nzoni bê na ala pëpe.+ 3 Mo na ala amä terê pëpe ti sara mariage* na popo ti mba. Mo mû molenge ti mo ti wali na molenge ti ala ti koli pëpe nga mo mû molenge ti ala ti wali na molenge ti mo ti koli pëpe.+ 4 Tongana mo sara ni, ala yeke pusu amolenge ti mo ti zia mbi ti voro ambeni nzapa nde;+ na ngonzo ti Jéhovah ayeke ga wâ na terê ti ala, na hio tongaso lo yeke futi ande mo.+

5 “Me ye so a lingbi ala sara na ala ayeke so: Mo fâ agbalaka ti ala na sese, mo kungbi ayanda ti ala ti tênë,+ mo dë na sese ayongoro yanda* ti ala+ nga mo zö ayanda ti ala so a leke ni na kode,+ 6 ndali ti so mo yeke mbeni mara so ayeke nzoni-kue ndali ti Jéhovah Nzapa ti mo; na Jéhovah Nzapa ti mo asoro mo na popo ti amara kue ti sese ti ga mara ti lo, ye ti lo wani so lo zia ni nde.*+

7 “A yeke pëpe ndali ti so ala yeke mbeni mara so azo ti yâ ni awu ahon atanga ni la Jéhovah aye ala na lo soro ala;+ ala yeke lani kete ahon tanga ti amara kue.+ 8 Me a yeke ndali ti so Jéhovah aye ala nga lo ye ti sara ye alingbi na bä so lo dë na akotara ti ala+ la Jéhovah asigi na ala na lege ti ngangu maboko ti lo, ti zi mo na ndo so mo sara lani ngbâa dä,+ ti zi mo na gbe ti ngangu* ti Pharaon, gbia ti Égypte. 9 Mo hinga nzoni so Jéhovah Nzapa ti mo ayeke tâ Nzapa, Nzapa so ayeke be-ta-zo, lo ngbâ lakue ti bata mbele ti lo nga ti fa tâ ndoye ti lo juska na ahale so aga na molongo saki oko ni, ahale ti azo so aye lo nga angbâ ti bata acommandement ti lo.+ 10 Me ti azo so ake lo, lo yeke futa ala na lê ni lê ni, na lege so lo yeke futi ala.+ Lo yeke gï nduru ti bâ lege ti azo so ake lo; lo yeke futa ala na lê ni lê ni. 11 Tongaso, sara kue ti bata acommandement, andia so ayeke fa lege na zo nga na ambela so mbi hunda na mo laso ti bata ni.

12 “Tongana ala ngbâ ti dengi mê ti mä ambela so nga ala sara ye alingbi na ni, Jéhovah Nzapa ti mo ayeke sara ye alingbi na mbele ti lo nga lo yeke fa tâ ndoye na mbage ti mo alingbi na bä so lo dë na akotara ti mo. 13 Lo yeke ye mo, lo yeke sara tufa na ndö ti mo nga lo yeke sara si amolenge ti mo aga gbani.+ Lo yeke mû na mo gbâ ti amolenge,* sese ti mo ayeke lë gbani gbani, mo yeke wara gbâ ti alê ti kobe, afini vin, mafuta,+ amolenge ti bagara na ti taba na ndö ti sese so lo deba yanga ti lo na akotara ti mo ti mû ni na mo.+ 14 Mo yeke ga mara so a iri tufa na ndö ti lo ahon tanga ti amara kue;+ akoli wala awali kue so ayeke na yâ ti mara ti mo ayeke wara molenge, anyama ti mo kue ayeke dü.+ 15 Jéhovah ayeke pusu akobela kue yongoro na terê ti mo, na lo yeke zia na terê ti mo pëpe asioni kobela so mo bâ ni lani na Égypte.+ Me lo yeke zia ni na terê ti azo kue so ake mo. 16 A lingbi mo futi* amara kue so Jéhovah Nzapa ti mo azia ala na maboko ti mo.+ Mo bâ* mawa ti ala pëpe+ nga mo voro anzapa ti ala pëpe,+ ndali ti so a yeke ga kûkû ti gbungo mo.+

17 “Tongana mo tene na yâ ti bê ti mo, mo tene: ‘Amara so awu mingi; mbi yeke tomba ala tongana nyen?’+ 18 sara mbeto ti ala pëpe.+ A yeke nzoni mo dabe ti mo na ye so Jéhovah Nzapa ti mo asara lani na Pharaon na azo ti Égypte kue;+ 19 dabe ti mo na akota ngbanga* so mo bâ na lê ti mo, afä, amiracle+ nga na ngangu maboko ti Jéhovah Nzapa ti mo so lo yôro ti sigi na mo.+ A yeke ye so Jéhovah Nzapa ti mo ayeke sara ande na amara kue so mo sara mbeto ti ala la.+ 20 Jéhovah Nzapa ti mo ayeke sara ande si kota mbeto agbu amara so,* juska tanga ti ala so angbâ+ si ayeke honde terê ti ala na lê ti mo akui kue. 21 Zia si mbeto ti ala ahon ndö ti mo pëpe, ndali ti so Jéhovah Nzapa ti mo ayeke na mo,+ na lo yeke kota Nzapa so amû mbeto mingi na zo.+

22 “Yeke yeke, Jéhovah Nzapa ti mo ayeke tomba ande amara so yongoro na devant ti mo.+ Mo yeke hunzi ande ala gï hio tongaso pëpe, si asioni nyama ti ngonda adü mingi ti sara sioni na mo pëpe. 23 Jéhovah Nzapa ti mo ayeke zia ala na maboko ti mo nga mo yeke sö benda na ndö ti ala juska mo hunzi ala kue.+ 24 Lo yeke zia agbia ti ala na maboko ti mo,+ na mo yeke zi iri ti ala na ndö ti sese.+ Zo oko ayeke dö sese na mo pëpe,+ juska mo hunzi ala kue.+ 25 Ayanda ti anzapa ti ala so a leke ni na kode, ala gbi ni.+ Argent na lor so ayeke na terê ni, mo sara nzara ni pëpe nga mo mû ni pëpe,+ ngbanga ti a ga mbeni kûkû ti gbungo mo, ndali ti so a yeke mbeni ye ti sioni mingi na lê ti Jéhovah Nzapa ti mo.+ 26 Mo ga na ye ti sioni na yâ ti da ti mo pëpe, si mo nga kue a futi mo pëpe tongana ye ni so. Mo bâ ye ni so tongana ye ti saleté, na mo ke ni na bê ti mo oko, ndali ti so a yeke mbeni ye so a lingbi a futi ni.

8 “Mo sara kue ti bata acommandement kue so mbi yeke mû na mo laso si ala ngbâ na fini,+ ala ga gbani nga ala gue amû sese ni so Jéhovah adeba yanga ti lo na akotara ti ala ndali ni.+ 2 Dabe ti mo na yongoro lege so Jéhovah Nzapa ti mo asara si mo tambela dä ngu 40 na yâ ti benyama,+ ti sara si mo zia ti pika kate ti mo, ti tara bê ti mo+ ti hinga ye so ayeke na yâ ni,+ ti bâ wala mo yeke bata acommandement ti lo wala mo yeke bata ni pëpe. 3 Ni la lo sara si mo zia ti pika kate ti mo, nga lo zia si nzara asara mo+ na lo mû na mo manne ti te,+ mbeni kobe so mo wala akotara ti mo ahinga ni pëpe, si mo hinga so zo ayeke ngbâ na fini gï na lege ti mapa pëpe, me zo ayeke ngbâ na fini na lege ti tënë kue so asigi na yanga ti Jéhovah.+ 4 Bongo ti mo abuba pëpe, nga gere ti mo asuku pëpe na yâ ti ngu 40 so.+ 5 Mo hinga nzoni so Jéhovah Nzapa ti mo asara aye so lani ti kiri na mo na nzoni lege, tongana ti so mbeni babâ ayeke gi ti kiri na molenge ti lo na nzoni lege.+

6 “Mo bata acommandement ti Jéhovah Nzapa ti mo na tambelango na lege so lo fa nga na kpengo mbeto ti lo. 7 Jéhovah Nzapa ti mo ayeke gue na mo na mbeni nzoni sese,+ mbeni sese so akete ngu ayeke sua dä, ali ti ngu nga na angu so ayeke sigi na gbe ti sese* ayeke sua na yâ ti akpangbala ndo ni so ayeke na yâ ti apopo-hoto nga na ando so ahoto ayeke dä, 8 sese ti blé, ti orge, ti vigne, ti figue, ti grenade,+ ti mafuta ti olive na ti mafuta ti otoro,+ 9 sese so kobe ayeke manke dä pëpe, na ye oko ayeke manke mo pëpe, sese so wen ayeke na yâ ti atênë ni, na mo yeke wara cuivre na yâ ti ahoto ni.

10 “Tongana mo te ye si yâ ti mo asi awe, a yeke nzoni mo sepela Jéhovah Nzapa ti mo ndali ti pendere sese so lo mû na mo.+ 11 Mo sara hange si mo girisa Jéhovah Nzapa ti mo pëpe, nga acommandement, ambela na andia ti lo so mbi yeke mû na mo laso, mo doro ni pëpe. 12 Tongana mo te ye si yâ ti mo asi, mo leke apendere da na mo lango na yâ ni,+ 13 tongana abagara na ataba ti mo aga gbani, mo wara gbâ ti argent na lor nga mo yeke na ye kue gbani gbani, 14 zia pëpe si bê ti mo apusu mo ti sara baba+ na ti girisa Jéhovah Nzapa ti mo so asigi na mo na kodro ti Égypte, ndo so mo sara lani ngbâa dä.+ 15 Lo la lo sara si mo tambela na yâ ti kota désert so asara zo mbeto mingi,+ so asioni ngbo na akpalakongo ayeke dä na so sese ni ahule mingi na ngu ayeke dä pëpe. Lo sara si ngu asigi na yâ ti ngangu tênë+ 16 na lo mû na mo manne ti te+ na yâ ti benyama, mbeni kobe so ababâ ti mo ahinga ni pëpe, ti sara si mo zia ti pika kate ti mo+ na ti tara bê ti mo si mo bâ nzoni dä kekereke.+ 17 Tongana bê ti mo apusu mo si mo tene: ‘A yeke na ngangu ti mbi wani nga mbi kpengba na maboko ti mbi la mbi wara mosoro so’,+ 18 girisa pëpe so a yeke Jéhovah Nzapa ti mo la amû na mo ngangu ti wara mosoro,+ tongaso si lo sara ye alingbi na mbele so lo te na akotara ti mo, tongana ti so lo sara laso.+

19 “Tongana mbeni lâ mo girisa Jéhovah Nzapa ti mo na mo gue na peko ti ambeni nzapa nde, mo sara na ala nga mo kuku na gbe ti ala, laso mbi tene na ala, ala yeke kui.+ 20 Legeoko tongana ti amara so Jéhovah ayeke futi ala na devant ti ala so, a yeke futi ala nga tongaso, ndali ti so ala mä yanga ti Jéhovah Nzapa ti ala pëpe.+

9 “Azo ti Israël, laso ala yeke fâ Ngu ti Jourdain+ ti gue ti mû sese ti amara so ayeke kota nga ayeke ngangu ahon ala,+ ti mû agbata so ayeke kota mingi nga so agbagba ni ayo juska na yayu;*+ 2 azo ni akono nga ala yo, amolenge ti Anak,+ ala so mo mä tënë ti ala, atene: ‘Zo wa la akpa ti luti na gbele amolenge ti Anak zo wa?’ 3 Tongaso, a yeke nzoni mo hinga laso so Jéhovah Nzapa ti mo ayeke fâ ngu kozo na mo.+ Lo yeke tongana mbeni wâ so ayeke gbi ye kue kue kue,+ na lo yeke hunzi ala kue. Lo yeke kinda ala na lê ti mo, tongaso si mo lingbi ti tomba* ala hio nga ti futi ala, gï tongana ti so Jéhovah amû zendo ni na mo.+

4 “Tongana Jéhovah Nzapa ti mo atomba ala na gbele mo awe, tene pëpe na yâ ti bê ti mo, mo tene: ‘Mbilimbili ti mbi la asara si Jéhovah aga na mbi ge ti mû sese so.’+ Me a yeke ndali ti sioni sarango ye ti amara so+ la Jéhovah atomba ala na gbele mo. 5 A yeke pëpe ndali ti so mo yeke mbilimbili wala bê ti mo avuru la mo yeke gue ande ti mû sese ti ala. Me a yeke ndali ti sioni sarango ye ti amara so la Jéhovah Nzapa ti mo ayeke tomba ala na gbele mo,+ nga ti sara ye alingbi na bä so lo dë na akotara ti mo Abraham,+ Isaac+ na Jacob.+ 6 A yeke nzoni mo hinga so a yeke pëpe ndali ti mbilimbili ti mo la Jéhovah Nzapa ti mo ayeke mû na mo pendere sese so ti ga ti mo, teti mo yeke mbeni mara so li ti azo ni akpengba mingi.*+

7 “Ala girisa lâ oko pëpe tongana nyen la ala son bê ti Jéhovah Nzapa ti ala na yâ ti benyama.+ Ngbene ye na ngoi so ala sigi na Égypte juska ala si na ndo so, ala yeke sara kpengba-li na Jéhovah.+ 8 Même na Horeb, ala son bê ti Jéhovah, na ngonzo agbu Jéhovah ngangu na terê ti ala na lo ye ti hunzi ala kue.+ 9 Na ngoi so mbi monté na ndö ti hoto ni ti wara akete tableau ti tênë,+ akete tableau ti mbele so Jéhovah ate na ala,+ mbi ngbâ na ndö ti hoto ni lâ 40 na bï 40,+ mbi te kobe pëpe nga mbi nyon ngu pëpe. 10 Na pekoni, Jéhovah amû na mbi akete tableau use ti tênë so li ti maboko ti lo Nzapa la asû mbeti na ndö ni. Na lê ti akete tableau so, a yeke wara atënë kue so Jéhovah atene na ala na ndö ti hoto na yâ ti wâ na ngoi so azo* ni abungbi lani.+ 11 Tongana lâ 40 na bï 40 so ahunzi awe, Jéhovah amû na mbi atableau use ti tênë so, atableau ti mbele ni, 12 na Jéhovah atene na mbi, atene: ‘Londo, mo descend hio si, ndali ti so azo ti mo so mo sigi na ala na Égypte so asara mbeni ye so ayeke sioni mingi.+ Gï hio tongaso, ala zia lege so mbi fa na ala ti tambela dä so awe. Ala leke yanda ti wen* ndali ti ala wani.’+ 13 Jéhovah atene na mbi, atene: ‘Mbi bâ azo so, na mbi bâ so li ti ala akpengba mingi.*+ 14 Mo zia mbi, mbi yeke hunzi ala na mbi yeke zi iri ti ala na ndö ti sese; na zia mbi sara si mo ga mbeni mara so ayeke ngangu ahon ala nga so azo ti yâ ni ayeke gbani ahon ala.’+

15 “Na pekoni, mbi londo na ndö ti hoto ni mbi descend, na ngoi so hoto ni ayeke gï wâ;+ akete tableau use ti mbele ayeke na yâ ti maboko ti mbi use kue.+ 16 Mbi bâ ndo na mbi bâ so ala sara siokpari na terê ti Jéhovah Nzapa ti ala. Ala mû wen* ala sara na yanda ti molenge ti bagara ndali ti ala wani. Gï hio tongaso, ala zia lege so Jéhovah afa na ala ti tambela dä so.+ 17 Tongaso, mbi gbu akete tableau use so, mbi bo yâ ni na sese, na yâ ni afâ kete kete na lê ti ala.+ 18 Na mbi kuku na sese na gbe ti Jéhovah lâ 40 na bï 40, tongana ti so mbi sara kozo. Mbi te kobe pëpe na mbi nyon ngu pëpe,+ ndali ti siokpari kue so ala sara tongana ala sara ye so ayeke sioni mingi na lê ti Jéhovah nga ala son bê ti lo. 19 Mbeto ahon ndö ti mbi ndali ti kota ngonzo so agbu Jéhovah na terê ti ala+ si lo ye ti hunzi ala hunzingo so. Me Jéhovah amä mbi na ngoi ni so nga.+

20 “Jéhovah asara ngonzo ngangu na terê ti Aaron si lo ye ti futi lo;+ me na ngoi ni so, mbi voro terê ti mbi na Nzapa ndali ti Aaron nga. 21 Mbi mû ye ti siokpari ni, molenge ti bagara+ so ala sara so, mbi gbi ni; mbi neka ni ngbii a ga fuku, na mbi tuku fuku ni na yâ ti ngu so alondo na yâ ti hoto ni si ayeke sua so.+

22 “Na Tabérah,+ na Massah+ nga na Kibroth-Hattaavah+ ala kiri ala sara si bê ti Jéhovah ason mingi. 23 Na ngoi so Jéhovah ahunda na ala ti zia Cadès-Barnéa+ ti hon, nga lo tene: ‘Ala gue ala mû kodro so mbi yeke mû na ala’, ala kiri ala sara kpengba-li na Jéhovah Nzapa ti ala;+ ala mä na bê na lo pëpe+ nga ala mä yanga ti lo pëpe. 24 Ngbene ye so mbi hinga ala, ala yeke sara gï kpengba-li na Jéhovah.

25 “Tongaso, mbi ngbâ ti kuku na sese na gbe ti Jéhovah lâ 40 na bï 40;+ mbi sara tongaso ngbanga ti so Jéhovah atene lo ye ti hunzi ala. 26 Mbi voro terê ti mbi na Jéhovah, mbi tene: ‘Jéhovah, Seigneur ti dunia kue, mo futi azo ti mo pëpe. Ala yeke ye ti mo wani.*+ Grâce na kota ti mo nga na ngangu maboko ti mo, mo zi ala, na mo sigi na ala na Égypte.+ 27 Mo dabe ti mo na awakua ti mo Abraham, Isaac na Jacob.+ Mo bâ gï kpengbango li ti azo so, sioni ti ala nga na siokpari ti ala pëpe.+ 28 Tongaso pëpe, azo ti kodro so mo sigi na e dä ayeke tene: “Jéhovah alingbi pëpe ti gue na azo so na kodro so lo mû zendo ti mû ni na ala, nga teti so lo ke ala, lo sigi na ala ti fâ ala na yâ ti benyama.”+ 29 Ala yeke azo ti mo, ye ti mo wani*+ so mo sigi na ni na lege ti kota ngangu ti mo nga na maboko ti mo so mo yôro ni.’+

10 “Na ngoi ni so, Jéhovah atene na mbi, atene: ‘Mo sara akete tableau use ti tênë tongana ti akozo ni so,+ mo monté na mbi ge na ndö ti hoto; mo sara nga mbeni sanduku ti keke. 2 Mbi yeke sû ande na lê ti akete tableau ni atënë so ayeke lani na lê ti akozo ni so mo fâ yâ ni so; na mo yeke zia ande ni na yâ ti sanduku ni.’ 3 Tongaso mbi leke mbeni sanduku na keke ti acacia nga mbi sara akete tableau use ti tênë tongana ti akozo ni so, na mbi monté na ndö ti hoto ni na atableau ni use kue na maboko ti mbi.+ 4 Na lo sû na lê ti akete tableau ni atënë so lo sû lani kozo,+ aCommandement bale-oko*+ so Jéhovah afa ni na ala na ndö ti hoto na yâ ti wâ+ na lango so ala bungbi,*+ na Jéhovah amû ni na mbi. 5 Na pekoni, mbi londo na ndö ti hoto ni mbi descend,+ mbi zia atableau ni na yâ ti sanduku so mbi sara, na a ngbâ na yâ ni tongana ti so Jéhovah ahunda na mbi ti sara.

6 “Azo ti Israël alondo na Béeroth-Bené-Jaacan ala gue na Mosérah. Aaron akui na a lu lo kâ;+ molenge ti lo Éléazar aga prêtre na peko ti lo.+ 7 Ala londo kâ, ala gue na Gudgodah, na ala londo na Gudgodah ala gue na Jotbathah,+ mbeni kodro so angu so asua* ayeke dä mingi.

8 “Na ngoi ni so, Jéhovah azia mara ti Lévi nde+ ti yô sanduku ti mbele ti Jéhovah,+ ti luti na gbe ti Jéhovah ti sara kua ti lo nga ti iri tufa na ndö ti azo na iri ti lo,+ tongana ti so ala ngbâ ti sara juska laso. 9 Ndani la azo ti mara ti Lévi awara pëpe mbeni sese wala mbeni héritage tongana ti aita ti ala. Jéhovah la ayeke ye ti ala, gï tongana ti so Jéhovah Nzapa ti mo atene na ala.+ 10 Mbi ngbâ na ndö ti hoto ni tongana ti so mbi sara kozo, lâ 40 na bï 40,+ na Jéhovah amä mbi na ngoi ni so nga.+ Ni la Jéhovah afuti mo pëpe. 11 Na pekoni, Jéhovah atene na mbi, atene: ‘Gue na devant ti azo ni, na mo na ala, ala leke terê ti ala ti hon, si ala gue ala mû sese so mbi deba yanga ti mbi na akotara ti ala ti mû ni na ala.’+

12 “Fadeso, Israël, nyen la Jéhovah Nzapa ti mo ahunda na mo nyen?+ A yeke gï ye so: Mo kpe mbeto ti Jéhovah Nzapa ti mo,+ mo tambela na lege kue so lo fa na mo,+ mo ndoye lo, mo sara na Jéhovah Nzapa ti mo na bê ti mo kue nga na âme* ti mo kue+ 13 nga mo bata acommandement na andia ti Jéhovah so mbi yeke fa na mo laso ndali ti nzoni ti mo wani.+ 14 Bâ, yayu, même yayu so ayo kâ,* ayeke ti Jéhovah Nzapa ti mo; sese nga na aye kue so ayeke na ndö ni ayeke ti lo.+ 15 Me a yeke gï akotara ti mo la Jéhovah aga nduru na ala na lo fa ndoye ti lo na mbage ti ala; na popo ti amara kue, lo soro ala, ahale+ ti ala ni, tongana ti so ala yeke bâ ni laso so. 16 Ti fadeso ala sara si bê ti ala avuru*+ na ala zia ti sara kpengba-li,*+ 17 ndali ti so Jéhovah Nzapa ti ala ayeke Nzapa ti anzapa,+ na Seigneur ti aseigneur, lo yeke Nzapa so ayeke kota mingi, lo yeke ngangu mingi, lo pika bê mingi, lo sara kangbi na popo ti azo pëpe+ nga lo yeda na petengo goro pëpe. 18 Lo sara si a fâ ngbanga ti amolenge so babâ ti ala ayeke dä pëpe* nga na awali-mua na lege ni;+ lo ye awande+ nga lo yeke mû na ala kobe na bongo. 19 A lingbi ala nga ala ye awande, ndali ti so ala yeke lani awande na kodro ti Égypte.+

20 “Jéhovah Nzapa ti mo la mo doit ti kpe mbeto ti lo, ti sara na lo,+ ti ngbâ nduru na lo nga ti deba na iri ti lo. 21 Lo la mo doit ti sepela lo.+ Lo yeke Nzapa ti mo, akota ye kue na aye ti pikango bê kue so mo bâ na lê ti mo, lo la lo sara ni ndali ti mo.+ 22 Akotara ti mo adescend lani na Égypte na azo* 70,+ me fadeso Jéhovah Nzapa ti mo asara si mo wu tongana atongoro ti yayu.+

11 “Mo doit ti ndoye Jéhovah Nzapa ti mo,+ nga mo bata lakue aye so lo fa na mo, andia ti lo, ambela ti lo nga na acommandement ti lo. 2 Ala hinga so laso mbi yeke sara tënë na ala, me na amolenge ti ala pëpe, amolenge ti ala so ahinga pëpe nga abâ pëpe aye so Jéhovah Nzapa ti ala asara lani ti fa lege na ala,+ kota ti lo+ nga na ngangu maboko ti lo+ so lo yôro. 3 Ala bâ nga pëpe afä na aye so, na Égypte, lo sara na Pharaon, gbia ti Égypte, nga na kodro ti lo kue,+ 4 wala ye so lo sara na aturugu ti Égypte, na ambarata nga na apuse ti mbarata ti Pharaon so Kota Ngu-Bengba amene ala na ngoi so ala yeke tomba peko ti ala, azo ti Israël, na Jéhovah afuti ala biani biani.*+ 5 Ala bâ pëpe ye so lo sara ndali ti* ala na yâ ti benyama juska ala si na ndo so, 6 wala ye so lo sara na Dathan na Abiram, amolenge ti Éliab, so ayeke molenge ti Ruben, na ngoi so sese asuru amene ala na azo ti da ti ala, atente ti ala, anyama ti ala nga na azo kue so amû peko ti ala na lê ti azo ti Israël kue.+ 7 ala bâ na lê ti ala wani akota ye kue so Jéhovah asara lani.

8 “Ala bata acommandement kue so mbi mû na ala laso, si ala kpengba nga ala fâ ngu ti mû sese ni, 9 si ala ninga+ na ndö ti sese so Jéhovah adeba yanga ti lo ti mû ni na akotara ti ala nga na ahale* ti ala,+ mbeni sese so lait na mafuta ti otoro asi singo dä.+

10 “Sese ni so ala yeke gue ti mû ni so ayeke tongana ti Égypte so ala londo dä aga so pëpe, sese so lani tongana ala lu lê ti kobe dä awe, ala yeke sara kua ngangu ti tuku ngu dä,* mo bâ mo tene a yeke jardin. 11 Me sese so ala yeke gue ti mû ni so ayeke mbeni sese ti ahoto nga na ti akpangbala ndo so ayeke na yâ ti apopo-hoto.+ Sese so anyon ngu-nzapa so ayeke pika dä;+ 12 a yeke mbeni sese so Jéhovah Nzapa ti mo ayeke bâ lege ni nzoni. Lê ti Jéhovah Nzapa ti mo ayeke lakue na ndö ni, ti londo na tongo nda ti ngu juska na hunzingo ni.

13 “Tongana ala sara kue ti bata acommandement so mbi mû na ala laso nga ala ye Jéhovah Nzapa ti ala, na ala sara na lo na bê ti ala kue nga na âme* ti ala kue,+ 14 lo* yeke sara si ngu-nzapa apika na ngoi ni na ndö ti sese ti ala, akozo ngu-nzapa nga na atanga ti ngu-nzapa, na ala yeke wara gbâ ti kobe, fini vin nga na mafuta.+ 15 Lo yeke sara si pere asigi ndali ti anyama ti ala; ala yeke te ye alingbi na ala.+ 16 Ala sara hange si bê ti ala apusu ala pëpe ti zia lo ti gue ti voro ambeni nzapa nde nga ti kuku na gbe ti ala.+ 17 Tongaso pëpe, ngonzo ti Jéhovah ayeke ga wâ na terê ti ala, na lo yeke kanga lê ti nduzu si ngu-nzapa apika pëpe+ na sese alë pëpe, na ala yeke kui hio na ndö ti pendere sese ni so Jéhovah ayeke mû na ala.+

18 “Ala sara si atënë ti mbi so awara place na yâ ti bê ti ala nga na yâ ti gigi ti ala, na ala kanga ni na ndö ti maboko ti ala tongana mbeni ye ti dango bê, nga a duti na ndö ti lê* ti ala tongana mbeni yanga ti bongo so zo akanga na devant ti li ti lo.+ 19 Ala fa ni na amolenge ti ala; mo fa ni na ala na ngoi so mo yeke duti na da ti mo, na ngoi so mo yeke tambela na lege, na ngoi so mo gue ti lango nga na ngoi so mo londo.+ 20 Mo sû ni na terê ti cadre ti yanga ti da ti mo nga na terê ti yanga ti gbagba ti mo, 21 si, na angoi kue so yayu ayeke dä, ala na amolenge ti ala aninga+ na ndö ti sese ni so Jéhovah adeba yanga ti lo ti mû na akotara ti ala.+

22 “Tongana ala sara kue ti bata acommandement so mbi yeke fa na ala na ala sara ye alingbi na ni, ti ndoye Jéhovah Nzapa ti ala,+ ti tambela na lege so lo fa na ala nga ti ngbâ nduru na lo,+ 23 Jéhovah ayeke tomba nga amara so kue na gbele ala,+ nga ala yeke mû sese ti amara so ayeke kota ahon ala nga so azo ni awu ahon ala.+ 24 Sese kue so gere ti ala ayeke dö ni ayeke ga ti ala.+ Yanga ti sese ti ala ayeke londo na benyama ti si na Liban, nga a londo na kota ngu, Ngu ti Euphrate, ti si na ngu-ingo so ayeke na mbage ti ouest.*+ 25 Zo oko ti luti na gbele ala ayeke duti ande dä pëpe.+ Jéhovah Nzapa ti ala ayeke sara ande si mbeto ti ala ahon ndö ti azo ti sese kue so ala tambela dä,+ gï tongana ti so lo mû zendo ni na ala.

26 “Laso, mbi zia na devant ti ala tufa na deba:+ 27 ala yeke wara tufa tongana ala bata acommandement ti Jéhovah Nzapa ti ala so mbi yeke fa na ala laso;+ 28 ala yeke wara deba tongana ala ke ti bata acommandement ti Jéhovah Nzapa ti ala,+ nga tongana ala zia lege so mbi fa na ala laso ti mû, na ala mû peko ti ambeni nzapa nde so ala hinga ala pëpe.

29 “Tongana Jéhovah Nzapa ti mo ague na mo na ndö ti sese ni so ayeke ga ti mo so, mo fa tënë ti* tufa ni na Hoto ti Guérizim nga mo fa tënë ti deba ni na ndö ti Hoto ti Ébal.+ 30 Ahoto so ayeke na mbage ti Ngu ti Jourdain na mbage ti ouest,* na sese ti azo ti Canaan so asara kodro na Arabah, so abâ ndo lê na lê na Guilgal, na a yeke na terê ti akota keke ti Moréh.+ 31 Ala yeke fâ Ngu ti Jourdain ti gue ti mû sese so Jéhovah Nzapa ti ala ayeke mû na ala.+ Tongana ala mû ni si ala sara kodro dä awe, 32 zia ala sara kue ti sara ye alingbi na andia nga na ambela kue so mbi yeke zia na gbele ala laso.+

12 “So ayeke andia na ambela so a lingbi ala sara kue ti sara ye alingbi na ni na ngoi kue so ala yeke sara kodro na ndö ti sese so Jéhovah, Nzapa ti akotara ti ala, ayeke mû ande na ala. 2 Ala futi ando kue so amara so ala yeke tomba ala avoro anzapa ti ala dä:+ atâa a yeke na ndö ti akota hoto, akete hoto wala na gbe ti fini keke so kugbe ni adü pendere. 3 Ala fâ na sese agbalaka ti amara so, ala kungbi ayanda ti ala ti tênë,+ ala gbi ayongoro yanda* ti ala nga ala dë na sese ayanda ti anzapa ti ala so a leke ni na kode,+ na ala zi iri ti anzapa so na ndo ni so.+

4 “Ala voro Jéhovah Nzapa ti ala tongaso pëpe.+ 5 Me ala gi Jéhovah Nzapa ti ala na ndo kue so, na popo ti amara ti ala, lo soro ti zia iri ti lo dä nga ti duti dä, na ala gue kâ.+ 6 A yeke na ndo ni so si ala yeke gue na asandaga ti ala so a yeke zö ni agbi kue,+ ambeni sandaga, adîme*+ ti ala, amatabisi ti maboko ti ala,+ asandaga so ala mû ndali ti mbeni zendo, asandaga so bê ti ala apusu ala ti ga na ni+ nga na akozo molenge ti bagara na ti ataba wala angasa ti ala.+ 7 Ala na azo ti da ti ala ayeke te ye kâ na gbele Jéhovah Nzapa ti ala,+ na ala yeke sara ngia na peko ti akua kue so ala sara,+ ndali ti so Jéhovah Nzapa ti ala asara tufa na ndö ti ala.

8 “Ala sara ye pëpe tongana ti so e yeke sara na ndembe so: so zo oko oko ayeke sara ye so ayeke na lege ni na lê ti lo,* 9 ndali ti so ade ala si pëpe na ndo ti wungo terê+ nga ade ala wara pëpe héritage so Jéhovah Nzapa ti ala aye ti mû na ala. 10 Tongana ala fâ Ngu ti Jourdain+ na ala sara kodro na sese so Jéhovah Nzapa ti ala aye ti mû na ala, lo yeke sara si awato ti ala kue so angoro ala azia ala kpô, na ala yeke duti na siriri.+ 11 Ala yeke ga na aye kue so mbi hunda na ala ti ga na ni na ndo so Jéhovah Nzapa ti ala asoro ti zia iri ti lo dä:+ asandaga ti ala so a yeke zö ni agbi kue, ambeni sandaga, adîme ti ala,+ amatabisi ti ala nga na asandaga nde nde kue so ala deba yanga ti ala ti mû na Jéhovah. 12 Ala yeke duti na ngia na gbele Jéhovah Nzapa ti ala,+ ala, amolenge ti ala ti koli na ti wali, angbâa ti ala ti koli na ti wali nga na azo ti mara ti Lévi so asara kodro na yâ ti agbata* ti ala, ndali ti so azo ti mara ti Lévi awara mbeni sese wala mbeni héritage pëpe tongana ti ala azo ti Israël.+ 13 Mo sara hange si asandaga ti mo so a yeke zö ni agbi kue, a zö ni pëpe na mbeni ndo nde so mo bâ.+ 14 Ndo so Jéhovah asoro na yâ ti mbeni mara, ni la mo yeke gue dä na asandaga ti mo so a yeke zö ni agbi kue; kâ la mo yeke sara ye kue so mbi yeke hunda na mo.+

15 “Na angoi kue so mo ye, mo lingbi ti fâ nyama ti te+ alingbi na tufa so Jéhovah Nzapa ti mo asara na ndö ti mo na yâ ti agbata ti mo kue.* Zo so aga sioni awe na zo so aga sioni pëpe alingbi ti te nyama ni, tongana ti so zo kue alingbi ti te gazelle wala lekpa. 16 Me, a lingbi ala te mênë pëpe;+ ala tuku ni na sese tongana ngu.+ 17 Na yâ ti agbata* ti mo, a yeke mû ande lege na mo pëpe ti te dîme ti alê ti kobe, ti fini vin, ti mafuta, ti akozo molenge ti abagara, ti ataba, wala ti angasa ti mo,+ atâa asandaga so mo mû ti sara ye alingbi na azendo ti mo, asandaga so bê ti mo apusu mo ti mû ni wala amatabisi ti mo. 18 Aye ni so, mo te ni na gbele Jéhovah Nzapa ti mo, na ndo so Jéhovah Nzapa ti mo asoro:+ mo, molenge ti mo ti koli na ti wali, zo ti kua ti mo ti koli na ti wali nga na azo ti mara ti Lévi so asara kodro na yâ ti agbata* ti mo; na mo yeke sara ngia na gbele Jéhovah Nzapa ti mo na peko ti akua kue so mo sara. 19 Mo sara hange si na angoi kue so mo sara kodro na ndo ni so, mo girisa azo ti mara ti Lévi pëpe.+

20 “Na ngoi so Jéhovah Nzapa ti mo asara si sese ti mo akono,+ tongana ti so lo mû zendo ni na mo,+ na mo tene: ‘Mbi ye ti te nyama’, ndali ti so nzara ti nyama asara mo,* mo lingbi ti te ni na ngoi kue so mo ye.+ 21 Tongana ndo so Jéhovah Nzapa ti mo asoro ti zia iri ti lo dä+ ayo mingi na mo, mo lingbi ti fâ ambeni bagara, wala ambeni taba wala ambeni ngasa ti mo so Jéhovah amû na mo, gï tongana ti so mbi mû lani yanga na mo ti sara, na mo te ni na yâ ti agbata* ti mo na ngoi kue so mo ye. 22 Mo lingbi ti te ni tongana ti so mo yeke te gazelle na lekpa;+ zo so aga sioni awe na zo so aga sioni pëpe alingbi ti te ni. 23 Me mo ngbâ gï na ndö ti desizion ti mo ti te mênë ni pëpe,+ ndali ti so mênë ayeke fini;*+ na nyama so mênë ni angbâ dä, te ni pëpe. 24 Mo te mênë pëpe. Mo tuku ni na sese tongana ngu.+ 25 Mo te ni pëpe, tongaso si ye aga nzoni na mo na amolenge ti mo na peko ti mo, ndali ti so mo yeke sara ye so ayeke na lege ni na lê ti Jéhovah. 26 Tongana mo yeke gue na ndo so Jéhovah asoro ande, mo mû gï aye ti mo so mo zia ni nde ndali ti Nzapa nga na asandaga so mo mû ti sara ye alingbi na azendo ti mo, si mo gue na ni. 27 Kâ, nyama ti mo so mo ga na ni ti tene a mû na sandaga so a zö ni agbi kue, a yeke zö ni nga na mênë ni+ na ndö ti gbalaka ti Jéhovah Nzapa ti mo; a lingbi a tuku mênë ti nyama ti mo so mo mû na sandaga na ndö ti gbalaka+ ti Jéhovah Nzapa ti mo; me nyama ni, mo lingbi ti te ni.

28 “Mo sara kue ti sara ye alingbi na atënë kue so mbi fa na mo, si ye aga lakue nzoni na mo na amolenge ti mo na peko ti mo, ndali ti so mo yeke sara ye so ayeke nzoni nga na lege ni na lê ti Jéhovah Nzapa ti mo.

29 “Tongana Jéhovah Nzapa ti mo ahunzi amara so mo yeke tomba ala so awe,+ na mo sara kodro na ndö ti sese ni awe, 30 mo sara hange si mo tï na yâ ti kûkû pëpe na peko ti so a hunzi ala na gbele mo. Mo hunda ndo na ndö ti anzapa ti ala pëpe, mo tene: ‘Amara so ayeke voro ka anzapa ti ala ni tongana nyen? Mbi kue mbi ye ti sara tongaso.’+ 31 Mo sara tongaso na Jéhovah Nzapa ti mo pëpe, ngbanga ti so, ti voro anzapa ti ala, amara so asara ye nde nde kue so Jéhovah ake, même ala zö amolenge ti ala ti koli na ti wali na anzapa ti ala ni.+ 32 Tënë kue so mbi tene na ala so, ala sara kue ti bata ni.+ Ala zia mbeni tënë na ndö ni pëpe nga ala zi mbeni tënë na yâ ni pëpe.+

13 “Tongana mbeni prophète wala zo ti fango peko ti abango li so lo bâ abâ gigi na ndo so mo yeke dä, na lo mû na mo mbeni fä wala lo fa mbeni ye so ayeke si kekereke, 2 na fä ni wala peko ti bango li so lo fa aga tâ tënë, na lo tene: ‘Zia e gue na peko ti ambeni nzapa nde,’ anzapa so mo hinga ala pëpe, ‘na e sara na ala,’ 3 mo mä tënë ti prophète so wala zo ti fango peko ti bango li so pëpe,+ ndali ti so Jéhovah Nzapa ti ala ayeke tara bê ti ala+ ti hinga wala ala ye Jéhovah Nzapa ti ala na bê ti ala kue nga na âme* ti ala kue.+ 4 A yeke Jéhovah Nzapa ti ala la ala doit ti gue na peko ti lo, ti kpe mbeto ti lo, ti bata acommandement ti lo, ti mä yanga ti lo, ti sara na lo nga ti ngbâ nduru na lo.+ 5 Âdu ti prophète so wala zo ti fango peko ti bango li so, ala fâ lo,+ ndali ti so lo pusu ala ti sara kpengba-li na Jéhovah Nzapa ti ala so asigi na ala na Égypte na lo zi ala na ndo so ala sara lani ngbâa dä; lo pusu ala nga ti zia lege so Jéhovah Nzapa ti ala ahunda na ala ti tambela dä; ala zi sioni ye na popo ti ala.+

6 “Tongana ita ti mo ti koli, molenge so mama ti mo adü, wala molenge ti mo ti koli wala ti wali, wala wali ti mo so mo ye lo mingi wala tâ kamarade ti mo* agi ti handa mo na hondengo ni, lo tene: ‘E gue e sara na ambeni nzapa nde,’+ anzapa so mo wala akotara ti mo ahinga ala pëpe, 7 anzapa ti amara so angoro ala, atâa ala so ayeke nduru na ala wala ala so ayo na ala, amara so alondo na yanga ti sese ni juska ti si na mbeni mbage ni, 8 mo yeda na lo pëpe, mo mä lo pëpe,+ mo bâ mawa ti lo pëpe nga mo honde ndö ti lo pëpe; 9 me mo fâ gï lo.+ Mo la mo yeke kozo zo ti zia maboko na ndö ti lo ti fâ lo; na pekoni tanga ti azo ni ayeke sara nga tongaso.+ 10 Mo bo lo na tênë mo fâ lo,+ ndali ti so lo gi ti sara si mo ke Jéhovah Nzapa ti mo so asigi na mo na Égypte, ndo so mo sara lani ngbâa dä. 11 Azo ti Israël kue ayeke mä ande tënë so, na mbeto ayeke sara ala, na ala yeke sara mara ti sioni ye so na popo ti ala encore ape.+

12 “Tongana mo mä a tene na yâ ti mbeni gbata ti ala so Jéhovah Nzapa ti ala amû na ala ti sara kodro dä, 13 a tene: ‘Ambeni zo ti kirikiri afono na popo ti azo ti gi ti handa azo ti gbata ti ala, ala tene: “E gue e sara na ambeni nzapa nde,” anzapa so mo hinga ala pëpe so,’ 14 mo bâ yâ ti tënë ni nzoni, mo gi ti hinga ye dä mbilimbili na mo hunda ndo na ndö ni;+ tongana mo bâ so a sara sioni ye so biani na popo ti ala, 15 mo fâ azo ti gbata ni so na épée.+ Mo futi aye kue so ayeke na yâ ni na épée, même anyama.+ 16 Na pekoni, mo bungbi anzoni ye kue ti gbata ni na ndo so azo ayeke gue ka dä mingi, na mo gbi gbata ni; âdu ti anzoni ye ni, a yeke ga tongana mbeni sandaga so a mû ni kue na Jéhovah Nzapa ti mo. Gbata ni ayeke ga mbeni ndo so a wara gï afango da na ndö ni, na a yeke ngbâ tongaso lakue. A lingbi zo akiri aleke ni pëpe. 17 Mo mû ye oko pëpe so a zia ni nde ti futi ni,*+ si ngonzo ti Jéhovah so alondo tongana wâ adë, na lo bâ mawa ti mo, lo sara nzoni bê na mo nga lo sara si amolenge ti mo aga gbani, tongana ti so lo mû zendo ni na akotara ti mo.+ 18 Mo mä yanga* ti Jéhovah Nzapa ti mo, na lege so mo bata acommandement ti lo kue so mbi yeke mû na mo laso, na tongaso mo yeke sara ye so ayeke na lege ni na lê ti Jéhovah Nzapa ti mo.+

14 “Ala yeke amolenge ti Jéhovah Nzapa ti ala. Ala suru terê ti ala na kä pëpe+ wala ala kio kuä ti ndö ti lê* ti ala pëpe ndali ti mbeni zo so akui,+ 2 ndali ti so ala yeke mbeni mara so ayeke nzoni-kue+ ndali ti Jéhovah Nzapa ti ala; na Jéhovah asoro ala na popo ti amara kue ti sese ti ga azo ti lo, ye ti lo wani so lo zia ni nde.*+

3 “Ala te pëpe mbeni ye so ayeke sioni.+ 4 Anyama so ala lingbi ti te ayeke so:+ bagara, taba, ngasa, 5 mara ti alekpa nde nde, gazelle, ngasa ti ngonda, taba ti ngonda nga na taba ti yâ ti ahoto; 6 anyama so li ti gere ti ala akangbi use nga so ala te kobe ala mene ni na ala kiri na ni na yanga ti ala si ala kiri ate ni, ala so la si ala lingbi ti te ni. 7 Ye oko, na popo ti anyama so ate kobe ala mene ni na ala kiri na ni na yanga ti ala si ala kiri ate ni wala ala so li ti gere ti ala akangbi use, ala so la ala te pëpe: chameau, ndaramba nga na sibisi,* ngbanga ti so ala te kobe ala mene ni na ala kiri na ni na yanga ti ala si ala kiri ate ni, me li ti gere ti ala akangbi use pëpe. Ala bâ ala tongana ye ti sioni.+ 8 Cochon nga, ala te lo pëpe, ngbanga ti so, atâa so li ti gere ti lo akangbi use, tongana lo te kobe lo mene ni, lo yeke kiri na ni pëpe na yanga ti lo si lo kiri lo te ni. Ala bâ lo tongana ye ti sioni. Ala te anyama so pëpe nga ala ndu kuâ ti ala pëpe.

9 “Na popo ti aye kue so ayeke na yâ ti ngu, ala so ala lingbi ti te ni la: Aye kue so tïtî ala ayeke ti susu na ala yeke na écaille, ala lingbi ti te ala.+ 10 Me aye kue so ayeke na yâ ti ngu si tïtî ala ayeke ti susu pëpe nga ala yeke na écaille pëpe, ala te ala pëpe. Ala bâ ala tongana ye ti sioni.

11 “Ala lingbi ti te andeke kue so ayeke nzoni. 12 Me ala te andeke so pëpe: aigle, balbuzard, vuko vautour,+ 13 bengba milan, vuko milan, mara ti amilan kue, 14 mara ti acorbeau kue, 15 autruche,* hibou, mouette, mara ti andeke kue ti mungo kondo, 16 kete hibou, hibou so mê ti lo ayo, cygne, 17 pélican, vautour, cormoran, 18 cigogne, mara ti ahéron kue, huppe na dongi.* 19 Gbâ ti akete kete nyama kue so ayeke na kpangbi ayeke nga sioni ndali ti ala. Ala te ala pëpe. 20 Anyama kue so ayeke huru na so ayeke nzoni, ala lingbi ti te.

21 “Ala te pëpe nyama so akui awe.+ A lingbi ti mû ni na wande so asara kodro na yâ ti gbata* so mo yeke dä, na lo lingbi ti te ni, wala a lingbi ti kä ni na mbeni wande, ndali ti so ala yeke mbeni mara so ayeke nzoni-kue teti Jéhovah Nzapa ti ala.

“Mo tö molenge ti ngasa na yâ ti ngu ti me ti mama ti lo pëpe.+

22 “Ngu oko oko, mo mû dîme* ti alê ti kobe kue so ayeke lë na yaka ti mo.+ 23 Mo yeke te dîme ti alê ti kobe ti mo, ti fini vin ti mo, ti mafuta ti mo nga na ti akozo molenge ti abagara ti mo, ti ataba ti mo wala ti angasa ti mo na gbele Jéhovah Nzapa ti mo na ndo so lo soro ti zia iri ti lo dä,+ si mo manda ti kpe mbeto ti Jéhovah Nzapa ti mo lakue.+

24 “Me tongana lege ti singo na ndo ni ayo na mo mingi nga mo lingbi pëpe ti yô aye ni ti gue na ni na ndo so Jéhovah Nzapa ti mo asoro ti zia iri ti lo dä+ ndali ti so a yo mingi na mo, (teti so Jéhovah Nzapa ti mo ayeke sara tufa na ndö ti mo,) 25 mo yeke kä aye ni na mo mû nginza ni na maboko ti mo, mo gue na ndo so Jéhovah Nzapa ti mo ayeke soro. 26 Mo lingbi ti mû nginza ni ti vo na ye kue so mo ye:* bagara, taba, ngasa, vin wala ambeni sämba nde, nga na mbeni ye nde so mo ye;* mo yeke te ye na gbele Jéhovah Nzapa ti mo na mo sara ngia, mo na azo ti da ti mo.+ 27 Mo girisa pëpe zo ti mara ti Lévi ti yâ ti agbata ti mo,+ ndali ti so lo wara pëpe mbeni sese wala mbeni héritage tongana ti so mo wara.+

28 “Tongana ngu ota alingbi awe, mo ga na dîme kue ti alê ti kobe ti mo ti ngu ni so, mo zia ni na mbeni ndo na yâ ti agbata ti mo.+ 29 Tongaso, zo ti mara ti Lévi, so awara pëpe mbeni sese wala mbeni héritage tongana ti so mo wara ti mo; wande, molenge so babâ ti lo ayeke dä pëpe* nga na wali-mua so ayeke na yâ ti agbata ti mo, ayeke ga ti te ye alingbi na nzara ti ala,+ si Jéhovah Nzapa ti mo asara tufa na ndö ti mo na yâ ti aye kue so mo yeke sara.+

15 “Lakue na hunzingo ti ngu mbasambala, mo zi bon na li ti zo.+ 2 Zingo bon ni ayeke tongaso: Zo oko oko kue ayeke zia tënë ti bon so lo sara na mba ti lo. A lingbi lo hunda pëpe na mba ti lo wala na ita ti lo ti futa bon ni, ndali ti so a yeke to mbela ndali ti zingo bon na li ti zo na iri ti Jéhovah.+ 3 Mo lingbi ti hunda na wande ti futa na mo bon ti mo;+ me mo zia tënë ti bon ti mo kue so ayeke na li ti ita ti mo. 4 Ye oko, a lingbi zo oko na popo ti ala aga wayere pëpe, ndali ti so Jéhovah ayeke sara tufa na ndö ti mo+ na yâ ti kodro so Jéhovah Nzapa ti mo ayeke mû na mo ti ga ye ti mo; 5 me a yeke duti tongaso gï tongana mo mä yanga ti Jéhovah Nzapa ti mo, na mo sara kue ti bata acommandement kue so mbi yeke mû na mo laso.+ 6 Jéhovah Nzapa ti mo ayeke sara tufa na ndö ti mo tongana ti so lo mû zendo ni na mo, amara mingi ayeke sara bon na tïtî mo,* me mo yeke na bezoin ti mû bon na tïtî ala pëpe;+ mo yeke komande amara mingi, me ala yeke komande mo pëpe.+

7 “Tongana, na yâ ti mbeni gbata ti kodro so Jéhovah Nzapa ti mo ayeke mû na mo, mbeni ita ti mo zo ti Israël aga wayere, mo bâ lo bango na lê pëpe wala zia si maboko ti mo akpengba na mbage ti lo pëpe.+ 8 Me a lingbi maboko ti mo awoko na mbage ti lo+ na mo sara na lo bon* ti ye kue so lo yeke na bezoin ni wala so amanke lo. 9 Mo sara hange si mo maï mbeni sioni bibe na yâ ti bê ti mo pëpe, na mo tene: ‘Ngu mbasambala ni, ngu ti zingo bon na li ti zo, aga nduru awe,’+ na mo ke ti zi maboko ti mo ti mû ye na ita ti mo so aga wayere. Me tongana lo toto na Jéhovah ndali ti ye so mo sara na lo, andâ a ga siokpari na li ti mo awe.+ 10 A lingbi mo mû ye na lo na bê ti mo oko,+ me na bê use pëpe, ndali ti so a yeke na sarango tongaso si Jéhovah Nzapa ti mo ayeke sara tufa na ndö ti akusala ti mo kue nga na aye kue so mo ye ti sara.+ 11 Awayere ayeke duti dä lakue na yâ ti kodro ni.+ Ndani la mbi mû yanga na mo, mbi tene: ‘A lingbi mo zi maboko ti mo, mo mû ye na ita ti mo so ayeke bâ pasi nga so ayeke wayere na yâ ti kodro ti mo.’+

12 “Tongana ita ti mo Hébreu, koli wala wali, akä terê ti lo na mo na lo sara kua na mo ngu omene awe, na ngu mbasambala ni, mo zi lo.+ 13 Tongana mo zi lo awe, mo zia lo lo gue maboko senge pëpe. 14 Zia maboko ti mo awoko ti mû na lo ambeni nyama ti mo, ambeni lê ti kobe so ayeke na ndo ti pikango lê ti kobe ti mo nga na mbeni vin na mafuta so mo pete. Mo mû ye na lo alingbi na tufa so Jéhovah Nzapa ti mo asara na ndö ti mo. 15 Girisa pëpe so mo yeke lani ngbâa na kodro ti Égypte na Jéhovah Nzapa ti mo azi mo. Ndani la mbi mû yanga na mo ti sara ye so laso.

16 “Me tongana lo tene na mo, lo tene: ‘Mbi ye ti hon pëpe,’ ndali ti so lo ye mo na azo ti da ti mo, na lo yeke na ngia na ngoi so lo yeke na ndo ti mo,+ 17 mo mû ye ti korongo na mê, mo kôro mê ti lo na terê ti cadre ti porte, na lo yeke ga ngbâa ti mo biani biani. Mo yeke sara nga mara ni na ngbâa ti mo ti wali. 18 Tongana mo zi lo, lo hon, zia si bê ti mo ason pëpe, ndali ti so kua so lo sara na mo na yâ ti angu omene so ahon fani use kua so mbeni zo so mo yeke futa lo futango ayeke sara na mo, na Jéhovah Nzapa ti mo asara tufa na ndö ti mo na yâ ti ye kue so lo sara.

19 “Akozo molenge ti abagara ti mo wala ti ataba wala ti angasa ti mo so ayeke akoli ni, mo zia ala nde ndali ti Jéhovah Nzapa ti mo.+ Mo mû akozo molenge ti abagara* ti mo ti sara na mbeni kua pëpe, wala mo fâ kuä ti terê ti akozo molenge ti ataba ti mo pëpe. 20 Ngu oko oko, mo na azo ti da ti mo ayeke te ala na gbele Jéhovah Nzapa ti mo na ndo so Jéhovah ayeke soro.+ 21 Me tongana mbeni mbage ti terê ti nyama ni abuba, na tapande gere ti lo wala lê ti lo wala mbeni ye nde ti terê ti lo, mo mû lo na sandaga na Jéhovah Nzapa ti mo pëpe.+ 22 Mo te ni na yâ ti agbata* ti mo; zo so aga sioni na zo so aga sioni pëpe alingbi ti te ni, tongana ti so zo kue ayeke te gazelle na lekpa.+ 23 Me mo te mênë ni pëpe;+ mo tuku ni na sese tongana ngu.+

16 “Girisa nze ti Abib* pëpe, nga sara Matanga ti Pâque ndali ti Jéhovah Nzapa ti mo,+ ndali ti so a yeke na nze ti Abib la Jéhovah Nzapa ti mo asigi na mo na Égypte na bï.+ 2 Nga, mo mû mbeni taba wala ngasa nga na bagara na popo ti anyama ti mo,+ mo mû na sandaga ti Pâque na Jéhovah Nzapa ti mo,+ na ndo so lo soro ti zia iri ti lo dä.+ 3 Na ngoi so mo yeke te nyama ti Pâque ni, mo zia pëpe na terê ni mbeni ye so a sara na levure;+ na yâ ti lango mbasambala, mo te gï mapa so a sara na levure pëpe, mapa ti vundu, ndali ti so mo sigi na kodro ti Égypte na loro.+ Mo sara tongaso si mo dabe ti mo na lango so mo sigi lani na Égypte. Mo sara ni na yâ ti gigi ti mo kue.+ 4 Na yâ ti lango mbasambala so, na yâ ti kodro ti mo kue, a yeke bâ pëpe mengo farine so akpi awe;+ nga a lingbi nyama so mo fâ ni na lakui ti kozo lango ni angbâ juska na ndapre pëpe.+ 5 A mû lege na mo pëpe ti fâ nyama ti Pâque ni na yâ ti agbata kue so Jéhovah Nzapa ti mo ayeke mû na mo. 6 Me mo sara ni na ndo so Jéhovah Nzapa ti mo asoro ti zia iri ti lo dä. Mo fâ nyama ti Pâque ni na lakui, kete na peko ti lindango ti lâ,+ alingbi na ngoi so mo sigi lani na Égypte. 7 Mo zö ni, mo te ni+ na ndo so Jéhovah Nzapa ti mo ayeke soro;+ na mo kiri na tente ti mo na ndapre ni. 8 Na yâ ti lango omene, mo te gï mapa so a sara na levure pëpe; na lango mbasambala ni, a yeke sara kota bungbi ndali ti Jéhovah Nzapa ti mo. A lingbi mo sara kua pëpe.+

9 “Mo diko ayenga mbasambala. Mo yeke to nda ti dikongo ayenga mbasambala ni ti londo na ngoi so mo komanse ti fâ akozo lê ti kobe ti yaka ti mo.+ 10 Na pekoni, mo yeke sara Matanga ti Ayenga ndali ti Jéhovah Nzapa ti mo+ na lege ti aye so mo mû na bê ti mo wani na sandaga alingbi na tufa so Jéhovah Nzapa ti mo asara na ndö ti mo.+ 11 Mo yeke sara ngia na gbele Jéhovah Nzapa ti mo na ndo so Jéhovah Nzapa ti mo asoro ti zia iri ti lo dä; mo, molenge ti mo ti koli na ti wali, ngbâa ti mo ti koli na ti wali, zo ti mara ti Lévi so alango na yâ ti agbata* ti mo, wande so asara kodro na ndo so mo yeke dä, molenge so babâ ti lo ayeke dä pëpe* nga na wali-mua.+ 12 Girisa pëpe so mo yeke lani ngbâa na Égypte;+ a lingbi mo bata andia so nga mo sara ye alingbi na ni.

13 “Tongana mo mû alê ti kobe ti mo na ndo ti pikango alê ti kobe ti mo nga na mafuta na vin so mo pete mo kiri na ni na da awe, a lingbi mo sara Matanga ti Akpangba*+ lango mbasambala. 14 Mo sara ngia na ngoi ti matanga ni,+ mo, molenge ti mo ti koli na ti wali, ngbâa ti mo ti koli na ti wali, zo ti mara ti Lévi, wande so asara kodro na ndo so mo yeke dä, molenge so babâ ti lo ayeke dä pëpe nga na wali-mua, so ala yeke na yâ ti agbata ti mo. 15 Na yâ ti alango mbasambala so, mo yeke sara matanga+ ndali ti Jéhovah Nzapa ti mo na ndo so Jéhovah ayeke soro, ndali ti so Jéhovah Nzapa ti mo ayeke sara tufa na ndö ti alê ti kobe kue ti yaka ti mo nga na ndö ti aye kue so mo sara,+ na mo yeke duti ande gï na ngia.+

16 “Fani ota na yâ ti ngu oko oko, akoli kue ti kodro ti mo ayeke si na gbele Jéhovah Nzapa ti mo na ndo so lo soro: ala yeke sara Matanga ti mapa so a sara na levure pëpe,+ Matanga ti Ayenga+ nga na Matanga ti Akpangba;*+ zo oko ayeke ga na gbele Jéhovah maboko senge pëpe. 17 Zo oko oko aga na matabisi alingbi na tufa so Jéhovah Nzapa ti lo asara na lo.+

18 “Mo zia ajuge+ na amokonzi na ndö ti mara oko oko na yâ ti agbata* kue so Jéhovah Nzapa ti mo ayeke mû na mo; a lingbi ala fâ ngbanga ti azo ni na lege ti mbilimbili. 19 A lingbi mo ba yâ ti ngbanga pëpe,+ mo mû mbage ti zo pëpe+ wala mo mû goro pëpe, ndali ti so goro ayeke sara si lê ti zo ti ndara avuko+ nga ayeke ba yâ ti atënë ti zo ti mbilimbili. 20 Mo gi ti sara gï ye so ayeke mbilimbili,+ si mo ngbâ na fini nga mo gue mo mû sese so Jéhovah Nzapa ti mo aye ti mû na mo.

21 “Mo lu pëpe mbeni keke ti tene aduti tongana mbeni yongoro yanda*+ na terê ti gbalaka ti Jéhovah Nzapa ti mo.

22 “Mo kpo nga na nduzu pëpe mbeni yanda ti tênë ndali ti mo wani;+ a yeke mbeni ye so Jéhovah Nzapa ti mo ake ni.

17 “Bagara wala taba so mbeni mbage ti terê ti lo abuba, mo mû na sandaga na Jéhovah Nzapa ti mo pëpe, ndali ti so a yeke ye ti sioni mingi na lê ti Jéhovah Nzapa ti mo.+

2 “A lingbi ti si so, na yâ ti mbeni oko ti agbata so Jéhovah Nzapa ti mo ayeke mû na mo, a wara mbeni koli wala mbeni wali so ayeke sara mbeni ye so ayeke sioni na lê ti Jéhovah Nzapa ti mo, nga lo yeke doro tënë ti mbele ti lo,+ 3 na lo gue lo voro ambeni nzapa nde nga lo kuku na gbe ti anzapa ni so wala na gbe ti lâ, wala na gbe ti nze wala na gbe ti aye kue so ayeke na lê ti nduzu;+ a yeke mbeni ye so mbi hunda na mo ti sara pëpe.+ 4 Tongana a sara tënë ni na mo wala mo mä tënë ni, a lingbi mo gi ti hinga tënë na ndö ni mbilimbili. Tongana a yeke tâ tënë+ so a sara sioni ye so na Israël, 5 mo sigi na koli wala wali so asara sioni ye so na yanga ti gbagba ti gbata ni, na ala bo zo ni na tênë ala fâ lo.+ 6 Tongana atémoin* use wala ota afa so ye ni asi biani,+ ala fâ zo so alingbi na kuâ so. Me tongana témoin ti ye ni ayeke gï oko, a lingbi ala fâ lo pëpe.+ 7 Atémoin ni la ayeke duti akozo zo ti bongo lo ti fâ lo; na pekoni tanga ti azo ni ayeke sara nga tongaso. Mo zi ye ti sioni na yâ ti kodro ti mo.+

8 “Tongana mbeni tënë alondo na yâ ti mbeni gbata ti mo na a yeke ngangu na mo ti fâ yâ ti ngbanga ni, na tapande, tënë ti tukungo mênë,+ wala tënë ti mbeni ye so zo ayeke na droit ti wara ni, wala tënë ti ye ti ngangu so a sara na mbeni zo wala mbeni ye so adü papa, mo londo mo gue na ndo so Jéhovah Nzapa ti mo asoro.+ 9 Mo gue na ndo ti aprêtre ti mara ti Lévi nga na zo so ayeke juge+ na ngoi ni so, mo fa tënë ni na ala, na ala yeke fâ yâ ti ngbanga ni na mo.+ 10 Na pekoni, mo sara tongana ti so ala fa na mo na ndo so Jéhovah asoro. Ye kue so ala fa na mo so, sara gï ni. 11 Mo sara ye alingbi na ndia so ala fa na mo, nga a lingbi na desizion ti ala.+ Mo zia lege ti desizion ti ala ni pëpe ti gue na mbage ti koli wala na mbage ti wali.+ 12 Zo so baba apusu lo ti ke ti sara ye so prêtre so ayeke sara kua na Jéhovah Nzapa ti mo afa wala so juge afa, a lingbi a fâ lo.+ Mo zi ye ti sioni na Israël.+ 13 Azo kue ayeke mä ande tënë ni na mbeto ayeke sara ala, na ala yeke zia encore si baba apusu ala ti sara ye tongaso pëpe.+

14 “Tongana mo si na sese so Jéhovah Nzapa ti mo ayeke mû na mo, na mo mû ni si mo sara kodro dä, na mo tene: ‘Mbi ye mbeni gbia ti komande mbi tongana ti amara kue so angoro mbi,’+ 15 tongaso, mo yeke zia na ndö ti mo mbeni gbia so Jéhovah Nzapa ti mo la asoro lo.+ Mo soro gbia ni gï na popo ti aita ti mo. A mû lege na mo pëpe ti soro mbeni wande so ayeke ita ti mo pëpe ti komande mo. 16 Ye oko, a lingbi gbia ni awara gbâ ti ambarata ndali ti lo wani pëpe+ wala lo sara pëpe si azo ni akiri na Égypte ti wara ambeni mbarata na ndö ni,+ ndali ti so Jéhovah atene na ala, atene: ‘Ala kiri na Égypte pëpe.’ 17 Nga, a lingbi lo mû gbâ ti awali pëpe, ngbanga ti bê ti lo ahon yongoro;+ a lingbi lo bungbi gbâ ti argent nga na lor ndali ti lo wani pëpe.+ 18 Tongana lo duti na ndö ti trône ti royaume ti lo awe, a lingbi lo mû mbeti ti Ndia so aprêtre ti mara ti Lévi ayeke bata, lo sara ti lo copie* ni.+

19 “A lingbi mbeti ti Ndia ni aduti na terê ti lo, na lo diko ni na yâ ti gigi ti lo kue,+ si lo manda ti kpe mbeto ti Jéhovah Nzapa ti lo, ti bata nga ti sara ye alingbi na atënë kue ti Ndia so.+ 20 Tongaso si bê ti lo apusu lo pëpe ti bâ terê ti lo kota ahon aita ti lo nga lo zia lege ti commandement ni pëpe ti gue na mbage ti koli wala na mbage ti wali, tongaso si lo komande aninga na ndö ti royaume ti lo, lo na amolenge ti lo ti koli na yâ ti Israël.

18 “Aprêtre ti mara ti Lévi nga na mara ti Lévi ni kue ayeke wara pëpe mbeni sese wala mbeni héritage tongana ti azo ti Israël. Kobe ti ala ayeke asandaga so a zö ni na Jéhovah, so aga ti lo awe.+ 2 Ni la ala yeke wara pëpe mbeni héritage na popo ti aita ti ala. Jéhovah la ayeke héritage ti ala, tongana ti so lo tene na ala.

3 “Bâ aye so aprêtre ayeke na droit ti wara ni lakue na maboko ti azo ni la: Zo so amû nyama na sandaga, atâa a yeke bagara wala taba, a lingbi lo mû maboko ni, ngbangba ni nga na yâ ni na prêtre. 4 A lingbi mo mû na lo nga akozo lê ti kobe ti mo, fini vin ti mo, mafuta ti mo nga na kozo kuä ti terê ti taba ti mo so mo fâ ni.+ 5 Jéhovah Nzapa ti mo asoro lo na amolenge ti lo ti koli na popo ti tanga ti amara ni kue ti sara kua na iri ti Jéhovah lakue.+

6 “Me tongana mbeni zo ti mara ti Lévi azia gbata so lo sara kodro dä na Israël,+ na lo ye* ti gue na ndo so Jéhovah asoro,*+ 7 lo lingbi ti sara kua kâ na iri ti Jéhovah Nzapa ti lo tongana ti aita ti lo kue, azo ti mara ti Lévi, so ayeke luti kâ na gbele Jéhovah.+ 8 Lo yeke wara oko wungo ti kobe so ala yeke wara,+ na ndö ti nginza so lo wara na peko ti so lo kä aye ti akotara ti lo.

9 “Tongana mo si na sese so Jéhovah Nzapa ti mo ayeke mû na mo, mo manda pëpe ti sara asioni ye so amara ni kâ ayeke sara.+ 10 A lingbi a wara na popo ti ala pëpe zo so asara si a gbi molenge ti lo ti koli wala ti wali na wâ,*+ wala zo ti bango mbadi,+ wala zo ti sarango magie,+ wala zo ti fango ye so ayeke si kekereke,+ wala zo ti yorö,+ 11 wala zo ti kangango amba ti lo na yorö, wala zo so ague abâ zo ti sarango tënë na yingo ti akuâ,+ wala zo so ague abâ zo ti fango aye so ayeke si ande na zo,+ wala zo so ayeke hunda tënë na akuâ.+ 12 Zo so asara aye so, lo yeke sioni mingi na lê ti Jéhovah, nga a yeke ndali ti asioni sarango ye so la si Jéhovah Nzapa ti mo ayeke tomba amara so na gbele mo. 13 Sara si tënë ayeke na li ti mo pëpe na gbele Jéhovah Nzapa ti mo.+

14 “Amara so mo yeke mû sese ti ala ayeke mä azo ti sarango magie+ nga na azo ti sarango mbadi;+ me Jéhovah Nzapa ti mo amû lege na mo ti sara mara ti aye so pëpe. 15 Jéhovah Nzapa ti mo ayeke soro ande na popo ti aita ti mo mbeni prophète tongana mbi ndali ti mo. Ala mä lo.+ 16 Jéhovah Nzapa ti mo ayeke sara tongaso ndali ti ye so mo hunda ni na Horeb na ngoi so azo kue* abungbi lani,+ si mo tene: ‘Zia mbi mä go ti Jéhovah Nzapa ti mbi encore ape wala mbi bâ kota wâ so encore ape, ngbanga ti mbi kui.’+ 17 Tongaso, Jéhovah atene na mbi, atene: ‘Ye so ala tene so ayeke nzoni. 18 Mbi yeke sara si mbeni prophète tongana mo ayeke bâ gigi na popo ti aita ti ala ndali ti ala,+ mbi yeke zia tënë ti mbi na yanga ti lo,+ na lo yeke fa na ala ye kue so mbi tene na lo.+ 19 Zo so ayeke ke ande ti mä tënë so lo yeke tene na iri ti mbi, lo yeke na tënë ti kiri na ni na mbi.+

20 “‘Tongana baba apusu mbeni prophète ti tene mbeni tënë na iri ti mbi so mbi la mbi fa na lo ti tene ni pëpe wala lo sara tënë na iri ti ambeni nzapa nde, a lingbi prophète so akui.+ 21 Ye oko, mo lingbi ti tene na bê ti mo, mo tene: “E yeke hinga tongana nyen so a yeke tënë so Jéhovah la atene ape?” 22 Tongana prophète ni asara tënë na iri ti Jéhovah na ye so lo tene asi pëpe wala tënë so lo tene aga tâ tënë pëpe, andâ Jéhovah la asara tënë ni pëpe. Baba la apusu prophète ni ti sara tënë. Mo sara mbeto ti lo pëpe.’

19 “Tongana Jéhovah Nzapa ti mo afuti amara so Jéhovah Nzapa ti mo ayeke mû sese ti ala na mo, na mo tomba ala nga mo sara kodro na yâ ti agbata ti ala na mo lango na yâ ti ada ti ala,+ 2 mo soro agbata ota na kodro so Jéhovah Nzapa ti mo ayeke mû na mo ti ga ti mo.+ 3 Sese so Jéhovah Nzapa ti mo amû na mo ti ga ti mo so, mo kangbi yâ ni ota. Mo leke alege ti tene zo kue so afâ mbeni zo akpe ague na mbeni oko ti agbata ni so.

4 “Tënë ti zo so afâ mbeni zo, na lo kpe lo gue kâ ti tene lo ngbâ na fini ayeke tongaso: A yeke ti so lo fâ mba ti lo ni na mbana pëpe nga lo ke lo kozo pëpe;+ 5 na tapande, tongana lo na mba ti lo ni ague na gbako ti gi keke, lo yô dö ti lo na nduzu ti dë na keke, me lê ti dö ni asigi na terê ti keke ni na amû mba ti lo ni si lo kui, a lingbi lo kpe lo gue na mbeni oko ti agbata so si lo ngbâ na fini.+ 6 Tongaso pëpe, na lê ti ngonzo,* zo so ayeke na droit ti fâ mbeni zo so afâ zo+ alingbi ti tomba peko ti wafango zo ni, lo gbu lo na lo fâ lo, ndali ti so lege ti gbata ni ayo mingi. Andâ lo lingbi fade na kuâ pëpe ndali ti so lo ke zo ni kozo pëpe.+ 7 Ndani la mbi mû yanga na mo, mbi tene: ‘Mo soro agbata ota.’

8 “Tongana Jéhovah Nzapa ti mo akono sese ti mo tongana ti so lo deba yanga ândö na akotara ti mo,+ na lo mû na mo sese ni kue so lo mû zendo ti mû ni na akotara ti mo,+ 9 gï tongana mo ngbâ lakue ti bata acommandement kue so mbi fa na mo laso, ti ndoye Jéhovah Nzapa ti mo na ti tambela na lege ti lo lakue,+ mo soro ambeni gbata ota ti zia na terê ti agbata ota so.+ 10 Tongana mo sara tongaso, mênë ti zo ayeke tuku senge senge pëpe+ na kodro ti mo so Jéhovah Nzapa ti mo ayeke mû na mo ti ga ti mo, nga ngbanga ti mênë ayeke duti ande na li ti mo pëpe.+

11 “Me tongana mbeni zo ake mba ti lo kozo,+ lo ku lo ti sara sioni na lo na lo pika lo* si lo kui, na pekoni zo ni akpe ague na mbeni oko ti agbata so, 12 a-ancien ti gbata ti lo ayeke tokua ndo ti iri lo ti ga, ala yeke zia lo na maboko ti zo so ayeke na droit ti fâ mbeni zo so afâ zo, na a lingbi lo kui.+ 13 Mo bâ* mawa ti lo pëpe, na mo zi ngbanga ti mênë ti zo so atuku senge senge na li ti azo ti Israël,+ tongaso si aye aga nzoni na mo.

14 “Tongana mo wara sese ti mo awe na kodro so Jéhovah Nzapa ti mo ayeke mû na mo, mo mû pëpe ye so afa yanga ti sese ti voizin ti mo,+ so akotara alu ni ti fa yanga ni, mo lu ni na mbeni ndo nde.

15 “Tongana gï zo oko la ayeke témoin ti mbeni faute wala siokpari so mbeni zo asara,+ gï tënë ti lo ni alingbi pëpe ti zia tënë na li ti zo ni.* Na lege ti tënë ti yanga ti atémoin* use wala ota, si gere ti mbeni tënë ayeke luti nzoni.+ 16 Tongana mbeni témoin ti sioni bê abi tënë na li ti mbeni zo na lo tene so zo ni asara mbeni ye so ake ndia,+ 17 azo use so tënë ayeke na popo ti ala ayeke luti na gbele Jéhovah, na gbele aprêtre nga na ajuge so ayeke sara kua na ngoi ni so.+ 18 Ajuge ni ayeke gi nda ti tënë ni nzoni;+ tongana zo so abi tënë na li ti mba ti lo ni ayeke témoin ti mvene nga tënë so lo bi na li ti ita ti lo ayeke mvene, 19 ala sara na lo oko ye so lo leke na mayele ti sara na ita ti lo so,+ na ala zi ye ti sioni na popo ti ala.+ 20 Tanga ti azo ayeke mä tënë so na mbeto ayeke sara ala, na ala yeke sara mara ti sioni ye so na popo ti ala encore ape.+ 21 Ala bâ* mawa ti zo ni pëpe:+ Fini* na place ti fini,* lê na place ti lê, pembe na place ti pembe, maboko na place ti maboko nga gere na place ti gere.+

20 “Tongana mo gue ti sara bira na awato ti mo na mo bâ so wungo ti ambarata ti ala, apuse ti mbarata ti ala nga na aturugu ti ala ayeke mingi ahon ti mo, sara mbeto ti ala pëpe, ndali ti so Jéhovah Nzapa ti mo so asigi na mo na kodro ti Égypte ayeke na mo.+ 2 Na ngoi so ala yeke nduru ti gue na bira ni, a lingbi prêtre aga asara tënë na azo ni.+ 3 Lo tene na ala, lo tene: ‘Azo ti Israël, ala mä tënë so: Ala yeke gue ti sara bira na awato ti ala la. Zia bê ti ala anze pëpe. Ala sara mbeto pëpe, ala zia si mbeto ahon ndö ti ala pëpe nga ala zia si terê ti ala adö na mbeto ndali ti azo ni pëpe, 4 ndali ti so Jéhovah Nzapa ti ala ayeke tambela legeoko na ala ti tiri na awato ti ala nga ti sö ala.’+

5 “Akota zo ti aturugu ni nga ayeke tene na azo ni, atene: ‘Zo wa la aleke fini da me ade lo lango na yâ ni ape? Zia lo kiri na da ti lo. Tongaso pëpe, lo lingbi ti kui na yâ ti bira ni na mbeni zo nde alango dä. 6 Zo wa la alu yaka ti vigne me ade lo ko lê ni ape? Zia lo kiri na da ti lo. Tongaso pëpe, lo lingbi ti kui na yâ ti bira ni na mbeni zo nde ayeke ko ni. 7 Zo wa la ague na peko ti mbeni wali me ade lo sara mariage na lo ape? Zia lo kiri na da ti lo.+ Tongaso pëpe, lo lingbi ti kui na yâ ti bira ni na mbeni koli nde asara mariage na wali ni.’ 8 Akota zo ti aturugu ni ayeke hunda nga azo ni, ala tene: ‘Zo wa la mbeto asara lo nga bê ti lo anze?+ Zia lo kiri na da ti lo. Tongaso pëpe, lo lingbi ti sara si bê ti aita ti lo anze tongana ti lo.’*+ 9 Tongana akota zo ti aturugu ni ahunzi tënë ti ala na azo ni awe, a lingbi ala zia amokonzi na ndö ti aturugu ni ti fa lege na ala.

10 “Tongana mo ga nduru na mbeni gbata ti sara bira na ni, gue nga na tënë ti siriri na ala.+ 11 Tongana ala yeda na tënë ti siriri ti mo ni na ala zi yanga ti gbagba ti gbata ti ala na mo, azo ti gbata ni kue ayeke ga azo ti sarango angangu kua ti mo nga ala yeke sara kua na mo.+ 12 Ye oko, tongana azo ni ake ti duti na siriri na mo me ala ga ti sara bira na mo, mo ngoro gbata ni na bira, 13 na Jéhovah Nzapa ti mo ayeke zia gbata ni na maboko ti mo; mo fâ koli oko oko kue na épée. 14 Âdu ti awali, amolenge, anyama nga na aye kue so ayeke na yâ ti gbata ni, so ti tene aye kue so ala gbu na peko ti bira ni, alingbi ti ga ti mo;+ na mo yeke te anzoni ye ti awato ti mo, so Jéhovah Nzapa ti mo amû na mo.+

15 “Ye so mo yeke sara ande na agbata kue so ayo mingi na mo la, agbata so ayeke pëpe na popo ti agbata ti amara so ayeke nduru na mo. 16 Me na yâ ti agbata ti amara so, so Jéhovah Nzapa ti mo ayeke mû na mo ti ga ti mo, ye kue so ayeke wu pupu, mo bata ni na fini pëpe.+ 17 Me mo futi ala kue: azo ti mara ti Heth, azo ti mara ti Amori, azo ti Canaan, azo ti Périzzi, azo ti Hévi nga na azo ti mara ti Jébus,+ tongana ti so Jéhovah Nzapa ti mo amû yanga na mo ti sara; 18 si ala fa na mo pëpe tongana nyen ti sara asioni ye so ala yeke sara ti voro na anzapa ti ala, si ala sara siokpari na terê ti Jéhovah Nzapa ti ala.+

19 “Tongana mo ngoro mbeni gbata na bira ti tene mo mû ni, na a sara alango mingi awe la mo ngbâ ti sara bira na ni, mo mû dö ti futi na akeke ti gbata ni pëpe. Mo lingbi ti te alê ti keke ni, me mo dë ni na sese pëpe.+ Keke ayeke zo si mo ngoro ni na bira tongana ti so a yeke ngoro zo na bira? 20 Mo lingbi ti futi gï akeke so mo hinga so a yeke te lê ni pëpe. Mo lingbi ti dë ni na sese nga ti mû ni ti leke na ye ti ngorongo na gbata so ayeke sara bira na mo, juska gbata ni atï.

21 “Tongana a wara kuâ ti mbeni zo na yâ ti ngonda na kodro so Jéhovah Nzapa ti mo ayeke mû na mo, na a hinga pëpe zo so afâ lo, 2 a lingbi a-ancien na ajuge+ ti kodro ti mo ague amû yongo ti ndo so kuâ ti zo ni ayeke dä na agbata so angoro ndo so a wara kuâ ni dä. 3 Na pekoni, a-ancien ti gbata so ayeke nduru mingi na kuâ ni ayeke mû mbeni kete wali-bagara so ade ti sara kua na lo pëpe, so ade ti zia joug na ndö ti go ti lo pëpe, 4 na a-ancien ti gbata ni ayeke gue na kete wali-bagara ni na yâ ti mbeni popo-hoto* so ngu ayeke sua dä, so ade ti dë yaka dä pëpe wala ade ti lu ye dä pëpe, na ala kungbi go ti lo kâ.+

5 “Aprêtre, azo ti mara ti Lévi, ayeke ga nduru, ndali ti so ala la Jéhovah Nzapa ti mo asoro ala ti sara kua ti lo,+ ti iri tufa na ndö ti azo na iri ti Jéhovah.+ Ala la ayeke fa tongana nyen ti leke atënë kue so andu ye ti ngangu so a sara na zo.+ 6 Na pekoni, a-ancien kue ti gbata so ayeke nduru mingi na ndo so kuâ ti zo ni ayeke dä ayeke sukula maboko ti ala+ na ndö ti kete wali-bagara ni so a kungbi go ti lo na yâ ti popo-hoto ni so; 7 na ala tene: ‘Maboko ti e atuku mênë so pëpe, nga e bâ pëpe tongana nyen la lo kui. 8 Jéhovah, mo zia tënë ni na li ti azo ti mo azo ti Israël pëpe, ala so mo zi ala;+ nga mo zia si ngbanga ti mênë ti zo so atuku senge senge so angbâ na ndö ti azo ti mo Israël pëpe.’+ Tongaso, ngbanga ti mênë ayeke ngbâ na li ti ala pëpe. 9 Tongana mo sara ye so, mo yeke zi na li ti mo ngbanga ti mênë ti zo so atuku senge senge; na ye so mo sara so ayeke mbilimbili na lê ti Jéhovah.

10 “Tongana mo gue mo sara bira na awato ti mo, si Jéhovah Nzapa ti mo asara si mo sö benda na ndö ti ala nga mo mû ala na ngbâa,+ 11 si na popo ti angbâa ni mo bâ mbeni pendere wali so agbu bê ti mo na mo ye ti mû lo ti ga wali ti mo, 12 mo lingbi ti ga na lo na da ti mo. Na pekoni, lo yeke kio kuä ti li ti lo, lo fâ nzene ti maboko ti lo, 13 lo zi bongo ti lo ti ngbâa na terê ti lo na lo duti na da ti mo. Lo yeke toto kuâ ti babâ na mama ti lo nze oko,+ na pekoni mo lingbi ti bungbi na lo; na mo yeke ga koli ti lo na lo yeke ga wali ti mo. 14 Me tongana lo nzere na bê ti mo pëpe, mo zia lo lo gue+ na ndo so bê ti lo aye.* Me mo lingbi ti kä lo pëpe wala ti sara ye ti ngangu na lo pëpe, ndali ti so mo zia kamene na lê ti lo awe.

15 “Tongana mbeni koli ayeke na awali use, na lo ye mbeni mingi ahon mba ti lo,* na ala use kue adü na lo amolenge-koli, si kozo molenge ni ayeke ti wali ni so lo ye lo mingi pëpe,+ 16 na lango so lo ye ti kangbi amosoro ti lo na popo ti amolenge ti lo, lo lingbi pëpe ti mû molenge ti wali so lo ye lo mingi so ti ga kozo molenge na place ti kozo molenge ni so ayeke ti wali so lo ye lo mingi pëpe so. 17 A lingbi lo fa so molenge-koli ti wali so lo ye lo mingi pëpe so la ayeke kozo molenge na mungo na lo double ti aye kue so lo yeke na ni, ndali ti so lo yeke tongo nda ti ngangu ti lo ti dungo molenge. Lo la lo yeke na droit ti kozo molenge.+

18 “Tongana mbeni zo ayeke na molenge-koli so asara kpengba-li na aye ti mä ndo pëpe, lo yeke mä yanga ti babâ wala mama ti lo pëpe,+ nga ala tara ti mû maboko na lo me lo ke ti mä ala,+ 19 a lingbi babâ na mama ti lo amû lo ague na lo na a-ancien na yanga ti gbagba ti gbata, 20 na ala tene na a-ancien ni: ‘Molenge ti e so ayeke molenge ti kpengba-li so aye ti mä ndo pëpe, na lo ke ti mä yanga ti e. Lo yeke zo ti tengo ye ahon ndö ni+ nga lo yeke ngbâa ti sämba.’+ 21 Tongaso, azo ti gbata ni kue ayeke bo lo na tênë si lo kui. A lingbi mo zi ye ti sioni na yâ ti kodro ti mo; azo ti Israël kue ayeke mä tënë ni, na mbeto ayeke sara ala.+

22 “Tongana mbeni zo asara mbeni siokpari so alingbi na ngbanga ti kuâ,+ na a fâ lo si a kanga kuâ ti lo na ndö ti keke,+ 23 a lingbi kuâ ti lo angbâ na ndö ti keke ni na bï pëpe.+ Me mo sara kue ti lu lo na lango ni so, ndali ti so zo so a kanga lo na ndö ti keke ayeke mbeni ye so Nzapa adeba ni awe,+ na a lingbi mo buba sese ti mo pëpe, sese so Jéhovah Nzapa ti mo ayeke mû na mo tongana héritage.+

22 “Tongana mo bâ bagara wala taba ti ita ti mo so agirisa, mo sara sanka ti lo pëpe.+ Mo sara kue ti kiri na lo na ita ti mo. 2 Me tongana ita ti mo ni alango ayo na mo wala mo hinga lo pëpe, mo gue na nyama ni na yanga-da ti mo, na lo ngbâ na ndo ti mo juska ita ti mo aga ti gi peko ti lo. Na pekoni, mo kiri na nyama ni na lo.+ 3 Ye so mo doit ti sara na kororo, bongo wala mbeni ye ti ita ti mo so agirisa si mo wara ni so la. Mo sara sanka ti ye ni pëpe.

4 “Tongana mo bâ kororo wala bagara ti ita ti mo atï na ndö ti lege, mo sara sanka pëpe. Mû maboko na lo ti yô nyama ni na nduzu.+

5 “A lingbi wali ayü bongo ti koli pëpe, na koli ayü bongo ti wali pëpe. Zo so asara tongaso lo yeke ga sioni mingi na lê ti Jéhovah Nzapa ti mo.

6 “Tongana mo si na ndö ti da ti ndeke na terê ti lege, atâa da ni ayeke na yâ ti keke wala na sese, na amolenge ni wala apara ayeke na yâ ni nga mama ni ayeke lango na ndö ti amolenge ni wala na ndö ti apara ni, mo bungbi mama ni na akete ndeke ni mo mû pëpe.+ 7 Mo zia mama ni lo hon, me mo lingbi ti mû akete ndeke ni. Mo sara tongaso si ye aga nzoni na mo nga mo ngbâ na fini aninga.

8 “Tongana mo leke fini da, mo sara nga kete gbagba na terê ti li ti da ni,+ si ngbanga ti mênë aga na li ti sewa ti mo pëpe ndali ti so mbeni zo alondo na li ti da ni atï.

9 “Mo lu mara ti lê ti kobe use na yâ ti yaka ti vigne ti mo pëpe.+ Tongaso pëpe, lê ti kobe ni kue so asigi nga na lengo ti vigne ni kue ayeke ga ande ti ndo so ayeke nzoni-kue.

10 “Mo kanga pëpe bagara na kororo na terê ti charrue ti dë na yaka.+

11 “Mo yü pëpe bongo so a bungbi kuä ti terê ti taba na lin si a sara na ni.+

12 “Mû akamba so a pe ni pendere, mo kanga na yanga ti bongo ti mo na ayanga ni osio kue.+

13 “Tongana mbeni koli amû wali, lo bungbi na lo, me na pekoni lo ye lo pëpe,* 14 lo bi tënë na li ti wali ni lo tene wali ni asara sioni nga lo sara si iri ti wali ni abuba, na lege so lo tene: ‘Mbi mû wali so, me na ngoi so mbi bungbi na lo, mbi bâ so ye oko afa pëpe so lo de ti hinga koli pëpe’, 15 babâ na mama ti molenge-wali ni ayeke mû ye so afa so lo de ti hinga koli pëpe so, ala ga na ni na a-ancien na yanga ti gbagba ti gbata ni. 16 Babâ ti molenge-wali ni ayeke tene na a-ancien ni, atene: ‘Mbi mû molenge ti mbi na koli so, me lo ye lo pëpe,* 17 na lo tene so lo sara ye ti sioni, na lege so lo tene: “Mbi bâ so ye oko afa pëpe so molenge ti mo ade ti hinga koli pëpe.” Me bâ ye so afa so molenge ti mbi ade ti hinga koli pëpe la.’ Na ala yeke gbara yâ ti bongo ni na gbele a-ancien ti gbata ni. 18 A-ancien ti gbata ni+ ayeke mû koli ni, ala punir lo.+ 19 Ala yeke hunda na lo ti futa amende ti sicle* ti argent 100 na ala mû ni na babâ ti wali ni, ndali ti so lo buba iri ti mbeni molenge-wali ti Israël so ade ti hinga koli pëpe;+ lo yeke ngbâ lakue wali ti lo. Lo lingbi pëpe ti sara divorce na lo na yâ ti gigi ti lo kue.

20 “Me, tongana tënë ni ayeke tâ tënë, na ye oko afa pëpe so molenge-wali ni ade ti hinga koli pëpe, 21 a yeke gue na lo na yanga ti da ti babâ ti lo, na azo ti gbata ni ayeke bo lo na tênë si lo kui, ndali ti so, na Israël, lo sara mbeni ye so abi nengo ti zo na sese+ na lege so lo sara lango-sioni* na da ti babâ ti lo.+ Mo zi ye ti sioni na yâ ti kodro ti mo.+

22 “Tongana a wara mbeni koli na ngoi so lo yeke lango na wali ti mba ti lo, a lingbi ala use kue akui, koli ni na wali ni.+ Mo zi ye ti sioni na Israël.

23 “Tongana mbeni koli atingbi na mbeni molenge-wali so ade ti hinga koli pëpe na yâ ti gbata, mbeni molenge-wali so koli ague na peko ti lo awe, si lo lango na lo, 24 ala gue na ala use kue na yanga ti gbagba ti gbata ni, na ala bo ala na tênë si ala kui: ti molenge-wali ni ndali ti so lo dekongo na yâ ti gbata ni pëpe; ti koli ni ndali ti so lo buba wali ti mba ti lo.+ Mo zi ye ti sioni na yâ ti kodro ti mo.

25 “Me tongana, na yâ ti ngonda, mbeni koli atingbi na mbeni molenge-wali so koli aga na peko ti lo awe, na lo lango na lo teti so ngangu ti lo ahon ti wali ni, gï koli ni la ayeke kui, 26 me mo sara ye oko na wali ni pëpe. Lo sara pëpe mbeni siokpari so alingbi na kuâ. Ye ni so ayeke tongana ti so mbeni koli apika mba ti lo si lo fâ lo.*+ 27 Lo tingbi na molenge-wali ni na yâ ti ngonda, na molenge-wali ni adekongo, me zo ti mû maboko na lo ayeke dä pëpe.

28 “Tongana mbeni koli atingbi na mbeni molenge-wali so ade ti hinga koli pëpe, mbeni molenge-wali so koli ade ti gue na peko ti lo pëpe, lo gbu lo, lo lango na lo si a wara ala,+ 29 koli ni ayeke mû sicle ti argent 50 na babâ ti molenge-wali ni, na molenge-wali ni aga wali ti lo.+ So lo zia kamene na lê ti lo, lo lingbi pëpe ti sara divorce na lo na yâ ti gigi ti lo kue.

30 “A lingbi zo amû wali ti babâ ti lo pëpe; so ayeke bingo nengo ti babâ ti lo na sese*+ la.

23 “Mbeni koli so yâ ti para ti korobo ti lo afâ wala so a fâ terê ti lo ti koli alingbi ti ga na yâ ti congrégation ti Jéhovah pëpe.+

2 “A lingbi molenge so a dü lo na gigi ti mariage aga na yâ ti congrégation ti Jéhovah pëpe.+ Même juska na ahale ti lo so aga na molongo bale-oko ni, mbeni oko alingbi ti ga na yâ ti congrégation ti Jéhovah pëpe.

3 “A lingbi zo ti mara ti Ammon wala ti Moab aga na yâ ti congrégation ti Jéhovah pëpe.+ Même juska na ahale ti ala so aga na molongo bale-oko ni, mbeni oko alingbi ti ga na yâ ti congrégation ti Jéhovah pëpe, 4 ndali ti so ala mû na ala kobe na ngu lani pëpe na ngoi so ala sigi na Égypte na ala yeke na lege,+ nga ndali ti so lani ala futa Balaam, molenge ti Béor ti kodro ti Péthor na Mésopotamie, ti deba* ala.+ 5 Me Jéhovah Nzapa ti mo ake ti mä Balaam+ lani. Jéhovah Nzapa ti mo asara si deba ni aga tufa na ndö ti mo,+ ndali ti so Jéhovah Nzapa ti mo aye mo.+ 6 Na yâ ti gigi ti mo kue, mo gi siriri ti ala pëpe wala nzoni ti ala pëpe.+

7 “Mo ke zo ti mara ti Édom pëpe, lo yeke ita ti mo.+

“Mo ke zo ti Égypte pëpe, mo yeke lani wande na kodro ti lo.+ 8 Ahale ti ala so aga na molongo ota ni alingbi ti ga na yâ ti congrégation ti Jéhovah.

9 “Tongana mo sara camp na terê ti awato ti mo, mo kpe aye kue so ayeke sioni.*+ 10 Tongana mbeni koli aga sioni na peko ti so ngu ti terê ti lo ayuru na bï,+ a lingbi lo sigi na yâ ti camp ni na lo kiri dä pëpe. 11 Na lakui, lo yeke sukula ngu, na pekoni lo kiri na yâ ti camp ni na ngoi so lâ alinda.+ 12 Mo zia mbeni ndo nde* na gigi ti camp ni, ti tene mo gue dä. 13 Mo zia kpoka na popo ti agbakuru ti mo, si tongana mo gue na kabinë, mo zi dû na kpoka ni, na mo pusu sese na ndö ti saleté so asigi na yâ ti mo, 14 ndali ti so Jéhovah Nzapa ti mo ayeke tambela na yâ ti camp ti mo+ ti zi mo nga ti zia awato ti mo na maboko ti mo; camp ti mo adoit ti duti nzoni-kue,+ si lo bâ mbeni ye ti sioni na mbage ti mo pëpe si lo dö mo lo zia pëpe.

15 “Tongana mbeni ngbâa akpe wa ti lo si lo si na ndo ti mo, mo kiri na lo na wa ti lo ni pëpe. 16 Lo lingbi ti sara kodro na mo na ndo kue so lo soro ti sara kodro dä na yâ ti agbata ti mo. Mo sara pasi na lo pëpe.+

17 “Mbeni wali ti Israël adoit ti ga wali-ndumba ti yâ ti mbeni temple pëpe,+ nga mbeni koli na popo ti amolenge ti Israël adoit ti sara ndumba na yâ ti mbeni temple pëpe.+ 18 Nginza* so a futa na mbeni wali-ndumba wala na mbeni koli so asara ndumba,* mo ga na ni pëpe na yâ ti da ti Jéhovah Nzapa ti mo ti mû ni ndali ti zendo so mo mû, ndali ti so aye use so kue ayeke ye ti sioni mingi na lê ti Jéhovah Nzapa ti mo.

19 “Mo zia intérêt pëpe na ndö ti bon so mo sara na ita ti mo,+ atâa na ndö ti nginza, kobe wala mbeni ye nde so mo mû na lo na bon. 20 Mo lingbi ti zia intérêt na ndö ti bon so mo sara na wande,+ me mo sara tongaso pëpe na ita ti mo,+ si Jéhovah Nzapa ti mo asara tufa na ndö ti mo na yâ ti ye kue so mo yeke sara na kodro so mo yeke gue ti mû ni.+

21 “Tongana mo mû zendo na Jéhovah Nzapa ti mo,+ ku pëpe ti sara ye alingbi na ni,+ ndali ti so Jéhovah Nzapa ti mo ayeke hunda ni na mo biani; tongaso pëpe, a yeke siokpari la mo sara so.+ 22 Me tongana mo mû zendo pëpe, a yeke siokpari pëpe.+ 23 Ye so asigi na yanga ti mo, mo sara ye alingbi na ni.+ Mo sara ye alingbi na zendo so mo wani mo mû na yanga ti mo na Jéhovah Nzapa ti mo, tongana offrande so zo amû na bê ti lo wani.+

24 “Tongana mo lï na yâ ti yaka ti vigne ti mba ti mo, mo lingbi ti te lê ni alingbi na nzara ti mo,* me mo zia mbeni na yâ ti sakpa ti mo pëpe.+

25 “Tongana mo lï na yâ ti yaka ti mba ti mo, mo lingbi ti ko ambeni lê ti kobe ni so abe awe na yâ ti maboko ti mo, me mo fâ ni na zembe pëpe.+

24 “Tongana mbeni koli asara mariage na mbeni wali, me wali ni anzere na lo pëpe ndali ti so lo bâ mbeni sioni ye na mbage ti wali ni, a lingbi lo sû mbeti ti divorce+ lo mû na wali ni, na lo tene na lo ti zia da ti lo, lo hon.+ 2 Na peko ti so lo sigi na da ti koli ni, mbeni koli nde alingbi ti mû lo.+ 3 Tongana use koli ni aye lo pëpe,* lo sû mbeti ti divorce lo mû na lo, na lo hunda na lo ti sigi na da ti lo, wala tongana use koli ni akui, 4 kozo koli ni so ahunda na lo lani ti hon alingbi pëpe ti kiri ti mû lo na peko ti so a sara si wali ni aga sioni awe, teti ye so ayeke sioni mingi na lê ti Jéhovah. Mo ga na siokpari pëpe na yâ ti kodro so Jéhovah Nzapa ti mo ayeke mû na mo ti ga ye ti mo.

5 “Tongana mbeni koli asara mariage fini fini, a lingbi lo lï turugu pëpe wala a mû na lo mbeni kua nde ti sara ndali ti kodro pëpe. A lingbi lo duti yamba na ndo ti lo teti ngu oko na lo zia ngia na bê ti wali ti lo.+

6 “A lingbi zo amû tênë ti nekango na ye wala tênë so a yeke neka ye na ndö ni ti bata na place ti bon pëpe,+ ndali ti so a yeke ye so grâce na ni zo ni ayeke te ye la lo mû ni* ti bata na place ti bon so.

7 “Tongana a wara mbeni zo so agbu ita ti lo,* zo ti Israël, lo sara ye ti ngangu na lo nga lo kä lo,+ a lingbi zo ni so akui.+ Mo zi ye ti sioni na yâ ti kodro ti mo.+

8 “Tongana buruma* asigi, sara kue ti sara ye alingbi na ye kue so aprêtre ti mara ti Lévi ayeke fa na ala.+ Sara kue ti sara ye alingbi na yanga so mbi mû na aprêtre ni. 9 Girisa pëpe ye so Jéhovah Nzapa ti mo asara lani na Miriam na ngoi so ala londo na Égypte ala yeke ga.+

10 “Tongana mo sara bon na mba ti mo,+ mo lï pëpe na yâ ti da ti lo ti gbu ye so lo ye ti mû na mo ti bata na place ti bon ni. 11 Mo luti na gigi, na zo ti mungo bon ni la ayeke sigi na mo ye so lo ye ti mû na mo ti bata na place ti bon ni. 12 Tongana zo ni ayeke na ye pëpe, a lingbi ye ti lo ni angbâ na mo pëpe juska na ngoi so mo gue ti lango.+ 13 Mo sara kue ti kiri na lo ye so lo mû na mo ti bata na place ti bon hio na peko ti lindango ti lâ, tongaso lo lingbi ti gue ti lango na bongo ti lo na terê ti lo,+ na lo yeke iri tufa na ndö ti mo; sarango tongaso ayeke duti ye ti mbilimbili na lê ti Jéhovah Nzapa ti mo.

14 “Zo so mo mû lo na kua, so ye atia lo nga lo yeke wayere, mo sara ye ti likisi na lo pëpe, atâa lo yeke ita ti mo zo ti Israël wala wande so ayeke na yâ ti agbata* ti mo.+ 15 Mo mû na lo futa ti lo na lango ni so,+ kozo si lâ alinda, ndali ti so lo yeke na ye pëpe, nga gigi* ti lo kue la. Tongaso pëpe, lo yeke toto na Jéhovah ndali ti ye so mo sara, na tënë ayeke duti na li ti mo ndali ni.+

16 “A lingbi a fâ ababâ pëpe ndali ti ye so amolenge ti ala asara, nga a lingbi a fâ amolenge pëpe ndali ti ye so ababâ ti ala asara.+ Zo oko oko ayeke kui ndali ti siokpari ti lo wani.+

17 “Tongana mo yeke fâ ngbanga ti wande wala ti molenge so babâ ti lo ayeke dä pëpe,*+ mo ba yâ ti ngbanga ni pëpe; nga mo mû bongo ti wali-mua ti bata na place ti bon pëpe.+ 18 Girisa pëpe so mo yeke lani ngbâa na Égypte, na Jéhovah Nzapa ti mo azi mo kâ.+ Ndani la mbi yeke mû yanga na mo ti sara ye so.

19 “Tongana mo ko alê ti kobe ti yaka ti mo na mo girisa mbeni so mo kanga gere ni, mo kiri kâ ti mû ni pëpe. Mo zia ni angbâ ndali ti wande, molenge so babâ ti lo ayeke dä pëpe nga na wali-mua,+ si Jéhovah Nzapa ti mo asara tufa na ndö ti mo na yâ ti aye kue so mo yeke sara.+

20 “Tongana mo pika keke ti olive ti mo ti tene alê ni atuku, mo kiri mo pika ni encore ape. Tanga ni so angbâ ayeke ndali ti wande, molenge so babâ ti lo ayeke dä pëpe nga na wali-mua.+

21 “Tongana mo ko alê ti vigne ti mo, a lingbi mo kiri mo ga pëpe ti ko tanga ni so angbâ. Zia a ngbâ ndali ti wande, molenge so babâ ti lo ayeke dä pëpe nga na wali-mua. 22 Girisa pëpe so mo yeke lani ngbâa na kodro ti Égypte. Ndani la mbi yeke mû yanga na mo ti sara ye so.

25 “Tongana tënë alondo na popo ti azo, ala yeke gue na gbele ajuge,+ na ajuge ni ayeke fâ yâ ti ngbanga ti ala: zo so ayeke mbilimbili, ala yeke tene so tënë ayeke na li ti lo pëpe, na zo so asara sioni, ala yeke tene so tënë ayeke na li ti lo.+ 2 Tongana zo so asara sioni alingbi na pika,+ juge ni ayeke mû yanga si a tanda lo na sese na a pika lo na lê ti juge ni. Wungo ti pika ni ayeke lingbi na sioni so zo ni asara. 3 Lo lingbi ti pika lo fani 40,+ me a hon ni pëpe. Tongana a pika lo ahon fani 40 ni, ita ti mo ni ayeke ga buba na lê ti mo.

4 “A yeke nzoni mo kanga yanga ti bagara pëpe na ngoi so lo yeke sara kua na ndo so a yeke pika alê ti kobe dä.+

5 “Tongana akoli so ala yeke aita alango ndo oko si mbeni akui sân ti dü molenge-koli, wali ti wakuâ ni alingbi ti sara mariage na mbeni koli ti yâ ti mbeni sewa nde pëpe. Ita ti koli ni adoit ti mû lo na wali na lo sara mariage na lo tongana ti so a hunda.+ 6 Kozo molenge so wali ni ayeke dü, a yeke zia iri ti wakuâ ni na ndö ti lo,+ si iri ti lo agirisa na popo ti azo ti Israël pëpe.+

7 “Me tongana koli ni aye ti sara mariage na wali ti ita ti lo so akui so pëpe, a lingbi wali ni ague abâ a-ancien na yanga ti gbagba ti gbata ni na lo tene: ‘Ita ti koli ti mbi ake ti sara si iri ti ita ti lo angbâ na popo ti azo ti Israël. Lo ke ti sara mariage na mbi tongana ti so a hunda.’ 8 A-ancien ti gbata ti lo ayeke iri lo na ala yeke sara tënë na lo. Tongana lo ngbâ ti ke si lo tene: ‘Mbi ye ti sara mariage na lo pëpe’, 9 na lê ti a-ancien ni, wali-mua ni ayeke pusu nduru na koli ni, lo zi poro na gere ti koli ni,+ lo tuku ngu ti yanga na lê ti lo, na lo tene: ‘So ayeke ye so a lingbi a sara na koli so ake ti dü molenge ti tene iri ti ita ti lo ti koli angbâ la.’ 10 Na pekoni, a yeke hinga sewa ti koli ni* so na Israël na iri ti ‘Sewa ti koli so a zi lani poro na gere ti lo so la.’

11 “Tongana akoli use ayeke tiri, si wali ti mbeni aga ti gbu koko ti koli ti lo so a yeke pika lo, na lo yôro maboko ti lo, lo gbu mbeni koli ni so na terê ti lo ti koli, 12 mo dë maboko ti wali ni. Mo bâ* mawa ti lo pëpe.

13 “A lingbi mo duti pëpe na mara ti awen* ti ndö ti kilo use,+ kota ni na kete ni, na yâ ti bozo ti mo. 14 A lingbi a wara pëpe akungba ti hakango na ye use,+ kota ni na kete ni, na da ti mo.* 15 A lingbi nengo ti wen ti ndö ti kilo ti mo ayeke mbilimbili na alingbi na ni nga kungba ti mo ti hakango na ye ayeke mbilimbili na alingbi na ni, si mo ninga na ndö ti sese so Jéhovah Nzapa ti mo ayeke mû na mo.+ 16 Zo ti kirikiri kue so asara mara ti aye so, lo yeke sioni mingi na lê ti Jéhovah Nzapa ti mo.+

17 “Mo girisa pëpe ye so Amalec asara na mo na lege na ngoi so ala sigi na Égypte si ala yeke ga,+ 18 so lo ga lo tingbi na mo na lege na lo sara bira na azo kue so angbâ ti tambela yeke na peko na ngoi so mo fatigué kue. Lo kpe mbeto ti Nzapa pëpe. 19 Tongana Jéhovah Nzapa ti mo asara si mo yeke na tënë encore ape na awato ti mo kue so angoro mo na kodro so Jéhovah Nzapa ti mo ayeke mû na mo ti ga ye ti mo,+ a lingbi mo zi iri ti Amalec na ndö ti sese.+ Mo girisa ni pëpe.

26 “Tongana mo si na sese so Jéhovah Nzapa ti mo ayeke mû na mo ti ga ye ti mo, na mo mû ni si mo yeke sara kodro dä, 2 mû ambeni kozo lengo ti akobe kue* ti sese ni, alê ti kobe ti sese so Jéhovah Nzapa ti mo amû na mo si mo bungbi ni, mo zia ni na yâ ti sakpa, na mo gue na ndo so Jéhovah Nzapa ti mo asoro ti zia iri ti lo dä.+ 3 Mo gue na prêtre so ayeke sara kua na ngoi ni so, na mo tene na lo: ‘Laso, mbi ye ti tene na Jéhovah Nzapa ti mo so mbi si na sese so Jéhovah adeba na akotara ti e ti mû na e so awe.’+

4 “Prêtre ni ayeke mû sakpa ni na maboko ti mo, lo zia ni na devant ti gbalaka ti Jéhovah Nzapa ti mo. 5 Na pekoni, mo yeke tene na gbele Jéhovah Nzapa ti mo, mo tene: ‘Babâ ti mbi ayeke mbeni Araméen so ague lani na ando nde nde;*+ lo descend na Égypte,+ lo sara kodro kâ tongana wande, lo na azo ti da ti lo so ayeke mingi pëpe.+ Me kâ, lo ga mbeni kota mara so ayeke ngangu nga so azo ti yâ ni awu mingi.+ 6 Azo ti Égypte asara e pasi, ala sara ye ti ngangu na e nga ala gbu e na ngangu ti sara ngangu kua ti ngbâa.+ 7 Tongaso, e toto na Jéhovah Nzapa ti akotara ti e, na Jéhovah amä toto ti e, lo bâ vundu ti e, akpale ti e nga na ye ti ngangu so a yeke sara na e.+ 8 Ni la Jéhovah asigi na e na Égypte na lege ti ngangu maboko ti lo so lo yôro,+ na lege ti ye so amû mbeto mingi, na lege ti afä nga na amiracle.+ 9 Lo ga na e na ndo so, lo mû na e kodro so, kodro so lait na mafuta ti otoro asi singo dä.+ 10 Bâ, mbi ga na akozo lengo ti akobe ti sese ni so Jéhovah amû na mbi.’+

“A lingbi mo zia ni na gbele Jéhovah Nzapa ti mo, na mo kuku na gbele Jéhovah Nzapa ti mo. 11 Na pekoni, mo yeke sara ngia ndali ti aye ti nzoni kue so Jéhovah Nzapa ti mo amû na mo na azo ti da ti mo; mo na zo ti mara ti Lévi nga na wande so asara kodro na ndo so mo yeke dä.+

12 “Na ngoi so mo bungbi dîme+ ti alê ti kobe ti mo kue na ota ngu ni so ayeke ngu ti dîme, a lingbi mo mû ni na zo ti mara ti Lévi, na wande, na molenge so babâ ti lo ayeke dä pëpe* nga na wali-mua so ayeke na yâ ti agbata* ti mo; na ala yeke te ni alingbi na nzara ti ala.+ 13 Na pekoni, mo yeke tene ande na gbele Jéhovah Nzapa ti mo, mo tene: ‘Ye so mbi zia ni nde ndali ti Nzapa, mbi zi ni kue na yâ ti da ti mbi awe, na mbi mû ni na zo ti mara ti Lévi, na wande, na molenge so babâ ti lo ayeke dä pëpe nga na wali-mua,+ tongana ti so mo hunda na mbi. Mbi doro acommandement ti mo pëpe wala mbi bâ ni tongana senge senge ye pëpe. 14 Ye so mbi zia ni nde ndali ti Nzapa so, mbi te ni pëpe na ngoi so mbi yeke toto kuâ ti mbeni zo, mbi zi mbage ni pëpe na ngoi so mbi ga sioni na mbi mû mbage ni pëpe ndali ti mbeni zo so akui. Mbi mä yanga ti Jéhovah Nzapa ti mbi, nga mbi sara ye kue so mo hunda na mbi. 15 Fadeso, kâ na yayu, ndo ti duti ti mo so ayeke nzoni-kue, mo bâ ndo na mo sara tufa na ndö ti azo ti mo Israël nga na ndö ti sese ni so mo mû na e,+ tongana ti so mo deba yanga na akotara ti e,+ sese so lait na mafuta ti otoro asi singo dä.’+

16 “Laso, Jéhovah Nzapa ti mo ayeke mû yanga na mo ti sara ye alingbi na andia nga na ambela so. A lingbi mo bata ni nga mo sara ye alingbi na ni na bê ti mo kue+ nga na âme* ti mo kue. 17 Laso, Jéhovah Nzapa ti mo atene na mo so lo yeke ga Nzapa ti mo tongana mo tambela na ndö ti lege ti lo, tongana mo bata andia ti lo,+ acommandement ti lo+ nga na ambela ti lo+ na mo mä yanga ti lo. 18 Nga laso, mo tene na Jéhovah so mo yeke ga mara ti lo, ye ti lo wani so lo zia ni nde,*+ tongana ti so lo mû zendo ni na mo, nga so mo yeke bata acommandement ti lo kue. 19 Lo yeke yâa nga mo na nduzu na ndö ti amara kue so lo sara,+ lo yeke sara si a gonda mo, iri ti mo awu nga mo wara gloire tongana mo fa so mo yeke mbeni mara so ayeke nzoni-kue ndali ti Jéhovah Nzapa ti mo,+ gï tongana ti so lo mû zendo ni.”

27 Moïse na a-ancien ti azo ti Israël aluti na devant ti azo ni; na Moïse atene: “Ala bata commandement oko oko kue so mbi yeke fa na ala laso. 2 Na lango so ala yeke fâ ande Ngu ti Jourdain ti lï na kodro so Jéhovah Nzapa ti mo ayeke mû na mo, mo kpo akota tênë na nduzu na mo crépir ni na fuku ti mbamba.*+ 3 Na ngoi so mo fâ ngu ni awe, mo sû atënë kue ti Ndia so na ndö ni, si mo lingbi ti lï na kodro so Jéhovah Nzapa ti mo ayeke mû na mo, kodro so lait na mafuta ti otoro asi singo dä, gï tongana ti so Jéhovah Nzapa ti akotara ti mo amû zendo ni na mo.+ 4 Tongana ala fâ Ngu ti Jourdain awe, ala kpo atênë so na nduzu na ndö ti Hoto ti Ébal+ na ala crépir ni na fuku ti mbamba,* alingbi na yanga so mbi mû na ala laso so. 5 Mo leke nga mbeni gbalaka kâ na Jéhovah Nzapa ti mo, mbeni gbalaka ti tênë. A lingbi mbeni gbakuru so a leke ni na wen andu atênë ni pëpe.+ 6 Mo leke gbalaka ti Jéhovah Nzapa ti mo na atênë so a dë ni dengo pëpe; na mo yâa na ndö ni na Jéhovah Nzapa ti mo asandaga so a zö ni agbi kue. 7 A lingbi mo mû asandaga ti beoko+ na mo te ni kâ,+ na mo sara ngia na gbele Jéhovah Nzapa ti mo.+ 8 Na mo sû polele atënë kue ti Ndia so na ndö ti atênë ni.”+

9 Na pekoni, Moïse na aprêtre so ayeke azo ti mara ti Lévi asara tënë na azo ti Israël kue, ala tene: “Azo ti Israël, ala duti kpô, ala mä tënë si. Laso, ala ga azo ti Jéhovah Nzapa ti ala awe.+ 10 Ala mä yanga ti Jéhovah Nzapa ti ala, na ala sara ye alingbi na acommandement ti lo+ nga na andia ti lo, so mbi yeke fa na ala laso so.”

11 Na lango ni so, Moïse amû yanga na azo ni, lo tene: 12 “Tongana ala fâ Ngu ti Jourdain awe, amara so ayeke luti ande na ndö ti Hoto ti Guérizim+ ti iri tufa na ndö ti azo ni ayeke: Mara ti Siméon, ti Lévi, ti Juda, ti Issacar, ti Joseph na ti Benjamin. 13 Na ala so ayeke luti na ndö ti Hoto ti Ébal+ ti fa tënë ti deba ni ayeke: Mara ti Ruben, ti Gad, ti Aser, ti Zabulon, ti Dan na ti Nephtali. 14 Azo ti mara ti Lévi ayeke tene tënë na kota go na azo ti Israël kue,+ ala tene:

15 “‘Deba ayeke na ndö ti zo so aleke mbeni yanda na kode+ wala lo leke mbeni statue ti wen,*+ mbeni ye so ayeke sioni mingi na lê ti Jéhovah,+ ye ti maboko ti zo so ahinga ti sara akua ti maboko,* na lo honde ni.’ (Azo kue ayeke tene: ‘Amen!’*)

16 “‘Deba ayeke na ndö ti zo so abâ babâ wala mama ti lo tongana mbumbuse zo.’+ (Azo kue ayeke tene: ‘Amen!’)

17 “‘Deba ayeke na ndö ti zo so azi ye so afa yanga ti sese ti mba ti lo, lo zia ni na mbeni ndo nde.’+ (Azo kue ayeke tene: ‘Amen!’)

18 “‘Deba ayeke na ndö ti zo so asara si mbeni waziba agirisa lege.’+ (Azo kue ayeke tene: ‘Amen!’)

19 “‘Deba ayeke na ndö ti zo so aba yâ ti ngbanga+ ti wande, ti molenge so babâ ti lo ayeke dä pëpe* nga na ti wali-mua.’+ (Azo kue ayeke tene: ‘Amen!’)

20 “‘Deba ayeke na ndö ti zo so alango na wali ti babâ ti lo, ndali ti so lo bi nengo ti babâ ti lo na sese* awe.’+ (Azo kue ayeke tene: ‘Amen!’)

21 “‘Deba ayeke na ndö ti zo so alango na mbeni nyama.’+ (Azo kue ayeke tene: ‘Amen!’)

22 “‘Deba ayeke na ndö ti zo so alango na ita ti lo ti wali, molenge ti babâ ti lo wala molenge ti mama ti lo.’+ (Azo kue ayeke tene: ‘Amen!’)

23 “‘Deba ayeke na ndö ti zo so alango na mama ti wali ti lo.’+ (Azo kue ayeke tene: ‘Amen!’)

24 “‘Deba ayeke na ndö ti zo so aku na hondengo ni si lo fâ mba ti lo.’+ (Azo kue ayeke tene: ‘Amen!’)

25 “‘Deba ayeke na ndö ti zo so ayeda ti mû goro ti fâ* zo so tënë ayeke na li ti lo pëpe.’*+ (Azo kue ayeke tene: ‘Amen!’)

26 “‘Deba ayeke na ndö ti zo so asara si atënë ti Ndia so ayeke na ngangu pëpe na lo sara ye alingbi na ni pëpe.’+ (Azo kue ayeke tene: ‘Amen!’)

28 “Tongana mo mä yanga ti Jéhovah Nzapa ti mo na lege so mo sara kue ti sara ye alingbi na acommandement ti lo kue so mbi mû na mo laso so, ti tâ tënë ni Jéhovah Nzapa ti mo ayeke zia mo na nduzu na ndö ti amara kue ti sese.+ 2 Atufa so kue ayeke ga ande na ndö ti mo na ayeke wara mo,+ ndali ti so mo ngbâ ti mä yanga ti Jéhovah Nzapa ti mo:

3 “Tufa ayeke ga na ndö ti mo na yâ ti gbata, tufa ayeke nga na ndö ti mo na yâ ti ngonda.+

4 “Tufa ayeke ga na ndö ti amolenge ti mo,*+ na ndö ti akobe ti yaka ti mo, na ndö ti amolenge ti anyama ti mo nga na akete bagara na akete taba ti mo.+

5 “Tufa ayeke ga na ndö ti sakpa ti mo+ nga na ye so mo yeke sara ka mapa na yâ ni.+

6 “Tufa ayeke ga na ndö ti mo na yâ ti aye kue so mo yeke sara.

7 “Jéhovah ayeke sara si mo sö benda na ndö ti awato ti mo so aga ti tiri na mo.+ Na gango ti ala, ala yeke mû lege oko, me na kpengo ti ala na gbele mo, ala yeke mû alege mbasambala.+ 8 Jéhovah ayeke mû yanga ti tene tufa aga na ndö ti agogoro ti mo+ nga na kua oko oko kue so mo ye ti sara, nga lo yeke sara tufa na ndö ti mo na kodro so Jéhovah Nzapa ti mo ayeke mû na mo. 9 Jéhovah ayeke sara si mo ga mara ti lo so ayeke nzoni-kue,+ tongana ti so lo deba ndali ni na mo,+ ngbanga ti so mo ngbâ ti bata acommandement ti Jéhovah Nzapa ti mo na mo ngbâ ti tambela na ndö ti lege ti lo. 10 Amara kue ti sese ayeke bâ so iri ti Jéhovah ayeke na ndö ti mo,+ na mbeto ti mo ayeke sara ala.+

11 “Jéhovah ayeke sara si amolenge ti mo, anyama ti mo nga na akobe ti yaka ti mo awu ahon ndö ni+ na kodro so Jéhovah adeba na akotara ti mo ti mû na mo.+ 12 Jéhovah ayeke zi ande na mo yanga ti yayu, gogoro ti lo, ti mû na mo ngu-nzapa na ngoi ni+ nga ti sara tufa na ndö ti ye kue so mo yeke sara. Mo yeke sara ande bon na amara mingi, me mo yeke na bezoin ti mû bon na tïtî zo pëpe.+ 13 Jéhovah ayeke zia mo lakue na li ni, me na ndangba ni pëpe; mo yeke duti na nduzu,+ me na gbe ni pëpe, tongana mo ngbâ ti bata acommandement ti Jéhovah Nzapa ti mo, so mbi mû yanga na mo laso ti bata ni nga ti sara ye alingbi na ni. 14 Atënë kue so mbi mû yanga na mo laso ti bata ni so, mo zia lege ni pëpe ti gue na mbage ti koli wala na mbage ti wali,+ ti gue na peko ti ambeni nzapa nde ti sara na ala.+

15 “Me tongana mo mä yanga ti Jéhovah Nzapa ti mo pëpe na lege so mo sara kue pëpe ti sara ye alingbi na acommandement ti lo kue nga na ambela so mbi mû yanga na mo laso ti bata ni, adeba so kue ayeke ga na ndö ti mo na ayeke wara mo:+

16 “Deba ayeke ga na ndö ti mo na yâ ti gbata, nga deba ayeke ga na ndö ti mo na yâ ti ngonda.+

17 “Deba ayeke ga na ndö ti sakpa ti mo+ nga na ye so mo yeke sara ka mapa na yâ ni.+

18 “Deba ayeke ga na ndö ti amolenge ti mo,*+ na ndö ti akobe ti yaka ti mo nga na akete bagara na akete taba ti mo.+

19 “Deba ayeke ga na ndö ti mo na yâ ti aye kue so mo yeke sara.

20 “Jéhovah ayeke sara si deba aga na ndö ti mo, li ti mo ayeke ga kirikiri, lo yeke punir mo na yâ ti kua oko oko kue so mo ye ti sara, juska a futi mo kue na, hio tongaso, mo yeke dä mbeni pëpe, ndali ti asioni sarango ye ti mo nga ndali ti so mo dö mbi mo zia.+ 21 Jéhovah ayeke sara si kobela angbâ na terê ti mo juska mo hunzi na ndö ti sese so mo yeke gue ti mû so.+ 22 Jéhovah ayeke pika mo na kobela ti kota körö, na ngangu fièvre,+ na kobela ti sukungo terê, ngangu ndowa, na épée,+ akobe ti yaka ti mo ayeke hule hulengo, buruma ayeke gbu ni;+ aye so ayeke ngbâ ti mû peko ti mo juska mo kui. 23 Lê ti nduzu so ayeke na li ti mo ayeke ga cuivre, na sese so ayeke na gbe ti mo ayeke ga wen.+ 24 Jéhovah ayeke sara si mbutu nga na poussière apika na ndö ti kodro ti mo tongana ngu-nzapa, juska a hunzi mo kue. 25 Jéhovah ayeke sara si awato ti mo asö benda na ndö ti mo.+ Ti gue ti tiri na ala, mo yeke mû ande lege oko, me ti kpengo ni na gbele ala, mo yeke mû alege mbasambala; na mo yeke ga ande mbeni ye so amû kota mbeto na aroyaume kue ti sese.+ 26 Kuâ ti mo ayeke ga kobe ti andeke kue so ayeke huru na lê ti nduzu nga ti anyama kue ti sese; zo ti tomba ala na terê ni ayeke dä pëpe.+

27 “Jéhovah ayeke pika mo na furoncle ti Égypte, hémorroïde, kobela so asara si terê ti zo asara, na kobela so asara si terê ti zo asara kä, so mo lingbi ti sava na yâ ni pëpe. 28 Jéhovah ayeke pika mo na kobela ti gbogbolinda, kobela ti bubango lê+ nga lo yeke sara si li ti mo aga kirikiri.* 29 Mo yeke tatara ndo na bê ti midi, tongana ti so zo so lê ti lo abuba ayeke tatara ndo na yâ ti vukongo ndo,+ nga aye kue so mo sara ayeke ga nzoni pëpe; azo ayeke mû ye ti mo lakue na likisi nga ala yeke nzi mo, na mbeni zo ti sö mo ayeke dä pëpe.+ 30 Mo yeke gue kogara ti wali, me mbeni koli nde ayeke lango na lo na ngangu. Mo yeke sara da, me mo yeke lango na yâ ni pëpe.+ Mo yeke lu vigne, me mo yeke ko lê ni pëpe.+ 31 A yeke fâ bagara ti mo na lê ti mo, me mo yeke wara mbeni ti te pëpe. A yeke nzi kororo ti mo na lê ti mo, me lo yeke kiri na mo pëpe. A yeke mû ataba ti mo na awato ti mo, me mo yeke wara mbeni sauveur pëpe. 32 A yeke mû amolenge ti mo ti koli na ti wali ti mû na ambeni zo nde,+ me mo yeke bâ ndo bango na lê; nzara ti ala ayeke sara mo lakue, me mo yeke na ngangu ti sara mbeni ye pëpe. 33 Mbeni mara so mo hinga ala pëpe si ayeke te ande akobe ti yaka ti mo nga na aye kue ti peko ti ngangu kua ti mo;+ a yeke mû aye ti mo lakue nga a yeke neka mo lakue. 34 Ye so lê ti mo abâ ayeke sara si li ti mo aga kirikiri.

35 “Jéhovah ayeke pika mo na furoncle so ason nga so ayeke kaï pëpe na genou ti mo nga na gere ti mo use kue, a londo na gbe ti gere ti mo juska na bê ti li ti mo. 36 Jéhovah ayeke gue na mo nga na gbia so mo zia na ndö ti mo na mbage ti mbeni mara so mo na akotara ti mo ahinga ala pëpe;+ kâ, mo yeke sara na ambeni nzapa nde, anzapa ti keke na ti tênë.+ 37 Mo yeke ga mbeni ye so amû kota mbeto na zo, mbeni tënë ti mato na yanga ti azo kue nga mbeni ye ti hengo ni na popo ti ala so Jéhovah ague na mo na mbage ti ala.+

38 “Mo yeke mû gbâ ti ngongoa ti lu na yaka, me mo yeke ko ande lê ti kobe mingi pëpe,+ ndali ti so agbadora ayeke te ni. 39 Mo yeke lu vigne nga mo yeke sara kua ni, me mo yeke nyon vin ni pëpe nga mo yeke bungbi ye oko pëpe,+ ndali ti so angusu abuba ni. 40 Keke ti olive ayeke duti ande na ndö ti sese ti mo kue, me mo yeke kpaka mafuta na terê ti mo pëpe, ndali ti so alê ti olive ni ayeke tuku na sese. 41 Mo yeke dü amolenge-koli na amolenge-wali, me ala yeke ngbâ ti mo pëpe, ndali ti so ala yeke gue na ngbâa.+ 42 Akete kete nyama so asi singo* ayeke futi akeke ti mo kue nga na alengo ti sese ti mo. 43 Wande so asara kodro na mo ayeke maï gï maïngo ahon mo, me mo, mo yeke kiri gï kiringo na gbe ni. 44 Lo yeke mû bon na mo, me mo yeke sara bon na lo pëpe.+ Lo yeke na li ni, me mo yeke na ndangba ni.+

45 “Adeba so kue+ ayeke ga ande na ndö ti mo, ayeke mû peko ti mo nga ayeke wara mo juska mo hunzi kue,+ ndali ti so mo mä yanga ti Jéhovah Nzapa ti mo pëpe na lege so mo ke ti bata acommandement na andia ti lo so lo mû na mo.+ 46 A yeke ngbâ ti ga ande na ndö ti mo na ahale ti mo nga a yeke duti tongana mbeni fä na mbeni ye ti gbotongo mê teti lakue lakue,+ 47 ndali ti so, na ngoi so mo yeke na ye kue gbani gbani, mo sara na Jéhovah Nzapa ti mo na ngia nga na nzerengo bê pëpe.+ 48 Jéhovah ayeke tokua awato ti mo ti tiri na mo, mo yeke sara kua na ala+ atâa so nzara ti kobe+ na ti ngu asara mo, atâa so mo yü bongo nzoni pëpe nga ye kue amanke mo. Lo yeke zia joug ti wen na ndö ti go ti mo juska lo hunzi mo kue.

49 “Jéhovah ayeke sara si mbeni mara so ayeke na yongoro ndo,+ kâ na yanga ti sese, aga ti tiri na mo, mara ni ayeke ga hio tongana aigle,+ mara so mo hinga yanga ti kodro ti azo ni pëpe,+ 50 mbeni mara so na bango azo ni, ala yeke sioni mingi, ala yeke ne ambakoro pëpe wala ala yeke sara nzoni bê na amaseka pëpe.+ 51 Ala yeke te amolenge ti anyama ti mo nga na akobe ti yaka ti mo juska mo hunzi kue. Ala yeke zia mbeni lê ti kobe, fini vin, mafuta, kete bagara wala kete taba na mo pëpe, juska ala futi mo.+ 52 Ala yeke sara camp angoro terê ti agbata* ti mo kue ti kanga lege na mo ti sigi na sese ti mo, juska angangu gbagba ti gbata ti mo so ayo na nduzu mingi na so mo zia bê ti mo dä atï. Ala yeke sara camp na terê ti mo na yâ ti agbata ti mo kue so ayeke na kodro ti mo so Jéhovah Nzapa ti mo amû na mo.+ 53 Na pekoni, mo yeke te amolenge ti mo* wani, nyama ti terê ti amolenge ti mo ti koli na ti wali,+ ala so Jéhovah Nzapa ti mo amû na mo, ndali ti so awato ti mo angoro mo na bira ni ngangu mingi nga ala zia mo na yâ ti kota vundu.

54 “Même koli so akpengba pëpe na maboko ti lo andu kua pëpe, ita ti lo, wali ti lo so lo ye lo mingi wala amolenge ti lo so angbâ, lo yeke bâ ande mawa ti ala pëpe, 55 nga lo yeke gbanzi ala na nyama ti terê ti amolenge ti lo so lo yeke te, ndali ti so awato angoro agbata ti mo na bira ngangu mingi nga ala zia mo na yâ ti kota vundu, na a sara si lo yeke na ye oko pëpe.+ 56 Nga wali so na popo ti ala akpengba pëpe nga maboko ti lo andu kua pëpe, so apensé même kete pëpe ti dö sese na gere ti lo ndali ti so lo woko mingi,+ koli ti lo so lo ye lo mingi, molenge ti lo ti koli na ti wali, lo yeke bâ ande mawa ti ala pëpe, 57 lo yeke sara même tongaso na mbage ti bôbô ti molenge so asigi na yâ ti lo nga na amolenge so lo dü, teti lo yeke te ala na hondengo ni ndali ti so awato angoro agbata ti mo na bira ngangu mingi nga ala zia mo na yâ ti kota vundu.

58 “Tongana mo sara kue pëpe ti bata atënë kue ti Ndia so, so a sû na yâ ti mbeti so,+ nga mo kpe iri ti Jéhovah+ Nzapa ti mo pëpe, iri so ayeke na gloire+ nga so amû mbeto na zo, 59 Jéhovah ayeke tokua aye ti ngangu na terê ti mo na ahale ti mo, akota ye ti ngangu so aninga+ nga na asioni kobela so ayeke ninga na terê ti zo. 60 Lo yeke sara si akobela kue ti Égypte akiri na terê ti mo, akobela so mbeto ni asara mo lani mingi so, na a yeke ngbâ na terê ti mo. 61 Jéhovah ayeke tokua même na terê ti mo mara ti kobela kue wala ye ti ngangu kue so a sû na yâ ti mbeti ti Ndia so pëpe, juska a hunzi mo kue. 62 Atâa so ala ga gbani tongana atongoro na lê ti nduzu,+ gï kete wungo ti ala si ayeke ngbâ,+ ndali ti so ala mä yanga ti Jéhovah Nzapa ti ala pëpe.

63 “Gï tongana ti so a nzere ândö na Jéhovah ti sara si ala maï nga ala ga gbani, a yeke nzere nga na Jéhovah ti futi ala na ti sara si ala hunzi; a yeke zi ala na ndö ti sese so ala ga nduru ti mû ni so.

64 “Jéhovah ayeke kangbi mo na popo ti amara kue, a londo na mbeni yanga ti sese ti si na mbeni yanga ni;+ kâ, mo yeke sara na ambeni nzapa nde, anzapa ti keke na ti tênë, so mo na akotara ti mo ahinga ala pëpe.+ 65 Mo yeke duti ande na siriri pëpe na popo ti amara so+ nga mo yeke wara ande ndo ti zia gere ti mo dä pëpe. Me Jéhovah ayeke sara si mo yeke gi bê ti mo mingi,+ lê ti mo ayeke bâ ndo nzoni pëpe nga bê ti mo ayeke nze.*+ 66 Gigi ti mo ayeke gï na lê ti kuâ, bï na lâ mo yeke gï na mbeto, nga mo yeke hinga pëpe wala mo yeke sö kuâ. 67 Na ndapre, mo yeke tene: ‘Âdu fade lakui la!’ na lakui, mo yeke tene: ‘Âdu fade ndapre la!’ teti so mbeto ahon ndö ti mo nga ndali ti ye so lê ti mo ayeke bâ. 68 Jéhovah ayeke mû mo na bateau ti kiri na mo na Égypte na lege so mbi fa lani na mo, mbi tene: ‘Mo yeke kiri ti bâ ni encore ape’; kâ, ala yeke kä terê ti ala na awato ti ala ti ga angbâa ti koli na ti wali, me zo ti vongo ala ayeke dä pëpe.”

29 So ayeke atënë ti mbele so Jéhovah amû yanga na Moïse ti te na azo ti Israël na sese ti Moab, na ndö ti mbele so lo te lani na ala na Horeb.+

2 Tongaso, Moïse airi azo ti Israël kue na lo tene na ala, lo tene: “Ala bâ lani aye kue so Jéhovah asara na lê ti ala na kodro ti Égypte, ye so lo sara na Pharaon, na awakua ti lo kue nga na kodro ti lo kue,+ 3 akota ngbanga so lo dë,* so mo bâ ni na lê ti mo, akota fä nga na amiracle so lo sara.+ 4 Me juska laso Jéhovah ade amû na ala pëpe bê so asara si zo ahinga ndo, lê ti bâ na ndo nga na mê ti mä na ndo.+ 5 ‘So mbi fa lege na ala ngu 40 na yâ ti benyama,+ bongo ti ala abuba na terê ti ala pëpe nga poro ti ala abuba na gere ti ala pëpe.+ 6 Ala te mapa pëpe nga ala nyon vin wala mbeni sämba pëpe, si ala hinga so mbi yeke Jéhovah Nzapa ti ala.’ 7 Ala gue ngbii ala si na ndo so, na Sihon gbia ti Hesbon+ na Og gbia ti Basan+ aga ti sara bira na e, me e sö benda na ndö ti ala.+ 8 Na pekoni, e mû sese ti ala, e mû ni na azo ti mara ti Ruben, azo ti mara ti Gad nga na ndambo ti mara ti Manassé ti ga ti ala.+ 9 Tongaso, ala bata atënë ti mbele so nga ala sara ye alingbi na ni, si ye kue so ala yeke sara ande aga nzoni.+

10 “Ala kue la aluti laso na gbele Jéhovah Nzapa ti ala: amokonzi ti amara ti ala, a-ancien ti ala, akota zo ti ala, akoli kue ti Israël, 11 amolenge ti ala, awali ti ala+ nga na wande+ so asara kodro na yâ ti camp ti mo, a komanse na lo so ayeke gi na mo keke ti wâ ti si na lo so ayeke tö na mo ngu. 12 Mo yeke ge ti lï na yâ ti mbele ti Jéhovah Nzapa ti mo na lege ti bä, mbele so Jéhovah Nzapa ti mo ayeke te na mo laso,+ 13 nga ti tene lo sara si mo ga mara ti lo laso+ na lo lingbi ti ga Nzapa ti mo,+ gï tongana ti so lo mû zendo ni na mo, nga tongana ti so lo deba lani yanga ti lo na akotara ti mo Abraham,+ Isaac+ na Jacob.+

14 “A yeke gï na ala oko pëpe si mbi yeke te mbele na ala na lege ti bä, 15 me a yeke nga na ala so ayeke luti legeoko na e laso na gbele Jéhovah Nzapa ti e, nga na ala so laso ayeke na popo ti e ge pëpe. 16 (Ala hinga nzoni mingi tongana nyen la e duti ândö na kodro ti Égypte nga tongana nyen la e hon na popo ti amara nde nde na yâ ti tambela ti e.+ 17 Ala bâ lani aye ti amara ni so ayeke sioni mingi nga na afungo yanda*+ ti ala ti keke, ti tênë, ti argent nga na ti lor.) 18 Ala sara hange si a wara laso pëpe na popo ti ala mbeni koli, mbeni wali, mbeni sewa wala mbeni mara so bê ti lo apusu lo ti zia Jéhovah Nzapa ti e ti gue ti sara na anzapa ti amara so;+ si a wara pëpe mbeni gunda ti keke so amaï na alë alê ti keke so ayeke poison nga na absinthe.+

19 “Me tongana mbeni zo amä atënë ti bä so, na lo tene na yâ ti bê ti lo, lo tene: ‘Atâa tongana mbi ngbâ ti sara ye ti bê ti mbi wani, mbi yeke wara siriri’, ye oko, lo yeke futi ye kue* so ayeke na lege ti lo, 20 Jéhovah ayeke pardonné lo pëpe.+ Me kota ngonzo ti Jéhovah ayeke ga tongana wâ na terê ti zo ni, na deba kue so a sû tënë ni na yâ ti mbeti so ayeke ga na ndö ti lo+ nga Jéhovah ayeke zi iri ti lo na ndö ti sese. 21 Tongaso, Jéhovah ayeke zia lo nde na tanga ti amara kue ti Israël ti tene ye ti vundu aga na ndö ti lo alingbi na deba kue ti mbele ni, deba so a sû tënë ni na yâ ti mbeti ti Ndia so.

22 “Ahale ti ala, amolenge ti ala so ayeke ga ande na peko ti ala, nga na awande so alondo na mbeni kodro so ayo ayeke bâ ande aye ti ngangu so Jéhovah atokua na ndö ti kodro ni. 23 Lo yeke tokua na ndö ti kodro ni soufre, ingo nga na wâ, si na ndö ti sese ni kue a lingbi pëpe ti lu ye nga kobe alingbi ti sigi dä pëpe, si même mbeni pere alingbi ti sigi dä pëpe, tongana ti so a si lani na Sodome na Gomorrhe,+ Admah na Zéboïm,+ so kota ngonzo ti Jéhovah apusu lo ti futi ni. 24 Amolenge ti ala, awande nga na amara kue ayeke tene: ‘Jéhovah asara tongaso na kodro so ngbanga ti nyen?+ Nyen la apusu lo ti sara mara ti kota ngonzo tongaso?’ 25 Tongaso ala yeke tene: ‘A yeke ndali ti so ala ke mbele ti Jéhovah+ Nzapa ti akotara ti ala, mbele so lo te na ala na ngoi so lo sigi na ala na kodro ti Égypte.+ 26 Me ala gue lani ala sara na ambeni nzapa nde, ala kuku na gbe ti ala, anzapa so ala hinga ala kozo pëpe nga so lo ke na ala ti voro ala.*+ 27 Ni la ngonzo agbu Jéhovah mingi na terê ti kodro ni, na lo sara si deba kue so a sû tënë ni na yâ ti mbeti so aga na ndö ti kodro ni.+ 28 Na yâ ti ngonzo ti lo, kota ngonzo ti lo+ nga na ngonzo ti lo ti wâ, Jéhovah azi ala na ndö ti sese ti ala, lo gue na ala na mbeni kodro nde, kodro so ala yeke dä laso so.’+

29 “Aye so a honde ni ayeke ti Jéhovah Nzapa ti e,+ me aye so a fa ni na gigi ayeke ti e na ahale ti e teti lakue lakue, si e lingbi ti bata atënë kue ti Ndia so.+

30 “Tongana atënë so kue aga na ndö ti mo, tufa nga na deba so mbi zia na gbele mo,+ si na ndo ti amara kue so Jéhovah Nzapa ti mo akangbi mo na popo ti ala+ mo dabe ti mo na ni,*+ 2 si mo kiri na Jéhovah Nzapa ti mo,+ mo mä yanga ti lo na sarango ye kue so mbi fa na mo laso ti sara, mo na amolenge ti mo, si mo sara ni na bê ti mo kue nga na âme* ti mo kue,+ 3 Jéhovah Nzapa ti mo ayeke kiri na azo ti mo so ayeke angbâa,+ lo yeke sara nzoni bê na mo+ nga lo yeke mû mo na popo ti amara kue, ndo so Jéhovah Nzapa ti mo akangbi yâ ti ala dä, ti kiri ti bungbi mo.+ 4 Atâa tongana yâ ti azo ti mo akangbi juska na yanga ti sese, Jéhovah Nzapa ti mo ayeke mû mo kâ ti bungbi mo nga ti kiri na mo.+ 5 Jéhovah Nzapa ti mo ayeke kiri na mo na yâ ti kodro so ababâ ti mo amû ni ândö, na mo yeke mû ni; lo yeke sara si mo maï nga amolenge ti mo aga gbani ahon ti ababâ ti mo.+ 6 Jéhovah Nzapa ti mo ayeke sara si bê ti mo na ti ahale ti mo avuru,*+ si mo ndoye Jéhovah Nzapa ti mo na bê ti mo kue nga na âme* ti mo kue, si mo lingbi ti ngbâ na fini.+ 7 Na pekoni, Jéhovah Nzapa ti mo ayeke kiri na adeba so kue na ndö ti awato ti mo so ake mo nga asara ye ti ngangu na mo.+

8 “Na pekoni, mo yeke kiri ande ti mä yanga ti Jéhovah nga ti bata acommandement ti lo kue so mbi mû na mo laso. 9 Jéhovah Nzapa ti mo ayeke sara si akusala ti maboko ti mo kue amaï mingi,+ amolenge ti mo aga gbani, anyama ti mo awu mingi, nga yaka ti mo alë mingi, ndali ti so a kiri a nzere na Jéhovah mingi ti sara si mo maï, tongana ti so bê ti lo anzere lani na terê ti akotara ti mo.+ 10 Na ngoi ni so, mo yeke mä yanga ti Jéhovah Nzapa ti mo, na mo yeke bata acommandement nga na ambela ti lo so a sû ni na yâ ti mbeti ti Ndia so, na mo yeke kiri na Jéhovah Nzapa ti mo na bê ti mo kue nga na âme* ti mo kue.+

11 “Commandement so mbi yeke mû na mo laso ti bata so ahon ngangu ti mo pëpe, a yeke yongoro na mo pëpe.+ 12 A yeke na yayu pëpe, si mo tene: ‘Zo wa la si ayeke monté ande na yayu ti mû ni ti ga na ni na e, si e mä ni na e sara ye alingbi na ni?’+ 13 A yeke nga na mbeni mbage ti ngu-ingo pëpe, si mo tene: ‘Zo wa la ayeke fâ ngu-ingo ni ti mû ni ti ga na ni na e, si e mä ni na e sara ye alingbi na ni?’ 14 Tënë ni ayeke tâ nduru na mo, a yeke na yanga ti mo wani nga a yeke na yâ ti bê ti mo wani,+ si mo lingbi ti sara ye alingbi na ni.+

15 “Bâ, laso mbi zia na gbele mo fini na nzoni, kuâ na sioni.+ 16 Tongana mo mä acommandement ti Jéhovah Nzapa ti mo so mbi mû na mo laso ti bata, na lege so mo ndoye Jéhovah Nzapa ti mo,+ mo tambela na ndö ti lege ti lo, mo bata acommandement ti lo, andia ti lo nga na ambela ti lo, mo yeke ngbâ na fini,+ amolenge ti mo ayeke ga gbani, nga Jéhovah Nzapa ti mo ayeke sara tufa na ndö ti mo na ndö ti sese so mo yeke gue ti mû ni so.+

17 “Me tongana bê ti mo apusu mo si mo mû mbeni lege nde+ nga mo mä ndo pëpe, tongana a handa mo si mo kuku na gbe ti ambeni nzapa nde na mo sara na ala,+ 18 mbi tene na ala laso so ala yeke kui.+ Ala yeke ngbâ aninga pëpe na ndö ti sese ni so ala yeke fâ Ngu ti Jourdain ti mû so. 19 Laso, mbi mû yayu na sese ti duti atémoin ti ye so ala yeke sara. Mbi zia na gbele mo fini na kuâ, tufa na deba;+ a lingbi mo soro fini si mo lingbi ti ngbâ na fini,+ mo na ahale ti mo,+ 20 na lege so mo ndoye Jéhovah Nzapa ti mo,+ mo mä yanga ti lo nga mo ngbâ nduru na lo,+ ndali ti so lo yeke fini ti mo nga grâce na lo la mo yeke ngbâ aninga na ndö ti sese so Jéhovah adeba ti mû ni na akotara ti mo Abraham, Isaac na Jacob.”+

31 Na pekoni, Moïse aga, lo tene tënë so na azo ti Israël kue, 2 lo tene: “Laso, mbi yeke na ngu 120.+ Mbi lingbi ti fa lege na ala* mbeni pëpe, ndali ti so Jéhovah atene na mbi, atene: ‘Mo yeke fâ ande Ngu ti Jourdain so pëpe.’+ 3 Jéhovah Nzapa ti mo la ayeke fâ ngu ni kozo ti mo, lo la lo yeke hunzi amara so na gbele mo na mo yeke tomba ala ande.+ Josué la ayeke fa lege na mo ti fâ ngu ni,+ tongana ti so Jéhovah atene. 4 Jéhovah ayeke sara na amara so oko ye so lo sara lani na Sihon+ na Og,+ agbia ti azo ti mara ti Amori, nga na kodro ti ala na ngoi so lo hunzi ala kue.+ 5 Jéhovah ayeke sara si ala sö benda na ndö ti amara so; ala sara ye na amara so alingbi na commandement kue so mbi mû na ala.+ 6 Sara ye na mbeto pëpe, luti tongana koli.+ Mo sara mbeto pëpe wala mo dö na mbeto na gbele ala pëpe,+ ndali ti so Jéhovah Nzapa ti mo la ayeke tambela na terê ti mo. Lo yeke zia mo pëpe, na lo yeke dö mo ti zia mo pëpe.”+

7 Tongaso, Moïse airi Josué na lo sara tënë na lo na lê ti azo ti Israël kue, lo tene: “Sara ye na mbeto pëpe, luti tongana koli,+ ndali ti so mo la mo yeke gue na azo so na kodro so Jéhovah adeba yanga na akotara ti ala ti mû ni na ala, na mo yeke mû ande kodro ni na ala tongana héritage.+ 8 Jéhovah la ayeke tambela ande na devant ti mo na lo yeke na mo lakue.+ Lo yeke zia mo pëpe nga lo yeke dö mo ti zia mo pëpe. Sara mbeto pëpe nga zia si mbeto ahon ndö ti mo pëpe.”+

9 Na pekoni, Moïse asû atënë ti Ndia so+ na lo mû ni na aprêtre, azo ti mara ti Lévi, so ayeke yô sanduku ti mbele ti Jéhovah, lo mû ni nga na a-ancien kue ti Israël. 10 Moïse amû yanga na ala, lo tene: “Lakue na hunzingo ti ngu mbasambala, na ngoi so a soro ni na yâ ti ngu ti zingo bon na li ti zo,+ na ngoi ti Matanga ti Akpangba,*+ 11 tongana azo ti Israël kue ague na gbele Jéhovah+ Nzapa ti mo, na ndo so lo soro, mo yeke diko Ndia so na azo ti Israël kue si ala mä ni.+ 12 Mo bungbi azo ni,+ akoli, awali, amolenge* nga na awande so asara kodro na yâ ti agbata* ti mo, si ala mä ni, ala manda ti hinga Jéhovah Nzapa ti ala na ti kpe mbeto ti lo, nga ala sara kue ti sara ye alingbi na atënë kue ti Ndia so. 13 Tongaso, amolenge ti ala so ahinga Ndia so pëpe ayeke mä ni+ na ala yeke manda ti kpe mbeto ti Jéhovah Nzapa ti ala na yâ ti angoi kue so ala yeke sara kodro na ndö ti sese ni so ala yeke fâ Ngu ti Jourdain ti mû ni so.”+

14 Na pekoni, Jéhovah atene na Moïse, atene: “Ngoi ti tene mo kui aga nduru awe.+ Mo iri Josué, na ala gue na* tente ti bungbi, si mbi zia lo na kua ti lo.”+ Tongaso Moïse na Josué ague na tente ti bungbi. 15 Jéhovah asi na tente ni na yâ ti mbinda,* na mbinda ni aluti na yanga ti tente ni.+

16 Jéhovah atene na Moïse, atene: “Mo ga nduru ti kui awe;* na azo so ayeke londo ti sara ndumba na anzapa ti awande so angoro ala na kodro so ala yeke gue dä so.+ Ala yeke zia mbi+ nga ala fâ yâ ti mbele so mbi te na ala.+ 17 Na ngoi ni so, ngonzo ti mbi ayeke londo na terê ti ala,+ mbi yeke zia ala+ nga mbi yeke honde lê ti mbi na ala+ juska a hunzi ala kue. Na peko ti so aye ti ngangu nga na aye ti vundu aga na ndö ti ala,+ ala yeke tene ande: ‘Nzapa ti e ayeke na popo ti e pëpe, ni la aye ti ngangu so aga na ndö ti e so.’+ 18 Me na ngoi ni so, mbi yeke ngbâ ti honde lê ti mbi na ala ndali ti asioni ye kue so ala sara na lege so ala gue na peko ti ambeni nzapa nde.+

19 “Fadeso, ala sû bia so na lê ti mbeti teti ala wani+ nga ala fa ni na azo ti Israël.+ Ala sara si azo ti Israël amanda ni,* si bia ni alingbi ti dabe ti ala na tënë so mbi tene na ala.+ 20 Tongana mbi gue na ala na kodro so mbi deba yanga ndali ni na akotara ti ala,+ kodro so lait na mafuta ti otoro asi singo dä,+ na ala te ye alingbi na ala nga ala maï,*+ ala yeke gue ande na peko ti ambeni nzapa nde ti sara na ala, ala yeke ne mbi pëpe nga ala yeke fâ yâ ti mbele ti mbi.+ 21 Na ngoi so aye ti ngangu nga na aye ti vundu aga na ndö ti ala,+ bia so ayeke dabe ti ala na tënë so mbi tene na ala, (na a lingbi ahale ti ala agirisa ni pëpe), ndali ti so mbi hinga ye so ayeke na bê ti ala+ même kozo si mbi gue na ala na kodro so mbi deba yanga ti mbi ndali ni.”

22 Tongaso, na lango ni so, Moïse asû bia so na lê ti mbeti na lo fa ni na azo ti Israël.

23 Lo* zia nga Josué,+ molenge ti Nun, na kua ti lo, na lo tene: “Sara ye na mbeto pëpe, luti tongana koli,+ ndali ti so mo la mo yeke gue na azo ti Israël na kodro so mbi deba yanga na ala ndali ni,+ na mbi yeke na mo lakue.”

24 Gï so Moïse ahunzi ti sû atënë ti Ndia so kue na lê ti mbeti awe,+ 25 Moïse amû yanga na azo ti mara ti Lévi, so ayeke yô sanduku ti mbele ti Jéhovah, lo tene: 26 “Ala mû mbeti ti Ndia ni,+ ala zia ni na terê ti sanduku+ ti mbele ti Jéhovah Nzapa ti ala; kâ, mbeti so ayeke duti témoin ti ye so ala yeke sara. 27 Mbi hinga nzoni so ala yeke azo ti kengo yanga,+ na li* ti ala akpengba mingi.+ Asingana so mbi ngbâ na terê ti ala si ala yeke sara kpengba-li na Jéhovah tongaso so, si ti peko ti kuâ ti mbi ayeke duti ande tongana nyen? 28 Ala bungbi a-ancien kue ti mara ti ala nga na akota zo ti ala na gbele mbi, si mbi tene atënë so na mê ti ala, nga mbi mû yayu na sese ti duti témoin ti ye so ala yeke sara.+ 29 Mbi hinga so na peko ti kuâ ti mbi, ala yeke sara ye ti sioni+ na ala yeke zia lege so mbi fa na ala. Ye ti ngangu ayeke ga ande na ndö ti ala+ na yâ ti angoi so ayeke ga, ndali ti so ala yeke sara ye so ayeke sioni na lê ti Jéhovah nga ala yeke son bê ti lo na lege ti akusala ti maboko ti ala.”

30 Tongaso, Moïse adiko na mê ti congrégation ti azo ti Israël kue atënë ti yâ ti bia so, ti londo na li ni ti si na nda ni:+

 3 Mbi yeke to mbela na iri ti Jéhovah.+

Fa tënë na ndö ti kota ti Nzapa ti e!+

Lo yeke Nzapa so ayeke be-ta-zo,+ lo sara ye ti kirikiri lâ oko ape.+

Lo yeke mbilimbili na lo yeke sara ye na lege ni.+

Ala yeke azo so sarango ye ti ala aba bango nga ayeke kirikiri mingi!+

 6 So lege ti sarango ye na Jéhovah la?+

ala azo so li ti ala ayeke dä pëpe so na so ndara amanke ala so.+

Lo yeke Babâ ti mo ape? Lo so asara si mo bâ gigi.+

Lo so asara mo nga lo so asara si gere ti mo aluti ngangu.

15 Tongana mafuta ti Jéshurun* aga dä awe, lo sara ngangu-li.

Mafuta ti mo aga dä, mo kono mingi, yâ ti mo asi ahon ndö ni.+

29 Âdu fade ala yeke na ndara,+ ka ala gbu li na ndö ti ye so.+

Ala yeke gbu li ti ala na ndö ti ye so ayeke si ande na ala.+

30 Tongana nyen si zo oko alingbi ti tomba azo 1 000?

Tongana nyen si zo use azia loro na gere ti azo 10 000?+

Zia ala ga amû maboko na ala ma!

Zia ala ga ndo ti batango terê ti ala ma!

Mbi fâ zo, na mbi mû fini na zo.+

44 Tongaso, Moïse aga, lo diko atënë ti yâ ti bia so kue na mê ti azo ni,+ lo na Osée* molenge ti Nun.+ 45 Tongana Moïse ahunzi ti sara atënë so kue na azo ti Israël awe, 46 lo tene na ala, lo tene: “Atënë kue so mbi tene na ala laso ti gboto mê ti ala so,+ ala bata ni na bê ti ala, tongaso si ala mû yanga na amolenge ti ala ti sara kue ti bata atënë kue ti yâ ti Ndia so.+ 47 Tënë ni so ayeke senge tënë pëpe, me a yeke fini ti ala;+ grâce na ni, lango ti ala alingbi ti wu na ndö ti sese so ala yeke fâ Ngu ti Jourdain ti mû ni so.”

48 Jéhovah asara tënë na Moïse, na oko lango ni so, lo tene: 49 “Monté na ndö ti hoto ti Abarim so,+ Hoto ti Nébo,+ so ayeke na kodro ti Moab, so abâ ndo lê na lê na Jéricho, na mo bâ sese ti Canaan, so mbi yeke mû ni na azo ti Israël tongana héritage.+ 50 Na pekoni mo yeke kui na ndö ti hoto ni so mo yeke monté dä so, na mo yeke wu terê ti mo tongana ti akotara ti mo,* gï tongana ti so ita ti mo Aaron akui lani na ndö ti Hoto ti Hor+ na lo yeke wu terê ti lo tongana ti akotara ti lo; 51 ndali ti so na ngu ti Méribah+ ti Cadès na yâ ti benyama ti Zîn, ala use kue aduti lani be-ta-zo na mbi pëpe na popo ti azo ti Israël, nga ndali ti so ala sara lani pëpe si mbi ga nzoni-kue na lê ti azo ti Israël.+ 52 Mo yeke ngbâ ayo si mo bâ kodro ni, me mo yeke lï pëpe na yâ ti kodro ni so mbi yeke mû na azo ti Israël.”+

33 So ayeke tufa so Moïse, zo ti tâ Nzapa, airi na ndö ti azo ti Israël kozoni si lo kui la.+ 2 Lo tene:

7 Lo iri tufa so na ndö ti Juda:+

 8 Ti Lévi, lo tene:+

12 Ti Benjamin, lo tene:+

13 Ti Joseph, lo tene:+

18 Ti Zabulon, lo tene:+

19 Ala yeke iri azo ti gue na ndö ti hoto.

20 Ti Gad, lo tene:+

“Tufa na ndö ti zo so asara si ayanga ti sese ti Gad akono.+

Amokonzi ti azo ni ayeke bungbi ande terê ti ala.

22 Ti Dan, lo tene:+

“Dan ayeke kete bamara.+

Lo yeke londo na Basan si lo huru na loro ti ga.”+

23 Ti Nephtali, lo tene:+

Mû sese ti mbage ti ouest na sud.”

24 Ti Aser, lo tene:+

“Tufa ti Aser ayeke amolenge.

29 Ngia ayeke na mo, Israël!+

Zo wa la ayeke tongana mo zo wa?+

34 Na pekoni, Moïse alondo na kpangbala ndo ti désert ti Moab, lo gue na Hoto ti Nébo,+ na li ti Pisgah,+ so abâ ndo lê na lê na Jéricho.+ Jéhovah afa na lo sese ni kue, a londo na Galaad juska na Dan,+ 2 sese ti Nephtali kue, sese ti Éphraïm nga na ti Manassé, sese ti Juda juska na ngu-ingo so ayeke na mbage ti ouest,*+ 3 sese ti Négueb+ nga na ando so ayeke na terê ti Ngu ti Jourdain,+ popo-hoto ti Jéricho, kodro ti akeke ti mbûrü, juska na Zoar.+

4 Jéhovah atene na lo: “Sese so mbi deba yanga ti mbi ndali ni na Abraham, Isaac na Jacob, mbi tene: ‘Mbi yeke mû ni na ahale* ti mo’+ so la. Mbi zia lege na mo ti bâ ni na lê ti mo, me mo yeke si kâ pëpe.”+

5 Na pekoni, Moïse, wakua ti Jéhovah, akui kâ na sese ti Moab gï tongana ti so Jéhovah atene.+ 6 Lo lu lo na yâ ti popo-hoto na sese ti Moab, nduru na Beth-Péor; juska laso, zo oko ahinga pëpe ndo so dû ti kuâ ti lo ayeke dä.+ 7 Na ngoi so Moïse akui, lo yeke na ngu 120.+ Lê ti lo angbâ ti bâ ndo nzoni, nga ngangu ti lo angbâ. 8 Azo ti Israël atoto Moïse na kpangbala ndo ti désert ti Moab lango 30.+ Na pekoni, alango so ala mû ti toto Moïse nga ti sara vundu ndali ti lo ahunzi.

9 Josué, molenge ti Nun, asi singo na yingo ti ndara, ndali ti so Moïse azia maboko ti lo na ndö ti lo;+ na azo ti Israël akomanse ti mä yanga ti lo nga ala sara ye gï tongana ti so Jéhovah afa na Moïse.+ 10 Me mbeni prophète tongana Moïse, so Jéhovah ahinga lo lê na lê,+ abâ gigi na Israël mbeni pëpe.+ 11 Lo sara afä na amiracle kue so Jéhovah atokua lo ti sara na kodro ti Égypte, na Pharaon, na awakua ti lo kue nga na kodro ti lo kue,+ 12 legeoko na aye ti ngangu nga na kota ye ti dongo bê so Moïse asara na lê ti azo ti Israël kue.+