Mo yeke “dö yanga ti keke so afa lege na mo”?

NA NGOI so a sû na Bible, a yeke sala kusala na mbeni yongoro keke so li ni ayeke na wen ti fa lege na anyama ti gbotongo anene kungba. Ye nyen alingbi ti si na pekoni tongana nyama ni asala ngangu-li na lo kpo tele ti lo na ni? A hon ti ga na lo ye ti nzoni, a yeke so gi tele ti lo mveni.

Jésus Christ so azingo ândö na popo ti akuâ asala tënë ti akeke so tongana lo si na mbeni koli so iri ti lo ayeke Saul, so lo yeke na lege ti gue ti gbu ambeni disciple ti Jésus. Na yâ ti mbeni lumière so aza ngangu, Saul amä go ti Jésus: “Saul, Saul, teti nyen mo sala ngangu na Mbi? A yeke ngangu na mo ti dö yanga ti keke so afa lege na mo.” Na salango sioni na aChrétien, Saul ayeke tiri lani biani na Nzapa, lo yeke mû mbeni lege so alingbi gi ti sala sana na lo mveni.​—Kusala 26:14.

E lingbi nga, na mbana pëpe, ti ‘dö yanga ti keke so afa lege na e’? Bible ahaka “tënë ti zo ti ndara” na keke ti fa lege so ayeke pusu e ti tambela na lege ti mbilimbili (Zo-ti-fa-tene 12:13). Wango so a wara na yâ Tënë ti Nzapa so a sû na gbe ti yingo alingbi ti pusu na ti fa lege na e nzoni, gi tongana e zia lege na ni ti sala tongaso (2 Timothée 3:16). Ti ke ti zia lege na ni ti pusu e alingbi gi ti sala sioni na e.

Saul abata ândö atënë ti Jésus na bê ti lo, lo gbian lege ti lo na lo ga bazengele Paul so azo aye tënë ti lo mingi. Legeoko nga, batango wango ti Nzapa ayeke ga na e adeba nzoni ti lakue lakue.​—aProverbe 3:1-6.

[Lingu ti foto na lembeti 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers