Ngoi ti fa na gigi mbeni tënë ti lingo

Ti bata ambeni tënë na lingo alingbi ti mû lege na mbeni zo ti duti na siriri na ti kpe tënë. Me mbeni ngoi ayeke dä ti fa na gigi mbeni tënë ti lingo? Tara ti bâ tënë so prophète Amos atene na ndo Nzapa ti lo: “Fade Seigneur L’Eternel asala ye oko pëpe tongana Lo fa tënë ti lingo ti bê ti Lo na aboi ti Lo aprophète kozoni pëpe.” (Amos 3:7). Na lege ti atënë so, e lingbi ti manda ye na ndo batango tënë na lingo. Teti mbeni ngoi, Jéhovah alingbi ti bata gi teti lo mveni ambeni tënë ti lingo. Na nda ni, lo lingbi ti fa ni na ambeni zo. Tongana nyen e lingbi ti mû tapande ti Jéhovah na ndo tënë so?

Ngoi na ngoi, aberger so a soro ala na yâ kongregation abâ so a yeke nzoni ti bata mbeni tënë na lingo (Kusala 20:28). Na tapande, teti nzoni ti kongregation ni, ala lingbi ti bata na lingo ambeni kete tënë so andu ambeni ye so a leke wala a gbian na yâ kongregation, na ti ku juska mbeni ngoi si ala fa ni na gigi.

Ye oko, tongana ye tongaso asi, a yeke kota ye mingi ti fa na azo so tënë ni andu ala si ala hinga wala a yeke fa na gigi tënë so, lawa si ayeke fa ni nga tongana nyen. Tongana azo ni ahinga lawa si a yeke fa tënë ni na gigi, a lingbi ti mû maboko na ala ti bata atënë ni na lingo.​—aProverbe 25:9.