Sese so ayeke gue na ndo wa?
Akpale ti ngangu na aye so amû vundu mingi na zo ayeke aye so amû ndo lê sese kue! A ye ti fa nyen?
TËNË TI NZONI DUTI TI ZO OKO OKO: 1) Abombe asungba na yâ agara. 2) A pika ngombe na ndo amaître na a-élève na yâ ekole. 3) A nzi amolenge a hon na ni na ngoi so lê ti ababâ na mama ti ala ayeke na mbeni ndo nde. 4) A gbu awali na ambakoro-koli na ngangu na a nzi aye ti ala na kota lâ.
TËNË TI ALEGE TI VORONGO: 1) A-église ayeke mû maboko na abungbi ti aturugu so ayeke tiri bira na popo ti ala. 2) A bi tënë na li ti amokonzi ti vorongo na tenengo so ala mû mbage na fango azo mingi ti mbeni mara. 3) Aprêtre ayeke lango na akete molenge, na église akanga lê na ndo ni. 4) Wungo ti azo so ayeke ga na église akiri na peko na a yeke kä ada ti église.
AYE SO ANGORO E NA SESE: 1) Agbako so a dë ni kue na sese teti apialo ti dengo buze. 2) Tënë ti ando so gbâ ti akeke ayeke dä me so awanzinga adë ni kue na sese ti wara ye ti tingo na wâ. 3) Angu ti dungu so lê ni abuba awe na zo alingbi ti nyon ni pëpe. 4) Agbagbara ye so andokua ti lekengo aye ayeke bi na yâ ngu-ingo nga na ambeni fini kode so asigigi na ni ti gbu asusu ayeke aye so asala si kusala ti gbungo asusu atï. 5) Pupu so a buba ni mingi na asioni guru asala si zo alingbi ti hu nzoni pëpe.
TËNË TI WARANGO KOBE TI YANGA: 1) Wungo ti nginza kue so mingi ti azo na yâ ambeni kodoro ti Afrika ayeke wara na yâ ngu oko ayeke tâ kete mingi. 2) Tënë na ndo awayinda so bê ti warango ye mingi ti ala asala si ndokua ti dengo buze ti ala atï, na azo saki mingi agirisa kua ti ala. 3) Salango ye na nzi asala si azo agirisa nginza so ala bata fade nde teti angu mingi.
TËNË TI KOTA NZARA: Azo kutu 800 tongaso na ndo sese ayeke lango lâ oko oko na nzara na yâ ti ala.
BIRA: 1) Wungo ti azo ahon kutu 100 agirisa fini ti ala na yâ abira kue so a sala na yâ siècle 20. 2) Wungo ti akota ngombe so azo ayeke na ni alingbi ti futi azo ti sese kue lege mingi na peko ti tele. 3) Abira na popo ti azo ti kodoro oko. 4) Salango ye ti awabingo kpale wala a-terroriste ague na li ni mingi ti mû sese kue.
KOBELA TI FUTI KODORO NA AMBENI KOBELA NDE: 1) Ti londo na ngu 1918, kobela ti Grippe Espagnole afâ lani azo kutu 21. 2) Kobela ti SIDA aga fadeso awe “kobela so afâ azo na amû sese kue ahon tanga ti akobela kue ti mbaï ti azo.” 3) Kobela ti cancer na ti bê aga na vundu na azo na ndo sese kue.
Bâ gi pëpe atënë so oko na oko me gi ti hunda tele ti mo: A yeke aye so asi gi oko oko tongaso na ndo sese, wala a yeke na yâ bungbi ti ambeni ye so ayeke si legeoko na ndo sese kue na so tâ nda ti singo ti ala ayeke dä?
[Encadré/Foto na lembeti 5]
Nzapa abi bê ti lo biani na ndo e?
Azo mingi awara vundu teti aye ti ngangu so ayeke si, aye ti ala so ala girisa ni wala mbeni zo ti ala so akui, na ala yeke hunda tele ti ala ngbanga ti nyen Nzapa asala mbeni ye pëpe ti kanga lege na mara ti aye tongaso.
Nzapa ayeke bi bê ti lo biani na ndo e. Lo leke ye laso ti fa lege nzoni na e, na ti mû dengo bê so alingbi (Matthieu 11:28-30; 2 Timothée 3:16, 17). Lo zia gunda ti ye so ayeke mû lege ti lungula biaku salango ngangu na zo, kobela nga na kui. Aye so lo leke ti sala afa so lo yeke bi bê ti lo gi pëpe na azo ti mbeni mara oko, me na azo ti amara kue, akete mara kue nga na ayanga kue.—Kusala 10:34, 35.
E yeke bi bê ti e nga biani na ndo Nzapa? Mo hinga Zo so asala yayu na sese? Iri ti lo ayeke nyen? Ye nyen lo leke ti sala? Lo mveni lo kiri tënë na ahundango tënë so na yâ ti Bible. Na yâ ni, lo fa na e aye wa lo ngbâ ti leke ti lungula salango ngangu na zo, nga kobela na kui. Ti wara nzoni na yâ aye so, ye nyen a yeke ku na mbage ti e? A hunda ti tene e manda ye na ndo lo nga na aye so lo leke ti sala. Tongana nyen e lingbi ti ku tele ti e ti wara nzoni na yâ aye so lo leke, tongana e mä na bê na lo pëpe? (Jean 3:16; aHébreu 11:6). A yeke nga kota ye mingi ti sala ye alingbi na aye so lo hunda (1 Jean 5:3). Bingo bê ti mo na ndo Nzapa akono alingbi na ni ti pusu mo ti sala tongaso?
Ti hinga biani ngbanga ti nyen Nzapa azia lege na aye ti fadeso ti si, a lingbi e gbu nda ti mbeni kota tënë so abâ gigi lani. Bible afa peko ti kota tënë so. E yeke bâ ande tënë na ndo ni na lembeti 15 ti brochure so.