BIA TI SALOMON
1 Bia so ayeke pendere ahon atanga ni kue, so ayeke bia ti Salomon:+
3 Fion ti amafuta ti mo ayeke pendere mingi.+
Iri ti mo ayeke tongana mafuta so a tuku ni, so afun pendere.+
Ni la amaseka-wali aye mo so.
4 Mû mbi na terê ti mo,* e kpe e hon.
Gbia aga na mbi na yâ ti mbeni chambre ti lo.
Zia mbi na mo e duti na ngia nga terê ti e anzere ndali ti mo.
Zia e gonda* aye so mo sara ti fa so mo ye mbi mingi, so ayeke nzoni ahon vin.
Ala* yeke na raison ti ye mo.
5 Amolenge-wali ti Jérusalem, mbi vuko me mbi yeke pendere;
mbi yeke tongana atente ti Kédar,+ tongana abongo ti tente ti Salomon.+
6 Ala zia ti bâ mbi ndali ti so mbi vuko so,
ndali ti so lâ asu mbi mingi.
Ngonzo asara amolenge ti mama ti mbi ti koli na terê ti mbi;
ala zia mbi ti bata ayaka ti vigne,
me ti mbi yaka ti vigne ni, mbi bata ni pëpe.
7 Mo so mbi ye mo mingi* so, tene na mbi si:
Ndo wa la mo gue na anyama ti mo dä ti tene ala te pere?+
Ndo wa la anyama ti mo ayeke wu terê dä na midi?
Ndani nyen ti tene mbi duti tongana wali so abi voile* na ndö ti lo
na popo ti anyama ti amba ti mo?”
8 “Mo wali so mo yeke pendere mingi ahon atanga ni so, tongana mo hinga pëpe,
mû gï place ti gere ti anyama ni,
gue na akete ngasa ti mo ti tene ala te pere nduru na atente ti aberger.”
9 “Mo so mbi ye mo mingi so, mbi bâ mo tongana mbeni wali-mbarata* na popo ti apuse ti mbarata ti Pharaon.+
10 Ngbangba ti mo ayeke pendere na aye ti baba,*
go ti mo ayeke pendere na aye ti go.
11 E yeke sara aye ti baba na lor ndali ti mo,
na e yeke zia argent na terê ni.”
12 “Na ngoi so gbia aduti na terê ti table ti lo so ayeke ronde ronde,
fion ti yombo ti mbi+ amû ndo.
13 Lo so agbu bê ti mbi mingi ayeke tongana bozo ti myrrhe+ so fion ni afun pendere
so alango na popo ti me ti mbi na bï.
14 Lo so agbu bê ti mbi mingi ayeke tongana gbâ ti alengo ti keke ti lêlë+
na yâ ti ayaka ti vigne ti En-Guédi.”+
15 “Mo so mbi ye mo mingi so, mo yeke pendere mingi!
Mo yeke pendere mingi! Lê ti mo ayeke tongana ti akolokoto.”+
16 “Mo so mo gbu bê ti mbi mingi so, mo kue mo yeke pendere* mingi, nga mo zia ngia na bê ti mbi mingi.+
Gbogbo ti e ayeke apere.
17 Akeke ti da* ti e ayeke akeke ti cèdre,
nga akeke ti li ti da ti e ayeke akeke ti genévrier.
2 “Mbi yeke gï senge fleur ti safran so asigi na kpangbala ndo na terê ti ngu,
mbeni fleur ti lis na yâ ti apopo-hoto.”+
2 “Lo so mbi ye lo mingi so, lo yeke na popo ti amaseka-wali
tongana fleur ti lis so ayeke na popo ti asisi.”
3 “Legeoko tongana keke ti pomme na popo ti akeke ti gbako,
lo so agbu bê ti mbi mingi so ayeke tongaso na popo ti amolenge ti koli.
Mbi ye mingi ti duti na gbe ti dê ni;
nga lê ni anzere na yanga ti mbi.
4 Lo ga na mbi na yâ ti da ti matanga;*
yengo so lo ye na mbi ayeke tongana banderole na maboko ti zo.
5 Mû na mbi araisin so a pete ni boule boule+ si mbi te mbi wara ngangu;
mû na mbi apomme si akpengba mbi,
ndali ti so nzara ti mo ahon ndö ti mbi.
6 Maboko ti lo ti wali ayeke na gbe ti li ti mbi,
na lo gbu mbi na kate ti lo na maboko ti lo ti koli.+
Ala gi ti zia nzara ti koli na yâ ti mbi pëpe juska bê ti mbi la aye zo ni si.+
8 Mbi mä go ti lo so agbu bê ti mbi mingi so!
Bâ, lo la lo yeke ga so!
Lo yeke monté ahoto, lo yeke huru na ndö ti akete hoto.
9 Lo so agbu bê ti mbi mingi so ayeke tongana mbeni gazelle, tongana mbeni lekpa+ so akono awe.
Bâ lo la kâ so! Lo luti na peko ti gbagba ti e;
lo yeke bâ ndo na fenêtre na yâ ti da;
lo yeke bâ ndo na yâ ti adû ti fenêtre.
10 Lo so mbi ye lo mingi so atene na mbi:
‘Mo so mo gbu bê ti mbi mingi so, londo;
mo so mo yeke pendere mingi so, ga e hon ti e.
11 Bâ, ngoi ti dê ti hiver* ahon awe,
nga ngu-nzapa ayeke pika encore ape, ahon awe.
12 Akeke asara fleur na yâ ti kodro awe,+
ngoi ti dengo amaboko ti akeke asi awe+
nga a mä toto ti akolokoto na yâ ti kodro ti e.+
13 Afigue so ayeke be ka ti ala kozo abe awe;+
Akeke ti vigne asara fleur na afun pendere.
Mo so mbi ye mo mingi so, londo mo ga.
Mo so mo yeke pendere mingi so, ga e hon ti e.
14 Mo kolokoto ti mbi so mo yeke na yâ ti adû ti akota tênë,+
kâ na yâ ti ahoto,
zia si mbi bâ mo na mbi mä go ti mo,+
ndali ti so toto ti go ti mo ayeke pendere, nga bango mo anzere na mbi mingi.’”+
15 “Gbu na e ambo ti ngonda,*
akete ni so ayeke buba ayaka ti vigne,
ndali ti so akeke ti vigne ti e asara fleur awe.”
16 “Lo so agbu bê ti mbi mingi ayeke ti mbi nga mbi yeke ti lo.+
Lo gue na anyama ti lo ti te pere+ na ndo so afleur ti lis ayeke dä.+
17 Tongana pupu akomanse ti ya nga gbe ti dê ahon,
mo so mo gbu bê ti mbi mingi so, kiri ge hio,
tongana mbeni gazelle+ wala mbeni lekpa+ so akono awe so ayeke kpe na ndö ti ahoto so akangbi popo ti aye.*
Mbi gi lo, me mbi wara lo pëpe.+
2 Mbi yeke londo ti fono na yâ ti gbata ni;
na ndö ti alege nga na ndo so azo ayeke gue ka dä mingi,
zia mbi gi koli so mbi ye lo mingi so.*
Mbi gi lo, me mbi wara lo pëpe.
3 Asinziri so ayeke fono ti bembe ndo na yâ ti gbata ni awara mbi.+
Mbi hunda ala, mbi tene: ‘Ala bâ lo so mbi ye lo mingi so?’*
4 Gï so mbi zia ala mbi hon,
mbi wara lo so mbi ye lo mingi so.*
Mbi gbu lo, mbi zia lo, lo hon pëpe,
juska mbi gue na lo na da ti mama ti mbi,+
na yâ ti chambre ti mama ti dungo mbi.
5 Amolenge-wali ti Jérusalem, ala deba yanga ti ala na mbi
na iri ti agazelle nga na awali-lekpa:
Ala gi ti zia nzara ti koli na yâ ti mbi pëpe juska bê ti mbi la aye zo ni si.”+
6 “Nyen la alondo na yâ ti benyama kâ si ayeke ga tongana gbâ ti guru la ayeke monté so?
A tuku yombo ti myrrhe na vuru dukane na terê ni,
nga na akugbe kue so afun pendere, so azo ti dengo buze akä ni.”+
7 “Bâ, a yeke ye ti yongo na Gbia Salomon!
Angangu koli 60 angoro ni;
a yeke angangu koli ti Israël.+
8 Ala kue ayeke na épée,
a fa lege ti sarango bira na ala kue.
Zo oko oko ayeke na épée ti lo na terê ti lo
ala yeke nduru ti tiri na ye so amû mbeto mingi na zo na bï.”
10 Agere ni ayeke na argent,
amaboko ni nga na peko ni ayeke na lor.
A sara place ti duti ni na laine ti violet;
amolenge-wali ti Jérusalem so aye lo mingi
la aleke yâ ni pendere.”
11 “Amolenge-wali ti Sion, ala sigi,
ala bâ Gbia Salomon
so ayü couronne ti mariage so mama ti lo+ asara ni na lo
na lango ti mariage ti lo,
na lango so bê ti lo ayeke na ngia.”
4 “Mo so mbi ye mo mingi so, mo yeke pendere mingi!
Mo yeke pendere mingi!
Lê ti mo ayeke tongana ti akolokoto na gbe ti voile ti mo.
Kuä ti li ti mo ayeke tongana gbâ ti angasa
so ayeke descend ahoto ti Galaad.+
2 Pembe ti mo ayeke tongana gbâ ti ataba so a fâ kuä ti terê ti ala aninga pëpe,
so alondo na ndo so a sukula ala dä si ayeke ga;
ala kue ayeke na amolenge ti ngbo,
mbeni oko ti girisa molenge ti lo ayeke dä pëpe.
3 Poro ti yanga ti mo ayeke tongana bengba kamba,
nga tënë ti yanga ti mo anzere na zo.
Ngbangba* ti mo na gbe ti voile ti mo
ayeke tongana mbeni mbage ti lê ti keke ti grenade so a fâ yâ ni.
4 Go ti mo+ ayeke tongana tour ti David,+
so a sara ni nzoni na tênë;
a zia avala saki oko na terê ni;
avala ni kue ayeke ti angangu koli nga ayeke ronde ronde.+
5 Me ti mo use kue ayeke tongana akete gazelle use+
so a dü ala angbo,
so ayeke te pere na popo ti afleur ti lis.”
6 “Tongana pupu akomanse ti ya nga gbe ti dê ahon,
mbi yeke gue na ndö ti hoto so akeke ti myrrhe ayeke dä
nga na ndö ti kete hoto so akeke so a sara na dukane ayeke dä.”+
8 Mo so mo yeke ga ande wali ti mbi, e londo na Liban,+ e hon;
e londo na Liban, e hon.
E londo na li ti Hoto ti Amana,* e descend,
e londo na li ti Hoto ti Sénir na ti Hermon,+ e descend;
e londo na ando so abamara ahonde terê ti ala dä, na ndö ti ahoto so azen ayeke dä, e descend.
9 Ita ti mbi ti wali, mo so mo yeke ga ande wali ti mbi, bê ti mbi kue ayeke gï na ndö ti mo;+
gï lê ti mo so mo sara asara si bê ti mbi kue ayeke gï na ndö ti mo,
gï mbeni ye ti terê ti ye ti go ti mo asara si bê ti mbi kue ayeke gï na ndö ti mo.
10 Ita ti mbi ti wali, mo so mo yeke ga ande wali ti mbi, aye so mo sara ti fa so mo ye mbi+ anzere na mbi mingi!
Aye so mo sara ti fa so mo ye mbi ayeke nzoni mingi ahon vin,+
nga yombo ti mo afun pendere ahon akugbe kue so afun pendere!+
11 Mo so mo yeke ga ande wali ti mbi, mafuta ti otoro alondo na yanga ti mo ayuru.+
Mafuta ti otoro na lait ayeke na gbe ti langue ti mo,+
nga bongo ti mo afun pendere mingi tongana fion ti gbako ti Liban.
12 Ita ti mbi ti wali, mo so mo yeke ga ande wali ti mbi, mo yeke tongana jardin so yanga ti gbagba so ayeke na terê ni akanga,
jardin so yanga ti gbagba so ayeke na terê ni akanga, mbeni dû ti ngu so a kanga yanga ni.
13 Akete keke ti mo so asigi* ayeke paradis* ti akeke ti grenade
so alê ni ayeke pendere mingi; akeke ti lêlë nga na akeke ti nard ayeke dä;
14 akeke ti nard,+ fleur ti safran, sosongo*+ nga na keke ti cinnamome,+
mara ti akeke nde nde kue so a sara na dukane, keke ti myrrhe, keke ti aloès+
nga na ayombo kue so afun pendere mingi.+
15 Mo yeke li ti ngu na yâ ti mbeni jardin, mbeni dû ti ngu so ngu ni ayeke pendere,
nga angu so alondo na Liban+ si asua.
16 Pupu ti mbage ti nord, mo londo!
Pupu ti mbage ti sud, mo ga!
Ya gï yeke na ndö ti jardin ti mbi.
Zia si fion ni amû ndo.”
“Zia si lo so agbu bê ti mbi mingi so alï na yâ ti jardin ti lo
na lo te alê ti keke ni so ayeke pendere mingi.”
5 “Ita ti mbi ti wali, mo so mo yeke ga ande wali ti mbi,
mbi si na yâ ti jardin ti mbi awe.+
Mbi bungbi myrrhe ti mbi awe nga na akugbe ti mbi so afun pendere.+
Mbi te otoro ti mbi na mafuta ni awe;
mbi nyon vin ti mbi nga na lait ti mbi awe.”+
“Akamarade, ala te ye!
Ala nyon ye nga ala wara ngia mingi na yâ ti aye so ala yeke sara ti fa yengo terê ti ala!”+
2 “Mbi lango, me bê ti mbi alango pëpe.+
Mbi mä bruit ti lo so agbu bê ti mbi mingi na pikango yanga-da!”
‘Ita ti mbi ti wali, mo so mbi ye mo mingi so, zi yanga-da na mbi,
pendere kolokoto ti mbi, mo so sioni ye ayeke na terê ti mo pëpe!
Ngu ti pere amû yâ ti li ti mbi kue,
angu ti pere ti bï amû yâ ti kuä ti li ti mbi kue.’+
3 Mbi zi yongoro bongo ti mbi awe.
Mbi yeke kiri ti yü ni?
Mbi sukula gere ti mbi awe.
Mbi yeke kiri ti sara saleté dä?
4 Lo so agbu bê ti mbi mingi azi maboko ti lo na terê ti dû ti porte ni awe,
na bê ti mbi apika ngangu mingi ndali ti lo.
5 Mbi londo ti zi yanga-da na lo so agbu bê ti mbi mingi so;
myrrhe so ayeke na terê ti maboko ti mbi ayuru,
nga na mafuta ti myrrhe so ayeke na terê ti ali ti maboko ti mbi ayuru,
ayuru na terê ti ye ti kangango na yanga-da ni.
6 Mbi zi yanga-da na lo so agbu bê ti mbi mingi,
me lo so agbu bê ti mbi mingi so atourné terê ti lo, lo hon awe.
Vundu asara mbi* so lo hon so.*
Mbi gi lo, me mbi wara lo pëpe.+
Mbi iri lo, me lo yeda pëpe.
7 Asinziri so ayeke fono ti bembe ndo na yâ ti gbata ni awara mbi.
Ala pika mbi, ala zia kä na terê ti mbi.
Asinziri ti gbagba azi bongo* so mbi bi na terê ti mbi.
8 Amolenge-wali ti Jérusalem, ala deba yanga ti ala na mbi:
Tongana ala wara lo so agbu bê ti mbi mingi,
ala tene na lo so nzara ti lo ahon ndö ti mbi.”
9 “Mo so mo yeke pendere mingi ahon tanga ti awali kue so,
na lege wa lo so agbu bê ti mo mingi ayeke nzoni ahon mbeni koli nde so agbu bê ti zo mingi?
Na lege wa lo so mo ye lo mingi ayeke nzoni ahon mbeni koli nde so a ye lo mingi,
si mo hunda na e ti deba yanga ti e tongaso so?”
10 “Lo so agbu bê ti mbi mingi, terê ti lo aza zango nga lo be bengo;
na popo ti azo saki bale-oko, lo yeke ti lo nde mingi.
11 Li ti lo ayeke tongana lor, lor ti nzoni ni.
Kuä ti li ti lo ayeke tongana kugbe ti mbûrü* so pupu ayengi ni
nga avuko tongana terê ti corbeau.
12 Apara ti lê ti lo ayeke tongana akolokoto na terê ti angu so asua,
so ala yeke sukula terê ti ala na yâ ti lait;
ala yeke duti na terê ti mbeni place ti ngu so asi singo na ngu.
13 Ngbangba ti lo ayeke tongana jardin ti akugbe so afun pendere,+
akoto ti akugbe so afun pendere.
Poro ti yanga ti lo ayeke tongana afleur ti lis, na mafuta ti myrrhe ayeke yuru dä.+
14 Ali ti maboko ti lo ayeke lor, so a zia chrysolithe* dä.
Ndö ti yâ ti lo ayeke tongana pembe ti doli so a kpaka terê ni nzoni si a zia saphir na ndö ni kue.
15 Gere ti lo ayeke tongana pilier ti marbre so gere ni ayeke na lor ti nzoni ni.
Lo yeke pendere tongana sese ti Liban, lo yeke tongana akeke ti cèdre+ so mara ni ayeke dä pëpe.
16 Tënë ti yanga ti lo anzere nzerengo,
nga aye ti lo kue ayeke nzoni mingi.+
Amolenge-wali ti Jérusalem, lo so agbu bê ti mbi mingi nga so mbi ye lo mingi so ayeke tongaso.”
6 “Mo wali so mo yeke pendere mingi ahon atanga ni so,
lo so agbu bê ti mo mingi so ahon na ndo wa?
Lo so agbu bê ti mo mingi so amû lege wa?
Zia e na mo e gue e gi lo.”
2 “Lo so agbu bê ti mbi mingi so adescend na jardin ti lo,
na ajardin so gbâ ti akugbe so afun pendere ayeke dä,
ti tene anyama ti lo ate pere kâ
nga ti tene lo bungbi afleur ti lis.+
3 Mbi yeke ti lo so agbu bê ti mbi mingi,
na lo so agbu bê ti mbi mingi ayeke ti mbi.+
Lo gue na anyama ti lo ti te pere na ndo so afleur ti lis ayeke dä.”+
4 “Mo so mbi ye mo mingi so,+ mo yeke pendere tongana gbata ti Thirtsa,*+
mo yeke pendere tongana Jérusalem;+
pendere ti mo apika bê ti zo tongana aturugu so aluti na terê ti abanderole ti ala.+
Kuä ti li ti mo ayeke tongana gbâ ti angasa
so ayeke descend ahoto ti Galaad.+
6 Pembe ti mo ayeke tongana gbâ ti ataba
so alondo na ndo so a sukula ala dä si ayeke ga;
ala kue ayeke na amolenge ti ngbo,
mbeni oko ti girisa molenge ti lo ayeke dä pëpe.
7 Ngbangba* ti mo na gbe ti voile ti mo
ayeke tongana mbage ti lê ti keke ti grenade so a fâ yâ ni.
9 Me pendere kolokoto ti mbi,+ lo so sioni ye ayeke na terê ti lo pëpe, lo yeke gï oko.
Lo la lo yeke nde mingi na lê ti mama ti lo.
Lo la mama ti dungo lo aye lo mingi.
Amolenge-wali abâ lo, na ala tene lo yeke na ngia;
agbia-wali nga na awali ti gbia ti use ndo abâ lo, na ala gonda lo,
10 ala tene: ‘Wali wa la aza zango tongana lumière ti ndapre so?
Wali wa la ayeke pendere tongana nze so?
Wali wa la aza pendere tongana lumière ti lâ so?
Wali wa la lo pika bê ti zo tongana aturugu so aluti na terê ti abanderole ti ala so?’”+
11 “Mbi gue lani na jardin ti akeke ti noyer*+
ti bâ afini kugbe so ayeke maï na yâ ti popo-hoto,*
ti bâ wala afini maboko ti akeke ti vigne asigi awe
wala akeke ti grenade asara fleur awe.
12 Sân ti tene mbi hinga,
nzara ti bango aye ni so ague na mbi
juska na terê ti apuse ti mbarata ti akota zo ti kodro ti mbi.”*
13 “Sulamite, kiri ge, kiri ge si!
Kiri ge, kiri ge,
si e bâ mo!”
“Nyen la si lê ti ala ayeke gï na terê ti Sulamite ni so?”+
“Lo yeke tongana agroupe use so ayeke dodo.”*
7 “Mo molenge-wali so azo ane mo mingi,
gere ti mo ayeke tâ pendere mingi na yâ ti poro so mo yü!
Acuisse ti mo ayeke pendere tongana aye ti baba,
kua so zo so ahinga kode nde nde ti sarango kua ti maboko la asara ni.
2 Turungu ti mo ayeke tongana dû ti sembe so ayeke ronde ronde.
Mbi ye si vin so a mélangé yâ ni amanke dä pëpe.
Yâ ti mo ayeke tongana gbâ ti alê ti blé so a bungbi ni ndo oko,
so afleur ti lis ayeke na terê ni mbage na mbage.
4 Go ti mo+ ayeke tongana mbeni tour so a sara ni na pembe ti doli.+
Hôn ti mo ayeke tongana tour ti Liban
so abâ ndo na mbage ti Damas.
5 Li ti mo asara si mo yeke pendere tongana Carmel,+
Lê ti gbia ayeke gï na terê ti kuä ti li ti mo so atuku na lê ti peko ti mo.
6 Mo yeke pendere mingi nga sarango ye ti terê ti mo anzere na mbi mingi
ahon aye kue so amû ngia na bê ti zo, mo maseka-wali so mbi ye mo mingi.
7 Tongana mo luti, mo yeke tongana keke ti mbûrü,
nga me ti mo ayeke tongana ali ti tûmuru ni.+
8 Mbi tene: ‘Mbi yeke monté keke ti mbûrü ni,
ti mû alê ni.’
Zia si me ti mo aduti tongana ali ti alê ti vigne,
fion ti yanga ti mo afun pendere tongana apomme,
9 nga yanga ti mo anzere tongana vin so ayeke nzoni ahon atanga ni.”
“Zia si a descend nzoni na yâ ti lo so agbu bê ti mbi mingi,
a nzere na yanga ti azo so anyon ni si alango.
10 Mbi yeke ti lo so agbu bê ti mbi mingi,+
na gï mbi la lo sara nzara ti mbi.
11 Mo so mo gbu bê ti mbi mingi so, mo ga
e gue e fono na yâ ti benyama;
e gue e duti na popo ti akeke ti lêlë.+
12 E londo hio, e gue na ayaka ti vigne
ti bâ wala amaboko ti vigne ni asigi,
ti bâ wala yâ ti afleur ni azi+
nga ti bâ wala akeke ti grenade asara fleur.+
Kâ, mbi yeke fa na mo so mbi ye mo mingi.+
Mo so mo gbu bê ti mbi mingi so, mbi bata na mo
afini ni nga na angbene ni.
8 “Tongana fade mo yeke tongana ita ti mbi ti koli
so anyon me ti mama ti mbi, ka a yeke nzoni.
Tongana mbi wara mo na gigi, mbi yeke su yanga ti mo,+
na mbeni zo ti kasa mbi ndali ni ayeke dä pëpe.
Mbi yeke mû na mo vin so a mélangé yâ ni ti tene mo nyon,
nga mbi yeke mû na mo ngu ti lê ti keke ti grenade so adë pendere.
3 Maboko ti lo ti wali ayeke duti na gbe ti li ti mbi,
na lo yeke gbu mbi na kate ti lo na maboko ti lo ti koli.+
4 Amolenge-wali ti Jérusalem, ala deba yanga ti ala na mbi:
Ala gi ti zia nzara ti koli na yâ ti mbi pëpe juska bê ti mbi la aye zo ni si.”+
5 “Zo wa la alondo na yâ ti benyama kâ si lo yeke ga so?
Si lo zia li ti lo na ndö ti go ti zo so agbu bê ti lo mingi so?”
“Mbi zingo mo na lango na gbe ti keke ti pomme.
A yeke kâ la yâ ti mama ti mo ason na ngoi so lo ye ti dü mo.
A yeke kâ la yâ ti wali so adü mo ason lani ngangu.
6 Sara si mbi ga tongana nzoroko so a kpo na ndö ti bê ti mo,
nga tongana nzoroko so a kpo na ndö ti maboko ti mo,
ndali ti so yengo terê ayeke ngangu tongana kuâ;+
tongana azo amû terê kue na mba, kangbingo yâ ti ala ayeke ngangu tongana Dû ti kuâ.*
Yengo terê ayeke tongana wâ so agbi ye, wâ so alondo na Jah.*+
7 Angu so asua na ngangu alingbi ti mingo wâ ti yengo terê pëpe,+
wala kota ngu so asua alingbi pëpe ti mû ni ti hon na ni.+
Tongana zo amû mosoro ti yâ ti da ti lo kue ndali ti yengo terê,
azo ayeke bâ ni* tongana sioni ye.”
8 “E yeke na mbeni ita ti e ti wali,+
me ade me ti lo asigi pëpe.
E yeke sara ande nyen ndali ti lo
na lango so koli aga ti sara kogara ti lo?”
9 “Tongana lo yeke gbagba,
e yeke leke mbeni ye ti argent na li ni,
me tongana lo yeke mbeni yanga-da,
e yeke pika keke ti cèdre na terê ni si a zi pëpe.”
10 “Mbi yeke mbeni gbagba,
nga me ti mbi ayeke tongana atour.
Tongaso, na lê ti lo mbi ga
tongana zo so ayeke na siriri.
11 Salomon ayeke na mbeni yaka ti vigne+ na Baal-Hamon.
Lo zia azo ti bata yaka ti vigne ni.
Zo ti batango vigne oko oko ayeke ga na lo alê ti nginza ti argent 1 000 ndali ti alê ti vigne ni.
12 Mbi yeke na yaka ti vigne ti mbi wani.
Salomon, alê ti nginza ti argent 1 000 ni ayeke ti mo.
Nga alê ti nginza ti argent 200 ayeke ti azo so ayeke bata yaka ni.”
13 “Mo so mo yeke duti na yâ ti jardin,+
akamarade aye ti mä go ti mo.
Zia mbi nga mbi mä ni.”+
14 “Mo so mo gbu bê ti mbi mingi so, kpe mo hon;
kpe hio tongana ti so mbeni gazelle+
wala mbeni lekpa so akono awe
ayeke kpe na ndö ti ahoto so akugbe so afun pendere ayeke dä.”
Na Hébreu: “Gboto mbi na peko ti mo.”
Wala “sara tënë ti.”
So ti tene amaseka-wali.
Wala “âme ti mbi aye mo mingi.”
Wala “voile ti azo so ayeke na vundu.”
Wala “wali-mbarata ti mbi.”
A lingbi nga ti tene “na popo ti kuä ti li ti mo so a sara na pete.”
Wala “pendere koli.”
Wala “ti kota da.”
Na Hébreu: “da ti vin.”
Wala “ngoi ti ngu-nzapa.”
Wala “arenard.” Mbeni mara ti ambo ti ngonda so ala kono mingi pëpe, nga ala yo na nduzu mingi pëpe; amê ti ala ayo yongo nga lê ti ala ahan mingi.
A lingbi nga ti tene “dû ti ahoto.” Wala “ahoto ti Béther.”
Wala “so âme ti mbi aye lo mingi so.”
Wala “so âme ti mbi aye lo mingi so.”
Wala “so âme ti mbi aye lo mingi so.”
Wala “so âme ti mbi aye lo mingi so.”
Mbeni kete gbogbo so ayeke yô na akota zo ti kodro.
Wala “Aterê ti li.”
Wala “Anti-Liban.”
A lingbi nga ti tene “Poro ti terê ti mo.”
Wala “jardin.”
Mbeni mara ti sosongo so afun pendere.
Wala “Âme ti mbi asigi.”
A lingbi nga ti tene “Âme ti mbi azia mbi na ngoi so lo sara tënë.”
Wala “voile.”
A lingbi nga ti tene “tongana ali ti tûmuru.”
A yeke mbeni tênë ti nginza so couleur ni ayeke jaune wala vert.
Wala “Gbata so amû ngia na zo.”
Wala “Aterê ti li.”
Akeke so ayeke tongana keke ti acajou, na a sigi lani na Israël.
Bâ na kete bakari.
Wala “azo so amû terê ti ala wani ti sara kua.”
Wala “dodo ti Mahanaïm.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
“Jah” ayeke nduru iri ti Jéhovah.
A lingbi nga ti tene “lo.”