A Ninga Mingi Ahon Lor ti Nzoni Kue
A YEKE gi lor mingi ndali ti pendere ti lo nga dutingo ti lo so aninga. Mingi ti aye so asala si azo aye ni ayeke teti so a ba a tene lo ngbâ lakue na zango ni nga na sioni oko pepe teti lakue lakue. Ye so ayeke ngbanga ti so ngu, oxygène, soufre, nga ndulu na aye kue asala sioni oko pepe na lor. Aye mingi so a leke na lor, so a wara na yâ amangboko so atï na gbe ti ngu nga na ambeni ndo nde angbâ lakue ti bata zango ti ala na peko ti angu ngbango mingi.
Ye oko, a yeke nzoni ti ba so Bible atene so mbeni ye nde ayeke dä so aninga mingi ahon na so “ngele ni ahon ngele ti lor so afuti, kamême a tara lor ni na yâ wâ.” (1 Pierre 1:7) Lor so “a tara” ni, wala so a leke nzoni ahon, na yâ ti wâ nga na lege ti ambeni kode nde alingbi ti sala si wungo ti saleté na yâ ni aduti gi kete kete mingi. Ye oko, atä lor so a leke nzoni ahon ayeke futi, wala ayeke ga ngu, tongana a zia ni na yâ ti mbeni ngu so a bungbi acide chlorhydrique so a haka ni fani ota na acide nitrique so a haka ni fani oko. Tongaso, na lege ti senda-ye, na tenengo so ‘lor afuti’ Bible atene tâ tene.
Nde na so, tâ mabe ti Chrétien ‘abata âme na fini.’ (aHébreu 10:39, NW) Azo alingbi ti fâ mbeni zo so ayeke na kpengba mabe, legeoko tongana ti so ala sala giriri na Jésus Christ. Me a mu zendo so na ala so ayeke na tâ mabe: “Duti be-ta-zo juska na kui, na fade Mbi mu na mo couronne ti fini ti lakue lakue.” (Apocalypse 2:10) Nzapa angbâ lakue ti dabe lo na azo so akui be-ta-zo, na lo yeke zingo ande ala na popo ti awakinda. (Jean 5:28, 29) Mbeni kota wungo ti lor oko pepe alingbi ti sala ye so. Na ndo tene so, mabe ayeke biani na ngele ngangu mingi ahon ngele ti lor. Ye oko, ti tene mabe awara mara ti ngele ngangu ahon tongaso, a lingbi a tara ni nga. Biani, a yeke “tarango ti mabe” so Pierre asala tene ni si ayeke na ngele ngangu ahon ngele ti lor. A-Témoin ti Jéhovah ayeke duti ande na ngia ti mu maboko na mo ti manda Bible ti tene mo kono na mo bata mbeni kpengba mabe na yâ tâ Nzapa, Jéhovah, nga na yâ Molenge ti lo, Jésus Christ. Ye so, na lege ti tene ti Jésus, “ayeke fini ti lakue lakue.”—Jean 17:3, NW.