Ngele Wa A Hunda ti Bata Mbeni Nzo Yingo-ti-hinga?

“AHUNDA Ngorogbia na Ngangu ti Wara Pata 20 000R$.” Kota li ti tënë so ayeke nde mingi asigigi ade ti ninga pëpe na yâ mbeni mbeti-sango ti Brésil Correio do Povo. Article ni asala tënë ti Luiz Alvo de Araújo, mbeni zo ti poste ti kodoro ni, so akä sese ti lo na ngorogbia ti kodoro ni. Na peko ti so, na lege ti mbeti so lo sû maboko dä, lo zia sese ni na ngorogbia ti kodoro ni, bê ti Luiz adö ti bâ so ngorogbia ni afuta na lo pata 20 000R$ (ndulu na 5 600 000 F CFA) na ndo ti nginza so ala mä tele dä!

A yeke lani kete ye pëpe ti kiri na nginza ti ndo ni so. Na peko ti so lo gue fani mingi na andokua ti ngorogbia ni, so lo wara lege pëpe ti tingbi na azo ni, a wa Luiz ti mû mbeni wagbungo koko na ti leke kpale ni na da-ngbanga. Wafango ngbanga ni, so adë ngbanga na li ti ngorogbia ti wara nginza ni na ti futa nginza ti ngbanga, atene: “E lingbi ti tene so mbeni zo aglisa lege, na teti so andokua ti Letäa ahunda aye mingi ti sala, zo oko pëpe ahinga tongana nyen ti leke kpale ni. Ti mbi, a yeke fani oko ni ti bâ mara ti tënë tongaso na gbele ngbanga la.”

Luiz, mbeni Témoin ti Jéhovah, atene: “Yingo-ti-hinga ti mbi so Bible afa lege na ni amû lege na mbi pëpe ti bata ye so ayeke biani ti mbi pëpe. A lingbi mbi gi lege ti kiri na nginza ni.”

Azo mingi ayeke bâ mara ti bango ndo tongaso tongana mbeni ye ti ndima wala même tongana mbeni ye so a yeke ngangu ti gbu nda ni. Me Tënë ti Nzapa afa so atâ Chrétien abâ na nene ni mingi batango mbeni nzo yingo-ti-hinga na yâ asalango ye ti ala na ayanga-ti-komande ti sese. (aRomain 13:5) A-Témoin ti Jéhovah aleke na bê ti ala ti bata mbeni ‘nzo yingo-ti-hinga na ti tambela na lege so alingbi na yâ ye kue.’​—aHébreu 13:18.