Chapitre  66

Na matanga ti Akpangba

IRI TI Jésus awu na ya ngu ota na peko ti batême ti lo. Azo mingi abaa na le ti ala aye ti kpene so lo sala, na tene ti kusala ti lo akangbi na ya kodoro ni kue. Fadeso, tongana azo abungbi teti matanga ti Akpangba na Jérusalem, ala gi lo ka. Ala ye ti hinga: “Lo yeke na ndo wa?”

Azo apapa na popo ti ala tene ti Jésus. Ambeni zo atene: “Lo yeke zo ti nzoni.” Me ambeni zo nde atene: “Tongaso pepee, lo fa lege ti kirikiri na azo mingi.” Azo ayeke sala mara ti tene tongaso mingi na akozo lango ti matanga ni. Me mbeni zo oko ayeke na ngangu pepee ti mu mbage ti Jésus na le ti azo kue. A yeke ngbanga ti so mbito ti amokonzi ti aJuif asala azo ni.

Tongana ndambo ti matanga ni ahunzi awe, Jésus asi. Lo gue na ya temple, na ndo so be ti azo ado ti ma lege so lo fa ye na ala. Teti so Jésus amanda ye la oko pepee na ya alikolo ti arabbi, aJuif ahunda na be ti ala: “Na lege nyen zo so ahinga mbeti teti lo manda mbeti giriri pepee?”

Jésus afa nda ti tene ni na ala: “Tene so mbi fa na i ayeke ti mbi pepee, me a yeke ti lo so ato mbi. Tongana mbeni zo aye ti sala ye so Nzapa aye, fade zo so ahinga tongana tene ni ayeke ti Nzapa, wala tongana mbi sala tene ti mbi mveni.” Fango ye ti Jésus aduti ndulu na ndia ti Nzapa. Tongaso, azo alingbi ti baa mbilimbili so lo gi lege ti mu gloire na Nzapa, na lo mveni pepee. Jésus ahunda na ala: “Moïse amu Ndia na i giriri pepee?” Ti zingo na ala, lo tene: “Mbeni zo ti i abata Ndia ni pepee.”

Na pekoni, Jésus ahunda: “Teti nyen i gi lege ti fa mbi?”

Azo so ama tene ti lo, peut-être agene so aga na matanga ni, ahinga pepee so ambeni zo agi lege ti fa lo. Na le ti ala, zo oko alingbi ti gi lege ti fa mbeni kota maître tongaso pepee. Tongaso ala tene li ti Jésus ayeke nzoni pepee teti lo tene mara ti tene tongaso. Ala tene na lo: “Mo yeke na yingo sioni. Zo nyen agi lege ti fa mo?”

Amokonzi ti aJuif aye ti fa Jésus, kamême so azo mingi mingi so aga ahinga ni pepee. Tongana Jésus alungula kobela ti mbeni koli na la ti Sabbat, ngu oko na nze omene kozoni, amokonzi agi lege ti fa lo. Fadeso Jésus afa na gigi so ala sala ye na lege ni pepee tongana lo hunda na ala: “Tongana a fa zo na nganza na la ti sabbat, si i lingbi bata ndia ti Moïse, ngonzo agbu i na tele ti mbi? teti mbi sala si tele ti mbeni zo aga nzoni na la ti sabbat. A lingbi i fa ngbanga pepee na lege ti ye so le abaa, me a lingbi i fa ngbanga mbilimbili.”

Awakodoro ti Jérusalem, so ahinga ye so asi, atene fadeso: “So ayeke lo so ala gi lege ti fa lo pepee? Baa, lo yeke sala tene na kamela pepee na gbele azo kue, na ala sala tene na lo oko pepee. Amokonzi ti e ahinga biani lo so ayeke Christ?” Azo ti gbata ti Jérusalem ahinga ngbanga ti nyen ala ma na be pepee so Jésus ayeke Christ: “E hinga ndo so zo so alondo da; me tongana Christ asi, fade mbeni zo ahinga ndo so lo londo da pepee.”

Jésus akiri tene na ala: “I hinga mbi, na i hinga ndo so mbi londo da. Mbi ga na be ti mbi mveni pepee, me lo so ato mbi, lo yeke taa Nzapa, lo so i hinga lo pepee. Mbi hinga lo, teti mbi londo na tele ti lo, na lo to mbi.” Fadeso ala gi lege ti gbu lo, peut-être ti bi lo na da ti kanga wala ti fa lo. Me mbeni zo azia maboko ti lo na ndo lo pepee, teti ngoi ti lo ti kui ade asi pepee.

Me azo mingi ama na be na Jésus, na ye so ala sala ayeke na lege ni. Lo tambela na le ti ngu, lo kanga lege na pupu, lo sala si ngu ti ingo so asuku akai, na lege ti ye ti kpene lo sala si ambeni kete mapa na susu aga kobe teti azo saki mingi, lo lungula kobela ti azo, lo sala si azo so gere ti ala abuba aga nzoni, lo zi le ti awaziba, lo lungula kobela ti buruma, na même lo kiri akua na fini. Tongaso ala hunda: “Tongana Christ asi, fade lo sala fa ahon fa so zo so asala?”

Tongana aFarizien ama azo mingi so adema tele tongaso, ala na akota prêtre ato ambeni capita ti gbu Jésus. Jean 7:11-32.

▪ Jésus asi na matanga ni la nyen? Azo atene nyen na ndo ti lo?

▪ Ngbanga ti nyen ambeni zo atene Jésus ayeke na yingo sioni?

▪ Awakodoro ti Jérusalem abaa Jésus tongana nyen?

▪ Ngbanga ti nyen azo mingi ama na be na Jésus?