Royaume ti Nzapa ayeke nyen?

YE SO BIBLE ATENE

“Fade Nzapa ti yayu ayâa royaume so afuti lâ oko pëpe.”​—Daniel 2:44, La Sainte Bible en sango.

“A mû na e mbeni molenge ti koli; gouvernement ayeke duti na ndö ti go ti lo.”—Ésaïe 9:5; kete tënë na gbe ni.

TËNË SO ABÂ MO TONGANA NYEN?

• Mbeni gouvernement ti mbilimbili so mo lingbi ti wara ye ti nzoni dä.​—Ésaïe 48:17, 18.

• Mo yeke duti na nzoni seni nga na ngia na yâ ti fini dunia so ayeke ga.—Apocalypse 21:3, 4.

E LINGBI TI YEDA BIANI NA YE SO BIBLE ATENE?

En, ndali ti ambeni raison use tongaso:

• Jésus afa ye so Royaume ti Nzapa ayeke sara ande. Jésus afa lani na adisciple ti lo ti sambela ti tene Royaume ti Nzapa aga nga ti tene a sara ye so bê ti Nzapa aye na ndö ti sese (Matthieu 6:9, 10). Jésus asara ambeni ye so afa tongana nyen a yeke kiri ande tënë na sambela so.

  Na ngoi so lo yeke lani na ndö ti sese, Jésus amû kobe na azo, lo sava azo ti kobela nga lo zingo akuâ (Matthieu 15:29-38; Jean 11:38-44). Teti so lo yeke ga ande Gbia ti Royaume ti Nzapa, Jésus afa kete yanga ti aye ti nzoni so Royaume ni ayeke sara ande na azo so ayeke duti na gbe ni.​—Apocalypse 11:15.

• Aye so ayeke si na yâ ti dunia so afa so Royaume ti Nzapa aga nduru ti si awe. Jésus atene lani so kozo si Royaume ni aga ti zia siriri na ndö ti sese, fade dunia ni ayeke si singo na atënë ti bira, nzara nga na yengingo ti sese.—Matthieu 24:3, 7.

  A yeke aye so e yeke bâ ni laso. Tongaso e hinga na bê ti e kue so Royaume ti Nzapa aga nduru awe ti hunzi akpale so kue.