Azo ti Futingo Akeke
NA YÂ NGOI so a sû na Bible, a yeke ba akeke tongana amosoro ti ngele ngangu. Na tapande, na ngoi so Abraham avo mbeni ndo ti lu na Sara, wali ti lo so lo ndoye mingi, a zia akeke na popo ti molongo ti aye so a sû na yâ ti mbeti ti mango tele ti mungo na lo sese ni.—Genèse 23:15-18.
Legeoko nga laso, a ba akeke na ngele ngangu mingi, na azo mingi na ndo sese kue ayeke bi lê na ndo batango agbako. Buku State of the World 1998 (“Dutingo ti aye na sese na ngu 1998”) atene: “Atä so azo mingi na yâ ti akodoro ti banga ayeke gi bê ti ala na ndo ti agbako so ayeke na yâ akodoro ti ndowa na ngu-nduzu, ala hinga peut-être pepe so agbako ti ando ti dë so ayeke na yâ ti akodoro ti ala mveni ayeke amara ti agbako so yâ ni akangbi mingi ahon tanga ti agbako kue, na so ayeke na akpale mingi ahon.” Ye nyen ayeke sala ngangu na ndo seni ti agbako ti akodoro ti banga ti Poto na ti Amerika ti Banga? Azo mingi atene so a yeke futingo akeke ti agbako si ayeke na lingu ti kpale so; ye oko, ambeni ngangu nde ayeke dä so ayeke futi na mayele akeke oko na oko na peko ti tele, tongana a lingbi tene tongaso. A yeke angangu wa? Asioni yorö so ayeke buba pupu, na angu-nduzu ti acide. Angangu ti futingo ye so alingbi ti woko ngangu ti akeke yeke yeke, na ti sala si akete nyama na kobela afuti ala hio.
Teti angu mingi, azo so amu mbage ti batango ndo so angoro e nga na ambeni zo nde so abi bê na aye so ayeke si na tele ti e agboto lê na ndo nene ti bata amosoro ti ndagigi ti sese. Na yâ ti angu 1980, na pekoni so awandara na Zamani amanda angangu so asioni yorö ti bubango pupu nga na angu-nduzu ti acide ayeke sala na ndo aye so angoro zo, ala tene na nda ni: ‘Tongana a sala mbeni ye pepe, ti si na ngu 2000, fade azo ayeke ba pendere ti agbako gi na ndo ti angbele foto na alimon.’ Ye ti nzoni ni ayeke so ngangu ti sese ti kiri ti lë aye ayeke kota mingi na a sala si juska fadeso lo luti na gbele mingi ti akpale so a sala tene ni kozo.
Ye oko, na nda ni a yeke Nzapa si ayeke sala ande ye mingi ahon ti bata amosoro ti e ti ndagigi. “Na da ti Lo na nduzu, Lo mu ngu na akota hoto” na “Lo sala si pele amaï teti anyama, na Lo sala le-kasa teti zo ti sala ye na ni.” Nga, lo mu zendo “ti futi ala so afuti sese.” (Psaume 104:13, 14; Apocalypse 11:18) So tâ ye ti pendere si a yeke duti ande tongana azo ti sese awara lege ti duti na fini teti lakue lakue na yâ mbeni sese so aye ti bubango amosoro ti ndagigi, ayeke duti dä mbeni pepe!—Psaume 37:9-11.