TOTO TI JÉRÉMIE
א [Aleph]*
1 Aï-oo! Ala bâ tongana nyen la gbata so azo asi singo lani na yâ ni so aduti gï lo oko so ma!+
Aï-oo! Ala bâ tongana nyen la gbata so lani azo ti lo ayeke gbani na popo ti amara so la aga tâ tongana mbeni wali-mua so ma!+
Aï-oo! Ala bâ tongana nyen la lo so ayeke lani molenge-wali ti gbia na popo ti akodro-komanda, a gbu lo ti sara kua ti ngangu so ma!+
ב [Beth]
2 Lo toto mingi na bï,+ na ngu ti lê ti lo ayuru amû terê ti ngbangba ti lo kue.
Na popo ti andeko ti lo kue, mbeni oko ti dë bê ti lo ayeke dä pëpe.+
Akamarade ti lo kue ahanda lo;+ ala ga awato ti lo.
ג [Guimel]
3 A gbu Juda a gue na lo na kodro-wande,+ lo duti na yâ ti pasi nga lo sara ngangu kua ti ngbâa.+
Lo sara kodro na popo ti amara nde,+ lo wara ndo ti wungo terê pëpe.
Azo so ayeke sara ye ti ngangu na lo atomba peko ti lo si ala wara lo na yâ ti ye ti vundu so asi na lo.
ד [Daleth]
4 Alege ti Sion ayeke na vundu, ndali ti so mbeni zo ti ga na matanga na yâ ti kodro ni ayeke dä pëpe.+
Ayanga ti agbagba ni kue akungbi awe.+ Aprêtre ti Sion ayeke dema.
Amaseka ti lo so ade ti hinga koli pëpe ayeke na mawa, kota vundu ahon ndö ti Sion.
ה [Hé]
5 Awato ti lo aga fadeso azo so akomande lo;* awato ti lo agi bê ti ala oko pëpe.+
Jéhovah la aga na ye ti vundu so na ndö ti lo ndali ti so akengo ndia ti lo ayeke mingi.+
A gue na amolenge ti lo na ngbâa na gbele awato ti lo.+
ו [Waw]
6 Gloire kue so molenge-wali ti Sion ayeke na ni ahon kue awe.+
Amokonzi ti Sion aga tongana akoli-lekpa so awara pere ti tengo ni pëpe,
ala woko na tambela na devant ti azo so ayeke tomba peko ti ala.
ז [Zaïn]
7 Na yâ ti angoi ti vundu ti lo, nga na yâ ti angoi so lo yeke na da ti lango dä pëpe so, Jérusalem adabe ti lo
na aye ti nzoni kue so lo wara ni ândö.+
Na ngoi so azo ti lo atï na maboko ti wato ti lo si zo ti mû maboko na ala ayeke dä ape so,+
awato ti Jérusalem abâ lo na ala he lo hengo* ndali ti so lo tï awe.+
ח [Heth]
8 Jérusalem asara siokpari mingi,+
ndani la lo ga mbeni ye so zo ake ni bê oko.
Azo kue so ayeke ne lo ândö so, fadeso ala yeke bâ lo tongana mbumbuse zo, ndali ti so ala bâ terê ti lo so ayeke senge so awe.+
Jérusalem ayeke dema+ nga lo tourné lo hon na kamene.
ט [Teth]
9 Sioni ye so lo sara ayeke na yanga ti bongo ti lo.
Lo dabe ti lo lani na gigi ti lo ti kekereke pëpe.+
Tingo ti lo asara si bê ti azo adö; zo ti dë bê ti lo ayeke dä pëpe.
Jéhovah, mo bâ pasi ti mbi, ndali ti so wato agonda terê ti lo.+
י [Yod]
10 Wato ni amû amosoro ti Jérusalem kue lo hon na ni.+
Jérusalem abâ amara nde alï na yâ ti akubu ti temple ti lo,+
ala so mo mû yanga lani ti tene ala lï pëpe na yâ ti congrégation ti mo.
כ [Kaph]
11 Azo ni kue adema terê ti ala; ala yeke gi kobe ti tengo ni.+
Ala mû aye ti mosoro ti ala ti changé na mbeni ye ti tengo ni, gï ti tene ala ngbâ na fini.*
Jéhovah, mo bâ, mbi ga tongana mbeni wali so ayeke mbumbuse zo.*
ל [Lamed]
12 Ala kue so ayeke hon na lege so, ye so asi na mbi so asara ye oko na ala ape?
Ala bâ ndo ala bâ!
Mbeni pasi ti lingbi na pasi so mbi bâ so ayeke dä? pasi so a zia mbi na yâ ni so,
pasi so Jéhovah asara si mbi bâ ni na lango ti ngonzo ti lo so alondo tongana wâ.+
מ [Mem]
13 Na nduzu kâ lo tokua wâ na yâ ti abio ti mbi,+ lo hon na ngangu abio ti mbi oko oko kue.
Lo bi mbeni gbanda ti gbu na gere ti mbi; lo forcé mbi ti kiri na peko.
Lo sara si mbi ga mbeni wali so ye kue ahunzi na lo awe.
Na yâ ti lango ni kue mbi yeke na kobela.
נ [Noun]
14 A kanga akengo ndia ti mbi na terê ti go ti mbi tongana mbeni joug, maboko ti lo wani la lo kanga na ni.
A zia asiokpari ti mbi na ndö ti go ti mbi, na ngangu ti mbi ahunzi kue.
Jéhovah azia mbi na yâ ti maboko ti ala so mbi lingbi ti gbu lê ni na ala pëpe.+
ס [Samek]
15 Angangu zo ti mbi kue, Jéhovah atomba ala kue na yâ ti mbi.+
Lo iri gbâ ti azo na ndö ti mbi, ti tene ala neka amaseka ti mbi ti koli.+
Jéhovah adö maseka-wali* ti Juda na sese, tongana lê ti vigne na yâ ti dû ti sarango na vin.+
ע [Aïn]
16 Aye so la asara si mbi yeke toto so.+ Ngu ti lê ti mbi ayuru gbani gbani.
Zo so alingbi ti dë bê ti mbi wala ti sara si mbi wara* ngangu ayeke yongoro na mbi.
Amolenge ti mbi ti koli ayeke na vundu mingi, ndali ti so wato ahon mbi na ngangu awe.
פ [Pé]
17 Sion ayôro maboko ti lo na nduzu.+ Zo oko ti dë bê ti lo ayeke dä pëpe.
Jéhovah amû yanga na awato ti Jacob so angoro lo kue ti sara sioni na lo.+
Jérusalem aga mbeni sioni ye na lê ti ala.+
צ [Tsadé]
18 Jéhovah ayeke mbilimbili,+ ngbanga ti so mbi la mbi sara kpengba-li na andia ti lo.+
Azo, ala kue amä mbi nga ala bâ pasi ti mbi.
A gbu amaseka ti mbi ti wali* nga na amaseka ti mbi ti koli a gue na ala na ngbâa.+
ק [Qoph]
19 Mbi iri ndo na ala so aye mbi mingi so, me ala handa mbi.+
Aprêtre nga na a-ancien ti mbi akui na yâ ti gbata ni,
na ngoi so ala ngbâ ti gi kobe ti tengo ni ti tene ala ngbâ na fini.*+
ר [Resh]
20 Aï, Jéhovah, mo bâ, mbi yeke na yâ ti kota vundu.
Yâ* ti mbi ayeke kporo kporongo.
Bê ti mbi ayeke tourné na yâ ti mbi ndali ti so mbi sara kpengba-li mingi.+
Na gigi épée ayeke fâ azo,+ na yâ ti da a yeke gï kuâ.
ש [Shin]
21 Azo amä dema ti mbi. Me zo ti dë bê ti mbi ayeke dä pëpe.
Awato ti mbi kue amä tënë ti ye ti vundu so asi na mbi so.
Terê ti ala anzere, ndali ti so mo ga na ye ti vundu so na ndö ti mbi.+
Me mo yeke sara si lango so mo sara tënë ni lani so ayeke ga ande,+ ala nga kue ayeke ga tongana mbi.+
ת [Taw]
22 Zia mo bâ aye ti sioni kue so ala sara, na mo sara ye ti ngangu na ala,+
gï tongana ti so mo sara ye ti ngangu na mbi ndali ti akengo ndia ti mbi kue.
Dema ti mbi ahon ndö ni, bê ti mbi ayeke na kobela.
א [Aleph]
2 Aï! Ala bâ tongana nyen Jéhovah agbara mbinda ti ngonzo ti lo na ndö ti molenge-wali ti Sion!
Lo bi pendere ti Israël si alondo na yayu atï na sese.+
Na lango ti ngonzo ti lo, lo dabe ti lo pëpe na mbata ti gere ti lo.+
ב [Beth]
2 Jéhovah afuti ando ti lango ti Jacob kue na lo bâ mawa ti mbeni ndo ni oko pëpe.
Na yâ ti ngonzo ti lo, lo kungbi na sese angangu gbagba ti molenge-wali ti Juda.+
Lo kinda royaume+ ni nga na amokonzi ni na sese na lo sara si ala ga ye ti sioni.+
ג [Guimel]
3 Na yâ ti ngonzo ti lo so alondo ngangu, lo fâ ngangu* ti Israël kue na sese.
Na ngoi so wato apusu nduru, lo gboto maboko ti lo ti koli na peko.+
Ngonzo ti lo angbâ ti gbi na yâ ti Jacob mo bâ mo tene wâ so ayeke gbi aye kue so angoro ni.+
ד [Daleth]
4 Lo gboto yâ ti* kokora ti lo mo bâ mo tene mbeni wato. Tongana mbeni wato, lo leke maboko ti lo ti koli nduru ti sara bira.+
Azo kue so ayeke nzoni na lê ti e, lo ngbâ gï ti fâ ala kue.+
Lo tuku ngonzo ti lo tongana wâ+ na yâ ti tente ti molenge-wali ti Sion.+
ה [Hé]
5 Jéhovah aga tongana wato ti e.+
Lo hunzi Israël kue.
Lo kungbi atour ti Israël kue na sese.
Lo futi angangu gbagba ti Israël kue.
Na yâ ti gbata* ti Juda, lo sara si vundu nga na dema ahon ndö ni.
ו [Waw]
6 Lo buba kpangba ti lo,+ tongana ti so a yeke buba na kete da ti yaka.
Lo sara si matanga ti lo ahunzi.*+
Jéhovah asara si a girisa tënë ti matanga nga na tënë ti lango ti sabbat na Sion.
Na yâ ti kota ngonzo ti lo, lo bâ agbia nga na aprêtre tongana asenge ye.+
ז [Zaïn]
7 Jéhovah ake gbalaka ti lo awe.
Lo ke akubu ti temple ti lo awe.+
Lo zia amur ti angangu tour ti gbata ni na maboko ti awato.+
Ala dekongo na yâ ti da ti Jéhovah,+ tongana ti so azo ayeke dekongo na lango ti mbeni matanga.
ח [Heth]
8 Jéhovah aleke na bê ti lo awe ti futi gbagba ti molenge-wali ti Sion.+
Lo gboto yâ ti kamba ti mungo na yongo ti ye.+
Lo gbanzi maboko ti lo pëpe ti futi* ala.
Lo sara si sese so azo amonté ni aga koto na terê ti gbagba ni nga na mur ti gbagba ni so aduti na vundu.
Lo sara si ala kue awoko.
ט [Teth]
9 Ayanga ti gbagba ti Sion alï na yâ ti sese.+
Nzapa abuba nga akungbi abarre ni.
Agbia ni nga na amokonzi ni ayeke na popo ti azo ti amara nde.+
Ndia* ayeke dä pëpe. Même aprophète awara pëpe mbeni vision so alondo na Jéhovah.+
י [Yod]
10 A-ancien ti molenge-wali ti Sion aduti na sese, ala zi yanga oko pëpe.+
Ala tuku fuku ti sese na li ti ala na ala yü bongo ti vundu.+
Amaseka-wali ti Jérusalem so ade ti hinga koli pëpe akuku akpo li ti ala na sese.
כ [Kaph]
11 Mbi toto juska lê ti mbi asuku.+
Yâ* ti mbi ayeke kporo kporongo.
Foie ti mbi asigi atï na sese, ndali ti so molenge-wali ti azo ti mbi atï,*+
ndali ti so amolenge nga na aforoto awoko na lê ti ala avuko si ala tï kirikiri na ando ti gbata ni so azo ayeke gue ka dä mingi.+
ל [Lamed]
12 Na ngoi so ala woko na lê ti ala avuko si ala tï kirikiri tongana zo so a fâ lo na ando ti gbata ni so azo ayeke gue ka dä mingi,
nga so fini* ti ala ayeke gue yeke yeke ti hunzi na yâ ti amaboko ti amama ti ala,
ala yeke hunda amama ti ala, atene: “Ye ti tengo ni nga ye ti nyongo ni ayeke na ndo wa?”+
מ [Mem]
13 Nyen la mbi yeke mû ti tene aduti témoin nyen?
Molenge-wali ti Jérusalem, mbi lingbi ti mû nyen ti haka mo na ni?
Mo maseka-wali ti Sion so mo de ti hinga koli pëpe, mbi lingbi ti haka mo na nyen si adë bê ti mo?
Ngbanga ti so kä ti mo akono mingi mo bâ mo tene ngu-ingo.+ Zo wa la alingbi ti sava mo zo wa?+
נ [Noun]
14 Avision so aprophète ti mo abâ ndali ti mo ayeke avision ti mvene nga asenge senge ye,+
ala fa lani sioni ti mo na gigi pëpe, tongana fade ala fa ni na gigi, a lingbi ti kanga lege si a gue na mo na ngbâa pëpe,+
me ala ngbâ gï ti tene mvene na mo na ala handa mo na lege ti avision ni so.+
ס [Samek]
15 Azo kue so ayeke hon na lege ayeke pika maboko ti ala ti he mo hengo.+
Li ti ala akpe si ala yeke hûru yanga ti ala+ nga ala yeke yengi li ti ala na terê ti gbata* ti Jérusalem, ala tene:
“Eskê gbata so azo ayeke tene lani tënë ni atene: ‘A yeke tâ pendere mingi, a zia ngia na bê ti azo ti sese kue’ so, tâ ni la?”+
פ [Pé]
16 Awato ti mo kue azi yanga ti ala na ndö ti mo.
Ala hûru yanga ti ala na ala te pembe ti ala, ala tene: “E mene lo awe.+
Lango so e yeke ku ni so la!+ Lango ni asi awe, na e bâ ni awe!”+
ע [Aïn]
17 Jéhovah asara aye so lo leke lani na bê ti lo ti sara so awe;+ lo sara ye alingbi na tënë so lo tene so awe,+
yanga so lo mû ândö kozoni so.+
Lo futi mo sân ti bâ mawa ti mo.+
Lo zia si terê ti wato ti mo anzere ndali ti ye so asi na mo; lo yâa ngangu* ti awato ti mo na nduzu.
צ [Tsadé]
18 Mo gbagba ti molenge-wali ti Sion, bê ti azo ni adekongo na mbage ti Jéhovah.
Zia ngu ti lê ti ala asua tongana kota ngu bï na lâ.
Mo wu terê ti mo pëpe, mo zia lê ti mo awu terê ti lo na toto ni pëpe.
ק [Qoph]
19 Mo londo! Mo dekongo na bï, na tongo nda ti kua ti asinziri.
Mo zi bê ti mo kue na devant ti Jéhovah tongana ngu so zo atuku na sese.
Mo yô maboko ti mo na nduzu na lo ndali ti fini* ti amolenge ti mo,
so lê ti ala avuko si ala tï kirikiri na coin* ti alege kue ndali ti so nzara ahon ndö ti ala.+
ר [Resh]
20 Aï Jéhovah! Mo bi lê nga na ndö ti azo ti mo so mo sara ye ti ngangu na ala so ma!
Eskê awali ayeke ngbâ gï ti te ahale* ti ala, tâ amolenge ti ala so ala la adü so?+
Eskê a yeke nzoni ti tene a fâ aprêtre nga na aprophète na yâ ti temple ti Jéhovah?+
ש [Shin]
21 Kuâ ti amaseka-koli nga na ti ambakoro alango na sese na ndö ti alege.+
Amaseka ti mbi ti wali* nga na amaseka ti mbi ti koli akui na lege ti épée.+
Mo fâ ala na lango ti ngonzo ti mo; mo fâ ala sân ti bâ mawa ti ala.+
ת [Taw]
22 Mo iri ye so amû kota mbeto si alondo na mbage na mbage kue aga na ndö ti mbi, tongana ti so a yeke iri azo ti ga na lango ti mbeni matanga.+
Na lango ti kota ngonzo ti Jéhovah, zo oko akpe pëpe wala asö kuâ pëpe;+
ala so mbi la mbi dü ala* nga mbi la mbi bata ala so, wato ti mbi afâ ala kue.+
א [Aleph]
3 Mbi yeke zo so abâ ye so a iri ni pasi, ndali ti so Nzapa apunir e na kota ngonzo ti lo.
2 Lo mû mbi lo hon na ni na lo sara si mbi tambela na yâ ti vukongo ndo, me na yâ ti lumière pëpe.+
3 Biani, fani mingi maboko ti lo ayeke na terê ti mbi ti ke mbi na yâ ti lango ni kue.+
ב [Beth]
4 Lo sara si mbi nge sioni sioni nga poro ti terê ti mbi abuba kue.
Lo kungbi yâ ti abio ti mbi.
5 Lo mû sese lo monté aga koto angoro mbi kue, lo sara si sioni yorö ti fango zo+ nga na ye ti ngangu angoro mbi kue.
6 Lo forcé mbi ti duti na yâ ti vukongo ndo, tongana akuâ so akui aninga awe.
ג [Guimel]
7 Lo sara gbagba na terê ti mbi, si mbi wara lege ti kpe pëpe;
lo kanga mbi na anengo chaîne ti cuivre.+
8 Na ngoi so mbi toto na lo ngangu ti mû maboko na mbi, lo ke ti mä* sambela ti mbi.+
9 Lo kanga alege ti mbi na atênë so a dë terê ni.
Lo sara si alege so mbi tambela dä aba bango.+
ד [Daleth]
10 Lo ku ti gbu mbi tongana mbeni ours so ayeke ku ti gbu mbeni nyama, nga tongana mbeni bamara so ahonde terê ti lo ti ku mbi ti gbu mbi.+
11 Lo forcé mbi ti dö alege ti mbi ti zia nga lo fâ yâ ti mbi kete kete;
12 Lo gboto yâ ti* kokora ti lo, na lo zia mbi tongana ye so lo ye ti pika na kokora ni.
ה [Hé]
13 Lo pika alê ti kokora* so lo mû na yâ ti bozo ti kokora ti lo, si alï yâ ti arein ti mbi.
14 Mbi ga mbeni ye so azo kue ayeke he ni hengo, iri ti mbi la aga ye so ala yeke he bia na ni na yâ ti lango ni kue.
15 Lo sara si yâ ti mbi asi na asengo ye, lo sara si yâ ti mbi asi na absinthe.+
ו [Waw]
17 Mo zi siriri na terê* ti mbi; mbi girisa ye so ayeke ye ti nzoni.
18 Ni la si mbi tene: “Pendere ti mbi afuti awe, nga ye so mbi ku na mbage ti Jéhovah so afuti awe.”
ז [Zaïn]
19 Dabe ti mo na pasi ti mbi, dabe ti mo nga so mbi yeke na da ti lango pëpe;+ dabe ti mo na absinthe nga na sioni sengo yorö.+
20 Kite ayeke dä pëpe so mo yeke* dabe ti mo ande na mbi na mo yeke ga na mbage ti mbi ti mû maboko na mbi.+
21 Mbi dabe na ye so na yâ ti bê ti mbi; ndani la si mbi yeke kanga bê ti ku.+
ח [Heth]
22 A yeke ngbanga ti tâ ndoye so Jéhovah ayeke na ni, si e hunzi kue pëpe so,+
ndali ti so nzoni bê ti lo ayeke hunzi lâ oko pëpe.+
23 Lakue na ndapre, nzoni bê ni akiri aga gï fini ni;+ mo yeke be-ta-zo mingi.+
24 Mbi tene:* “Jéhovah ayeke part ti mbi,+ ndani la mbi yeke kanga bê ti ku lo.”+
ט [Teth]
25 Jéhovah asara nzoni na zo so azia bê ti lo na lo,+ na zo* so angbâ ti gi lo.+
26 A yeke nzoni zo aduti kpô ti ku*+ salut so alondo na Jéhovah.+
27 A yeke nzoni ti tene zo ayô joug na ngoi so lo de maseka.+
י [Yod]
28 Zia lo duti lo oko na lo duti kpô, na ngoi so Nzapa azia lege na pasi ni ti si na lo.+
29 Zia lo yôro yanga ti lo na yâ ti fuku ti sese;+ peut-être mbeni beku angbâ ndali ti lo.+
30 Zia lo dengi ngbangba ti lo na zo so ayeke pika lo; zia lo yeda si azo azonga lo mingi.
כ [Kaph]
31 Jéhovah ayeke ke e biani biani pëpe.+
32 Atâa so lo sara na e aye so amû vundu, lo yeke sara nga nzoni bê na e alingbi na tâ ndoye ti lo so ayeke mingi mingi.+
33 Na bê ti lo kâ, lo ye pëpe ti sara pasi na amolenge ti azo wala ti zia vundu na bê ti ala.+
ל [Lamed]
34 Ti neka azo ti kanga kue ti dunia so na gere,+
35 ti fâ ngbanga ti zo na lege ni pëpe na gbele Lo so ayeke na nduzu na ndö ti aye kue,+
36 ti ba yâ ti tënë ti ngbanga ti mbeni zo so ayeke na lege ni,
aye tongaso Jéhovah ayeda na ni pëpe.
מ [Mem]
37 Zo wa la alingbi ti sara tënë, na lo sara si ye ti peko ni asi, sân ti tene Jéhovah la amû yanga ti tene ye ni asi?
38 Ye ti nzoni na ye ti sioni alingbi pëpe ti sigi legeoko
na yanga ti Lo so ayeke na nduzu na ndö ti aye kue.
39 Ngbanga ti nyen la zo so ayeke na fini adema terê ti lo ndali ti aye so asi na lo na peko ti siokpari so lo sara?+
נ [Noun]
40 Zia e bâ asarango ye ti e mbilimbili na e gi ndani nzoni,+ na zia e kiri na Jéhovah.+
41 Na vuru bê zia e sambela Nzapa so ayeke na yayu nga zia e yôro maboko ti e na nduzu na lo,+ e tene:
42 “E ke andia ti mo nga e sara kpengba-li na mo,+ na mo pardonné e pëpe.+
ס [Samek]
43 Ngonzo ti mo asara si mo kanga lege na e ti ga nduru na mo;+
mo tomba peko ti e nga mo fâ e sân ti bâ mawa ti e.+
44 Mo mû mbinda mo kanga na lege na e si e ga nduru na mo pëpe, tongaso si sambela ti e asi na mo kâ pëpe.+
45 Mo sara si e ga tongana saka ti aye nga zende na popo ti azo.”
פ [Pé]
46 Awato ti e kue azi yanga ti ala ti sara tënë na terê ti e.+
47 Lakue e yeke gï na yâ ti kota mbeto nga e tï na yâ ti akûkû,+ e yeke gï e oko nga a futi e awe.+
48 Ngu ti lê ti mbi ayuru tongana ngu so asua, ndali ti so a futi molenge-wali ti azo ti mbi.+
ע [Aïn]
49 Ngu ti lê ti mbi angbâ gï ti yuru, lê ti mbi awu terê ti lo pëpe,+
50 juska na ngoi so Jéhovah angbâ kâ na yayu abâ ndo ge na sese na lo bâ ye so asi.+
51 Vundu asara mbi* tongana mbi bâ aye so asi na amolenge-wali kue ti gbata ti mbi.+
צ [Tsadé]
52 Senge senge tongaso awato ti mbi ayeke gi ti gbu mbi tongana ti so zo ayeke gi ti gbu mbeni ndeke.
53 Ala hunzi na fini ti mbi na yâ ti dû; ala ngbâ gï ti bi atênë na ndö ti mbi.
54 Ngu asuku ahon li ti mbi, si mbi tene: “Aï ti mbi ahunzi awe!”
ק [Qoph]
55 Mbi ngbâ na ngbonda ti dû ni kâ, mbi dekongo na iri ti mo Jéhovah.+
56 Mo mä go ti mbi; mo kanga mê ti mo pëpe na toto ti mbi so mbi toto na mo ti mû maboko na mbi, ti sara si pupu aya mbi.
57 Na lango so lani mbi iri ndo na mo, mo ga nduru na mbi. Mo tene: “Sara mbeto pëpe.”
ר [Resh]
58 Mo gbu koko ti mbi, Jéhovah, mo futa mbeni ye ti sö fini ti mbi na yâ ti kpale.+
59 Jéhovah, mo bâ ye ti sioni so a sara na mbi; mbi voro mo, mo fâ ngbanga ti mbi na lege ni.+
60 Mo bâ ye ti sioni kue so ala kiri peko ni na mbi, aye ti sioni kue so ala leke na bê ti ala ti sara na mbi.
ש [Sin] wala [Shin]
61 Jéhovah, mo mä azonga so ala zonga na mbi awe, aye ti sioni kue so ala leke na bê ti ala ti sara na mbi,+
62 mo mä atënë ti yanga ti azo so ake mbi, nga na atënë so ala tene na gbe ti go ti ala na terê ti mbi na yâ ti lango ni kue.
63 Mo bâ ala; atâa ala duti wala ala luti, ala yeke he mbi na yâ ti abia ti ala.
ת [Taw]
64 Jéhovah, mo yeke kiri ti futa ala ande alingbi na aye so ala sara so.
65 Mo yeke sara ande si li ti ala akpengba; so ayeke deba so mo dë na ndö ti ala la.
66 Na yâ ti ngonzo ti mo, Jéhovah, mo yeke tomba peko ti ala, na mo yeke futi ala biani biani na ndö ti sese.*
א [Aleph]
4 Aï-oo! Pendere lor+ so ayeke za zango so, a kiri a za pëpe!
Aï-oo! Tênë ti ndo so ayeke nzoni-kue+ alango kirikiri na coin* ti alege kue!+
ב [Beth]
2 Âdu ti anzoni molenge ti Sion so ngere ti ala alingbi na ngere ti lor ti nzoni ni so,
bâ, a yeke bâ ala fadeso tongana asenge ta ti sese,
senge ye ti maboko ti zo ti lekengo ata ti sese.
ג [Guimel]
3 Atâa ambo ti ngonda, ala yeke mû me na amolenge ti ala,
me molenge-wali ti azo ti mbi aga tâ sioni,+ tongana a-autruche* na yâ ti benyama.+
ד [Daleth]
4 Langue ti amolenge so angbâ ti nyon me acollé na yâ ti yanga ti ala ndali ti so nzara ti ngu ahon ndö ti ala.
Amolenge ahunda mapa ti tengo ni,+ me zo oko amû ni na ala pëpe.+
ה [Hé]
5 Azo so ayeke te ka lani gï anzoni kobe so, ala lango na sese, nzara ahon ndö ti ala.+
Azo so ayeke yü ka abengba bongo+ depuis kete ti ala so, ala lango na yâ ti gbâ ti amburu ti wâ.
ו [Waw]
6 Punition* ti molenge-wali ti azo ti mbi ayeke kota mingi ahon punition so a mû na azo ti Sodome ndali ti siokpari ti ala,+
Sodome so a futi ni lani gï hio tongaso, na mbeni zo ti mû maboko na lo ayeke dä pëpe so.+
ז [Zaïn]
7 A-Naziréen+ ti Sion avuru lani ahon neige; na bango ala, ala vuru ahon lait.
Terê ti ala abe lani ahon ti acorail. Ala yeke lani tongana atênë ti saphir so terê ni aza pendere.
ח [Heth]
8 Fadeso ala vuko ahon vuko ti peko ti ta;
tongana zo abâ ala na ndö ti alege, lo yeke hinga ala pëpe.
Poro ti terê ti ala ague juska agbu abio ti ala;+ poro ti terê ti ala ni ahule tongana hulengo keke.
ט [Teth]
9 Ala so akui kuâ ti épée ayeke nzoni mingi ahon ala so akui kuâ ti nzara,+
ala so ayeke nge gï ngengo na nzara, a yeke mo bâ mo tene épée akpo yâ ti ala ndali ti so ala wara kobe ti yaka ti te pëpe.
י [Yod]
10 Atâa awali so ayeke bâ mawa ti zo, ala wani atö amolenge ti ala na maboko ti ala.+
Amolenge ni aga kobe ti tengo ti ala na lâ ti ye ti vundu so asi na molenge-wali ti azo ti kodro ti mbi.+
כ [Kaph.]
11 Jéhovah afa kota ngonzo ti lo kue;
lo sara si ngonzo ti lo amû ndo tongana wâ.+
Lo komanse ti bi wâ na yâ ti Sion, na wâ ni agbi afondation ti Sion kue.+
ל [Lamed]
12 Agbia ti sese nga na azo kue so asara kodro na ando so aye alë dä nzoni amä na bê lani pëpe
so awato alingbi ti lï na ayanga ti gbagba ti Jérusalem.+
מ [Mem]
13 Ye ni asi lani ndali ti asiokpari so aprophète ti lo asara nga ndali ti asioni so aprêtre ti lo asara,+
ala tuku mênë ti azo ti mbilimbili na yâ ti kodro ti lo.+
נ [Noun]
14 Ala fono kirikiri na ndö ti alege tongana azo so lê ti ala abuba.+
Ala ga sioni ndali ti mênë so atuku,+
tongaso mbeni zo alingbi ti ndu bongo ti ala pëpe.
ס [Samek]
15 A dekongo na ndö ti ala, a tene: “Ala hon kâ! Ala so terê ti ala aga sioni awe so! Ala hon kâ! Ala ndu e pëpe!”
Ala yeke azo so da ti li ti ala ayeke dä pëpe na ala yeke fono kirikiri.
Azo ayeke tene na popo ti amara, atene: “Ala lingbi pëpe ti duti na ndo so na popo ti e.*+
פ [Pé]
16 Jéhovah wani akangbi ala kirikiri;+
lo yeke bâ ala ande na nzoni lê encore ape.
Azo ayeke ne ande aprêtre pëpe+ nga a yeke sara nzoni bê na a-ancien pëpe.”+
ע [Aïn]
17 Même fadeso lê ti e abâ ndo gbä ti wara mungo maboko na lo fatigué kue.+
E bâ ndo na e zia bê ti e na mbeni mara so alingbi ti sö e pëpe.+
צ [Tsadé]
18 Awato ti e agi e na ando kue tongana ti so zo ayeke gi na nyama,+ ye so asara si e lingbi pëpe ti tambela na ando so azo ayeke gue ka dä mingi.
Ti e aga nduru ti hunzi awe; alango ti e alingbi awe, ngbanga ti so ti e ahunzi awe.
ק [Qoph]
19 Azo so ayeke tomba peko ti e ayapu na loro ahon a-aigle so ayeke huru na lê ti nduzu.+
Ala tomba peko ti e na ndö ti ahoto; ala honde terê ti ala ti ku e na yâ ti benyama.
ר [Resh]
20 Pupu so ayeke mû fini na e, so ti tene zo so Jéhovah asoro lo so,+ ala gbu lo na yâ ti kota dû ti ala,+
lo so e tene tënë ti lo, e tene: “A yeke na gbe ti dê ti lo la si e yeke sara kodro na popo ti amara.”
ש [Sin]
21 Mo huru na ngia, mo sara ngia, mo molenge-wali ti Édom,+ mo so mo sara kodro na sese ti Uz.
Me a yeke mû nga na mo kopo ni,+ mo yeke nyon ni mo yeke soulé na mo yeke zia terê ti mo senge na gigi.+
ת [Taw]
22 Molenge-wali ti Sion, punition ti sioni ti mo aga nduru ti hunzi awe.
Lo yeke gbu mo ti gue na mo na kodro-wande encore ape.+
Me ti mo, molenge-wali ti Édom, Nzapa ayeke bi lê ti lo ande na ndö ti asioni ti mo.
Lo yeke fa ande asiokpari ti mo na gigi.+
5 Jéhovah, mo dabe ti mo na ye so asi na e so.
Bâ ndo na mo bâ ye ti kamene so a sara na e so.+
2 Sese so ayeke ti e aga ti ambeni zo nde, na ada ti e aga ti awande.+
3 E ga anyindu, ababâ ti e ayeke dä pëpe; amama ti e ayeke tongana awali-mua.+
4 Ngu ti e wani, e doit ti vo ni vongo si e nyon,+ nga keke ti wâ ti e wani e kiri e vo ni vongo.
5 Ala so ayeke tomba e asi nduru na e awe.
Ngangu ti e ahunzi kue awe, me a zia lege na e ti wu terê ti e pëpe.+
6 E yôro maboko na azo ti Égypte+ nga na azo ti Assyrie,+ ti wara kobe ti tengo ni alingbi na e.
7 Akotara ti e so asara siokpari lani so, ala yeke dä encore ape me e la e yô ngbanga ti asioni ti ala na li ti e.
8 Azo ti kua la ayeke sara komandema na ndö ti e fadeso; zo ti zi e na maboko ti ala ayeke dä pëpe.
9 E yeke zia fini* ti e na lê ti kuâ tongana e gue ti gi kobe ti ga na ni,+ ndali ti so azo so ayeke na épée ayeke na yâ ti benyama.
10 Poro ti terê ti e amû wâ tongana four, ngbanga ti kota nzara so asara e.+
11 A bi kamene na lê ti awali ti Sion so amû koli awe,* nga na lê ti amaseka so ade ti hinga koli pëpe, so ayeke na yâ ti agbata ti Juda.+
12 A gbu amokonzi a kanga ala na nduzu na maboko ti ala,+ nga a ne a-ancien oko pëpe.+
13 Amaseka-koli ayô tênë ti nekango na ye, na amolenge-koli apika gere ti ala, ala tï na gbe ti anengo keke ti wâ so ala yô.
14 A-ancien so ayeke duti ka na yanga ti gbagba ti gbata ni+ ayeke dä mbeni pëpe; amaseka-koli apika mozoko encore ape.+
15 Ngia ahon na yâ ti bê ti e awe; dodo so e yeke do so achangé aga vundu.+
16 Couronne alondo na li ti e atï na sese. Mawa na e, ngbanga ti so e sara siokpari awe.
17 Ni la bê ti e ayeke na kobela;+
ndali ti aye so, lê ti e avuko,+
18 ndali ti so Hoto ti Sion angbâ senge senge,+ ambo ti ngonda* la ayeke fono dä.
19 Me mo, Jéhovah, mo duti ti mo na ndö ti trône ti mo lakue lakue.
Trône ti mo ayeke ngbâ na yâ ti angoi nde nde kue so ayeke ga.+
20 Ngbanga ti nyen la mo girisa e biani biani so? Ngbanga ti nyen la mo dö e mo zia aninga tongaso so?+
21 Jéhovah, mo kiri na e na terê ti mo, na e yeke duti ande nduru ti kiri na mo.+
Sara si alango ti e akiri aga tongana ti ândö.+
22 Me mo ke tâ e na bê ti mo oko.
Mo ngbâ ti sara ngonzo mingi na terê ti e.+
Chapitre oko ti si na osio ayeke mbeni bia ti totongo kuâ so a sû na yanga ti Hébreu, na kode ti dikongo agere-mbeti ti Hébreu.
Na Hébreu: “aga li ti lo.”
Wala “ala tï na ngia.”
Wala “ti tene ala mû ngangu na âme ti ala.”
A yeke Jérusalem la a yeke sara tënë ti lo tongana zo so.
Na Hébreu: “maseka-wali so ade ti hinga koli pëpe.”
Wala “âme ti mbi awara.”
Wala “amaseka ti mbi ti wali so ade ti hinga koli pëpe.”
Wala “ti tene ala mû ngangu na âme ti ala.”
Na Hébreu: “Akamba ti yâ.”
Na Hébreu: “adidi oko oko kue.”
Na Hébreu: “dö.”
Na Hébreu: “Molenge-wali”
Wala “Lo futi matanga ti lo.”
Na Hébreu: “mene.”
Wala “Fango ye.”
Na Hébreu: “Akamba ti yâ.”
A yeke mbeni kode ti sarango tënë na lege ti suma-tene, mo bâ mo tene kodro ni ayeke mbeni molenge-wali. Peut-être ti bâ mawa ti kodro ni.
Wala “âme.”
Na Hébreu: “molenge-wali.”
Na Hébreu: “didi.”
Wala “âme.”
Na Hébreu: “na li.”
Wala “lengo.”
Wala “Amaseka ti mbi ti wali so ade ti hinga koli pëpe.”
Wala “so mbi dü ala na nzoni terê.”
Wala “lo kanga lege na.”
A lingbi nga ti tene “duti tongana sese ti yaka so a zia ni ti wu terê ti lo.”
Na Hébreu: “dö.”
Na Hébreu: “amolenge.”
Wala “âme.”
Wala “âme ti mo ayeke.”
Wala “Âme ti mbi atene.”
Wala “âme.”
Wala “akanga bê ti ku.”
Wala “âme ti mbi.”
Wala “na gbe ti ayayu ti Jéhovah.”
Na Hébreu: “na li.”
Wala “anaamo” mbeni kota ndeke.
Na Hébreu: “Faute.”
Wala “Ala sara kodro na ndo so tongana awande.”
Wala “âme.”
Wala “a gbu awali ti Sion na ngangu a lango na ala.”
Wala “arenard.” Mbeni mara ti ambo ti ngonda so ala kono mingi pëpe, nga ala yo na nduzu mingi pëpe; amê ti ala ayo yongo nga lê ti ala ahan mingi.