Chapitre 127
A lu lo na vendredi—du-kua aduti senge na dimanche
FADESO peko ti bikombite ti vendredi aga ndulu ti hunzi, na tongana la alinda sabbat ti lango 15 ti Nisan ayeke tondani. Tele ti Jésus so akui awe angba na ndo keke, me azo ti nzi use so ayeke na tele ni ade ti kui pepee. A hiri peko ti bikombite ti vendredi, La ti Leke Ye, teti a yeke na ngoi ni so si azo aleke kobe na ahunzi mbeni kusala so alingbi ti ku pepee juska na peko ti la ti sabbat.
La ti sabbat so ayeke tondani fade fade ayeke gi mbeni la ti senge sabbat pepee (wala la mbasambala ni ti yenga ni), a yeke nga mbeni “kota” sabbat. A di iri ni tongaso teti lango 15 ti Nisan, so ayeke kozo lango ti lango mbasambala ti matanga ti Amapa so mama ni ayeke da pepee (na so ayeke lakue mbeni sabbat na lango kue so ati na ni na ya yenga ni) atingbi na la ti sabbat ti yenga oko oko.
Ndia ti Nzapa afa so kua ti zo alingbi pepee ti lango na ndo ti keke na bi. Ni laa aJuif ahunda na Pilate ti kungbi ya ti gere ti azo ni so afa ala na ndo keke si ala kui hio. A yeke ye so aturugu asala, ala kungbi ya ti gere ti azo ti nzi use so, me ala sala tongaso na Jésus pepee teti ala baa so lo kui awe. Ye so asala si tene so ti Nzapa aga taa tene: “Fade oko ti abio ti lo akungbi pepee.”
Ye oko, ti hinga biani so Jésus akui, mbeni oko ti aturugu ni ayoro likongo na ya kate ti lo. Likongo ni ali juska na be ti lo, na fade fade mene na ngu asigigi. Bazengele Jean, so abaa ye so kue, atene ye so asala si mbeni tene ti Nzapa aga taa tene: “Fade ala baa ndo na mbage ti Lo so ala kpo Lo.”
Joseph, ti kodoro ti Arimathée, mbeni oko ti Sanhédrin so azo aye lo mingi, aduti da nga na ngoi ti fango Jésus. Lo ke ti lo ti yeda na tene ti kota ndo ti fango ngbanga na ti fa ngbanga ti kirikiri na ndo Jésus. Joseph ayeke biani oko ti adisciple ti Jésus, ataa so lo yeke na mbito ti fa tele ti lo tongaso. Fadeso, na mbito pepee, lo gue na Pilate ti hunda ti mu kua ti Jésus. Pilate ahiri kozoni turugu ti kota kamba so abaa lege ti fango Jésus, na tongana turugu ni ayeda so Jésus akui biani, Pilate amu kua ni na Joseph.
Joseph akamata kua ni na lo leke ni nzoni na ya lin so avulu pendere ti gue ti lu lo. Nicodème, so ayeke oko nga ti Sanhèdrin, amu maboko na lo ti sala ni. Nicodème afa mabe ti lo na gigi nga pepee teti lo yeke na mbito ti glisa ndo ti lo. Me lo ga fadeso na kilo bale ota na ota ti myrrhe na ti aloès so ayeke aye ti ngere ngangu. Lege-oko tongana aJuif asala na lekengo kua ti ala kozo ti lu, angoro kua ti Jésus na abongo so azia yombo da.
Na pekoni ague azia kua ni na mbeni fini du-kua ti Joseph, so asala ni na ya tene so ayeke na mbeni yaka so ayeke ndulu. Ti hunzingo na ni, amu mbeni kota tene ti kanga yanga ni. A leke kua ni gi na loro si ala lu ni kozoni si la ti sabbat atondani. Tongaso Marie Madeleine na Marie, mama ti Jacques ti Kete ni, so amu mbage ti ala nga na lekengo kua ni, akiri na kodoro hio ti leke épice na mafuta ti yombo nde nde ti zia na ndoni. Ala leke na be ti ala ti kiri na peko ti la ti sabbat ti leke kua ti Jésus nzoni si alingbi ti bata ni aninga.
Ndade, so ayeke samedi (la ti sabbat), akota prêtre nga na aFarizien ague na Pilate na ala tene na lo: “Seigneur, e dabe e so na ngoi so lo ngba na fini, zo ti handa so atene: ‘Na peko ti lango ota fade ayaa mbi na nduzu.’ Tongaso a lingbi mo mu yanga si abata du-kua so ngangu juska ti si na lango ota ni, si adisciple ti lo ague anzi lo pepee ti tene na pekoni na azo: ‘A yaa lo awe na popo ti awakinda!’ Na fade tene ti kirikiri ti ndani ayeke sioni ahon ti kozoni.”
Pilate atene na ala: “I yeke na zo ti bata ye. I gue i kanga du-kua ni ngangu, alingbi na le ti i.” Tongaso ala gue ti baa du-kua ni nzoni na lege ti kangango tene ti yanga ni na ti zia ambeni turugu ti Rome ti bata ni.
Dimanche na kota na ndapelele, Marie Madeleine na Marie, mama ti Jacques, nga na Salomé, Jeanne na ambeni awali, aga na épice ti zia na tele ti kua ti Jésus. Na lege ala yeke tene na popo ti ala: “Fade zo wa alungula tene ti yanga ti du-kua so na e?” Me tongana ala si na du-kua ni, ala baa so sese ayengi awe na ange ti Jéhovah azi tene ni. Aturugu ti bata du-kua ni ague awe na ya ni ayeke senge! Matthieu 27:57–28:2; Marc 15:42–16:4; Luc 23:50–24:3, 10; Jean 19:14, 31–20:1; 12:42; Lévitique 23:5-7; Deutéronome 21:22, 23; Psaume 34:20 [34:21 sango]; Zacharie 12:10.
▪ Ngbanga ti nyen ahiri vendredi giriri La ti Leke Ye? Na tene so atene “kota” sabbat aye ti tene nyen?
▪ Atene wa ti Mbeti ti Nzapa aga taa tene na ndo kua ti Jésus?
▪ Joseph na Nicodème amu mbage ti ala na ye wa na lungo kua ti Jésus? Na ye nyen atingbi ala na Jésus?
▪ Aprêtre ahunda nyen na Pilate? Na lo kiri tene wa na ala?
▪ Na kota na ndapelele ti dimanche ye nyen asi?