Chapitre 104
Azo ama yanga ti Nzapa asala tene teti fani ota ni
NA YA temple, vundu asala Jésus teti kui so aku lo. Lo bi be ti lo mingi na ye so kui ti lo ayeke sala na ndo iri ti Baba ti lo. Ni laa, lo sambela tongaso: “Baba, mu gloire na iri ti mo.”
Tongana lo sala tene so awe, mbeni yanga asala tene na ngangu na yayu, a tene: “Mbi mu gloire na ni awe, na fade mbi kiri mbi mu gloire na ni.”
Azo mingi so ayeke ka ahinga ye so asi pepee. Ambeni atene: “Mbeni ange asala tene na lo.” Ambeni zo atene bekpa asumba. Me, biani, a yeke Jéhovah Nzapa so asala tene awe! A yeke kozo ngoi pepee so azo ama yanga ti lo tongana lo sala tene ti Jésus.
A sala fadeso ngu ota na ndambo awe, na la ni so Jésus akamata batême, Jean Wabatizengo zo ama go ti Nzapa so asala tene ti Jésus tongaso: “So ayeke Molenge ti mbi, so mbi ndoyee lo mingi, lo mu ngia na mbi mingi.” Na pekoni, ngoi kete na peko ti Pâque so ahon awe, Jacques, Jean na Pierre ama yanga ti Nzapa tongana Jésus agbian tele ti lo na gbele ala, lo tene: “So ayeke Molenge ti mbi, so mbi ndoyee lo mingi, lo mu ngia na mbi; i ma lo.” Na fadeso, teti fani ota ni, na lango 10 ti Nisan, lango osio kozoni si Jésus akui, azo akiri ama yanga ti Nzapa. Fadeso Jéhovah asala tene si azo mingi mingi ama tene ti lo!
Jésus afa ndani: “Yanga so asala tene teti mbi pepee, me teti i.” Yanga so afa na gigi biani so Jésus ayeke Molenge ti Nzapa, Messie so asala tene ti lo kozoni. Jésus akiri atene: “Ngbanga ti sese so ayeke fadeso, fade a bi mokonzi ti sese so na gigi.” Biani, lege so Jésus aduti be-taa-zo na ya fini ti lo afa na gigi so a yeke nzoni ti “bi na gigi”, wala ti fa, Satan Diable, lo so ayeke mokonzi ti sese so.
Jésus afa na gigi ye so ayeke si ande na lege ti kua ti lo, lo tene: “Na mbi, tongana ala kanga mbi na nduzu, fade mbi hiri mara ti azo kue na mbi.” Kui ti lo ayeke ngba senge pepee, teti na lege ti kui so, fade lo hiri azo ti ga na lo si ala lingbi wara fini ti lakue lakue.
Me azo mingi so ake, ala tene: “E ma so Ndia atene Christ angba lakue lakue. Teti nyen mo tene, a lingbi ala kanga Molenge ti zo na nduzu? Molenge ti zo ayeke zo nyen?”
Kamême so afa ayeke mingi, na mbeni oko ayeke ti ma yanga ti Nzapa mveni so asala tene, ambeni zo mingi ake ti ma na be so Jésus ayeke biani Molenge ti zo, Messie so asala tene ti lo kozoni. Me, lege-oko tongana lo sala nze omene kozoni na matanga ti Akpangba, Jésus akiri ahaka tele ti lo na “lumière” na lo mu wango so na azo so ama lo: “Tongana lumière ayeke na i, i ma na be na lumière, si i ga amolenge ti lumière.” Tongana Jésus asala tene so na ala awe, lo hon, lo honde tele ti lo teti azo agi lege ti fa lo.
A-Juif ama na be na Jésus pepee, na tongaso ala sala si tene ti Esaïe aga taa tene, lo tene ‘le ti azo so akanga, na be ti ala akpengba, si ala sanzé lege ti ala pepee si Nzapa alungula kobela ti ala’. Esaïe abaa na suma asedu ti Jéhovah na yayu, lo baa nga Jésus na tele ti Jéhovah na gloire so lo yeke na ni kozoni si lo ga na sese. Kamême na ye so kue, aJuif, alingbi na tene so Esaïe asu na mbeti kozoni, asala kpengba li ti ke afa so Jésus ayeke Zo ti songo ala so asala tene ti lo kozoni.
Nde na ala, ambeni mokonzi mingi (amembre ti Sanhédrin, kota da ngbanga ti aJuif) ama na be na Jésus. Nicodème na Joseph ti Arimathée ayeke use ti amokonzi so. Me amokonzi so afa na gigi pepee so ala ma na be na Jésus na ngoi ni so, mbito asala ala so fade alungula ala na kota ndo ti ala na ya synagogue. Azo tongaso aglisa anzoye mingi!
Jésus akiri atene: “Zo so ama na be na mbi, lo ma na be gi na mbi pepee, me lo ma na be nga na lo so ato mbi; na lo so abaa mbi abaa nga lo so ato mbi. (...) Tongana mbeni zo ama tene ti mbi na lo bata tene ni pepee, mbi fa ngbanga na li ti lo pepee; teti mbi ga ti fa ngbanga ti sese so pepee, me ti so sese so. (...) Tene so mbi tene, fade tene ni so afa ngbanga na li ti lo na la ti ndani.”
Ndoyee so Jéhovah ayeke na ni teti sese ti azo apusu lo ti to Jésus si azo so ama na be na lo alingbi ti wara fini. Fade zo ayeke wara fini gi tongana lo sala ye alingbi na tene so Nzapa amu na Jésus ti fa. Fade a fa ngbanga na “la ti ndani”, na la ti Komandema ti Ngu Saki Oko ti Christ.
Jésus akonda ti tene ni tongaso: “Mbi sala tene ti be ti mbi mveni pepee, me Baba so ato mbi, lo mu komandema na mbi, tene ti ye so lo ye mbi tene, na tene ti ye so lo ye mbi fa na azo. Na mbi hinga komandema ti lo ayeke fini ti lakue lakue. Tongaso tene so mbi tene ayeke tene so Baba afa na mbi ti tene.” Jean 12:28-50; 19:38, 39; Matthieu 3:17; 17:5; Esaïe 6:1, 8-10.
▪ Na ngoi ota wa azo ama yanga ti Nzapa so asala tene ti Jésus?
▪ Na lege wa prophète Esaïe abaa gloire ti Jésus?
▪ Amokonzi wa ama na be na Jésus? Me ngbanga ti nyen ala sala tene ni na gigi pepee?
▪ “La ti ndani” ayeke nyen? Fade afa ngbanga ti azo na lege ti nyen?