POINT 18

Fa ye alingbi na bezoin ti azo so ayeke mä mo

1 aCorinthien 9:19-23

NA NDURU TËNË: Sara si azo so ayeke mä mo agbu li ti ala wani na ndö ti ye so mo yeke fa, tongaso si ala bâ so ala manda mbeni pendere ye.

Bâ ye so azo so ayeke mä mo ahinga ni awe. Fa pëpe gï atënë so ala mä ni kozo awe, me sara si ala bâ so ye so mo yeke fa so aga fini ye na lê ti ala.

Hon hio hio na ndö ti atënë so azo ni ahinga ni awe, me tongana mo yeke fa ambeni fini ye, a yeke nzoni mo gue yeke.
Sara recherche nga gbu li ti mo. Tongana lege ayeke dä, sara tënë na ndö ti aye so azo ahabitué na ni mingi ape wala aye so ayeke si ka ti gboto lê na ndö ti akota tënë ti mo. Gbu li nzoni na ndö ti devoir ti mo ni nga na lege so mo peut ti tingbi ni na aye so mo ye ti sara tënë ni.

Na ngoi so mo yeke gbu li na ndö ti devoir ti mo, hunda terê ti mo na atënë so: ‘Nyen?, ngbanga ti nyen?, lawa?, na ndo wa?, zo wa nga tongana nyen?’ Ti hunda mara ti atënë so nga ti kiri tënë na ni na yâ ti devoir ti mo kue, a yeke sara si devoir ni aduti pendere.
Fa nzoni ti tënë ni. Fa na azo so ayeke mä mo tongana nyen la atënë ti yâ ti Bible alingbi ti aidé ala na yâ ti gigi ti ala ti lâ oko oko. Sara tënë na ndö ti ambeni mbilimbili ye, abango ndo nga na asarango ye so alingbi na azo so ayeke mä mo.