Jean aye ti mä tënë ti yanga ti Jésus

A sara ngu oko tongaso awe la Jean Baptiste ayeke na da ti kanga. Même lo kue lo mä nga tënë ti amiracle so Jésus asara. Tara ti bâ ngia so Jean ayeke na ni lani tongana adisciple ti lo aga atene na lo so Jésus azingo mbeni molenge-koli ti mbeni wali-mua na gbata ti Naïn. Me, Jean aye ti hinga nda ti aye ni so kue, na lo ye ti mä ni na yanga ti Jésus ni wani. Tongaso, Jean airi adisciple ti lo use ti ga. Lo iri ala ngbanga ti nyen? Ti tokua ala ti gue ti hunda na Jésus tënë so: “Mo yeke Lo so e yeke ku gango ti lo so? Wala a lingbi e ku mbeni zo nde?”—Luc 7:19.

Hundango tënë ni so akpa mbeni ye so zo amä yâ ni ape. Jean ayeke mbeni koli so avoro Nzapa na bê kue. Lo la lo yeke zo so abatize lani Jésus asara ngu use tongaso awe. Lo bâ lani yingo ti Nzapa so adescend na ndo ti Jésus na lo mä go ti Nzapa so ayeda na Jésus. Mbeni ye so amû lege na e ti pensé so Jean ayeke na mabe encore ape tongana ti kozo ayeke dä ape. Tongana a yeke tongaso, ka Jésus ayeke sara nzoni tënë ti Jean ape tongana ti so lo yeke gue ti sara so. Me tongana a yeke kite la Jean ayeke na ni so ape, ngbanga ti nyen la lo hunda mara ti tënë ni so na ndo ti Jésus?

Jean aye ti tene Jésus lo wani la atene na yanga ti lo so ni la ni yeke Messie ni. Ye so ayeke kpengba Jean so angbâ gi na da ti kanga. Me, âmanke mbeni raison ni nde ayeke dä so Jean ahunda ndo ni so. Jean ahinga so aprophétie ti yâ ti Bible afa so Messie ni ayeke ga ande gbia nga sauveur ti azo. Me, anze mingi na peko ti batême ti Jésus, Jean la angbâ na da ti kanga so. Tongaso, Jean aye ti hinga wala mbeni zo nde la ayeke ga ande, na peko ti Jésus, ti sara ande si aprophétie kue so a tene na ndo ti Messie ni aga tâ tënë.

A hon ti tene lo tene na adisciple ti Jean ni lo tene, ‘En mbi la mbi yeke Lo so ala yeke ku gango ti lo so’, Jésus afa na ala polele so ayeke Nzapa la amû na lo ngangu ti sava kobela ti azo nde nde kue. Na pekoni, lo tene na adisciple ni, lo tene: “Ala gue afa na Jean peko ti ye so ala yeke mä na ala yeke bâ so: Awaziba ayeke bâ ndo, azo so gere ti ala abuba ayeke tambela, tere ti azo ti buruma aga nzoni, azo so mê ti ala akanga ayeke mä ndo, a yeke zingo akuâ, na a yeke fa nzoni tënë na awayere.”—Matthieu 11:4, 5.

Peut-être gbe ti tënë ti Jean ni ayeke so, Jésus ayeke sara ande gbâ ti aye ahon ti so lo yeke sara ni fadeso, na peut-être lo yeke zi ande ni Jean ni na da ti kanga. Me, Jésus atokua ndo ti tene a tene na Jean so a lingbi lo ku pëpe ti bâ amiracle mingi ahon ti so ni yeke sara ni fadeso.

Na ngoi so adisciple ti Jean ni ague awe, Jésus afa na azo so Jean ayeke gi pëpe mbeni senge prophète, me lo yeke nga ‘watokua’ ti Jéhovah, tongana ti so prophétie so ayeke na Malachie 3:1 afa ni. Nga tongana ti so Malachie 4:5, 6 afa ni, lo yeke nga Prophète Élie. Jésus afa ndani na ngoi so lo tene: “Ti tâ tënë ni, na popo ti azo so awali adü ala, mbeni so abâ gigi so ayeke kota ahon Jean Baptiste ayeke dä ape. Me zo so ayeke senge zo na yâ ti Royaume ti yayu ayeke kota ahon lo.”—Matthieu 11:11.

Na tenengo so zo so ayeke senge zo na yâ ti Royaume ti yayu ayeke kota ahon Jean, Jésus aye ti fa so Jean ayeke duti ande pëpe na popo ti azo so ayeke komande na yâ ti Royaume na yayu. Jean aleke lani lege na Jésus, me lo kui kozoni si Jésus azi lege na azo ti gue na yayu (aHébreu 10:19, 20). Me, Jean ayeke mbeni prophète be-ta-zo ti Nzapa, na lo yeke duti ande na popo ti azo so ayeke wara fini na ndo ti sese na gbe ti Royaume ti Nzapa.