Chapitre 6

Molenge ti zendo

AHON TI kiri na Nazareth, Joseph na Marie angba na Bethléhem. Tongana Jésus awara lango miombe, ala fa lo na nganza, a lingbi na ndia so Nzapa amu ando na Moïse. Biani, na lege ti salango ye ti azo, amu na akete molenge ti koli iri ti ala na lango miombe ni nga. Tongaso ala hiri molenge ti ala Jésus tongana ti so ange Gabriel afa na ala kozoni.

Nze oko ahon awe, na Jésus fadeso ayeke na lango bale osio. Fadeso baba na mama ti lo ayeke gue na lo na ndo wa? Na temple na Jérusalem so ayo gi kete na ndo so ala lango da. Na lege ti ndia so Nzapa amu ando na Moïse, lango bale osio na peko ti so lo du molenge ti koli, a lingbi mama ni ague na temple ti tene lo mu sadaka si lo ga nzoni.

Marie asala tongaso. Sadaka ti lo ayeke akete ndeke use. Ye so afa na e biani so Joseph na Marie ayeke na nginza mingi pepee. Taa tene, ndia ti Moïse ahunda ti tene amu na sadaka mbeni molenge koli ti ngasangbaga, so biani ngere ni ayeke ngangu mingi ahon ngere ti andeke. Ye oko, tongana mama alingbi ti vo ye tongaso pepee, lo lingbi ti mu akete ndeke use wala apigeon use na place ni.

Na ya ti temple mbeni mbakoro koli, so iri ti lo ayeke Siméon, amu Jésus na ya maboko ti lo. Nzapa afa ando na lo so lo yeke kui pepee kozoni si lo baa Christ, wala Messie, ti zendo ti Jéhovah. Tongana Siméon asi na temple na la ni so, yingo ti nzoni kue ague na lo na molenge so Joseph na Marie ayo lo.

Tongana lo gbu Jésus, Siméon akiri singila na Nzapa, lo tene: “Fadeso, Gbia Seigneur, zia ngbaa ti mo ague na siriri, lege-oko tongana mo tene; teti le ti mbi abaa awe salut so mo leke na gbele azo kue ti ga lumière so afa ye na amara na ti ga gloire ti azo ti mo Israël.”

Be ti Joseph na Marie ado tongana ala ma tene so. Na pekoni Siméon ahiri nzoni tene na ndo ala na lo tene na Marie so molenge koli ti lo “adiko lo teti tingo na londongo ti azo mingi na Israël” na so vundu, lege-oko tongana épée so yanga ni aza, ayeke kpo ande âme ti lo Marie.

Anne so ayeke prophète ti wali, lo so ayeke na ngu 84, ayeke da nga. Taa tene, lo yeke lakue na ya temple ni. Na taa ngoi ni so lo ga ndulu na lo tonda ti kiri singila na Nzapa na ti sala tene ti Jésus na ala kue so aye ti ma lo.

Joseph na Marie ayeke na kota ngia ngbanga ti ye so asi na ala na ya ti temple! Biani, ye so kue afa na ala so molenge ni ayeke Zo ti Zendo ti Nzapa. Luc 2:21-38; Lévitique 12:1-8.

▪ Na lege ti salango ye ti azo, lawa akete molenge ti koli ti Israël awara iri ti ala?

▪ Ye nyen mbeni mama so ayeke Israélite alingbi ti sala tongana molenge ti koli ti lo ayeke na lango bale osio? Tongana nyen salango ye ti Marie na ngoi ni so asala tene na e na ndo ti mosoro ti lo?

▪ Azo wa ahinga Jésus na ngoi ni so, ala fa ni na gigi tongana nyen?