Nzoni tënë ni alondo biani na Nzapa?

1. Bible ayeke tënë ti yanga ti zo wa?

Nzoni tënë so atene azo ayeke duti ande na fini ti lakue lakue na ndo ti sese ayeke na yâ ti Bible (Psaume 37:29). Na yâ ti Bible a yeke wara akete buku 66. Nzapa asara kusala na akoli 40 tongaso so ayeke be-ta-zo ti sû ni. Moïse la asû akozo oku buku ni. Lo sû ni a sara ngu 3500 tongaso awe. Bazengele Jean la asû ndangba buku ni a sara ngu 1900 na ndo ni awe. Apensé ti zo wa la azo ti sungo Bible asû ni so? Nzapa la asara tënë na azo so asû Bible na lege ti yingo vulu ti lo (2 Samuel 23:2). Azo ni asû gi apensé ti Nzapa me ti ala wani pëpe. Tongaso, Bible alondo na Jéhovah.​—Diko 2 Timothée 3:16; 2 Pierre 1:20, 21.

Bâ vidéo Bible alondo na zo wa?

2. E hinga tongana nyen so Bible atene tâ tënë?

E hinga so Bible ayeke tënë ti yanga ti Nzapa ndali ti so anzene nzene ye so lo fa tënë ni kozoni aga tâ tënë biani. A yeke ye so mbeni zo alingbi ti sara ni pëpe (Josué 23:14). Gi Nzapa ti Ngangu Ahon Kue la alingbi ti fa mbilimbili ye so ayeke si na zo ande.​—Diko Ésaïe 42:9; 46:10.

Tongana mbeni mbeti alondo na Nzapa, a lingbi mbeti ni so aduti ti lo nde. Bible ayeke tongaso. A kangbi ni na azo na ayanga ti kodoro ngbangbo mingi na wungo ni ayeke ngbundangbu mingi. Atâa so a yeke ngbene buku, atënë so Bible atene na ndo ti senda-ye ague oko na aye so senda-ye afa. Nga atënë so azo 40 so asû ni ague gi oko.a Na ndo ni, ye so Bible afa na ndo ti ndoye alingbi gi ti londo na tâ Nzapa, Nzapa ti ndoye. Bible ayeke lakue na ngangu ti changé fini ti azo si aga nzoni. Aye so ague na azo kutu mingi ti yeda so Bible ayeke tënë ti yanga ti Nzapa.​—Diko 1 aThessalonicien 2:13.

Bâ vidéo E hinga tongana nyen so atënë ti Bible ayeke tâ tënë?

3. Bible asara tënë na ndo ti nyen?

Nzoni tënë so Bible aluti na ndo ni ayeke so: na ndoye Nzapa aleke ti sara mbeni ye ndali ti azo. Bible afa tongana nyen gi na tongo nda ti mbaï ti azo, ala girisa pasa so ala yeke na ni ti duti na fini na ndo ti sese so ayeke lani paradis nga a fa tongana nyen sese ayeke kiri ti ga ande paradis.​—Diko Apocalypse 21:4, 5.

Na yâ ti Bible a yeke wara andia nga na awango. Na ndo ni, a yeke wara na yâ ni atapande ti sarango ye ti Nzapa na mbage ti azo. Na lege ti atapande so, e lingbi ti hinga wala Nzapa ayeke tongana nyen. Tongaso, Bible alingbi ti mû maboko na mo ti hinga Nzapa. A fa tongana nyen mo lingbi ti duti na nzoni songo na lo.​—Diko Psaume 19:7, 11; Jacques 2:23; 4:8.

4. Mo lingbi ti sara tongana nyen ti mä yâ ti Bible?

Brochure so ayeke sara kusala na mara kode ti Jésus ti mû maboko na mo ti mä yâ ti Bible. Jésus asara kusala na ambeni tënë nde nde so ayeke na yâ ti Bible ti fa nda ti “Mbeti ti Nzapa.”​—Diko Luc 24:27, 45.

Mbeni pendere tënë ti lingbi na nzoni tënë so alondo na Nzapa ayeke pëpe. Atâa so kue, ambeni zo ayeke sara sanka ni, nga tënë ni ayeke son ambeni zo songo. Zia si bê ti mo anze pëpe. Mo yeke duti na beku ti wara fini ti lakue lakue gi tongana mo hinga Nzapa.​—Diko Jean 17:3.