BIBLIOTHÈQUE NA NDÖ TI INTERNET Watchtower
Watchtower
BIBLIOTHÈQUE NA NDÖ TI INTERNET
Sango
  • BIBLE
  • AMBETI
  • ABUNGBI
  • nwt Joël 1:1-3:21
  • Joël

Vidéo ayeke na yâ ti mbage ni so ape.

Pardon, mbeni kpale asi na ngoi ti zingo vidéo ni.

  • Joël
  • Mbeti ti Nzapa ti fini dunia
Mbeti ti Nzapa ti fini dunia
Joël

JOËL

1 Jéhovah atene na Joël,* molenge ti Pethuel, atene:

 2 “A-ancien, ala mä tënë so,

ala azo ti kodro* ni kue, ala dengi mê ti ala.

Eskê mara ti ye tongaso asi na ngoi ti ala

wala na ngoi ti akotara ti ala awe?+

 3 Ala sara tënë ni na amolenge ti ala.

Zia amolenge ti ala ni afa tënë ni nga na amolenge ti ala,

nga zia amolenge ni so afa tënë ni na amolenge so ayeke ga ande na peko ti ala.

 4 Ye so agbadora so aga kozo ate si azia, agbadora so ayeke huru hurungo aga ate ni;+

ye so agbadora ni so azia, agbadora so ayeke hara harango aga ate ni;

ye so agbadora ni so azia ni, agbadora so ayeke te aye kue aga ate tanga ni.*+

 5 Azo ti nyongo sämba,+ ala zingo na lango nga ala toto!

Azo ti nyongo vin kue, ala toto na vundu,

ndali ti so a zi nzerengo vin na yanga ti ala awe.+

 6 Mbeni mara aga na yâ ti kodro ti mbi, mara so ayeke ngangu mingi, na zo alingbi ti diko wungo ti ala pëpe.+

Pembe ti ala ayeke tongana ti bamara,+ nga bio ti ngbangba ti ala ayeke tongana ti bamara.

 7 Lo buba keke ti vigne ti mbi nga lo sara si keke ti figue ti mbi aga gï nduru nduru,

lo zi poro ni na terê ni kue, na lo bi ni na ngonda,

akete maboko ti akeke ni angbâ gï vuru vuru.

 8 Toto na vundu tongana maseka-wali so ade ti hinga koli pëpe* so ayü bongo ti vundu

ndali ti so koli so amû lo fini fini* akui.

 9 Sandaga ti lê ti kobe+ nga na sandaga ti sämba+ ayeke encore ape na yâ ti da ti Jéhovah;

aprêtre, awakua ti Jéhovah, ayeke sara mua.

10 A futi yaka, nga sese ni ayeke na vundu.+

A futi alê ti kobe, fini vin ahule kue nga mafuta ahunzi kue.+

11 Bê ti azo ti fango yaka anze, nga azo ti fango yaka ti vigne atoto na vundu,

ndali ti so blé na orge ayeke dä pëpe.

Alê ti kobe ti yaka ayeke dä encore ape.

12 Keke ti vigne ahule,

nga keke ti figue ahule.

Keke ti grenade, keke ti mbûrü na keke ti pomme,

akeke kue ti yâ ti ngonda ahule.+

Kamene asara azo so ayeke lani na ngia.

13 Ala aprêtre, ala yü bongo ti vundu,* na ala sara vundu;*

ala toto, ala awakua ti gbalaka ni.+

Ala awakua ti Nzapa ti mbi, ala ga, ala yü bongo ti vundu, na ala lango na ni na bï,

ndali ti so azo aga na asandaga ti lê ti kobe+ nga na asandaga ti sämba+ na da ti Nzapa ti ala pëpe.

14 Ala to mbela* ti tene azo amû jeûne; ala iri azo ti sara bungbi.+

Ala bungbi a-ancien nga na azo ti kodro ni kue ndo oko,

ala ga na da ti Jéhovah Nzapa ti ala,+ na ala toto na Jéhovah ti mû maboko na ala.

15 Aï, so lango ti vundu!

Lâ ti Jéhovah aga nduru.+

Na lango ni so, Nzapa so ngangu ti lo ahon angangu kue ayeke futi ye!

16 Eskê a mû kobe na lê ti e ahon na ni ape?

Ngia na nzerengo terê ahunzi na da ti Nzapa ti e ape?

17 Ngongoa ti kobe* ahule na gbe ti apelle ti ala.

A futi ada so a yeke bata aye dä.

A kungbi agogoro na sese, ndali ti so alê ti kobe ahule awe.

18 Même anyama adema terê!

Abagara afono kirikiri, ndali ti so ala yeke na ndo ti tengo pere pëpe.

Même ataba abâ pasi na pekoni.

19 Jéhovah, mbi yeke toto na mo,+

ngbanga ti so wâ agbi ando ti tengo pere ti benyama kue awe,

wâ agbi akeke kue ti yâ ti benyama.

20 Anyama ti ngonda atoto na mo,

ngbanga ti so ngu ahule

nga wâ agbi ando ti tengo pere ti benyama awe.”

2 “Ala hûru didi na Sion!+

Ala mû dekongo ti bira na ndö ti hoto ti mbi so ayeke nzoni-kue.

Zia terê ti azo ti kodro* ni kue adö,

ndali ti so lâ ti Jéhovah ayeke ga!+ A ga nduru ti si awe!

 2 A yeke lango so ndo avuko pitipiti,+

lango ti mbinda nga na ti kota vukongo ndo.+

A yeke tongana lumière ti kota ndapre so alondo na ndö ti ahoto.

Mbeni mara ayeke dä so azo ni ayeke gbani nga ala yeke ngangu mingi.+

Ade a bâ mbeni mara tongaso pëpe,

nga a yeke wara ande mbeni mara tongaso pëpe

na yâ ti angoi kue so ayeke ga.

 3 Na devant ti azo ni, wâ ayeke gbi ndo,

nga na peko ti ala, wâ ayeke gbi ndo.+

Kodro so ayeke na devant ti ala ayeke tongana yaka ti Éden,+

me ndo so ayeke na peko ti ala ayeke mbeni ndo so abuba kue;

mbeni ndo ti kpe dä ayeke dä pëpe.

 4 Ala kpa ambarata,

na ala yeke mû loro tongana ambarata ti bira.+

 5 Bruit ti ala ayeke tongana ti apuse ti mbarata na ngoi so ala yeke huru na ndö ti ahoto.+

Bruit ni ayeke tongana ti wâ so ayeke gbi ahulengo pere.

A yeke tongana ti azo so ayeke ngangu mingi so aleke terê ti ala ti sara bira.+

 6 Ndali ti ala, vundu ayeke hon ndö ti azo.

A yeke bâ mbeto na lê ti azo kue.

 7 Ala kpe loro tongana angangu turugu,

ala monté na ndö ti mur tongana aturugu.

Ala oko oko kue ayeke tambela gï droit na devant ti ala;

ala hon kirikiri na ndö ti alege ni pëpe.

 8 Ala pusu mba ti ala pëpe;

zo oko oko ayeke gue gï guengo na devant ti lo.

Tongana aye ti bira asara si ambeni atï,

atanga ni ayeke fâ yâ ti rang ni pëpe.

 9 Ala lï hio na yâ ti gbata ni, ala mû loro na ndö ti gbagba ni.

Ala monté na terê ti amur ti da, ala lï na lê ti afenêtre tongana zo ti nzi.

10 Kodro ni ayeke dö na devant ti ala, nga lê ti nduzu ayengi.

Lâ na nze avuko,+

na atongoro aza encore ape.

11 Jéhovah ayeke sara tënë na kota go na devant ti aturugu ti lo,+ ndali ti so ala yeke gbani na yâ ti camp ti lo.+

Zo so asara ye alingbi na tënë ti Nzapa ayeke zo ti ngangu.

Lâ ti Jéhovah ayeke kota mingi nga amû mbeto mingi.+

Zo wa la akpa ti gbu lê ni zo wa?”+

12 Jéhovah atene: “Même fafadeso, ala kiri na mbi na bê ti ala kue,+

na lege ti mungo jeûne,+ toto nga na dekongo ti vundu.

13 Ala suru yâ ti bê ti ala,+ me ala suru bongo ti ala pëpe,+

ala kiri na Jéhovah Nzapa ti ala,

ndali ti so lo yeke Nzapa so ayeke bâ mawa ti zo,* lo yeke sara nzoni bê na zo, lo yeke sara ngonzo hio hio pëpe+ nga lo si singo na tâ ndoye,+

tongaso si lo bâ wala lo lingbi ti zia lege ti* ye ti vundu so lo ye ti ga na ni.

14 Zo wa la ahinga zo wa? Ngonzo ti lo alingbi ti dë, na lo zia lege ti* ye so lo ye ti sara,+

nga lo iri tënë nzoni na ndö ti ala,

tongaso si ala mû sandaga ti lê ti kobe nga na sandaga ti sämba na Jéhovah Nzapa ti ala.

15 Ala hûru didi na Sion!

Ala to mbela* ti tene azo amû jeûne; ala iri azo ti sara bungbi.+

16 Ala bungbi azo ni; ala sara si azo kue so abungbi aga nzoni-kue.+

Ala bungbi ambakoro-koli;* ala bungbi amolenge nga na abébé so angbâ ti nyon me.+

Zia koli so amû wali fini fini asigi na yâ ti chambre ti lo, na wali so amû koli fini fini asigi na yâ ti chambre ti lo.

17 Na popo ti véranda nga na gbalaka ni,+

zia aprêtre, awakua ti Jéhovah, atoto, atene:

‘Aï, Jéhovah, bâ mawa ti azo ti mo.

Sara pëpe si azo ti mo aga mbeni ye ti he,

na lege so mo zia amara akomande na ndö ti ala.

Ngbanga ti nyen ti tene azo atene: “Nzapa ti ala ni ayeke na ndo wa?”’+

18 Tënë ti kodro ti Jéhovah ayeke gbu ande bê ti lo mingi,

na lo yeke bâ mawa ti azo ti lo.+

19 Jéhovah ayeke kiri tënë na azo ti lo, atene:

‘Mbi yeke mû ande na ala lê ti kobe, fini vin nga na mafuta,

na yâ ti ala ayeke si ande nzoni.+

Mbi yeke zia encore ape si ala ga ye ti he na popo ti amara.+

20 Mbi yeke pusu azo ti mbage ti nord yongoro na terê ti ala.

Mbi yeke sara si yâ ti azo ni akangbi kirikiri na yâ ti ndo so ahule ngangu na abuba kue.

Aturugu ti ala so ahon kozo ti bata ndo ayeke kpe ti gue na mbage ti ngu-ingo ti est.*

Aturugu ti ala so ayeke bata ndo na mbage ti peko ayeke kpe ti gue na mbage ti ngu-ingo ti ouest.*

Mbeni sioni fungo ti ye ayeke londo na terê ti ala ti monté na nduzu,

na fungo ye ni so ayeke ngbâ ti monté,+

ndali ti so Nzapa ayeke sara ande akota ye.’

21 Kodro, mo sara mbeto pëpe.

Duti na ngia nga zia terê ti mo anzere mingi, ndali ti so Jéhovah ayeke sara akota ye.

22 Anyama ti ngonda, ala sara mbeto pëpe,

ndali ti so fini pere ayeke duti mingi na ando ti tengo pere so ayeke na yâ ti benyama,+

nga akeke ayeke lë;+

akeke ti figue nga na ti vigne ayeke lë mingi.+

23 Ala amolenge ti Sion, ala duti na ngia nga zia terê ti ala anzere mingi ndali ti Jéhovah Nzapa ti ala,+

ndali ti so lo yeke sara si kozo ngu-nzapa apika alingbi na ni,

nga lo yeke sara si ngu-nzapa apika kota na yâ ti kodro ti ala.

Kozo ngu-nzapa nga na tanga ti ngu-nzapa ayeke pika tongana ti kozo.+

24 Ando ti pikango lê ti kobe ayeke si singo na anzoni lê ti kobe,

nga ando ti sarango vin nga ando ti sarango mafuta ayeke si singo na fini vin nga na mafuta.+

25 Mbi yeke kanga dû ti ye so asi na ala na yâ ti angu mingi so na yâ ni,

agbadora so ayeke huru hurungo, ala so ayeke hara harango, ala so ayeke te ye mingi nga na ala so ayeke te aye kue ate alê ti kobe ti ala.

Ala yeke gbâ ti aturugu ti mbi so mbi tokua ala lani na popo ti ala.+

26 Nyen na nyen, azo ti mbi ayeke te ye yâ ti ala asi,+

nga ala yeke sepela iri ti Jéhovah Nzapa ti ala,+

lo so asara aye ti kpene ndali ti ala.

A yeke zia kamene na lê ti azo ti mbi encore ape.+

27 Ala yeke hinga ande so mbi yeke na popo ti ala, azo ti Israël,+

nga ala yeke hinga so mbi yeke Jéhovah Nzapa ti ala,+ mbeni Nzapa nde ayeke dä pëpe.

A yeke zia kamene na lê ti azo ti mbi encore ape.

28 Na pekoni, mbi yeke tuku yingo ti mbi+ na ndö ti mara ti azo nde nde kue,

na amolenge ti ala ti koli na ti wali ayeke tene prophétie.

Ambakoro ti ala ti koli ayeke bâ abango li,

nga amaseka ti ala ti koli ayeke bâ avision.+

29 Même angbâa ti mbi ti koli na ti wali,

mbi yeke tuku yingo ti mbi na ndö ti ala na ngoi ni so.

30 Mbi yeke sara aye ti kpene na yayu nga na ndö ti sese,

Mênë, wâ nga na guru so ayo yongo na nduzu ayeke duti ande dä.+

31 Lâ ayeke gbian ande ti ga bingo na nze ayeke gbian ti ga mênë+

kozo si kota lâ ti Jéhovah so amû mbeto mingi asi.+

32 A yeke sö ande zo kue so adi iri ti Jéhovah.+

Na ndö ti Hoto ti Sion nga na Jérusalem, a yeke wara ande azo so asö kuâ,+ tâ gï tongana ti so Jéhovah atene;

azo so asö kua so ayeke ala so Jéhovah airi ala.”

3 “Na yâ ti alango ni so nga na ngoi ni so,

tongana mbi kiri na azo ti Juda na ti Jérusalem so a gue na ala na ngbâa,+

 2 mbi yeke bungbi nga amara kue ndo oko,

na mbi yeke descend na ala na yâ ti Popo-hoto* ti Josaphat.*

Kâ, mbi yeke gue na ala na gbele ngbanga+

ndali ti azo ti Israël so ayeke ye ti mbi.

Ala kangbi yâ ti azo ti mbi kirikiri na popo ti amara,

na ala kangbi yâ ti kodro ti mbi na popo ti ala wani.+

 3 Ala sara mbeni ye ti kangbi yâ ti azo ti mbi na popo ti ala;+

ala kä amolenge ti koli ti wara ye ti futa na wali-ndumba,

na ala kä amolenge-wali ti wara na vin ti nyon.

 4 Tyr, Sidon nga na akodro kue ti aPhilistin,

nyen la ala ye na terê ti mbi nyen?

Mbi sara mbeni ye na ala si ala ye ti kiri na ni na mbi so?

Tongana a yeke tongaso,

hio mbi yeke kiri na ni na li ti ala.+

 5 Ala mû argent nga na lor ti mbi,+

na ala gue na apendere mosoro ti mbi na yâ ti atemple ti ala.

 6 Ala kä azo ti Juda na ti Jérusalem na azo ti Grèce,+

si ala gue yongoro na kodro ti ala.

7 Fadeso, mbi yeke sara si azo ni alondo na ndo so ala kä ala dä so ti ga,+

na ye so ala sara na azo ni so, mbi yeke kiri na ni na li ti ala.

 8 Mbi yeke kä amolenge ti ala ti koli na ti wali na azo ti Juda,+

na ala yeke kä amolenge ni na azo ti Shéba, mbeni kodro so lege ni ayo mingi;

ndali ti so mbi Jéhovah la mbi sara tënë ni so.

 9 Ala to mbela so na popo ti amara,+ ala tene:

‘Ala leke terê ti ala ti sara bira! Ala sara si angangu koli alondo!

Zia aturugu kue apusu nduru, zia ala gue na devant!+

10 Ala pika akpoka ti charrue ti ala si aga a-épée nga ala pika azembe ti ala ti fango na amaboko ti keke si aga alikongo.

Zia zo so awoko atene: “Mbi yeke ngangu mingi.”

11 Amara kue so angoro ala, ala bungbi ndo oko,+ na ala ga ala mû maboko!’”

Jéhovah, descend na azo ti mo so ayeke ngangu mingi* na ndo ni so.

12 “Zia azo ti amara alondo aga na yâ ti Popo-hoto* ti Josaphat,

ndali ti so kâ la mbi yeke duti ti fâ ngbanga na ndö ti amara kue so angoro ala.+

13 Ala sara kua na zembe, ndali ti so lê ti kobe abe awe.

Ala descend ala dö yâ ti alê ti vigne, ndali ti so ndo ti sarango vin asi na vin.+

Aye ti batango vin asi singo na vin, ndali ti so sioni ti amara ahon ndö ni.

14 Gbâ ti azo ayeke na yâ ti popo-hoto* ti fango ngbanga.

Lâ ti tene Jéhovah afâ ngbanga na yâ ti popo-hoto* ti fango ngbanga aga nduru awe.+

15 Lâ na nze ayeke vuko,

na atongoro ayeke za encore ape.

16 Na Sion, Jéhovah ayeke dekongo tongana bamara;

lo yeke sara si go ti lo atoto ngangu na Jérusalem.

Yayu na sese ayeke yengi.

Me Jéhovah ayeke duti ande ndo ti batango terê ndali ti azo ti lo,+

mbeni ngangu gbagba ndali ti azo ti Israël.

17 Ala yeke hinga so mbi yeke Jéhovah Nzapa ti ala so aduti na Sion, hoto ti mbi so ayeke nzoni-kue.+

Jérusalem ayeke ga ndo so ayeke nzoni-kue,+

na awande ayeke hon na yâ ni encore ape.+

18 Na ngoi ni so, vin so anzere ayeke yuru na terê ti ahoto,+

lait ayeke sua na ndö ti akete hoto

nga angu kue so ayeke na Juda ayeke sua.

Ngu ayeke londo na li ti ngu so ayeke na yâ ti da ti Jéhovah ti sua,+

na ngu ni ayeke sua ti gue na yâ ti Popo-hoto* ti akeke ti acacia.

19 Me azo ayeke sara kodro na Égypte encore ape,+

nga Édom ayeke ga mbeni benyama so zo ayeke dä pëpe,+

ndali ti aye ti ngangu so a sara na azo ti Juda.+

Na yâ ti kodro ti ala, azo atuku mênë ti azo so tënë ayeke na li ti ala pëpe.+

20 Me azo ayeke sara kodro lakue na sese ti Juda,

nga, na yâ ti angoi kue so ayeke ga, azo ayeke sara kodro na Jérusalem.+

21 Mbi yeke zi ngbanga ti mênë so ayeke na li ti ala ândö;+

na Jéhovah ayeke duti ande na Sion.”+

Ndani aye ti tene “Jéhovah ayeke Nzapa.”

Wala “ti sese.”

Na Hébreu, a sara kua na atënë osio ti sara tënë ti mara ti gbadora oko na oko.

Wala “maseka-wali.”

Wala “koli ti lo.”

Na Hébreu: “ala kanga ceinture na yâ ti ala.”

Wala “pika ndö ti kate ti ala.”

Na Hébreu: “Ala zia mbeni lango nde.”

A lingbi nga ti tene “Ahulengo lê ti figue.”

Wala “ti sese.”

Wala “Nzapa ti grâce.”

Wala “ti regretté.”

Wala “lo regretté.”

Na Hébreu: “Ala zia mbeni lango nde.”

Wala “a-ancien.”

So ti tene Mer Morte.

So ti tene Kota ngu ti Méditerranée.

Wala “Kpangbala ndo.”

Ndani aye ti tene “Jéhovah ayeke Juge.”

Wala “angangu turugu ti mo.”

Wala “Kpangbala ndo.”

Wala “kpangbala ndo.”

Wala “kpangbala ndo.”

Bâ na kete bakari.

    Ambeti na Sango (1997-2025)
    Sigi
    Linda
    • Sango
    • Kangbi ni na mbeni zo
    • Aye so mo ye
    • Copyright © 2025 Watch Tower Bible and Tract Society of Pennsylvania
    • Lege ti sara kua na ni
    • Ye so a yeke sara na asango so mo mû
    • Paramètres de confidentialité
    • JW.ORG
    • Linda
    Kangbi ni na mbeni zo