Yorö ti duti na fini so aninga na so ayeke na ngia
MBENI mato atene: “Azo kue aye ti duti na fini, me zo oko pëpe aye ti ga mbakoro.” Azo mingi so aga ndulu na retraite awe aku ti wara ngoi mingi ti sala ye so bê ti ala aye na ti yô akungba mingi mbeni pëpe. Ye oko, ala yeke na mbito ti duti na ye oko pëpe ti sala na ti ga tâ gi ye senge. Ala sala nga mbito ti dutingo gi ala oko, ti dutingo na ngia pëpe nga ti seni ti ala so ayeke kiri na peko.
Tongaso, kelele ti dutingo na mbeni fini so ayeke na ngia ayeke nyen? Atâ ndeko nga na mbeni sewa so ayeke na ndoye ayeke aye so amû maboko ti ga na ngia na amaseka nga na ambakoro. Me, aye kue so ambeni zo alingbi ti sala ti leke na fini ti mbeni mbakoro ayeke pëpe ye ti kota ahon kue. Kota ye ni ayeke ye so mbeni mbakoro alingbi ti sala teti ambeni zo.
Mbeni gingo nda ti ye so a sala ni a ninga na tele ti akangba koli 423 na awali ti ala afa so, “ti sala ye teti ambeni zo nde alingbi ti mû maboko ti gboto lango ti fini ti e mveni.” Stephanie Brown, so amû li ni na yâ gingo nda ti ye so, afa pekoni: “Aye so gingo nda ti ye ni awara afa so ye ti nzoni so e yeke wara ayeke pëpe ye so aga na lege ti songo ti e na amba ti e, me ye so e yeke mû na ambeni zo.” Mara ti mungo ye tongaso andu mungo maboko na ambeni zo na kusala ti yâ ti da, batango amolenge, guengo na tokua ti ala, yongo ala na kutukutu wala dengingo mê na ala so ayeke na bezoin ti tene a sala lisoro na ala.
Ndulu na ngu 2 000 awe, Jésus Christ atene: “Ngia ayeke na zo so amû ye, ahon ngia ti lo so akamata ye.” (Kusala 20:35). Yorö ti duti na fini so aninga na so ayeke na ngia ayeke pëpe gbâ ti nginza so a zia na banque wala ayorö nga na tengo kobe so a tene ayeke kanga lege na zo ti ga mbakoro. Nde na so, a yeke ngbango ti sala kusala na mungo ngoi nga na angangu ti mo ti sala si fini ti ambeni zo aduti nzoni.
Ye oko, gi mungo ngoi nga na ngangu ti mo alingbi pëpe ti zi mo na yâ gango mbakoro, tingo kobela nga na kui. Gi Royaume ti Nzapa oko si fade ayeke hunzi biaku amara ti aye so kue. Na gbe ti yanga-ti-komande ti lo, kobela ayeke hunzi na même “kui ayeke mbeni pëpe.” (Apocalypse 21:3, 4; Esaïe 33:24). Biani, azo so amä yanga, fade ala yeke duti na ngia nga na fini ti lakue lakue na yâ paradis na ndo sese (Luc 23:43). A-Témoin ti Jéhovah ayeke na ngia, na ala lingbi ti mû na ambeni zo yorö so gunda ni ayeke na yâ Bible, so alingbi ti sala si zo aduti na fini so aninga na so ayeke na ngia.